رسالة لأبناء وزوجات الوزراء والولاة والسياسين

05:53 AM December, 10 2018

سودانيز اون لاين
معز عوض أبو القاسم-sudan
مكتبتى
رابط مختصر

✉️ رسالة لأبناء وزوجات الوزراء والولاة والسياسين ✉️

الرساله دي بالعاميه السودانية ، الحاجه الوحيده الفِضلت لينا في البلد دي .. والحاجه الوحيده البقينا نفتخر بيها في منافينا ..
بعد ما أبواتكم باعو مشروع الجزيره وباعو السكه حديد وباعو الخط النهري وباعو حلايب وباعو الجنوب وباعو حدودنا مع الحبشه وباعو حصتنا من النيل وباعو أراضينا للمستثمرين وباعو شبابنا للمنافي وباعو نسوانّا للنزوح وباعو شيّابنا للصالح العام المبكر وباعو تاريخنا وباعو حضارتنا ..
طبعاً قد تكونوا إنتو ما عارفين ، أو عارفين وعاملين رايحين ..
قبل أبدأ رسالتي ، داير أحكي ليكم حاجه صغيره ..
أبوي - الله يديهو العافيه - كان بِسف ، ما تمشو بعيد ..
سَف لي سَف يختلف ..
كان بسف تمباك .. وكان بِسف بشراهه شديده ، ما زهجتوهو لكن .. يعمل شنو !!!
إنتو قايلين الشعب ده بسف لشنو !!!
شايفين أبواتكم (بسفو) ، وقالو يسفو زيهم .. مش هم برضو أولياء أمورنا ومفروض نطيعن ؟
ما علينا .. أبوي طبعاً مرتبو ضعيف ومطالبنا كتيره .. ما عندو حل غير التمباك ، أحسن مما (يسف) زي أبواتكم ..
المهم ، كان برسلنا الدكان نجيب ليهو تمباك ، الكلام ده وانا كنت في سنه سابعه .. في البدايه كنت بمشي أجيب ليهو التمباك .. لكن صراحةً كنت مُستقرف الموضوع .. مع خالص إحترامي للتمباكه .. لكن كمان ده أبوي وما بقدر اقول ليهو (أبيت) .. بمشي أجيب ليهو التمباك مجبور ، وبسلمو ليهو وأنا بطنطن ... وهو عارفني لما اطنطن .. معناتو الموضوع ما راكب لي في راسي ..
ما بقدر أقول ليهو خلي سف التمباك ، ولا بقدر أعاندو .. لكن الموضوع كمان ما بتسكِت عليهو .. قوّيت قلبي وبقيت برفض أترسل ليهو للتمباك ..
بقول ليهو (أبيت) عديييييييييل ..
بقى يتحسس من الموضوع لمن شاف عنادي ، وبقى ما برسلني أنا بالتحديد .. أخواني التانين بمشو يجيبو ليهو التمباك عادي ..
شويه شويه بقى يقلل من التمباك ، لحدي ما خلاهو عدييييييل ولحدي هسه ما (سفَّ) تاني ..

في رأيي الإقلاع من التمباك أصعب من الإقلاع من السرقه ..
أبوي إتخذ القرار ده عشاني .. وعشان نقّتي .. لأنو بين كل وكت والتاني لمن يتكلمو في التلفزيون عن مضار التمباك ، بقول ليهو اسمع .. اسمع .. وهو يقول لي : هم ذاتن (بسفو) ..
حسّ بالإحراج من رفضي للمرسال بتاع التمباك ، وأقلع بحمد الله ..


