يا أخوانا، حاتم دا زي ترمب

05:23 PM November, 22 2018

سودانيز اون لاين
أبوبكر عباس-الإمارات
مكتبتى
رابط مختصر

يا أخوانا، حاتم دا زي ترمب
فشلت فشل شديد انو أكرهو

أمس بالرغم من خطابو المحبط جداً بخصوص خاشقجي وكلامو السافر عن انو المصالح فوق الأخلاق.

برضو غلبني أكره الزول دا

مرات أقول يمكن عشان عرق الشيطان الفيني قوي.

في زيارتي الأخيرة لنبي الله يحيي حفيد موفد عيسى عليه السلام،
قدر ما حنستو يشيل مني تجسد هامان فيني؛ رفض
قال لي صحي اتا صاحبي، لكن لا أستطيع تغير شيء في الأمر

المهم بعد تفكير شديد، لقيت في زاوية شوف تانية فيها مخرج

الضمير في خطابو يرجع لترامب وليس حاتم
والضمير هو موضوع حلقتنا لو البوست ما انحرف

الصباح وأنا ماشي سيدون وقفت في دوار الشاحنات عطبرة جنب بتاع دكان كردفاني متعود أشيل حاجاتي منو،
وبشرب قهوة جنبو مع واحد كردفانية من جبال النوبة
كنا التلاتة في الراكوبة
بدون مناسبة وقبل القهوة قلت ليهم أحمي ليكم قصّة:
حكيت ليهم قصّة يحيي فضل الله بتاعت القافلة بتشويق شديد،
قلت في سري لو سلمى الشيخ سلامة التي نفتقدها بشدة في المنبر
لو كانت معانا وسمعت طريقة حكيي للقصة كانت بكت وأصرت أمشي أشتغل في الإذاعة

طبعاً كضاب أنا قلت ليكم حكيت ليهم القصة من غير مناسبة
أبداً، أي حدث في الدنيا عندو مناسبة
وقولك للناس "من غير مناسبة"
نوع من التمويج
والتمويج قريب من اللولوة وهو جعلك للحاجة السيدا تبدو مموّجة
وهو ما يجعلك تركز على صعود الموجة وهبوطها

اللهم أكفنا شر المجمجة

قلت ليهم القافلة أول ما بركنت (أناخت الإبل) في سوق جنب نيالا،
وبعد بطلنا أناخ راحلته
بالله، شوفوا أناخ راحلته دي؟
وبرضو الحاقدين يقولوا لي:
أنت لا تعرف الكتابة بالفصحى!!!!

وانت زي منو😂

واصل

ست الشاي ركزت معاي تركيز شديد وبقت شايلة الشرقرق في يدها وغلبها توديهم للكانون،
قلت ليها بجملة اعتراضية سريعة:
بالمناسبة أنا طلبت قهوة
ودّت الشرقرق للكانون وما زال تركيزها شديد جداً
واصلت:
بعد أتغدى وشرب الشاي؛ أخدتو غفوة في العنقريب وقبل الغفوة غطى عيونو بالطاقية،
هي جات من وراهو شالت ليها سبيبة من شعرو

شعرت بورطة الاستمرار في القصّة مع تركيزها وتمنيت أن تحدث شكلة في البوست تحرفو

نبي الله يحيى وليس يحيي

Quote: شعرت بورطة الاستمرار في القصّة مع تركيزها وتمنيت أن تحدث شكلة في البوست تحرفو

ما تشفق على رزقك حسي يجوك

Quote: شالت ليها سبيبة من شعرو

يا مستنير يا داقس سبيبة واحدة دي بتكفي ليوم واحد من أيام الإسبوع
عشان كدا بيشيلوهن سبعة وعند الغض بشيلوهن خمسة عشان الويك إند ما محسوب.
في كل الأحوال العدد الفردي مطلوب

شعرت بورطة الاستمرار في القصّة مع تركيزها وتمنيت أن تحدث شكلة في البوست تحرفو
ـــــــــــــــــــــــــ
ورب المجرات تجي الاول لو اشتركت في البي بي سي للقصة اقصيرة

هنا في عدة شخوص داخل-خارج ومتشابكة

دخلت السبيبة في برمة فيها زيت ورجعتها مكانها في مشلعيب في الكرِقة،
الشرقرق فار ووش الجبنة اندلق
عليكم رب المجرات، اندلق دي كيف؟!
ما نبهتها للقهوة الفارت، لأنو ذهاب وش القهوة فيهو نجاة
ريحة البن المحروق غطت الراكوبة؛ انحرجت من شدة تركيزها
قلت ليها في سري، بعد دا كبيها
ودعوت للنار التي أنجتي من برد المتابعة والتوجس

أبوبكر عباس






سلام دكتور عباس .
الحكي عندك طاعم ولذيذ.
الذ من دجاج ماكدونالدز.
عندك مقدرة وصبر ايوب.
في رصك لحروف الكلمات .
لكن انا ما قلت كالبنيان المروص.
اوعك تهجمني ساكت .
اشواقي و احترامي

،،،،

Quote: ست الشاي ركزت معاي تركيز شديد وبقت شايلة الشرقرق في يدها وغلبها توديهم للكانون، قلت ليها بجملة اعتراضية سريعة: بالمناسبة أنا طلبت قهوة ودّت الشرقرق للكانون وما زال تركيزها شديد جداً واصلت: بعد أتغدى وشرب الشاي؛ أخدتو غفوة في العنقريب وقبل الغفوة غطى عيونو بالطاقية، هي جات من وراهو شالت ليها سبيبة من شعرو شعرت بورطة الاستمرار في القصّة مع تركيزها وتمنيت أن تحدث شكلة في البوست تحرفو أبوبكر عباس ،،،،

عزالدين عباس الفحل
ابوظبي

تزوجها ورفض يمشي مع أهلو وعاش معاها سبعة وعشرين سنة،
جاب فاطمة وعمر
يوم حسّت بالنهاية قالت لأختها: لو متّ أدفني البرمة جنب قبري،
جا سيل كشف البرمة، غنماية بظفرها كسرت البرمة
بعد شهر الزيت نشف وطارت السبيبة،
صحى من النوم مخلوع وجرى لمكان مناخ القافلة وسأل الناس كالمجنون:
القافلة مشت وين؟

ودعوت للنار التي أنجتي من برد المتابعة والتوجس.
عجيب.. أنا ما بفككها يا هامان، وإت ما قصرت في تجمير النار بالبرد..عجيب!
أم هي في شكل (كلمات سبارتاكوس الأخيرة)؟!
وطبعا، إصرار الهميم ما بجلّي، وفي محلو!!
لكن برضو؛ تتوجس خيفة من توجسها يا مستنير..
قول لمحسن هاك شوف جنس "محاننة الراوي/القاص) لجمهوره!!
أو بالله شوف ليك نوع فروسية أدبية جنس دي!؟
من نوع فروسية النفس الأدبية اللوامة.. الكاتبة لومها بقلمها؟
شيء لله يا فكي أبكر المجري:)
====

المهم؛ سمعت بالميتروشكا؟
الدمى الروسية.. طبعا!
لكن ما كنت قايلها تنفع تقنية جديدة في الحكي الطاعم:)
قصة تدور في محور سيدون شمالي خط ١٧ ونص، شرقي دار مالي!
طاقتها من شرقرق جبنة حبشية.. بالجنزبيل او بالكمبا. وأنا مالي!
بداخلها حكاية فوتونية تروى عن خليتين كردفانيتين
تفترضهما السردية وكأنهما متنافرتي القطبية كما الجندرية..
بداخلها قصة من سبيبة جلابي يحي الفضل،
المربوطة بأسبابها إلى مذراة يحي الآخر.
بداخلها قصة مخشجقة بالمانوية الفطرية المحتملة في العنوان..
كلها مؤطرة بزمن هلامي غائم يسيل بين الغيبوبة الساحرة والصحو المسحور.
ولكنه أيضا زمن يتوتر ويتمدد ويتقلص بالوعي اليشدك
إلى الذاكرة الاجتماعية التقليدية بانتحائها التنميطي المتوقع.
=====

غايتو لو ما كنت قد انخت بعرانك الأدبية في معاطن
ومناخات المنبر دا ثم هملتّها ووقعت السوق.. لكنت بدّعتا.
لكن للأسف بقيت بس مكتفي بالكتابة لأفق سودانيز محدود الأنوار ديّا . هههها!
غير كدا، لومك علي؛ لما كانت ستسعك وخيالات وتكتيكات قصصك،
كل هاتيك المجرات.. مش بس مسابفات البي بي سي يا المجري التاني انتا وهو!
====

قلت لي ترمب مالو؟
====

سيبك من الترمبيتا..
شفت الفلم المكسيكي:
؟Amores Perros
واحد ترجمها الحب كلاب والتاني قال كلاب الحبكانات
والتالت قال Love's a Bitch
والرابع قال الحب ابن حرام، والخامس قال كلام ما بنكتب هنا
وآخر أعلن ان الترجمة من الترجمة حرام..
المهم.. دا فلم جميل جدا وابن ستين توجس
وفيه قريب للسبعين حكاية .. حكاية طي حكاية..
فلم ميتروشكي جد.. بالكمبا..
=====

لو سمحت.. تم الحكاية..
=====

الكتابة من التلفون بتغلط براها وملولوة ولذا فالتعديل ضروري.
وهذا من باب تقليد "أسباب التعديل" الأبكراوية:)

قطب الأقطاب هاشم ود الحسن البندهو
اما فكي ابكرونا فقد رفع من قدر الفكي الي منزلة بين المنزلتين
وقد قرب
فوق هامان شوية وخوفي من ف آ رون 😃😂

ثم السلام عليكم

غايتو اتا تشرك للمصيبة ب السبيبة
رسم ريحت البن دي اكلت معاي جنبة ما فهمت ريحة ولا ريحت
لا آخذ كتابتك ببساطة ابدا حتي الاخطاء المقصودة

هي روحت من راح يضيع

يا رب يجوا
وما أفاد الأدب الا معارك الأدباء
اما نحن ف المستفيدون من نقع ونقاع
شئ نلقط وشئ نبرد

ثم سلام سلام

يا دكتورة ليك وحشة.. وعساك بخير.

