مستنى مرسال البروق

07:37 AM November, 26 2018

سودانيز اون لاين
أبوذر بابكر-
مكتبتى
رابط مختصر

مشدوه على درب الغيوم
مستنى مرسال البروق
كايس بشارات النجوم
تعلن صباحك والشروق

مزروعة ريدتك فى غناى
متوهطة الألحان خدار
ولحظة أجيك
ويجيك معاى
وهج النهار
ارق الليالى والودار
الباقى من فرح العمر
حزنى و أساى
تبقى الحروف زفة سنا
أعياد عصافير واندهاش
تهدى الحدائق سوسنا
ويبقى الكلام فرحة أرض
بلل رموش شوقا الدعاش
وأجيك أنا

مصلوب على صدر الهموم
متوسد الحزن القديم
لا ضلك الراقد وقف
لا حلمك السهران مسهد
جاهو نوم
مستنى طيف لقياك عشم
يغشاك يوم
تنسى الأسف
زمن التباريح النزف
وحرقة الوعد الألم

مشدوه على درب الغيوم
مستنى مرسال البروق
كايس بشارات النجوم
تعلن صباحك والشروق

تحياتي الشاعر الشفيف دعاش منبرنا أباذر
حيّاك الهطل الهتون، و(شاشتك) البروق االتي تضاهي كشمت أم نفل السمحة
إن كنت ياصديقي "مستنّي" مُرسال البروق، فنحن مشارفين بلحيل لمُسيال البروق ،كلنا في الشوق ولكن التضاريس تختلف
يقول الشاعر محمد عبدالباري من رائعته(البدو):
ولدوا في طفولةِ الأرضِ..
قِلّة
ثم سالوا..
كما تسيلُ الأهلّة
منذُ دهرينِ..
والقوافلُ حُبلى باسمهمْ..
والسُرى يُطاردُ ظلّه
حملوا من سُلالةِ البرقِ معنىً واستباحوا به القفارَ المُضِلّه
بينهمْ والرمال ألفُ (جناس ٍ) أغفلته (البلاغةُ) المختلّة!!
سيظلونَ في القراءة ِ لغزاً وسؤالاً مسافراً ما أجلّه
نشوغ الروح ياصديقي عجيب وبرق الحرية في سوداننا خُلّب ،وثوراتنا (دواداوة)
ولكن نشوغ البادية مانتمناه لأنه يمثل لنا حرية أخري ومن مُسيال البروق قال الشاعر رانفي وداللافض:
(كرفت للدعاش عنز القنان ام شورة
شافت البرق وجوكل بالهويدة سلولا)
إستهلال يجعل البدوي تتحرك وجدانه وحناياه ويتلفت قلبه،ويجوكل مثل (جوكال سلول عنز القناف أم شورة)
إن كان مثلي بالغربة لوت يده تصاريف الزمان....فهنا ذكري لتضاريس لها معزة..
وإن كان بهاتيك النجوع يجتمع الأدلّة والعمّار ويحدّدون الوجهة ومن (يركب دور) وفي الدّغش يمتطون النجائب وتذهب طلائع دورهم و(تعقر) القايم ربو ونبّوت
فهنا دخول تضاريس هامة جدا في حياة البادية الإجتماعية
فبإستهلاله اللافت جدا هيأك إلي تضاريس هامة جدا في حياة البادية بل يتباشرون بها،وهي بداية لإنعتاقهم من رهق العِد ونشل السواني ،
ووقّات الصيف ومن شُح المدامر،حيث تقل فرايحية الحياة قليلا وكذا الترف وبذا يبهت البهاء ورونقها ،وعندهم حياة العِز والبطر في الخريف وعلي قول شاعرة الجراري:
(حيدوب شاف الصّبن
جدع حشّاشتو إنغبن
أهل أم رقاً وبَن
هسّاع في العِز اللّبن
وفي النشوغ والظعائن وندل أجراسها و...الخ
هذه التضاريس التي يُغني لها رانفي بقلبه تمثل له (الحُريّة) لا بمعناها (الأفندي) ولكن حريّة إنعتاق من بُخل الصيف الذي ينعكس علي حياته كلّها،
إلي حرية الخريف وكرمه وجود تضاريسه،فتنعتق الفرقان من المدامر وينفك (قيدها) إلي نشوغ الخريف والفرح بالحياة ،
الطيور تغني والمياه تغني والوديان يالبهائها، كل صوت له دلاله جمالية وقت هذه التضاريس

معزتي لك

العبيد
الطيب الشايل الطيب

يا عبيد جيتك براها دعاش
وختت كراعك فى ذاتها مرسال رشاش
بشارة و خبر لابس خدار الواطا و ندواة السما

والله يا عبيد فتحة خشم ود اللافض واستهلاله يفتح فينا وفى الدنيا كلها بيبان الحياة ويديك كلمات سر المعانى

البدو يا عبيد هم معنى الحرية القلتها انت
معناها العالى والجد جد

تسلم ياخ وتطيب ايامك

أبوذر الجميل وضيفه الكريم ....

سلام ومحبه ....

كعهدك دائما تتحفنا بأهازيج الروعه ... وتخلق فينا الدهشه والبهره ....

حاولت أن اقتبس جزء من النص لاعلق عليه ...ولكن بالجد غلبني ....

أقول ليك قوله لك ولهذا النص الباهي الصادق الجميل (كلك كلك حلو)

مع خالص ودي وتقديري ؛؛؛

وانا برضو مستني البروق
مستني ياخ البال يروق
بكتنا اوجاع الحروق
ومتين نلم من ده النجيع بلد الشروق
ومتين نقالد النيل صباح ؟
وانا لي بنات النيل عشوق
..
اب ذر ياخ التقد نعالك من الفرح

حبيبنا عثمان

عاشق بنوت النيل
اتاريك شاعر ونحن ما جايبين خبر

وانا مستنى جيتك و شوفتك

والنيل منبع الافراح

تفرح بيهو و يفرح بيك

إدريس الأجمل

تحياتى و سلامى
جزيل التقدير ليك و لحضور حرفك النضير

وكلى امتنان و سعادة بيك و الله