اب قلبا ميت يخسر كرته الذي يراهن عليه (حميدتي يتملص)

10:16 AM December, 25 2018

سودانيز اون لاين
عبدالقادر محمد-عمق الوطن
مكتبتى
رابط مختصر

لبشير يخسر الكرت الأخير
حميدتي في خطاب قبل اقل من ساعة يقول " الشعب السوداني صبر والبقول غير كدا منافق و الحكومة المسؤلين الكبار فاسدين وهم العاملين الازمة وداسين قروش الناس ولازم يتحاسبو ودا ما اتفاقنا معاهم زمان قالو لينا اسحبو السلاح من الناس سحبناهو شالو قروش الناس ختوها في البنوك ووبهددهم بالسلاح عشان مايطالبو بي قروشهم" .

يا عبد القادر دا زول مُرتزِق ؤ مأجوّر، وهو زاتو سبب في الحصل للبلد
لأنوا ما بيقدِم لو ما دفعولو السبب الذي أرهق خزينة الدولة والمواطنين .
هسّع الحكومة ما عندها قُدرة تديهو قروش عشان كِدا قعد يفنجِط،
ما تشوف الكترة دي ديّل باكر ما تصلُن قروش يتفرقوا ؤ يصبحوا هباءً
منثورا لأنهم شِرزِمة ليس لهم ولاء لجهة ...

الكريم/ عبد القادر محمد
تحياتي
إذن من تبقى مع البشير؟؟؟

الأخ عبد القادر، والأخ أدم صيام،

أعطوا الناس المعلومة .. والناس تقرأ وتحلل معاكم .. أنتم مفتكرين هذه القوة جاءت من أجل أن تقلب الحكم مثلاً ..!
هذه القوات .. منذ تحركها من مواقعها .. معروفة جايه تعمل شنو؟ ..
شوف رسالة القائد حميدتي واضحة كيف .. هم جايين للناس العندهم أجندات في سحب الأموال من السوق .. الناس الذين يعطوهم وقود بأسعار مدعومة في طلمبات البنزين .. ويبيعوا نصفه للمواطن .. ثم يبيبعوا النصف الأخر في السوق الأسود.
الناس الذين يستلمون الدولار بالسعر الجمركي ويمشوا يدوره في السوق الأسوق .. الناس البدوهم دقيق بالتموين .. ويبيعوا نصفه للشعب والنصف الأخر في السوق الأسود ..

القائد حميدتي لما يضرب أصحاب الجشع والأجندات كما سماهم .. يهدأ الوضع ..

دي المعلومة الصحيحة في نظري .. وأستعجال الأمور وقراءة المدخلات بصورة خاطئة يؤدي إلي نتائج خاطئة .. ولا شنو؟ .. ومن الفهم الصحيح سواء وافق أهواء الناس أو ضدها يستطيعون أتخاذ ما يرونه يناسب حراكهم ..

بريمة

تجار العملة عايزين ليهم ( تاتشرات ) ؟

يااخوي ، تاتشرات ، دبابات ، صواريخ . جن احمر .

الشعب هب هبه الابطال ، بل السودان كله .. والجميع مصمم . لاتراجع حتي كنس كل القمامة .
والقصه لسه في بداياتها .. خلينا نشوف .

Quote: تجار العملة عايزين ليهم ( تاتشرات ) ؟ يااخوي ، تاتشرات ، دبابات ، صواريخ . جن احمر . الشعب هب هبه الابطال ، بل السودان كله .. والجميع مصمم . لاتراجع حتي كنس كل القمامة . والقصه لسه في بداياتها .. خلينا نشوف .

هذه القوات هي قوات مقاتلة في المقام الأول ولا تترك سلاحها لأي سبب .. فهي ليس قوات أمنية .. مثل الشرطة .. وهى قوات مدربة علي حروب العصابات .. وحروب المدن، خاضت عشرات الحروب في القري والمدن الصغيرة وأنتصرت علي عدوها دون خسائر في ارواح المواطنين .. تذكر لما حركة العدل والمساواة دخلت العاصمة .. هل أستطاع الجيش مواحهتها في أم درمان .. الجيش غير مدرب لتلك الحرب .. ديل الجماعة ناس الأمن جابوهم علي جناح السرعة .. وحسموا المعركة ..

أقرأوا الأمور بروية .. وتدبر ..

بريمة

Quote: هذه القوات هي قوات مقاتلة في المقام الأول ولا تترك سلاحها لأي سبب .. فهي ليس قوات أمنية .. مثل الشرطة .. وهى قوات مدربة علي حروب العصابات .. وحروب المدن، خاضت عشرات الحروب في القري والمدن الصغيرة وأنتصرت علي عدوها دون خسائر في ارواح المواطنين .. تذكر لما حركة العدل والمساواة دخلت العاصمة .. هل أستطاع الجيش مواحهتها في أم درمان .. الجيش غير مدرب لتلك الحرب .. ديل الجماعة ناس الأمن جابوهم علي جناح السرعة .. وحسموا المعركة ..

حروب عصابات ؟

وريني وين العصابات في العاصمة ؟

اجييك من الاخر :
ديل عبارة عن مليشيات متفلته ، لا توجد لها " عقيدة قتالية محددة ، لم تنال حظ في التدريب العسكري سوي ( نشن واضرب ) . عادة القوات النظامية تخضع لسلسة طويلة من الضبط والربط . ( وهولاء ) . ابعد مايكونوا عن الضبط والربط .
فهم عبارة عن مليشيا استقدمها النظام ، لمثل هذه الظروف ، لتخويف وارهاب المدنين العزل .( وقد يتم الاستغناء عن قادتها ، حسب الظرف الزماني والمكاني ، مثلما حدث مع خليل ابراهيم )



لسؤء الحظ ان الشعب السوداني شعب مسالم وغير مسلح ، لكن وقت الحاره لكل حادث حديث .