وخوفي من ف آ رون
دا منو دا؟
أوعى يكون فرعون باللغوة البشاشية؟
بالطريقة دي الزول الهاماني دا حيمسك في (السبيبة) دي
ويخلي البوست يغني (خوفي منك تنساني وتنسى الليالي)!
====
يا حفيظ؛ (الريحة/ت) تشم وتشيف
والــ (أناخ راحلته) كووولها، ما تشيف؟
لازمن تكون رجل مبادئ، وعلى هذا الأساس تقج شركك..هههههها.

ولأنو قيل: موضوع البوست (لو ما انحرف) فعن: الضمير!
فطبعا المبدأ الضميري الأول هو: (كما تدين تدان)!
ما تتم القصة نجهجها ليك..

حكى لي قال لي: الموفد الجماعة غالطوهو قالوا ليهو الله أبداً ما رسلك
قال ليهم: منو فيكم الله عشان يعرف رسلني ولّ ما رسلني؟؟
قلت ليهو: طيب ما ترجع تكتب لينا زي الكلام الطاعم دا وخلينا من كلامك الما مفهوم داك
قال لي ما بقدر، وصلت مرحلة السلام وانتو ناس حقيقة والحقيقة الانسان أكبر من الحقيقة

قلت في سري لو ترامب دا قعد ليهو فرد يوم في المسيكتاب شمال مع نبي الله يحيى؛
العالم ينصلح
وهواجسو البفكر بيها بصوت عالي دي، لو لاقى مبعوث من الله؛ بتبرد
لأنو ناس الحقيقة الناشفة هم أقرب الناس لما وراء الحقيقة (السلام)
وبمناسبة مرور لطيف بهنا دايرين لينا تعريف جديد للإله
غايتو في واحدة من خلواتي قلت:
الله دا هو ضمير الاحتمالات

غايتو ما لينا في الطيّب نصيّب
ولكم السلام يا معشر الكرام ...

Quote: غنماية بظفرها كسرت البرمة

بظفرها يا حنكوش؟! بضلفها.

يا محمد الامين وعلي دفع الله
لقيت ليهو اسم من دقنو وفتلو
هو ك
براقش
يا هاشم شفناهو شفناهو وحياة الخوة اناخ دي دارجية قحة . من صغار في سوق كوستي في همباتي اسمو ود الرشيد . موسي العجب بعرف نوادرو . كان رجل جنب وضكران
بجي السوق بشرب الجبنة مع الوالد . مازي جبنة بكري 😆😆 وكان جهوري الصوت هسة جهوري دي تلقى بكري فتح ليها الغاموس وكان زول حكاي جدا . وحكاويهو ما فايتاهو
اول من يجي بكون قايد جملو .. ابوي بناديهو ويعزمو . واصلا هو جاي لابوي . لكن اظن ابوي عارفو الا يحرص علي دعوته والا ذهب
اها
اتفضل يا ودالرشيد
صلي علي النبي
والوالد لا يحلف ابدا ابدا علي شخص ولا يقسم في اي موقف
يقوم ود الرشيد يقول ليهو
ال ننيخ جملي في اللول
ومن هنا عرفت انها دارجة
ف شنو يا هاشم لسة طالبنو جملة فصيحة بليغة لا تقل عن سبعة كلمات .. وتر 😆😆

لسة طالبنو جملة فصيحة بليغة لا تقل عن سبعة كلمات .. وتر.
-----------------------

دي كيف معاك: (بظفرها)؟
وتر برضو.. لا تحسب الضماير فهي موضوع البوست.
ـــــــــــــــــــ
ثم قفشه البروف..
بظفرها يا حنكوش؟! بضلفها.

قلت لي الضماير موضوع البوست يا هاشم
عشان كدة اخترتك اول زول في اللستة حقتي
بتعجبني الكتابات الذكية اللماحة و القراءات
هسة قبل يكتب الجملة تمهيدي كدة يدينا فعل الامر من رأي 😆😆

يا محمد الأمين إنت زول حامض
خلي الزول يحكي (آظفار أو أضلاف) الفرق بسيط
الفرق الضفارة لتقليم الاضافر، والكجامة لتقليم الأضلاف

Quote: دي كيف معاك: (بظفرها)؟ وتر برضو.. لا تحسب الضماير فهي موضوع البوست.

يا جماعة لا تسيؤوا الظن بالرجل فهو بيطار. والبياطرة الغنم عندهم أشكال وأنواع. بعضهن خواجيات: بياكلن بالمواعيد وبتفسّحن بالمواعيد... فقد يكنّ من ذوات الأظافر. أما زي الغنم جارات قريبي الفي مدينة النهود الواحدة منهن تتحين وقوف أتوس بحوار بابه فتقفز في كبوت الأتوس ومن ثم إلى سقفها، ثم تقفز إلى الحيطة ومنها إلى عرش (سقف) الراكوبة (فتعيث فيها فسادا). وكل ذلك من أجل أن تأكل من طرق (أوراق) التبلدية! أها النوع دا عمرها ما سمعت بالأظافر وأرقّ كلمة يمكن أن تقال لها: تك يتكيك ويضبحك!

Quote: غايتو ما لينا في الطيّب نصيّب ولكم السلام يا معشر الكرام

وعليكم السلام يا معاوية.
كيف ما ليك في الطيب نصيب؟
ات ما شايف سيرة سيدون ودوار الشاحنات؟
نان ديل ما نصيبك.. والكفالة:)!!
هي صحي اتبرا فيها دوار ولّ ياها صينية ساي:)

يا هاشم الفرق بين الصينية والدوار..
الصينية بيكون فيها بوليس حركة لابس أبيض
الدوار بكون فاضي والأولوية للقادمين من جهة اليسار
يعني لازم تحكوها مع بكور دا وتطلعوه حنكوش متسلبط في حكاوي دلنج يحي فضل الله... بطلوا حسادة خلو بكور يكمل، حشيتو أفكاره ياخ

ابلمبة دا زول تعبان ساي بس عندو (حلق)
التعديل معروف ل ابلمبة.

Quote: يا محمد الأمين إنت زول حامض خلي الزول يحكي (آظفار أو أضلاف) الفرق بسيط

يا عبدالعظيم الزول دا لو سكتنا ليهو بعد شوية حيحول لينا اللحاف ومخدتو لفراش ووسادة... والواحد يتلخبط: هو في دبي ولا في الخوي!

ابوبكر وشركاه
قافلة يحي والعير التي كان فيها ..
اما ابراهيم ناجي كانت قافلته اصغر...قال عنها
أقافلة الحياة أريتنيها "**" فلم ترَ مثلها عيني مثالا
أجل هي نحن في الدنيا حيارى "**" وما ندري لقافلةٍ مآلا
رأيتُ حياتَنا كم من غريب على "**" جنبيه بالإعياء مالا
وكم من سائلٍ لم يلقَ ردا وقد "**" سأل الهواجرَ والرماﻻ

البوست ده من بوستات ابوبكر عباس السمحة لولا مداخلة سيدنا هاشم الحسن ..

الغريبة هاشم صاحب ابوبكر
ويفترض يكون فاهم انو الغنا الطاعم لي فنان كبير ما مفروض يتغنى في حفلة فنان اكثر تواضعا ..

هذا يلزمني بالاعتراف بابوبكر كفنان في هذا البوست .. وهو كذلك

ترحيب كبير بالمشرف، عبد العظيم ونابري

أصلاً هذه الأيام تتلمسني أرواح خيّرة وسلام داخلي

ومستعد كمان أرحب بالأديب الكبير الشاعر الناقد الخواض لو مرّ من هنا

الدنيا دي ما شايلين منها حاجة

رب المجرات يهديك يا ابوبكر وتكون كده طوالي ..

Quote: يا أخوانا، حاتم دا زي ترمب

ده أصدق ما قيل في حق الزول ده .. والله صحي

أري ياحفيظ
ارِ محمد اريهما اريهم ولا تقل ر
ما قالت العرب رِ
لسان بني تميم رأي اري
اما اهل الحجاز فتقول ر ِ وره
والحجاز حضر واهل البادية أولي ان يتبعوا والله أعلم .



ابوبكر ارجع للقصة

مكرر

الموبايل يتصرف كما يحب

نستفيد من التكرار لتأكيد الامر
قال تعالي
يَسْأَلُكَ أَهْلُ الْكِتَابِ أَن تُنَزِّلَ عَلَيْهِمْ كِتَابًا مِّنَ السَّمَاءِ ۚ
فَقَدْ سَأَلُوا مُوسَىٰ أَكْبَرَ مِن ذَٰلِكَ فَقَالُوا أَرِنَا اللَّهَ جَهْرَةً
فَأَخَذَتْهُمُ الصَّاعِقَةُ بِظُلْمِهِمْ ۚ ثُمَّ اتَّخَذُوا الْعِجْلَ مِن بَعْدِ مَا
جَاءَتْهُمُ الْبَيِّنَاتُ فَعَفَوْنَا عَن ذَٰلِكَ ۚ وَآتَيْنَا مُوسَىٰ سُلْطَانًا مُّبِينًا
صدق الله العظيم

ترمب العنصري جنو لولوة ؤولولة.. قبل يومين سألوه:
ات يا ريّس بقيت وايت ناشوناليست ول كيف؟
طوالي حنبك ؤوشو حمر وقال لا انا ناشيوناليست ساي.
والسود ديل كلهم اصحابي الروح بالروح وانتو كذابين ؤعدويين الدولة.

أها اليومين ديل شايف حاتم واقف في خط سبعطاشر ونص،
واقف والهم عصف. راسو وألف سيف واقف ألف وطنية أحمر!
قال للجماعة: كلكم جهوية كشمشا ساكت.. ورافع صور وشعارات
وشغال خطب نارية وديماجوجية فوووق تقول يا ليل.
حتى قال لي المشرف: يا زول هوي زح مني كدي ول كدي.
تر لي غادي عامل لينا جلابيتك المخلقنة دي.

