Post: #1
Title: التنظيمات السياسية في حاجة لدورات تأمين !!
Author: امير بوب
Date: 01-01-2019, 05:13 PM
Parent: #0
04:13 PM January, 01 2019 سودانيز اون لاين
امير بوب-UK
مكتبتى
رابط مختصر معقولة البحصل دا ياخ !
تنظيمات من زمن حفروا البحر
ما قادرة تأمّن قادتها و إجتماعاتها !!
|
Post: #2
Title: Re: التنظيمات السياسية في حاجة لدورات تأمين !
Author: امير بوب
Date: 01-01-2019, 05:16 PM
Parent: #1
حسّهم التأميني ضعيف !
٤ اجتماعات قيادة تنضرب خلال يومين !!
و يتم مداهمة مكان الاجتماعات و إلقاء القبض عليهم !
بواسطة جهاز الأمن التعبان دا !!
|
Post: #4
Title: Re: التنظيمات السياسية في حاجة لدورات تأمين !
Author: امير بوب
Date: 01-01-2019, 05:20 PM
Parent: #2
تنظيم سياسي يفشل في حماية قادته
و غير قادر علي تأمين إجتماعاته هو بالتأكيد غير قادر على حماية ثورة الجماهير
و غير مؤهّل لأيّ دور طليعي !
|
Post: #3
Title: Re: التنظيمات السياسية في حاجة لدورات تأمين !
Author: سفيان بشير نابرى
Date: 01-01-2019, 05:20 PM
Parent: #1
يا بوب ياخ تأمين شنو ياخ في نص الثورة و الموت دا؟
قول :- التنظيمات السياسية ليه لحدي هسي متأخرة عن البيحصل كتير و كتير جداً.
كادر القيادي المقبوض دا أو بيقبضو فيهو ديل ما مشكلة المشكلة انو قيادات قوانا السياسية دي ليه ما عملت داخل احزابه قيادة ظل لإدارة الأمر الراهن من ثورة؟
|
Post: #5
Title: Re: التنظيمات السياسية في حاجة لدورات تأمين !
Author: علي دفع الله
Date: 01-01-2019, 05:26 PM
Parent: #3
بوب يا جميل
الثورة في مرحلة الكادر الجماهيري المكشوف
وفي نفس الوقت كوادر الظل جاهزة
اقعد عافية
#تسقط_بس
|
Post: #6
Title: Re: التنظيمات السياسية في حاجة لدورات تأمين !
Author: امير بوب
Date: 01-01-2019, 05:31 PM
Parent: #3
سلام سفيان
بالتأكيد لا أتحدَّث عن الحراك الثوري
و حملة الإعتقالات التي تتم للثوار اثناء الحراك و في الشوارع ، فهذا شيء طبيعي و متوقّع في ظل هذه الظروف
المحبط في الأمر انو ٤ اجتماعات لقيادة التنظيمات دي يتم ضربها !
و اعتقال القيادات من وسط اجتماع يُفترض انو مؤمّن تماماً
و مفروض الحس الأمني عند التنظيمات دي يكون عالي و حريصة علي سرية إجتماعاتها و حماية قادتها و المفروض تكون أكثر حذّر في ظل هذه الظروف من الأيام العادية
وين أتيام التأمين ؟
ولّا الشغلانة دي شكلها ماشيه بالبركة ساي !
دا شغل ني !
|
Post: #7
Title: Re: التنظيمات السياسية في حاجة لدورات تأمين !
Author: امير بوب
Date: 01-01-2019, 05:41 PM
Parent: #6
علي دفع الله يا راكز
والله حاجة تفقع المرارة ياخ
جهاز الأمن التعبان دا ينجح في اختراق اجتماعات قيادة تنظيمات
و يكون على علم بالمكان و الزمان
يداهم الاجتماع و يرفع المجتمعين !
...
والله زمن كنّا طلبة و في ظل القبضة الأمنية الشرسة خلال فترة التسعينات
كنّا قادرين نأمّن إجتماعاتنا بشكل أفضل
و نجحنا في عقد اكتر من إجتماع موسّع لكادر الجبهة الديمقراطية
...
واحد من أسباب صمود اسامة بن لادن كان في قوة شبكة التأمين التي تحيط به
الناس دي محتاجة تاخد نقلات ، اليشوفو طيب حزب الله بعمل شنو !
|
Post: #8
Title: Re: التنظيمات السياسية في حاجة لدورات تأمين !
Author: Arif Nashed
Date: 01-01-2019, 05:48 PM
Parent: #7
كلامك ده علي مستوي الأحزاب الكبيرة غير متوفر..
الترتيبات الداخلية معدومة اللهم الرئيس ونائبه وشوية البشكة
|
Post: #9
Title: Re: التنظيمات السياسية في حاجة لدورات تأمين !
Author: عمر التاج
Date: 01-01-2019, 06:46 PM
Parent: #8
بوب يافنان، ماك طيب يا اخي
التنظيمات دي احسن تخليهم على السليقة كده
زي ناس سيدي ديل، ليلهم كنهارهم لا تأمين ولا تكاتيك هههه
وبعدين أجهزة التأمين دي ياها البتسرق التنظيمات زاتها
اسه السرق حكومة الإنقاذ من الشعب ومن ناس الإنقاذ ذاتهم
غير ناس التأمين منو؟
|
Post: #10
Title: Re: التنظيمات السياسية في حاجة لدورات تأمين !
