القندول الصدح .. قصيدة طارق اللمين

00:30 AM December, 31 2018

سودانيز اون لاين
Yasir Elsharif-Germany
مكتبتى
رابط مختصر

القندول صدح


البلد النتح
جرح إمتهان ٱجدادا
جاييها الفرح
من ضي جبين ٱولادا

ياقندول ارح
جاتك شموع وقاده
شايلين البلح
متشابكين كالعاده

الدولار فتح
فات الحدود واتمادي
والريس شطح
قال تاكلو نيم وزياده
يلاكم ٱرح.
ناسا بتحمي بلادا
من ناسا قبح.
فاهمين ظلمنا (عباده)
الدرب إنفتح
والناس جميعا (قاده)
والزمن الكلح
ما بننتظرلو إعاده
يازمن السبح
صبحت قروش ووكاده
الكيل ان طفح.
ماداير اي زياده
الفجر الوضح
كيفن تحوشو جداده
الشعب إنجرح.
كايس لجرحو عياده
والشارع فتح
جات الحشود تتهادي
يابوليس ٱرح .
إيدك معانا قلاده
في عين المدح.
كل الطغاة الساده
باكر بالفرح.
تقلد عيونا مرادا
في بلدا سرح.
عزه وصمود وسياده
(قندولنا) الصدح
شتت حبوبو إراده
والشعب انشرح.
قوه ويقين وسعاده
التور النطح.
خلي الجموع تتنادي
جاهل وانفضح.
كل الحكاوي معاده
باكر ان شطح.
هوم كتير واتمادي
ياهو الانبطح.
والذله ليهو وساده
والكوز. الردح
قال ليبيا سوريا وزادا
ٱمبارح نبح
قال بينا وثبه قاده
اليمن الفتح
ابوابو. بي عدادا
اخير من اللغح
خيرات بلدنا وكاده
ثورتنا و لفح
حر جمرتا الوقاده
والكوز ان نصح
حتما نصيحتو بلاده
كفانا الانسفح
من دم اهانه واباده
بلدنا. الإنكشح
اصبح هبوب ورماده
والدولار كسح
بي فعل امر الساده
عايشين في مرح
والشعب ذل واباده
شفت المشانق تح
اتعلقت اعوادا
لي كل من سفح
دم الضعاف واتمادي
شفت الكوز فتح
ماليزيا بي ام كداده
وبالكرعين سرح
زيو وزي اي جداده
وشفت عداله صح
حكمت بكل اراده
في الفجر النجح
صادر عروش الساده
شعبنا بالفرح
كل الذئاب اصطادا
والان اقترح
لي كل كوز جباده

البلد النتح
جرح إمتهان ٱجدادا
جاييها الفرح
من ضي جبين ٱولادا

طارق اللمين
#موكب نصر حتي القصر#