قلت سبحان الله؛ هل يمكن أن يكون وجه الشبه بين حاتم وترمب،
هو فرط الوطنية الظاهرة بآخرهما؟
=====
يا مشرف بالله ما تستكثر اغنية وردي على بوست الفكي أبكر؟
الزول دا فنان خلي بالك.. ؤبالأمارة اغنينو المفضلة هي (صدفة يومي اللاقيتك)..
لكن انت بس ما ركبت معانا العنافيات بين دبي وام القوين..
كان نم ليك من نم الزمن القبيل والزمن اللسع جاي وكان عرفت حاجة:)
=====
يا أبكر، كيف يعني تدعو ترمب البعيد للمسيكتاب شمال،
وما تدعو حاتم القريب منها؟
أكان يلاقي الهميم أو نبني له صرحا.

تسلمي يا اخلاص
مع انو البوست ليس للفائدة ودخلت بقصد العكننة والمشاغلة والرسايل المشفرة قاصد بكري بس وقليلا هاشم
لكن اهو وقت جابت معرفة
صحيح الامر من اري للمذكر
ر
وللمؤنث
ري
العربي دة صعب ياخ عديل كدة 😆😆

سيد البوست غائب يا حفيظ ف فرصة
قال قس بن ساعدة اسمعوا و عوا
يعني لما يكون ثلاثي به حرفي علة تحذفهم وانت مطمئن
لكن وخلي بالك من لكن الكلام شئ و ناس البادية شئ تاني
يعني قس بن ساعدة لو ما كان يحدث جمع هل كان يقول اسمع و عِ
ماأظن
زي وفي يوفي قالوا فِ
بسم الله الرحمن الرحيم
ولَا تَقْرَبُوا مَالَ الْيَتِيمِ إِلَّا بِالَّتِي هِيَ أَحْسَنُ حَتَّىٰ يَبْلُغَ أَشُدَّهُ ۚ
وَأَوْفُوا بِالْعَهْدِ ۖ إِنَّ الْعَهْدَ كَانَ مَسْئُولً
صدق الله العظيم

بنو اسرائيل قالوا أرنا
والله أعلم

اتي ما حدثوك يا اخلاص ؟
البوست لا يعد ملكية شخصية
مشاع
نطفشو ليهو ما يعرف يلمو زاتو
مش هو بطفش برضو ؟
نخلي هاشم يغلبو يصلحو ليهو
شايف هاشم كل ما شرد جابو راجع
العربي صعب ياخ
كلمة واحدة تديها ضمة ولا فتحة ولا كسرة ولا سكون في حرف تطفشك

غايتو يا حفيظ البوست فيهو قراءات
وحارسنو اقطاب
اب سبيب وشيخ الطريقة
ناس حاتم وقريبي قالو مشغولين
وإشغل المشاغبين بأنفسهم وعجل بالنصر وبالفرج 😂😂

مكرر

بكري دا ما براو شكله مرشوش بي موية العذراء الكاثوليكية
وبيكتب بي دواية حبرها مخلوط بالفضيلة..
ما تكون ما بتعرف( الدواية) يا بكور عشان ما يتناوشوك ناس محمد الأمين وهاشم

Quote: وعليكم السلام يا معاوية. كيف ما ليك في الطيب نصيب؟ ات ما شايف سيرة سيدون ودوار الشاحنات؟ نان ديل ما نصيبك.. والكفالة:)!! هي صحي اتبرا فيها دوار ولّ ياها صينية ساي:)

أتبرا الجديدة حسب تعريف عبد العظيم فيها دوآر شوّف عيني جنب
الفندق بعد تقطع اللتبراوي، والفندق زاتو اكان ما وراني ليهو دليلي
لمجاهل اتبرا الجديدة المستنير ما كنت خابرو، أما اتبرا القديمة فيها
صينية . خسمتك يا ود الحسن ما تحدِس زول بحكاية الكفيل دي، وأنا
سمع أضاني دي ما قالا لي زول، هسّع أنا رسلت السعودية يجيبو لي
دستة عُقالآت ؤ مُنشار .
كنتُ أنوي أن أمتطي قلوصي وأنيخ معه في بادية السماوة حتي نلتقي
ذلك الرجل ونسمع منه عسى أن يكتب الله لنا الهدآية ...

تصحيح
الاناخة للبعارين فقط.

ابوبكر الشر المستطير
دى جريمة مكتملة الأركان .. مؤثقة لنشر الكراهية .. ضد الكردفانية .. بنصره ونرطبوا بى خيط .. داير تونس الناس ونسهم بعيد عن اهلنا .

ابكرونا
الونسة ما تكون حلوة .. الا لمن تحط من قدر قبائل الناس .. هسى لو كنت دخلت اسم قبيلة تانية عينك ما تشوف الا النور ..والباقين كمان فرحاتين يشجعوا فيك مذيع ناجح بدون خجلة .. ابكر داير تبقى ناجح على حساب السخرية وبث الكراهية والعنصرية .. ابكر شوف ليك قيم ضمنة ولا كوتشنة العبها .. غادى غادى ..تر مننا الفينا مكفينا

بالله يا ابكرونا الدنيا دى كان ما فرندقس تخلى الحريف وتدى الطقش .. ما كنا اتلمينا مع الحنش .. ابكر من يوم الليلة تتف الكلام دا من خشمك .. قال صوفة .. الصوفة التقوم ليك فى محلة كدة ما تخليك تنوم .. اعتزر فورا وسريع بدون مجمجة .

ابكر
ما تمثل دور العوير فى كتاب الطيب صالح وترسل الجمرات الخبيثة .. الونسة دى بيتونسوها فى الصوالين المغلقة .. لمن خلاس ماخد راحتك وتتجدع وخلفك كورال مشجع فنان ومبدع ..يعنى خلاس جبت التائة .. ابكر شوف ليك غماية عالجها بدل البتسوى غيهو دا ِ

دكتور سعية ما تعمل زى الضب الغمران تعال مارق .. انحنا ذاتنا غمرانين من الفسوة بتاعتك دى .. بسرعة قبل ما نرفع موضوعك للكجور بتاعنا يفتى فى امرك .. كدى كدى انت ما مارق منها .

بدت ترمي في اللقيمات، ريحة احتراق القمح زيها وزي احتراق البن تفعل الافاعيل،
أخذتني الريحة لقصته الأخرى عن النوباوي جمعة كافي تيّة وعشقه لريحة الرغيف،
ربط دماغي بسرعة تذكرت كافي بجون كوفي في الميل الأخضر
كوفي تنطق مثل القهوة ولكنها ترسم بطريقة مختلفة وكافي هو راكوبة القهوة ذاتها
قلت في سري يا للهول!!
ماذا يحدث؟!!
قررت وأنا أتناول صحن لقيمات شهي بعد القهوة أن استمتع بهذا الربط في خيالي ولا أحكيه لهم، عشان ما تقوم البت دي تتحرق بالزيت ساكت.

وأيضاً خفت أن يندرع فيني الأغبياء خارج الراكوبة بعباطة العنصرية

قلت يا للهول مرّة ثانية،
جمعة كافي تيّة في خيالي هو نفسو جون كوفي
ولا أقول ليكم، قررت الانتظار لحدي ما تخلص من اللقيمات وأحكي ليهم الربط

.
.
ما لي لا أرى الخوّاض ؟؟؟
أم كان من الغائبين !!!
.
..
.

ابكر العوير
والله يا ابكر سنة 98 جيت غشيت هيا وتلجاريب ومسمار والحديقة ودخلت عطبرة ما كان فى شارع زلط فى الزمن داك .. سايق عربية SUV ليها 3 شهور من موديل السنة ..فيها تلاجة بين المقعدين الامامى .. عطبرة كلها وقفت بى فرت رجل. محل ما امشى الناس تتلما فى العربية تتفرج .. امشى اسال ناس شركة سيدون قول ليهم الزول الزول الشال الوقود وما دفع تعريفة .. و مدير بنك السودان اسالهم من صاحب الشيك 4 مليون جنيه كان مبلغ كبير فى الزمن داك .. ولا اسال مدير شركة النقل النهرى .. اسالوا من الزول الوحيد دفع نصف قيمة عبور نقل السيارات والباقين دفعوا القيمة كاملة لمن الناس احتجت المدير قال ليهم الزول غشانا .. يا ابكر عطبرة كان فيها اثنين لكوندا واحدة فى الجديدة وصاحبها قبطى والتانية فى السوق كلها عناقريب ..والمطاعم مافيها غير الفول والشية .. كانوا ناس ساكت نلعب بيهم زى مادايرين .. متين افتحتوا .

مبروك السرقة يا دحش

انت صحي يا ود نواي
كبيت البنزين وزوغت مالك ما دفعت بفخامتك وجيبك المليان دا.؟

غايتو لو كنت هنا في السعودية كان كسروا ليك القزاز الوراء
لانو اي عال طرمبة هنا تتصور خاتي ليهو اربعة خمسة حجار غلاااد للناس البكبو ويكبو الزوغة

ازيكم ياخي

يابكور انت قاعد تحكى وتدفع فى فنجان البن الشى الفلانى وماعارف البصله امس بى سته جنيه فى بحرى امس. خساره الفلوس الدفعناها فى استنارتك .مواضيع الساعه ظاهره .سالت بتاع الرقشه قال فنجان الجبنه بى ٣ كبايات ابو حمار

سالت بتاع الرقشه قال الجماعه البيشربوا فى البن ديل كلهم ناس الشهادات الكرتونيه
الماجايبين خبر الغبش .