طبعاً لسه ما بديت رسالتي ،
✉️ يا أولاد الوزراء والولاة والمحافظين والدستوريين والتشريعيين والسياسين في البلد دي ،
كلّمو أبهاتكم ديل إنو البعملو فيهو ده حرام وعيب ..
نحن فترنا من الكتابه ومن القصايد ومن الكلام .. ياخ نحن من 89 بنكلم فيهم وما راضيين يسمعو ، يمكن يسمعوا كلامكم إنتو ..
قولوا ليهم البلد ماشه تضيع بي سببكم ،، فكوها لي غيركم وريحونا ..
يعني لمن أبوكم يجي داخل بي 19 كيلو لحمه و20 كيس فواكهه في البلد الفيها ملايين بنوموا جيعانيين وعطشانين ، ما عيب لمن واحد فيكم يقول لي أبوهو : (من أين لك هذا !!)
أقعدوا حاسبوهم في البيت .. لموا أخوانكم كلكم واتناقشو في صينية الغداء .. مثلاً قولو لي أبواتكم : لشنو نحن عندنا كم عربيه ، وفي ناس معاقين بتزحف في الأسواق لأنو ما عندهم كراسي متحركة ..
أو ما تركبو العربات ذاتا ، وأمشو دافرو مع الناس في خط الشهداء .. شوفو بي عيونكم الشعب ومعاناتو ، وتعالو كلّموا أبواتكم بالحاصل ..
نحن فترنا من النصائح والكلام .. الباقي عليكم إنتو .. ممكن ربنا يفتحا علينا والنظام يتنحى من نفسو .. مش بقولو يضع سرو في (أسمن) خلقو !!! اقصد (اضعف) خلقو ..
كلموهم بي وجعنا .. وبي كمية الدم السال من 89 لحدي هسه .. كلموهم إنو ملايين مننا ببيتو بدون عيشه ناشفه .. وإنو الملايين بموتو من عدم الأكسجين وبي فقدان حقنة بنسلين ..
كلموهم إنو مستشفيات الأطفال كل يوم بموتو فيها آلاف الأرواح بي سبب فواتير العلاج ..
لمن تمشو مستشفياتكم الخاصه وروهم إنو في مستشفى في (ود النيّل) عنابرا تحت الشدره والسرير الواحد فيهو أكتر من تمنيه عيانين والدِربّات بتتعلق ليهم وهم في الصقيعه ساي .. لمن تكونوا في رويال كير وللا بِست كير ، ذكّروهم إنو في عنابر في شكل رواكيب في البلد دي وإنو النسوان البموتو في الولاده أكتر من النسوان الحايمات في السوق العربي ..
ولمن تمشو الملاهي ، قولوا ليهم في شفع بتاعين أورنيش حفيانين وبنومو وبصحو وبياكلو في الكوشه .. كلموهم إنو في بت في دارفور بتمشي أكتر من عشره كيلو عشان تجيب ليها حطب تشد بيهو حلة بليله ليها ولي أخوانا بعد ما ماتت باقي اسرتها في حرب ..
ولمن يمشوا يسجلوكم في مدارس خاصه ، ذكروهم بالناس البطردوهم في حق الطباشير وقروش الشهر ودرس العصر والناس البتقرأ في الواطه وشايله ليها خرتايه والعيال النزحو مع أبواتهم بي سبب الحرب .. .. ولمن يختو ليكم ساندويتش وشيبس وعصير في شنطتكم ، ذكروهم إنو في تلاميذ برجعو البيت بدون فطور وما متعشين أمس .. كلموهم إنو في ملايين من الأطفال بياكلو بليلة عيش عشان يقدرو يعيشو ..
ما تمشو المدارس الخاصه ، أقروا مع باقي الشعب والمهمشين في أي مدرسه حكوميه بدون مراوح وبدون مقاعد وبدون مدرسه ذاتو ، أقعدو مع ديل وشوفو المعاناة البلاقوها .. كلموهم إنو في قرى في البطانه لحدي هسه ما عندهم فصل قش عشان يفكو فيهو الخط ..
البطانه البتصدر الثروه الحيوانية للسودان كلو وبتصدر الدهب ، لسه بتولع بالبابور ومافيها ولا حتة ظلط ..
أمشو شوفو الحاصل في البلد دي شنو وتعالو كلمو أهلكم .. كلموهم وإنتو في مول الواحه أو عفراء إنو ممكن يكون في شافع في البلد دي حلمو حتة سفنجه يستر بيها كراعو من حر الشمس وإنو التخمة البتحسوا بيها دي ، هي السبب في فقرنا وجوعنا .. وإنو في ناس بتشرب مع الحمير والغنم والبقر من ترعه واحده ..
ولمن تمشو تقضو إجازه في ماليزيا أو سويسرا ، ذكّروهم إنو في نسوان بركبو حمير مسافة 2 كيلو عشان يجيبن موية شراب في البلد الفيهو أطول نهر في العالم .. وإنو في ملايين من البنات الصغار بشيلو جوز مويه عكرانه في كتفهم عشان يشربوها ..
كلموهم إنو في طفل عمرو أقل من 10 سنوات بكون سارح ليهو بي غنم أو جِمال براهو ويمشي بيهم من ولايه لولاية وبشق غابات عنتر ما بقدر يمشي فيها ..
أجمعوا أولاد الوزراء والولاة وقاطعوهم .. ماعيب الزول يقيف مع الحق حتى لو ضد أبوهو ذاتو .. تعالو موتو معانا واطلعو معانا الشارع .. التاريخ ما ح يرحمكم بعدين ولا نحن بنرحمكم لو أبهاتكم ديل سقطو .. ح تعيشوا منبوذين إجتماعياً .. صلحو ابهاتكم واتكلمو معاهم في الحق .