Author: امير بوب
Date: 01-01-2019, 07:37 PM
عمر التاج سلام
خلي بالك احزاب ناس سيدي ديلك بكونوا معتمدين على ( الحواطة)
لا بعرفوا ليك شغل تأمين ولا غيرو !
انا كلامي عن باقي الأحزاب المفروض انها ما تقليدية
مدرسة الكادر دي قاعدة تعمل شنو ؟!
دورات التأمين ، أسس الحماية للعمل التنظيمي و حماية الكوادر القيادية و القدرة على تأمين العمل !
.....
غازي سليمان المحامي في لقاؤه زمان مع الطاهر التوم في برنامج مراجعات
قال لما كان مسئول عن تأمين عزالدين علي عامر
حكومة الجبهة كلها ما قدرت تلم فيه وأكمل عمله بنجاح حتي خارج عزالدين و وصّلو لندن !
قال ليه انا لو كنت مسئول عن تأمين عبد الخالق محجوب كان لقيتو قاعد ليوم الليلة !!
|
Post: #11
Title: Re: التنظيمات السياسية في حاجة لدورات تأمين !
Author: عبدالعظيم عثمان
Date: 01-01-2019, 07:49 PM
Parent: #10
تعرف يا بوب لو الشباب الكانو بنازلوا الجبهة الإسلامية في التسعينات علي قيادة الأحزاب دي هسي علي باليمين لا جهاز الأمن ولا غيره يقدر يضرب إجتماع.. ياخي خلي الإجتماع المؤتمرات الفيها الإعداد بالمئات كانت بتتأمن زي الترتيب.. الأحزاب عاوزة شغل كثير..
|
Post: #12
Title: Re: التنظيمات السياسية في حاجة لدورات تأمين !
Author: امير بوب
Date: 01-01-2019, 08:05 PM
Parent: #11
يا عبد العظيم العالم إتغيّر و الإيقاع إختلف
القيادات الشبابية بالتأكيد اكثر قدرة و مرونة في التعاطي مع الواقع الراهن
الخاتم عدلان زمان شبّه قيادات الأحزاب ديل بالديناصورات
و معروف انو الديناصورات رغم ضخامة حجمها و لكن عقولها صغيرة
لم تستطع ان تتكيّف مع الواقع و لذلك إنقرضت !
انا غايتو عندي حزب او تنظيم ما يقدر يأمّن شغلو و كوادره دا لا يعوّل عليه كثيراً !
دي سبهللية و مضيعة للزمن ساي !
و احزاب زي دي غير قادرة علي إحداث نقلة نوعية داخل صفوفها ، ناهيك عن قيادة ثورة لإسقاط نظام !
دا شغل ني شديد !
مافي حل غير الشارع الواحد دا
|
Post: #13
Title: Re: التنظيمات السياسية في حاجة لدورات تأمين !
Author: محمد البشرى الخضر
Date: 01-01-2019, 08:20 PM
Parent: #12
خليهم قيادات الاحزاب يلموهم ما مشكلة المهم ثيادات تجمع المهنيين!
ديل البكون قوش بعضي في اصابعيه اليومين ديل عشان يجيبوهم
|
Post: #14
Title: Re: التنظيمات السياسية في حاجة لدورات تأمين !
Author: Asim Ali
Date: 01-01-2019, 08:20 PM
Parent: #11
الاخ بوب والمتداخلين -سلام عليكم
فى اعتقادى الموضوع ما مشكله تامين اجتماع او فرد باجراءات لتفادى المراقبات والتنصت وانما هى اعمق حاليا بكميه الاختراق بكوادر بشريه على مستويات مختلفه فى جسم القوى المعارضه(دا موضوع طويل شرحو).لكن والحمدلله مايبدو رغم كل شىء ان الحراك واثره على الارض اثبت مقدرته على مستوى جيد من التامين واخترق كل خطط قمع الحراك سواء فى حراك المهنيين او فى الاحياء.
.
اللافت انو الاعتقالات تمت لقيادات قوى ليها قواعد فعاله على الارض عشان يتم افساح الطريق لجبهه ال22 ومسرحيتها الهزيله فى تم الاحتياج ليها لتنفيذ الخطه ب لاعاده تدوير نظام الاخوان
|
Post: #15
Title: Re: التنظيمات السياسية في حاجة لدورات تأمين !
Author: امير بوب
Date: 01-05-2019, 00:31 AM
Parent: #14
اعتقال د. محمد ناجي الأصم اليوم و بعض قادة الحراك و تجمع المهنيين
دليل تاني على خلل في مفهوم أهميّة و ضرورة التأمين للعمل و للقيادات الميدانية
في المرحلة دي على الأقل !
البلد تمر بمرحلة مفصلية و الوضع لا يتحمّل أي درجة من الإحباط نتيجة لضرب بعض قيادات الحراك و رموزه
و السبب عدم أخذ الحيطة و الحذر و الإنتباه لأهمية التأمين !
....
دي بديهيات !
|
|