سلام محمد الشيخ
والله كبيت من الشركة الام .. ما من الطرمبة .. ودعونى واخر ابتسامة كمان .. الشهرة متاعب .. بس عشان الواحد بطقع معاكم فى المنبر افتكرتوا مجنون .. الناس العاملين شفوت مقددين عطبرة .. اسالهم الحتة قدام عطبرة سامينها الحديقة لى شنو .. اقسم بالله العظيم كنت بسافر بالليل فى الخلاء عطبرة بورسودان بالنجوم .. ناس المستنير كان بيقروا فى الجامعة كيف يحوشوا الغنم. .. الوكت داك كان فى الطريق فى الخلاء تلقى عريشة واقفة برها ..سامينها الكافتريا .. اذا النار مولع توقف عربيتك تنتظر .. بعد شوية يجيك صاحب الكافتريا اذا كنت عايز تشرب شاى ولا جبنة .. لو عندك اكل يعملوا ليك ..تدفع. الفيهو النصيب وتتخارج بليلك دا .

Quote: الونسة ما تكون حلوة .. الا لمن تحط من قدر قبائل الناس

أبو اليمن ود نواي؛
والله حكاياتك حلوة ومتروسة شفتنة وجنصصة
لكن عليك النبي هسع لو المسننير كان قال الونسات دي
جرت في دكان الفول بتاع الشايقي ول محل جبنة بتاع الهدندوي
ول مع بتاع الكارو الجعلي.. يعني كنتا حتتحسس برضو ول كيف؟
====
من ناحية تانية؛
اكتر تلاتة بتاعين فتن في المنبر هما:
الفكي ابكر وصاحبه قسم الفضيل.

سلام هاشم الحسن
والله الشاقى .. الجعلى.. المحسى .. الدنقلاوى .. الحلفاوى .. البطحانى .. الفلاتى .. البرقاوى .. المسيرى .. التعايشى .. الريقى .. الفوراوى .. النويراوى .. الدينكاوى .. الزغاوى بى زغاوة تشاد .. ديل ناس البيت يجوا ويبيتوا و واحدين بالسنين معنا .
لكن ناس عطبرة فاكينها فى روحهم شديد خلاس .. مرة كدى مشيت لى صاحبى الطاهرفى الدكان بره عطبرة كدى. ..لقيتو شادى حلة دمعة قدام الدكان .. سالتوا الطاهر عندك ثلاث نساوين تطبخ ليه .. نساوينا ما بعرفوا يطبخوا.. بعملوا الشية والعصيدة بالروب .. ياخى الواحد لمن يجى عطبرة لى اخونا قائد المدفعية يكون مزنوق متين يمرق منها .. السوق المطاعم مافيها غير الشية والفول واذا ما حصلت تلقا الاكل خلص .. فى الزمن د اك هسى امكن اتصلحوا شوية .. ثقافة بتاعة اكل ماعندهم .. امشى خش الغرب اى قرية .. المرأة تعمل اكثر من عشرين صنف من الطعام .. ناس عطبرة ديك فاكينها فى روحهم شديد .

غايتو يا عمر دهب، الما بريدك يحدر ليك في الضلمة.
ما عارف، لكن أنا بكون متفاعل مع البؤس الحاصل دا بشكل إيجابي أكتر منك عشرات المرات.
متأكد أنك تعيش رفاهية أكثر مني بكثير

لكن لو دايرني أربط روحي في جذع شجرة؛ بعملو

هوّي يا أيمن نوآي المستنير دا ما من اتبرا نِهارت قايم
علينا، المستنير دا زول عندو كفيل في عطبرة ؤ بس ...

Quote: بدت ترمي في اللقيمات، ريحة احتراق القمح زيها وزي احتراق البن تفعل الافاعيل

إنت يا مستنير لقيماتك دي بيحمروها ولا بيشوها؟! "احتراق القمح" الطيب الزيت مشا وين؟

غايتو أنا وراك وراك يا إما أصبحت مشهور بسببك (انطلاقا من مقولة: بجاه الملوك نلوك)، يا إما اشتكيتك للمحاكم!

يا بروف*
جمعة كافي تيّة إنسان بري، بشم ريحة الطازج من على بعد أميال،
كل أفران كادوقلي تعرفه
مع أول صينية رغيف تطلع في أول فرن بتكون من نصيب كافي مجاناً
كان يلتهم الرغيف بطقوس عجيبة

أتوقف عن الكتابة نهائياً بالمنتدى كما فعل زميلي في الكوزنة ود البارقة،
وذلك للمضايقات والتخوين و الحقد الذي أواجهه

Quote: أتوقف عن الكتابة نهائياً بالمنتدى

كدا حتقطع عيشنا.

ابوبكر المستنير
عشان أهلك بخليكِ وأشيل في جرحي ماضيكِ

أحاول وبرضى ما قادر عشان أنسى وأنسيكِ

كتير الدمعه في عينيك تشوفيني عشرة عشرة
وحات دمعتك الغالية دى خليتك بس تانى ما تعمل كاكا .

Quote: أتوقف عن الكتابة نهائياً بالمنتدى كما فعل زميلي في الكوزنة ود البارقة، وذلك للمضايقات والتخوين و الحقد الذي أواجهه

.. أبقى واعي ياعمك ورفقا بمن يحبونك 😁

أبوبكر عباس






سلام دكتور عباس. .
خونة ، مضايقات ، كوزنة. حقد .
كلام كبير خلاص.
الحمد لله ما قلت نفسيات.
قالو المجانين في نعيم .
ياخي انت من اعز الناس.
القمر الضواي في سودانيزاون لايص.
بث. بث بث.
ما تتوقف عن الكتابة نهائياً بالمنتدى
شواقي.

Quote: أتوقف عن الكتابة نهائياً بالمنتدى كما فعل زميلي في الكوزنة ود البارقة، وذلك للمضايقات والتخوين و الحقد الذي أواجهه. أبوبكر عباس ،،،،

عزالدين عباس الفحل
ابوظبي

Quote: .ما لي لا أرى الخوّاض ؟؟؟أم كان من الغائبين !!!....

أهلاً قسم الفضيل

سبق لي أن أشرت إلى أنك واحد من الأذكياء في هذ المنبر...

وملاحظتك أعلاه دليل على ذلك الذكاء.

أعرف أنّ كلامي غامض ، ربما نلتقي وأبوح لك ب"سرٍّ"..

وإلا ربما سيكون "السرُّ" هامشاً في دراسة نقدية أو ما شابهها*،

كان الله هوّن.

أرقد عافية.

*لو حدث ذلك، سيكون هاشم الحسن أوّل من "تنبّأ" بذلك.

هي حكاًوي وحكايات نجمل بها جفاف الحياة
هاكم ليها ناشفة
في ترحال قافلته بين سودري وام در لحظها
جميلة رشيقة كغزال اما (الكسرو فيها ف أجادةالطبيخ )
عشرين صنف يا زول شي تقلية شي بالكول و شي مرس
شي نعيمة شي جداد وفي قول ناس المدن دجاج
لا تجد لة عظمآاما ملاح الروب وفي وشو البصل تدي ربك العجب
المفروك اديهو ليها ولما كان صديقة وابن عمه
بطيني يضرب به المثل فقد كان يصر علي ان تمر القافلة بمحلهم..
في ذلك اليوم شعر بالنعاس أغمض عينيه علي صورتها
ثم غطي عينية بالطاقية البرتقالية ليحلم بها ، شعر
بها تأتي خلفه وتأخذ سبيبة لحظها ابن عمه من بعيد وفرح فقد
كان يحب بنت عمهما الا ان عمه وجده قد خطباها ل( زول السبيب )
تركه وذهب للقافلة ولم يخبرهم بتأخره.
حين السؤال عن سبب عدم رجوع ابن العم حكي
لهم الحكاية مع زيادة عدد السبيب ليصرن سبعة سبيبات طوال .

كل تزوج بمن أحب وانجب اما اب سبيب فأنجب فاطمة وعمر
وبعد وفاة الزوجة شعر بالوحدة واصيب بمرض النسيان (الزهايمر) .
فاطمة تزوجت وارتحلت وعمر تخرج من الجامعة واغترب اما اهل زوجته ف الاخت كبرت
والجمع قد تفرقت بهم السبل , لم يتذكر في الزمن الغيهب سوي القافلة


وجو ناس كتبوها وصلحوها لنندهش
ناشفة مش

غايتو يا عمر دهب، الما بريدك يحدر ليك في الضلمة.
معقول فى زول مايريدك يابوبكر دى جلت منك

سلام فور اول بدون فرز

بحثت عن نص "القافلة" المُشار إليه في هذا البوست، ولم أعثر عليه.

هل بإمكانكم بسطه هنا؟

هو "الحلقة المفقودة"، في التخطيط الأوّلي.

مع خالص الشكر.

وعليكم السلام الأديب الرائع الخواض
في نص الغيبوبة
هل هو الأصل لا أدري

لو ما صديقي ود المدير حنسني؛ ما كنت جيت راجع.

هل بامكانكم بسطه؟
هو ديل علاقتم بالثقافة شنو؟
أطلبو مني أنا بتودد؛ ببسطو ليك يا ضنين المتابعة.

يا بكري الكتاب بعملو ترقيم للاشارات وتحت بختو محل الاشارة
وتجي تحت تفهمو قاصد شنو؟
ما كل الناس عاصرو تلك الكتابات ولا اتيحت لهم ياخ
خليك معاصر

ممكن تفهمونا حكاية السبيبة دي شنو؟
نحن اولاد ارياف وكدى وشمال الشخيت دااااك.

*****************


ود نواي يا ختييير

البروف يا أبسن، لاعب معاي ضاغط
قلت أخت النجمة أشتت بيها انتباهو

بعدين يا أخوانا،
زمان في المنتدى كان التصحيح حق حافظ وود البشرى،
شنو الحصل؟
كل المنتدى بقى مصححين

Quote: قلت في سري لو سلمى الشيخ سلامة التي نفتقدها بشدة في المنبر

غايتو انا طلعت بي حاجة مهمة من البوست وكلنا نفتقد كتابات سلمي .