✉️ وإنتَن يا نسوان (أولياء أمورنا) المبجلات .. مش بقولو وراء كل عظيم إمرأة ؟
طيب وين العظمه ؟
يا إنتن ما نسوان .. يا هم ما عظيمين ..
أنا غايتو متأكد من التانيه .
قوّموهم ياخ .. أو (قوموهم) من كراسيهم ..
الحكايه كلها في يدكن .. قولن ليهم الحاجات البسوو فيها دي غلط ..
ما تعدنّها دهب وتياب وصالات مناسبات وبوبار في بيوت البكاء .. برضكن الله بسألكن من النحنَ فيهو ده .. ما تفتكرن إنو ربنا ح يسامحكم ويقول إنتن بعيدات من السُلطه . إنتن السلطه ذاتا ..
يعني لمن يدخل عليك السيد الوالي أو الوزير وفي يدو سلسل دهب وغويشات وتياب جديده ، أجدعنو ليهو في وشو وذكرنّو بي كمية اليدين البتشحد في البلد دي .. ذكروهن إنو في آلاف من النسوان زيكن قاعدات في كوشه وللا تحت حيطه واقعه وبشحدن لقمة عيش ..
ذكروهن إنو في مليون يد مجدوعه بعيد من جسم صاحبتها بي سبب الحرب الولعوها رجالكن وقعدوا ..
ذكروهن إنو في رقاب بتستحق السلسل ده أكتر منكن ، رقاب ياما كفلت بيت وربّت رجال .. رقاب ضحّت بي حياتا كلها عشان تنستر وتستر أولادا
ذكروهن إنو التياب دي ممكن تستر حله كامله وتعرس لي مليون شابه بي سبب طمعكن باعت روحا للكلاب ..
وإنتن في غرفكن المكندشه وفللكم الفخيمه ، كلموهن إنو في ستات شاي وستات تسالي وكسره ماعندهن راكوبه تلمهم وقاعدات اليوم كلو في بنبر في الشمس عشان حتة قريشات قدر القريشات الممكن تصرفنها إنتن في شراية ملابس داخليه ..
صلِّحوهن إنتن من جوه غرفكم .. قاطعوهن في فراشن واعتصمن معانا لمن سعر السكر يزيد .. أمشن لي جاراتكن البسيطات وشوفن العوذ والحوجه حقتن ..
وإنت بتلبسنهن بدلتن الصباح ، ذكروهن بالعريانين الفي الشارع ، وإنتن معاهم في السرير ، ذكروهن بي مليون واحده نايمه براها لانو زوجها بفتش في رزقو في بلاد تانيه بعد ما طردو رجالن رجالكم ..
وإنتن بتهدهدن في شفعكن قبل النوم ، اتذكرن الأيتام والمشردين والما عارفين راسن من كرعيهن في البلد دي ،
وإنتن بتزفن أولادكن لي زوجاتن ، إتذكرن الشباب الطردوهن من البلد دي والقتلوهم في المظاهرات ..
أو طلقوهن لو لزم الأمر ، خلوهن وفوتن ..
أجمعن نسوان الوزراء التانيين وسوّن اجتماع وقاطعو رجالكم .. واحده فيكن تقاوم وتقود المظاهره الجايه معانا ..

