يا صاحب المشروع

02:34 PM November, 27 2018

سودانيز اون لاين
Ahmed Yassin-
مكتبتى
رابط مختصر

الشاعر أزهري محمد علي يثير جمهوره بقصيدة ثورية ساخنة والقاعة تردد معه في انفعال وحماس*

أثار الشاعر أزهري محمد علي ضجة كبيرة وحماساً في قاعة احتشدت بالجمهور، وذلك أثناء إلقاءه لقصيدة ذات طابع ثوري بعنوان (يا صاحب المشروع) حيث ظل الجمهور يصفق مع كل مقطع منها مردداً كلمة (ثورة) .

هذا وقد ظل جمهور القاعة الذي كان منفعلاً مع إلقاء الشاعر أزهري محمد علي – ظل يصفق طوال زمن إلقاء القصيدة التي جاءت أبياتها حادة اللهجة وساخنة في انتقادها للأوضاع التي أثارت المستمعين من الحضور في القاعة

*يا صاحب المشروع في قصرك العالي: الصوت هناك مسموع **
أزهري محمد علي

ولا السؤال ممنوع
دم الشهيد غالي
والانكسر في الروح
ما بجبرو الوالي
ارواح تزف ارواح
وبرضو اللسان مبلوع
راح الوطن باباح
جربنا لحس الكوع
جرب معانا وضوق
لو مرة واحدة الجوع
من قبل ماانسميك
الريس المخلوع
بالواضح المكشوف
فتش معانا وشوف
وين اختفي الزراع
وين اترمت احزاب
مين عسكر الاطفال
واستخبر الطلاب
مين شرد العمال
من فوبية الاضراب
نحن اكتفينا خراب
نحن استوينا سنين
نحن انطفينا عقود
سنوات طوت سنوات
كانت وعود في وعود
قدمنا ليك فلذات
ضحينا بالموجود
فوق الصبر صابرين
والصبر ليهو حدود
نحن بنكورك سير
وانت فطريق مسدود
لوشفتا عوج الضل
كان استقام العود
كان استراح الكل
والفي المنافي يعود
جرب معانا وشوف
خيبة رجا العشمان
والخاطر المكسوف
رعشة اصابع الام
في مدة المصروف
جرب معانا وشوف
ياساهي يالاهي
ياالامر الناهي
في قصرك الواهي
علمنا بالله
قبال حروف النهي
الامر بالمعروف.
بلد جزمة وبلد باتة
وبلد حكموها رباطة
وبلد هلكانة تعبانة
بلد جاطوها ضباطا
الجوا البلد فاتا
وجابو البرة قام جاطا
بلد والله ما معقول
أرخص حاجة فيها الزول
وشن الزول ؟
فطورو البوش
غداهو جلا
وعشاهو بكون بموية فول
هو وينو الزول ؟
ويمة براي بجيب الزول ؟
زول أوجاعو ما بتهدا
لو يبلع شريط بندول
بلد حكاما دون همة
جلابية مكوية
ومركوب جلدو نمرية
ودقن لكن بدون زمة
بلد مليانة بالغلبة
بالرمتالة والطلبة
وبالبتباهو أدب وعفاف
وبالبتباهو بالص....
بلد كاشف جنس كشفة
وبلد ناشف جنس نشفة
عمر ساكت ولا بسأل
ومامون تش مستشفى
تبيع مستشفى يا مامون؟
تضيع ناس ؟
وأولاد ناس ؟
وأرواح ناس ؟
وصحة ناس ؟
وزير قول لي بياتو أساس
بلد سايبة
وبلد عايبة
وبلد نديها ما جايبة
وبلد فسدان
وفيهو هبوط مية فنان
بلد فيها الفساد الوان
ولا نشرح ولا نكتر
أكان أصل الفساد كيزان