سلمى الشيخ سلامة!!
يا حليلا.. والله يا حليلا..
تحية لها وللسِيَر العطرة.
++++
------
إذن يا دكتورة إخلاص، النص الأتيت به، يبدو كنص موازي..
وكذا نص يحي فضل الله، المشار إليه "بالقافلة"،
فهو أيضا تناص مع أصل لنص فولكلوري ما (من ذاكرتي).
لكن اللعب بالزمن وتجميده أو تمييعه حد الزئبقية،
فهي اضافة (مستنيرة) من حكاية أبي بكر لحكاية تفاعل فتاة الشرقرق
مع حكاية يحي الكاتب التي تناصت معها حكاية إخلاص..
وخلطه لكل ذلك مع زمن المنبر...
إذن الباقي هو: ما أصل أصول هذه الحكايات..
وهل من كتاب للأحاجي السودانية في هذا الجوار؟

أما العجب العجاب فهو؛
لو أن الخواض، وقد توفر على كل هذه النصوص "السبيبية" المتناسلة،
فأجرى عليها "هامشا" نقديا، كما وعده بأعلاه لقسم الفضيل.
فإذن؛ بـ "بصيرة النقد"، قد ينكشف قناعُ "الحكاوي" عن "سبيبة" الامتاع!!

نعم هو نص موازِ حفزني له غضب البعض
وحلاوة ما أتي به المستنير

هي فكرة عمل وقد كنت أظن بامكانية القيام بها مع كاتب اخر

Quote: أما العجب العجاب فهو؛ لو أن الخواض، وقد توفر على كل هذه النصوص "السبيبية" المتناسلة، فأجرى عليها "هامشا" نقديا، كما وعده بأعلاه لقسم الفضيل. فإذن؛ بـ "بصيرة النقد"، قد ينكشف قناعُ "الحكاوي" عن "سبيبة" الامتاع!!

أنت , وربما الوحيد، الذي تعلم أنني كتبت سلسلة من النصوص النقدية في موضوع "استعمال النص"، و"القراءة" و"التأويل"،

مصرّا ًقدر الإمكان أن تكون الامثلة سودانية.

والانترنت بعكس القراءة التقليدية يعطي أمثلة باهرة في "تلقي النص " و"استعماله"، و ما أسمِّيه "فاتح الشهية" الطفيلي للنص.

وهذا البوست يعطي أمثلة واقعية باهرة عن قضايا "نظرية" في ما أنا بصدده.

ولذا -كما في "المخطط التأويلي"* يعتبر نص "القافلة " ليحيى فضل الله ، هو كما سبق لي أن ذكرت يعتبر "الحلقة المفقودة"..

كيف لأديب تقليدي أن ينقد أعمالي، هو لا يستوعب حدودها،
هذه مدرسة "كسر أنف" احتكار الكتابة،
أنا بمثابة ثورة والخواض كحاكم عسكري يرى في المشي خارج خطى الكتيبة ما يستحق الشنق

في البداية أرى أن ندخل هذا الناقد مدرسة
"الكتابة التفاعلية لمدة سنة،
بعدها نؤجر له كلكال

يكلكلو

سبحان الله مغيّر الاحوال من حال الى حال

Quote: لو ما صديقي ود المدير حنسني؛ ما كنت جيت راجع.

يعنى شكلتكم ما فى محلها
اها

Quote: سبحان الله مغيّر الاحوال من حال الى حال يعنى شكلتكم ما فى محلها اها

عِييييييك،
صاحبنا دا من زمن قفا نبكي من ذكرى حبيبٍ ومنزلِ ...

Quote: في البداية أرى أن ندخل هذا الناقد مدرسة "الكتابة التفاعلية لمدة سنة،

أهلا

ما هو تعريفك "للكتابة التفاعلية"؟؟؟

ولكي تشرح للمتابعين بطريقة عملية:

ما هوالفرق بين ما تنشره أنت مثلاً وما ينشره عثمان م. صالح في هذا المنبر،
منظوراً إليهما من خلال مصطلح "الكتابة التفاعلية"؟؟

مثلي لا يُسأل عن التعريف، نحن نبتدع الأشياء، ومن ثمّ يقوم الأكاديمي بمحاولة تأطيرها وهيهات!
الفرق بيني وعثمان هنا؛
أنا أكتب بمحبة وتواضع ولغة سهلة جداً
باختصار:
عثمان كاتب تقليدي جيد وأنا مبدع،
مبدع بالمعنى الحقيقي للكلمة
أبتدع المدرسة الجديدة

Quote: الفرق بيني وعثمان هنا؛ أنا أكتب بمحبة وتواضع ولغة سهلة جداً باختصار: عثمان كاتب تقليدي جيد وأنا مبدع، مبدع بالمعنى الحقيقي للكلمة أبتدع المدرسة الجديدة

سؤالي كان محددا جدا:
ما الفرق -ليس من ناحية نوعية الكتابة وقيمتها الإبداعية-

ولكن من ناحية النظر إليهما ضمن مصطلح "الكتابة التفاعلية" حين يتم نشر نص لكل منكما..

ماذا يحدث من اختلاف، ضمن منظور "الكتابة التفاعلية"؟؟؟

وهل أنت أوّل من "صكّ مصطلح الكتابة التفاعلية؟؟؟


وأوّل من زاول "الكتابة التفاعلية"؟؟؟

عثمان ليس له علاقة بالكتابة التفاعلية،
نصوص عثمان معمولة في بيتو،
أنا الصاج بتاعي بجيبو هنا وقاعدين نشتغل الوجبة هنا جماعياً

نعم أنا رائد هذا النوع من الكتابة،
لا أنسى دور الأحباب الجميلين الذي يقذفون بالتوابل والعطور علي الفكرة الأولى

تحياتي استاذ الخواض
اظن الكتابة في المنابر ومواقع التواصل كتابة تفاعلية
ممكن اعدل سؤالك بإضافة ابداعية فتكون
كتابة تفاعلية ابداعية

Quote: تحياتي استاذ الخواض اظن الكتابة في المنابر ومواقع التواصل كتابة تفاعلية ممكن اعدل سؤالك بإضافة ابداعية فتكون كتابة تفاعلية ابداعية

هذا أصلا مصطلح موجود ، وقد "لفحه" ابوبكر بدون أن يدري ماهيته...

تفاعل القراء لا يضيف شيئا الى النص ، وانما هو يشير إلى مدى استجابتهم للنص...

يعني "شتيمة" نواي للبيطار هي جزء من كتابة ابوبكر التفاعلية؟ ههههههه

هذا "التفاعل" يحدث في أوضع البوستات ههههه

أنت أوف بوينت
نعم شتيمة لص البنزين نواي جزء من النص التاني الغير مكتمل:
جمعة كافي تيّة وجون كافي
وهو نص أردت منه "السلام" الذي يحاصرني به محسن خالد

Quote: تفاعل القراء لا يضيف شيئا الى النص ، وانما هو يشير إلى مدى استجابتهم للنص...

على الأقل تصويب بعض الأخطاء - إن وجدت - تضيف شيئا إلى النص. أما إذا كان صاحب النص مبدعا موهوبا فيمكنه أن يستلهم من تفاعلات القراء ما يثري نصه الحالي أو تلهمه التفاعلات إلى إنتاج نصوص جديدة. وأما إذا كان النص ميتا، ففي هذه الحالة الدوام لله وحده.

حرامي البنزين شتمني فقط لأنو أنا قلت ست الشاي نوباوية،
تحداني أن أرجع للبوست،
رجعت للبوست ومعي نوباوي آخر إمعاناً في عدم الاستجابة للقهر،
المرّة دي نوباوي ولد الطبيعة
ثم تداعى جون كوفي ومحسن وسلامه الذي أبحث عنه داخل ترامب وحاتم

أنت وعثمان لا تعرفون شيئا عن الكتابة التفاعلية

Quote: إذا كان صاحب النص مبدعا موهوبا فيمكنه أن يستلهم من تفاعلات القراء ما يثري نصه الحالي أو تلهمه التفاعلات إلى إنتاج نصوص جديدة.

شكراً محمد الأمين .
إتفق مع هذا الكلام 100%، فالكتابة الجماعية أو المشتركة أو فلنقل
كتابة المنتديات فيها برآح أوسع من الكتابة المحصورة الخالية من روح الحوار ...

Quote: كتابة المنتديات فيها برآح أوسع من الكتابة المحصورة الخالية من روح الحوار ...

وقد عبر المستنير عنها بتشبيهها بالصاج حيث الإحساس الجميل وأنت تتذوق الطعم الطازج فتقول للطاهي: شوية ملح... لأ كترت الشمار!

Quote: الصباح وأنا ماشي سيدون وقفت في دوار الشاحنات عطبرة جنب بتاع دكان كردفاني متعود أشيل حاجاتي منو، وبشرب قهوة جنبو مع واحدة كردفانية من جبال النوبة كنا التلاتة في الراكوبة

يا سلآم عليك يأخ ؤ يا سلآم علي إنتقاءك للكلمات وذكاءك،
يا راجل يا لماح، جميل جداً إستبدال الولآية بالرآكوبة وعطبرة
ووضع الجميع بعدة جبنتهم في إطار الوطن .
حقيقة عجبتني ...

تحياتى للجميع
دايرين نقيف فى حتة .. نص السرد التفاعلى و دورها فى ابستملوجيا لخلخلة واهتزاز المسلمات لبناء المعرفة او ما يسمى بالحداثة كما ذكره محمد عابد الجابرى ومحمد اركون فى نقد العقل العربى .. اذا اكتفى النص السردى التفاعلى على اهتزاز المسلمات دون البناء يقود الى الفوضوية اى اللاسلطوية وبذلك تكون أداء من ادوات الهدم وليست لبناء الحداثة كما يفعل المستنير الان.
النقطة الثانية نوعية نص الخطاب التفاعلى الموجة .. ونسبية التفاعل مع النص امر ضرورى فى مرحلة البناء المعرفى. .. كما كانت نسبة التفاعل. اعلى. كل ما ذاد النجاح متل الجدلية المادية قادت الى بناء الاشتراكية ..والبرجماتية قادت لبناء الراسمالية ..وجدلية التاريخ. قادت المانيا من تاىيخ الاقطاعيات الى تاريخ المانيا الموحدة .