⚫️قال تعالى :
{لَا تَجِدُ قَوْمًا يُؤْمِنُونَ بِاللَّهِ وَالْيَوْمِ الْآخِرِ يُوَادُّونَ مَنْ حَادَّ اللَّهَ وَرَسُولَهُ وَلَوْ كَانُوا آبَاءَهُمْ أَوْ أَبْنَاءَهُمْ أَوْ إِخْوَانَهُمْ أَوْ عَشِيرَتَهُمْ أُولَئِكَ كَتَبَ فِي قُلُوبِهِمُ الْإِيمَانَ وَأَيَّدَهُمْ بِرُوحٍ مِنْهُ وَيُدْخِلُهُمْ جَنَّاتٍ تَجْرِي مِنْ تَحْتِهَا الْأَنْهَارُ خَالِدِينَ فِيهَا رَضِيَ اللَّهُ عَنْهُمْ وَرَضُوا عَنْهُ أُولَئِكَ حِزْبُ اللَّهِ أَلَا إِنَّ حِزْبَ اللَّهِ هُمُ الْمُفْلِحُونَ}
[المجادلة: 22].

نزلت هذه الآية في سيدنا أبو عبيدة بن الجراح وهو يقتل (أباه) المشرك في غزوة بدر ويقول المؤرخون (لم يقتل أبو عبيدة أبوه ، ولكن قتل الشرك في ذات أبيه) .. وفي سيدنا أبوبكر الصديق وهو يبحث عن (إبنه) عبد الرحمن في صفوف المشركين ليقتله .. وفي مصعب بن عمير وهو (يحرّش) في يهودي لكي يأسر (أخوه) المشرك .
* حادَّ : مال عن الطريق المستقيم .


معز عوض أبو القاسم

شكرا أخ المعــز

والله انت نصحتهم (بمنعــرج اللوى) لكن في هذ العالم الاسلامي جيب لي حالة واحدة استفاد

فيها المنصوح من الناصـح ؟؟؟

طبعاً تونــس استثناء ولو كان (معارضتنا) فيها فايدة أو بصيرة كان ركبـت (التونسيــة) ههه

طبعا هي اصلا راكباهــا ...

المهــم كان مفروض يمشــوا يوسطــوا التوانســة في (حالنــا) دا ولازم بالمعلومات والأرقام

والفيديوهات (الصفــوف) واكيـد حركة النهضـة (ذات نفسهــا) رايح تحـــن في حالنــا وتنصــح

جماعتهــم ديل وتقنعهــم إنه هذا ليس هو الاسلام والذي يستحق أن تهدر الارواح في سبيل

الحفاظ عليـه

وسطوا التوانســة ولا تنصحــوا (اولاد الابالســة) فهــم أكثر (أبلــســـة) من أبائهــم ....

أحمــد الشايقي

شكراً أخوي .

(لا خيرَ فينا إن لم نقلها)
عشان كدى بنحاول نبرئ ضميرنا عشان ما نقف وأيادينا مكتَّفة .
وهي برضو محاولة لـ(الإصلاح من الداخل) . إحتمال ينجحوا في حاجات فشل فيها الشارع السوداني كلو

المعز الشاعر الجميل
سلمت يداك



تحياتي ليك ولمعاوية العريباب (الوطن) اينما كنتم

شكراً يوسف


تسلم يا حبيب وشكراً للمداخلة
معاويه اتخطَّفتو المنافي برضو .

ليتهم يعووا ويرعووا
منور المنبر يامعز ...

جمال ،
حميد قال :
(يا الله كيف كان راح يكون
حال التعب
ديل لو ووعوا :
أن مافي داعي لها العفن)

منور بوجودكم يا غالي

سلام يا صاحب البوست المعبّر

قبل سنوات عديدة كتبت مثل هذا الكلام للآباء من جماعة المتأسلمين ولم يؤثر فيهم!!
يا عزيزى هؤلاء المتأسلمون وأسرهم قد ولغوا فى الحرام وأكل أموال البسطاء من المواطنين
وأزدادوا فى الضلال والسحت وقد عميت قلوبهم والله جلّ جلاله يمدّ لهم فى الضلال ثمّ يأخذهم
أخذ عزيز مقتدر! أليس هو القائل فى محكم تنزيله: ((من كان فى الضلالة فليمدد له الرحمن مدّا*
حتى إذا رأوا ما يوعدون إمّا العذاب وإمّا الساعة فسيعلمون من هو شرّ مكاناً وأضعف جندا))
صدق الله العظيم.
يا عزيزى كتابتك تؤثر فى الحجر ولكن هؤلاء ينطبق عليهم قول الله بأنها لا تعمى الأبصار بل
تعمى القلوب التى فى الصدور.

نحن متأكدين من عدالة ربنا . لكن روحنا انسَّلت من كُتر ما دعينا عليهم .. وبيني وبينك فِترنا وحلوقنا يِبْست