Post: #1
Title: الرد على افتراء البشير على الشعب السوداني في خطابه بود الحداد
Author: علي تولي
Date: 12-31-2018, 03:53 AM
02:53 AM December, 30 2018 سودانيز اون لاين علي تولي-USA مكتبتى رابط مختصر الرد على افتراء البشير على الشعب السوداني في خطابه بود الحداد شعر/ علي أحمد تولي
بتقولْ عُمَلا يا الْغيركُم عَمِيلْ ما فِيشْ بَينْ دُوَل الخَلِيج بَاقِيِنْ دُحُوشْ كُشْكِيشْ الشَّعبَ الْعَزِيزْ سَارقِنُّوا كيف بِيَعِيشْ سَاوَمْتُوا البَلَد بِعتُـــوهُو حَتَّى الدَّيشْ ***** ****** ***** تَكَبِّرُوا بِالنِّفاق غيرُكُم مِنُو المُرتَزَقَة عَدَّمْتُوا البُيوتْ مِنَ الرَّغِيفْ والطَرَقَة يَومَ قَام الشَّبَاب فِيْك لاسِيُوفْ لادَرَقَة فَزَيت بالبِلُود قَايِلْ وَسِيْــــعَة الفَرَقَة ***** ****** ***** جِيتْ وَد مَدَني لاَ ليكْ لَا خَبَر لاحِسْ وُخِجْلوا الكَانُوا أتْبَاعَك وُكزوا الضُرسْ لِقيتَ القَريَة حِرقَت فِيـــها اسْكُتْ هُسْ مَصَعَتْ نَارَا لاخَــلَّتْ طَرَفْ لا نُصْ ***** ****** ***** وَد حَدَّادَنَا يا الفِيــهَا انطَّلَق جُوعَارَك دَبَلجْوا لِلصُّور فِيها البِحَمِّسوا طَارَك مِينَ العُمَلا مِين الخَوَنَة يَا هُوعَمَارَك إنْتَ المَارِق الفِينَا وُجَيمعَ نَاس كَارَك ***** ****** ***** يا مادَّ القَرَعَة مَا بينَ العَرَبْ وَالرُوْسْ يا الوَرّيتنا مِن رَيِّس بِقيـــتْ مَريُوسْ ويــــنْ الكَانْ بِيَهَرِج بِالكُمَاج وَالدُّوسْ مَشبُول عُنقُو لي أُمَرا الخَلِيج مَمْرُوسْ ***** ****** ***** شنو الساومتو بي دم الشوام يا شوم معلي غبينة الشعب الصبح مضيوم سيتا دمار وفرحان بالخراب البوم مرتزقي الدول بالقرعة لسه تحوم ***** ****** ***** يا بشة الكِمِل زَمَنَكْ سَكَتْ طَنْبَارَكْ كَبَّر كُومْ جَرَايْرَكْ يَا الجَدَعتَ اِزَارَكْ تَقدِلْ فِيهَا وَالشَّعب اِنْسَلَتْ بِي نَارَكْ فَشَّةْ غُبْنُو فِي الهَجْمَة البِتَقلَع دَارَكْ ***** ****** ***** مَا تِنْغَشَّى يَا فَسْلَ النِّويسَ الفَخَّة فِيكَ وَشِيكَة فِي عَركَة جَنين تِنْلخَّا تِقدِل فِيهَا لَمِتينَ الشَّيُومْ وَالجَخَّة رَاحَتْ لِيكَ يَا الاصبَحْتَ بُقَّة وَبَخَّة ***** ****** ***** الشَّعبَ النَفَد صَبْرُو وزَمَانُوا انْضَرَّا شُوفُو اللَّيلة شَهَّاكَ المُـــرُوق لا برَّا قَامُوا جَرَارِقَ العَركَة الخَصِمَا انْصَرَّا مَا بِتْضُوقَا فُوق رُوْسَ الرُّجال تِنْفرَّا ***** ****** ***** الشَّارع كَرَبْ لَحلَح شَيُومُو الحَّرَا وَالخَصْمَ الكَبير بِينَ الحِيْط بِنْزَرَّا يُومَ عَبَّا الهُتَافْ فُوقك نِحَاسُو الكَرَّا اتْ غَمْرَانْ بَتَابِتْ مِن مَضُوقَ المُرَّا ***** ****** *****
Phoenix Arizona 30 ديسمبر2018
|
Post: #2
Title: Re: الرد على افتراء البشير على الشعب السوداني
Author: Hamid Elsawi
Date: 12-31-2018, 04:01 AM
Parent: #1
شكراً علي علي القصيدة أعذرني فات علي الترحيب بقدومك للمنبر ننتظر الكثير من قلمك الرصين
|
|