اذا عقدنا مقارنة .. نسبية تفاعل النص بين الفيلسوف الالمانى هجيل والمفكر السودانى محمود محمد طه لى تشابه الطرح .. نجد ان محمود محمد طه طرح بفلسفة روحية الانسان الكامل وجد نسبة ضئلية من التجاوب .. اتهم بالردة وتم قتله .. كما نجد الفيلسوف هيجل طرح الكمال العقلى او قمةالوعى العقلانى للانسان ..اتهم بالخيانه وعدم الوطنية .. لكن لم يقتل بل تم الجدل نهاية التاريخ ..كانت المانية تعيش فى اقتاعيات كل اقطاعية لها تاريخها التى تعتز وتفاخر بها .. كما نحن فى السودان دارفور لها تاريخها على دينار والجعلين لهم تاريخهم المك نمر والفونج. والنوبة ولبجة .. عندماا دخل نابليون المانيا هزمهم .. شعر الالمان بالزل والاهانة والمعاناة النفسية من جراء الهزيمة ... الا شخص واحد هو هيجل .. بشر الالمان بى وحدة المانيا وسوف تصبح عظيمة وحدث صحة نظرية هيجل ... نحن فى السودان نكرس للاقتاعية .. لذا من السهل ان تحتل اى دولة السودان تشاد او ارتريا او ليبيا اوغيرها من الدول .. ليس بسبب ضعفنا بل بسبب عدم وجود قومية واحدة .. نحن قوميات متعددة داخل مساحة جغرافية واحدة .. هذا ما يطر له المستنير .
الخواض قنطرت ليك الكورة تعال شوت ضفارى .

ود المدير مازلت احمل الكثير فى كنانتى .. انتهى من المستنير وارجع ليكم امسكوا الخشب

Quote: تحياتي استاذ الخواض اظن الكتابة في المنابر ومواقع التواصل كتابة تفاعلية ممكن اعدل سؤالك بإضافة ابداعية فتكون كتابة تفاعلية ابداعية

هذا أصلا مصطلح موجود ، وقد "لفحه" ابوبكر بدون أن يدري ماهيته...

تفاعل القراء لا يضيف شيئا الى النص ، وانما هو يشير إلى مدى استجابتهم للنص...

يعني "شتيمة" نواي للبيطار هي جزء من كتابة ابوبكر التفاعلية؟ ههههههه

هذا "التفاعل" يحدث في أوضع البوستات ههههه

لقد خلطت خلط مريع بين "كبي جزلان" وجمعة كافي تيّة
لعنة الله على الذاكرة

كبي جزلان:
تداعيـــات: يحيى فضــــــل الله

خطواته واسعة ، سريعة ، تشق ظلمة الليل ، لاتهتم مطلقا بكل مخاطر الطريق ، فارع القامة ، ضخم الجثة ، عار تماما ، لا يلبس حتي ما يستر العورة ، عار كالانتماء ، كما ولدته امه ، إعتاد كبي جزلان - هكذا كانوا ينادونه ، لم يشارك ابدا في إختيارات البشر لكل المسميات التي يطلقونها عليه - إعتاد كبي جزلان علي هذه الرحلة اليومية التي تبدأ في نهايات الليل و تنتهي في بواكير الصباح ، إنها رحلة موسمية ، تبدو خطوات كبي جزلان تواقع هذا الطريق المخيف حين تبدأ إجازات المدارس ، تلك المدارس التي علمته حب الرغيف ، مدارس ( كاتشا ) او ( كجه ) كما يقول سكان جبال النوبة الاصليين ، لاتعني تلك المدارس ب( كاتشا ) ، مدارس أسستها الارساليات المسيحية ، لا تعني بالنسبة له غير انها مكان يتواجد فيه الرغيف ، إن ضجة التلاميذ و الطلاب تشعره بالامان ، إن فكرة الامن العذائي لها ذلك المتسع من الاهنمام في عقل كبي جزلان ، خارج تلك النوايا المبرمجة التي جعلت الإرساليات تحقق طموحاتها المتعمدة في ان تكون تلك المنطقة التي تقع حنوب مدينة ( كادقلي ) ، منطقة ( كاتشا ) منطقة تلتحم فيها كل تناقضات حركة الفكر الانساني ، مدارس ذات بناء مدهش بالنسبة لسكان المنطقة ، أخذت تلك الجبال التي تحيط بالمدارس تقذف باصداء الاناشيد الي البعيد ، الي تلك الغابات و السهول ، الي أذان حيوانات المنطقة المتوحشة و المستانسة ، ضجة التلاميذ في حركتهم و سكونهم ، ألعابهم و مسامراتهم في الليالي المظلمة و المقمرة خارج عنابر الداخليات ، إن الظلام في تلك المنطقة له لون اكثف من حدود السواد ، لكن تبقي تلك المدارس بقع من الضوء يهتدي بها السائرون علي تلك الدروب الموحشة و النائية ، خارج احلام اولئك المدرسين ، خارج أرقهم الذي تصنعه ذكريات المدن التي أتوا منها ، خارج كل تلك الافعال التاريخية ، كان كبي جزلان يتعامل مع هذه المدارس بمنتهي التجريد ، لا تعني هذه المدارس بالنسبة اليه سوي الرغيف ، اصبح مذاق الرغيف علي لسانه نوع غريب من الإدمان ، لايبرح مطلقا مكانه الحميم امام مطابخ الداخليات ، يسمح لنفسه بالتجول حتي مباني السفرة - قاعة الطعام - ليس ابعد من ذلك بين المطبخ وقاعة الطعام ، كان يحس حين يري اولئك التلاميذ يتناولون طعامهم ، حين يري ذلك الرغيف المدور تمزقه الايدي و تلتهمه الافواه ، يحس ان فكرته عن هذا الشئ الغريب هو محور حركة الكون .

الطباخون و عمال المطبخ إعتادوا عليه ، اصبح من ضمن مسئولياتهم ، حاول مرة كبير الطباخين ان يبعده من المنطقة ، عن كمية الرغيف التي يلتهمها ، كان كبي جزلان هناك كما إعتاد ، وقف تلك الوقفة التي تشبه وقفة التماثيل ، وقف امام المطبخ ، كان ذلك في الصباح ، منع من ممارسة عشقه ، تحولت تلك الوقفة الي صخب عال جدا ، همهمات إحتجاج حيث انه لايستطيع مطلقا ان يختزن في عقله البسيط أي إشارات او علامات يمكن ان يقال عنها إنها لغة مشتركة بين البشر ، همهمات غريبة تحولت الي صراخ هستيري ، تحرر ذلك التمثال من جموده ، تحول كبي جزلان الي كتلة من الإنفعال اطاحت بكل الاشياء التي صادفته او حاولت ان تقف دونه و الرغيف ، قذف بكبير الطباخين علي اقرب صخرة علي ذلك الجبل ، قوة هائلة إقتلعت ابواب المطبخ ، هشمت الشبابيك ، حطم كبي جزلان اواني الطبخ ، هرسها مع ملاحظة انها من الالمنيوم لكنه اسنطاع ان يشكل بثورته العارمة اوضاعا و ملامح اخري لاي إناء مر به في طريقه ، كان يركض في دوائر متوترة و يصرخ ضد كل العالم الموجود بالمنطقة ، إمتدت ثورة كبي جزلان حتي وصلت الي الطابور الصباحي ، كان ناظر المدرسة يتحدث عن النظام كما كل يوم ، المدرسون في مكاتبهم يستعدون لبداية اليوم الدراسي ، التلاميذ يحاولون الهروب بشرودهم و همساتهم من خطبة الناظر المعتادة ، جاء كبي جزلان كما الإعصار ـ إقتحم الطابور ، يضرب كل من يصادفه ، هرج ، مرج ، تناثر التلاميذ في الفناء ، إختفي الناظر داخل مكتبه ، كبي جزلان يطارد التلاميذ في الفناء ، يضرب بكل قوة ، معركة لها ضحايا ، جرحي ، تلميذ كسرت يده ، بعضهم اغمي عليهم ، لا زالت ثورة كبي جزلان مستمرة ، هرول احد المدرسين الي حيث مكام الإنطلاقة ، عرف الامر ، اخذ معه اكثر من عشرة ارغفة و جاء الي الفناء ، يتابع الي درجة اللهث خطوات كبي جزلان الثائرة ، أخيرا إقترب منه ، لوح له بالارغفة ، همدت ثورة كبي جزلان رويدا رويدا ، إقترب من المدرس بحذر شديد ، خطف الارغفة من يده ، همهم ، صرخ بعنف ، إرتعش جسمه ، أخذ واحدة من الارغفة ، كومها في يده الضخمة ، رفع يده اليسري الي أعلي و كأنه يحيي الشمس ، مسح الرغيفة علي عرق إبطه الذي كان غزيرا جدا ، إلتهمها بعنف ، كأن كبي جزلان يأكل من عرق إبطيه

بعدها جاءت تعليمات من الناظر توصي بالإعتناء التام بمشروع كبي جزلان الغذائي ، بعدها اصبح واحدا من أهم مسئوليات الطباخين .
يخاف كبي جزلان من الاماكن الخالية ، يعرف تماما حين يختفي التلاميذ من المدارس انه سيواجه اياما صعبة وعصيبة ـ اياما يختفي فيها الرغيف ، في تلك الايام ، ايام الإجازات ، يكون كبي جزلان خارج حيويته ، متداخلا مع حزنه الابكم ، وقتها لاتجدي كل الصرخات ، كل الهمهمات ، يفقد تماما معني وجوده ، يواجه بذاكرته غير المعقدة تلك الابواب و الشبابيك المغلقة ، اغنام ترعي في فناء المدرسة ، الحشائش البرية تتطاول احيانا كثيرة علي سور المدارس ، خريف تصرخ فيه السماء برعودها و تشتعل ببروقها ، وحين ترعد السماء يصرخ كبي جزلان في وجهها و كأنه يحتج ضد الخريف ، الخريف يعني ان تقفل المدارس ، يختفي التلاميذ ، يرحلون الي حيث لايعلم ، يختفي تبعا لذلك الرغيف ، محور فكرة كبي جزلان عن الكون ، إجازة الخريف تمتد الي ستة اشهر لذا ان رحلات كبي جزلان ، تلك الرحلات التي تبدأ في نهايات الليل و تنتهي في الصباح لتبدأ من جديد في ظهيرة حارة ككل نهارات الخريف ، رحلات البحث عن رغيف ، عن ذلك المذاق ، مذاق يقاتل من اجله كبي جزلان الطبيعة بكل عناصرها .