تحياتي اخ بريمة ،،،،،

أخ هاشم،

والله أنا ما جيت مدافع عن قوات الدعم السريع .. ولا أحد .. ولا أنا جاي ضد الناس التى تتظاهر ضد الغلاء .. ما تسوي ليك عدو متوهم .. وليس لدي دخل بشرح أو الدفاع عن قوات الدعم السريع وعقيدتها القتالية .. في هذه اللحظة ..
كل همي هنا توفير معلومة صحيحة .. أنت وغيرك .. تبنوا مواقف علي قراءة صحيحة .. ولو ما عايزين قراءتي .. دا شيئ يخصكم .. يمكن لديكم معلومة موثقة أكثر مما لدي .. أبناء البقارة بالغرب رصدوا هذه القوات منذ أن خرجت من دارفور ودخلت حدود كردفان الغربية .. وعارفنها جاية لشنو ..

أمشي لبوست المستنير .. الأخ أبوبكر عباس .. عن صلاح قوش .. تلقاني في الصفحة الثانية ألمحت .. ممكن نفاجعكم بما لا تدرون .. وكان ذلك قبل ظهور أستقبال القوات ..

حروب العصابات محتملة في بلد نسبة قطع السلاح التى توجد به في أيدي المواطنين لا يفوقها إلا بلد مثل أمريكا ..

بريمة

Quote: والله أنا ما جيت مدافع عن قوات الدعم السريع .. ولا أحد .. ولا أنا جاي ضد الناس التى تتظاهر ضد الغلاء .. ما تسوي ليك عدو متوهم .. وليس لدي دخل بشرح أو الدفاع عن قوات الدعم السريع وعقيدتها القتالية .. في هذه اللحظة ..

ربنا يصلح الحال ، ونخلص من هذا الكابوس الذي جثم علي صدور البشر سنين عده . تالمنا وفقدنا فيها كثيرا من اعزاءنا واحبابنا ... . اخ يابلد




الفكرة وضحت اخ بريمة مع جزيل شكري

تحياتي ،،،،،

Quote: القائد حميدتي لما يضرب أصحاب الجشع والأجندات كما سماهم .. يهدأ الوضع ..

في هذه الحالة، أخي بريمة، سيضطر حميدتي لضرب البشير وكامل نظام الإنقاذ.

حميدتي عاوز يلعب بولتيكا وما عايز يشيل وش القباحة!
في عام ٢٠١٣ قام كثر بتحميله مسؤلية المجازر وحمامات الدم وطفق الانقاذيين في مجالسهم الخاصة يتحللون من الجرم برميه في رقبة حميدتي واتباعه -من قتل وعذب وجرح هو حميدتي وقواته .الامن والقوات النظامية مآب تعمل كدة !ديل جماعة حميدتي الحاقدين ديل ..دا منطق ناس الإنقاذ وسط سكان المركز والنيل !!
حميدتي يتحلل من مسؤلية ضرب المدنيين ويحمل أطراف متنفذة في السلطة مسؤلية الأزمة !وماب بكرة لو أخفقت الهبة الشعبية يقول انه هو من أجهضها !!
** بس هناك من يسعي ويروج لارتباط لا فكاك منه بين الإنقاذ وحميدتي وينفي. حتي -تحميل حميدتي لأطراف سلطوية وزر الأزمة .

حاء اسمعو كلام الجنجويدي بريمة ده ممثل حمرتي او ما تستعجلو في الاستنتاج او تتخمو بي كده.
وارد انو كايس يتخارج ووارد ده يكون ملعوب لربك الصف.
اصبرو بث!

بكرة يجي يوم الحساب
ويتكنس كل من ارتزق على اكتاف هذا النظام
شرب وأكل وشبع من قوت الشعب
كتير من الشخصيات تحاول تلمع وجهها أمام الشعب
مرة قوش ومرة حميدتي ومرة ناس دخان المرقة
ومرة سيدي قال لي أكتب بيان عشان نتلب من مركب الانقاذ
لكن الشعب واعي .. شعب معلم ياخ

ماتشغلو نفسكم بالافلام دى
الرهان الوحيد على على الجماهير مدعومه بالاحزاب الصامده
لاتنشغلو بتصريحات توابع الحكومه من القوى السياسيه والمسلحه فما يصدر ليس سوى جزء من الالهاء و الخدع الاعلاميه لاعطاء احساس زائف باصطفاف هذه القوى الى جانب الجماهير
.
كفانى من خطاب حميدتى قوله (كتر خيركم ماقصرتو - ودايرين مزيد من الصبر ) نفس لهجه رموز النظام
وبالمناسبه الزول دا لو دققتو فى الفيديو بيخاطب من ورقه جاهزه عشان كدا بياخد زمن بين كل جمله والتانيه.
بكره وبعدو برضو حتظهر تصريحات واشاعات من طرف تانى من اطراف النظام والناس تضيع زمنا وتنشغل بترديدها وتحليلها وهى اصلا مناورات مصنوعه باحكام
.
واستعير مقوله الاخت تماضر
الشارع اصدق انباء من الصحف(والاعلام )