خطواته واسعة تهزم ظلمة الليل ، تقوده لهفة مكثفة ، يتجه من ( كاتشا ) شمالا الي ( كادقلي ) ، يستطيع ان يهرب من كل الوحوش التي في الطريق ، عار كالإنتماء ، كما ولدته أمه ، يشق مهرولا غابات كثيفة ، تهرب من امامه حتي الشياطين ، لا يتوقف ابدا ، لايسمح لخطواته ان يصيبها التعب ، تجلده سياط من الامطار ، يهتدي بالبروق و يصرخ حين ترعد ، لكنه لايتوقف ابدا ، يخوض في وحول لزجة حافيا ، لا يلتفت حتي للاشواك التي تسكن قدميه ، يسبح متحديا تلك الخيران التي تندفع من الجبال ، لايهم ، حتي قوة الإندفاع يهزمها كبي جزلان في بحثه الوجودي عن ذلك المذاق ، عن تلك الرائحة التي تتفتح امامها كل مسامات حواسه الاكثر من خمس ، هذه المسافة التي تطويها خطوات كبي جزلان كانت لواري ( اب اربعة و الابيض ضميرك و السفنجة ) تقطعها في موسم الخريف ، موسم إجازات المدارس في اكثر من عشر ساعات و احيانا ايام بنهاراتها و لياليها بل في معطم الاحوال تتعطل هذه الحركة في الخريف ، لكن كبي جزلان لا يتعطل ابدا ، في نهايات كل ليل من ليالي هذه الشهور الستة ينطلق كبي جزلان الي( كادقلي) ، يصل في الصباح الباكر ، يقف امام فرن ( احمد حريقة ) ، يقث كتمثال ، ينظر الي طاولات الرغيف و هي تخرج من الفرن ، ملوثا بالطين و العرق ، درجة حرارة جسمه يمكنها ان تعادل حرارة الفرن الذي يخرج منه الرغيف ، تتساقط قطرات العرق من جسمه العاري تماما علي الارض ، إن كبي جزلان يمطر ايضا في كل خريف يختفي فيه التلاميذ من المدارس .

في بداية علاقته بأفران ( كادقلي ) تصرف بذلك الجنون الذي يصنعه الحرمان ، كان يهجم علي طاولات الرغيف بعنف غريب ، مداهمة يندر ان تجدها حتي عند اولئك الذين يؤمنون بالنضال المسلح ، ياصابعه العشرة يستطيع ان يكوم عددا من الارغفة ، خطف مرة طاولة كاملة و ركض بها هازما كل اللاحقين به ، إنطلق كما الإعصار و الطاولة تبدو إزاء جسمه الضخم اشبه بصندوق خشبي صغير ، تكررت هذه الافعال الجنونية حتي ان الافران غيرت مواعيدها بعد ان اكتشف ان إخفاءها لطاولات الرغيف لن تمنع كبي جزلان من الحصول عليها ، لاشئ يجدي مطلقا مع الطريقة التي يقتحم بها كبي جزلان ، إستقرت ممارسة كبي جزلان مع افران ( كادقلي ) بعد ان استطاع ( احمد حريقة ) ان يحصر كل تلك الثورة امام فرنه فقط ، رجل كريم استطاع ان يسمح بسماحة لذلك العملاق ، عاشق الرغيف ، ان يأخذ ما يريد و بدون اي عنف و بذلك استطاع ان يفدي اصحاب الافران الاخري .
يأتي كبي جزلان حاملا بين حناياه ذلك الإصرار العميق علي الهدف ، يقف ممطرا عرقه علي الارض ، ينتظر بلهفة تتجاوز منلوجات كل العشاق ، اول طاولة تخرج من الفرن يقتحمها ، يكور بيده الضخمة عددا من الارغفة ، يعصرها بأصابعه حتي تصبح كتلة واحدة متماسكة ، يرفع يده اليسري الي أعلي في أعظم تحية وثنية ، يمسح كتلة الرغيف علي عرق ابطيه و يلتهم و يلتهم و يلتهم .
( احمد حريقة) اصبح يحاسب العاملين في الفرن علي التأخير قياسا علي وقفة كبي جزلان امام الفرن في كل صباح من صباحات خريف الشهور الستة .


علق احد ظرفاء المدينة علي رحلات كبي جزلان مقترحا ان يكتب علي جسده العاري هذه العبارة ( كاتشا كادقلي وبالعكس ) ، مجرد ما إنتهي كبي جزلان من مهمته التاريخية ذات المغزي الوجودي امام فرن ( احمد حريقة ) ضم الي صدره عددا من الارغفة و اتجهت خطواته الي نفس ذلك الطريق الذي مر به ليلا ، هذه المرة الرحلة نهارية ، نهار خريفي ساخن ، يرجع كبي جزلان الي ( كاتشا ) ، يعرق و تغسله الامطار في الطريق ، الشمس تجفف جسده العاري ، تهرب من امامه الوحوش علي الطريق ، يحاول بعضها الإعتداء عليه ، لكن ، الرغبة في الحياة ، في المزيد من الرغيف تهزم تلك المحاولات ، عادة ما يصل كبي جزلان الي ( كاتشا ) بين العصر والمغرب ، تواجهه المدارس فارغة. من حيوية التلاميذ ، ترعبه فكرة الاماكن الخالية ، يتجول داخل فناء المدارس ، يسترخي امام المطبخ ، يؤرقه ذلك البحث عن المذاق الذي يدمنه ، يحاور بصرخاته المحتجة امطار الليل اذا كانت السماء ممطرة ، أكثر ما يثير كراهية الخريف عنده اصوات الضفادع ، محصورا في فكرته الآسرة عن الرغيف اضاع كل تفاصيل علاقاته بسكان المنطقة ، اصبح لا يتعدي حدود المدارس ، هكذا هي رحلات كبي جزلان تبدأ في نهايات الليل ، تنتهي في بدايات الصباح لتبدأ رحلة العودة في نهار خريفي غائظ ليصل بين العصر و الغروب ، يسترخي في مكانه الحميم ، تستفزه الفراغات و تثيره اصوات الضفادع ليبدأ رحلة جديدة ، هكذا و لمده ستة اشهر هي إجازة المدارس في الخريف يكون كبي جزلان قد صارع فيها كل قوي الطبيعة ، تحدي كل صعاب الطريق ، تهرب منه الوحوش و يهرب منها ، يمطر عرقا كما تمطر سحابات الخريف ، الخريف ذلك المسئول المباشر عن حالة كون الاماكن خالية .

هكذا ، حتي جاء يوم ، تحرك فيه كبي جزلان في نهاية الليل ، إرتبك فرن (احمد حريقة) في ذلك الصباح و لم يكن كبي جزلان موجودا ، لم يأت هذا الصباح الي ( كادقلي ) ، هناك في ( كاتشا ) كانت الشمس خلف السحب الداكنة تمارس غروبها الحزين و هي تعرف ان كبي جزلان لم يأت من ( كادقلي ) ، البروق تضئ ظلمة الليل دون ان يلتمع بالاضواء جسد ذلك المارد المقاتل ، أرعدت السماء و لاحظت غياب تلك الصرخة المحتجة و لم تجد الضفادع من تثيره ياصواتها ، غاب كبي جزلان في تلك الرحلة الاخيرة مخلفا ذلك الفراغ في كل مكان كان يجب ان يكون فيه ، هكذا ، بين ( كاتشا ) و ( كادقلي ) ، في رحلته الوجودية ، رحلة البحث عن الرغيف ، كبي جزلان تلتهمه الوحوش .

يحيى فضل الله العوض

Quote: هذا أصلا مصطلح موجود ، وقد "لفحه" ابوبكر بدون أن يدري ماهيته... تفاعل القراء لا يضيف شيئا الى النص ، وانما هو يشير إلى مدى استجابتهم للنص... يعني "شتيمة" نواي للبيطار هي جزء من كتابة ابوبكر التفاعلية؟ ههههههه هذا "التفاعل" يحدث في أوضع البوستات ههههه

سلام يا خواض
الا يخلق تفاعل القراء نصاً موازياً و قراءات متعددة ؟
الا تزيد القراءات المتعددة/ النصوص المتوازية المعرفة التراكمية عند الكاتب
وبالتالى تضيف بشكل او اخر الى النصوص المستقبلية
للكاتب اضافة نوعية مبنية على تلك القراءات ؟

Quote: ناس حاتم وقريبي قالو مشغولين وإشغل المشاغبين بأنفسهم وعجل بالنصر وبالفرج

لا اعتبر نفسي مشاغبا يا دكتورة ..
ليس بهذا الشكل على الاقل.
بيد ان دعائك لي (او على) جميل في جوهره ..
من الجيد, ومن الحكمة بمكان, أن ينشغل المرء بنفسه.

الحبيب محمد حيدر
هي مداعبة
ثم ان البورد صارت الكتابة به ك مشي البهلوان
علي حبل مشدود بين عارضتين ارتفاعهما فوق السحاب .
تصدق الواحد يفكر خمسين مرة حتي يكتب .
ثم السلام يغشاك والمعاك دفا وشفا وتبرأ من المداعا
ولك الدعاء أجمله وأكمله وأصدقه

الحبيب محمد حيدر
العراك الفكري والفلسفي في ما يخص السودان حبابو
الا انني لا طاقة لي به
وارأك طويل الباع ذو منطق فلا تأخذ الامر اكثر من مداعبة
وواصل جلادك النبيل

أهلا أستاذ أمير

الكتابة التفاعلية مختلف حولها من حيث إبداعيتها...

وهو مضطلح موجود، والبيطار يكذب بادعائه ، وهذا ليس من شيم الاستنارة الضاحكة؟؟؟

وانما خصيصة أصيلة عند:

المتفسّحين ، وهم "سائحو "الانترنت هههههه

اهتمامي بالموضوع قديم جدا : هاك هذا الرباط من "لاهوت الوردة":

رابط لنموذج عربي عن الرواية الرقميةرابط لنموذج عربي عن الرواية الرقمية

سلام الاستاذ الخواض
تارى الدكتور سارح بى غنم ابليس و يبيع فى اللبن المسكوب .. اصلوا ما كنت متخيلوا يغرف من المنبع ويسقى عطشى المنبر .. كان كده نفتش ليهو عن اسم تانى يليق بالمنزلة الجديدة .

ما زلت يا خواض، أوف بوينت!!

النص المتفرع والكتابة التفاعلية في رابطك* مسألة مختلفة يا تعبان!!

هامش خواضي:
* الرابط ما شغال، لكن ممكن تصل لمحتواه بالغوغلة

كله منك يا قسوم، يا حاقد.
ندهتا الشيطان؛ فأفسد علينا ميوس وحينا!

دكتورة اخلاص سلامات ..

عنيت ان من المفيد الانشغال بالنفس ..
على ذات النحو الذس تفعلين, وفي مجال محدد كالادب الخ .. المريخ في حالتي , او ساس يسوس دان يدين دين وهكذا ..

مودتي وتقديري

الحبيب محمد حيدر
أجدت التوصيف


مودتي ومحبتي

كما توجد نصوص جيدة وسيئة توجد ايضا كتابة تفاعلية جيدة وسيئة . وهذا لا ينف الاثنين
أي قارئ في ظني لنص يصنع نصه الشخصي الذي قد لا يشبه النص المقروء وان لم يكتب
حقيقة بعض النصوص الموازية تكون ابدع من النص الاصلي
وبعض النصوص المشهورة جدا لم يعرفها الناس إلا بعد الكتابة عنها رغما عن قراءتهم لها

الكتابة التفاعلية والأدب المتفاعل

فضاء العلاقة بين النص والقاريء, وفضاء العلاقة بين النص والخالق

أعتقد أن المثير حول الادب المتفاعل هو موت فكرة موت الكاتب .. فالكاتب ما زال حي يفرفر في الأدب المتفاعل او التفاعلي ويدخل في حيثيات الاستقراء ويضيف ويبرر ويوميء بالاشارات هنا وهناك .. وبالتأكيد لا يوجد نموذج او قالب محدد لرفرنست (تشكيل مرجعية) الكتابة الأديبة المتفاعلة او التفاعلية.

Quote: أعتقد أن المثير حول الادب المتفاعل هو موت فكرة موت الكاتب .. فالكاتب ما زال حي يفرفر في الأدب المتفاعل او التفاعلي ويدخل في حيثيات الاستقراء ويضيف ويبرر ويوميء بالاشارات هنا وهناك

المشراااااف..
كتــــللللتها!!
بدل (موت الكاتب) وبقينا في (تعدد الكُتّاب)!!
حكمة والله وحكاية!!
====
إلى حين عودة؛
نعم هو (أدب متفاعل)،
ولكن أفضِّل اصطلاح (الأدب التفاعلي).

====
أسامة يا خواض.. جهّز (هوامشك) النقدية ساي..
كلامي في بوست النذير مشى وجا..

Quote: فالكاتب ما زال حي يفرفر

كما أن التفاعل يكشفه - وإن شئت يفضحه - ويؤنسن العملية الإبداعية. فلو كانت الكتابة التفاعلية أيام موسم الهجرة إلى الشمال لما احتار الناس فيما إذا كان الطيب صالح هو مصطفى سعيد أو لا. (وكأن هناك شبها بين جمالياتها وجماليات غناء القعدات!)

موت المؤلف دي نظرية غلبني اتصالح معاها
فالكاتب يكتب جزءا من نفسه في نصه ان لم يكن كامل نفسه

افتكر ان هناك عدة عوامل تساعد على التفاعل او اللاتفاعل مع النص .. منها نوعية المستهدف اى القارئ .. أكاديمي . متوسط . دون الوسط .. العامل الثانى كيفية بناء النص . ساخر . علمى .مبتزل .فكاهى. او متنوع ... العامل الثالث مفردات اللغة المستخدمة فى بناء النص public language or street language دى ما لقيت حاجة مناسبة بالعربى .. العامل الرابع طريقة توصيل النص اى النشر. رقمى. كتب . جرائد . مجلات ..نكتفى بهذه العوامل.
اعتقد تحديد مستويات التفاعل .. تفاعل إيجابي ..و التفاعل السلبى .. و اللاتفاعل إى النص يكون فى حالة خمول ينشط عند نوفر البيئة الملائمة .. اتفق فى الجزئية مع اخونا ابو سن النص لا يموت بل يكون فى حالة خمول .
تراكم النصوص و تفاعلها ..يقود الى التراكم المعرفى و هذا الحراك. المعرفى يحدث الوعى .. والوعى المنظم يحدث التغير فى المجتمع

مكرر صاحب البوست احزف التكرار .. عندى مشكلة فى النت .. وشكرا ..اخر لى مداخلة فى البوست

افتكر ان هناك عدة عوامل تساعد على التفاعل او اللاتفاعل مع النص .. منها نوعية المستهدف اى القارئ .. أكاديمي . متوسط . دون الوسط .. العامل الثانى كيفية بناء النص . ساخر . علمى .مبتزل .فكاهى. او متنوع ... العامل الثالث مفردات اللغة المستخدمة فى بناء النص public language or street language دى ما لقيت حاجة مناسبة بالعربى .. العامل الرابع طريقة توصيل النص اى النشر. رقمى. كتب . جرائد . مجلات ..نكتفى بهذه العوامل.
اعتقد تحديد مستويات التفاعل .. تفاعل إيجابي ..و التفاعل السلبى .. و اللاتفاعل إى النص يكون فى حالة خمول ينشط عند نوفر البيئة الملائمة .. اتفق فى الجزئية مع اخونا ابو سن النص لا يموت بل يكون فى حالة خمول .
تراكم النصوص و تفاعلها ..يقود الى التراكم المعرفى و هذا الحراك. المعرفى يحدث الوعى .. والوعى المنظم يحدث التغير فى المجتمع

افتكر ان هناك عدة عوامل تساعد على التفاعل او اللاتفاعل مع النص .. منها نوعية المستهدف اى القارئ .. أكاديمي . متوسط . دون الوسط .. العامل الثانى كيفية بناء النص . ساخر . علمى .مبتزل .فكاهى. او متنوع ... العامل الثالث مفردات اللغة المستخدمة فى بناء النص public language or street language دى ما لقيت حاجة مناسبة بالعربى .. العامل الرابع طريقة توصيل النص اى النشر. رقمى. كتب . جرائد . مجلات ..نكتفى بهذه العوامل.
اعتقد تحديد مستويات التفاعل .. تفاعل إيجابي ..و التفاعل السلبى .. و اللاتفاعل إى النص يكون فى حالة خمول ينشط عند نوفر البيئة الملائمة .. اتفق فى الجزئية مع اخونا ابو سن النص لا يموت بل يكون فى حالة خمول .
تراكم النصوص و تفاعلها ..يقود الى التراكم المعرفى و هذا الحراك. المعرفى يحدث الوعى .. والوعى المنظم يحدث التغير فى المجتمع

Quote: المشراااااف.. كتــــللللتها!!

كلمتكم انا صعب لمن اقوم على الثقافة .. هههههه

محمد الامين سلامات
انسنة الادب!!

في البداية اندفعت عشان اواققك .. تاني اخدت لي صنة لانو في حاجة لغوية ما قدرت احاكمها ..

انسنة دي تعبير بحبو جدا .. وبتخيلوا يرتقي اكثر من ارتقاء الانسان (مصدر التعبير) .. الانسنة عندي تحمل شبهة كل الاشياء الجميلة في الانسان ..

عشان كده وقفت وصنيت مساااافة .. لقيت نفسي ممكن اطلق تعبير (بشرنة الادب عن طريق الوسايط المتفاعلة) ..

ليه ؟!

لانو بشرنة دي وان كانت تعبير ضعيف لغويا لكنو يحمل مدولات القبح والجمال في الانسان اكتر من تعبير الانسنة الخالص عندي لوجه الجمال الانساني .. وكذلك الادب المتفاعل ليس خالصا لوجه الجمال لو فهمت ما اعني (والسؤال لاحساسي بعدم القدرة على التعبير)

البنوية وما ادراك ما البنوية يا حفيظ
فكرة سخيفة جدا ..
الكاتب كما البطل لا يموت

تحياتي للجميع
نواى و مشرف تسلمو
لو اخدنا زواية موسم الهجرة مثلا . وفي ظني هي رواية مناسبة كنموذج هنا كون ان جميع القراء قرأت الرواية و كاتبها معروف
هل يمكن لأي كاتب غير الطيب صالح ان يكتبها؟ اقصد كاتب لم يعش ذات حياته المكانية . وماوفرته له من معارف . كاتب آخر عاش ذات حياته في العموم وكتب رواية لها ذات السمات . توفيق الحكيم وعصفور من الشرق
الطيب صالح كتب رؤيته المستمدة من تجربته الشخصية . وما توصل له من مفاهيم ورؤية . فهو كتب قصته الشخصية ولم يكتبها !
فمن حق القارئ ان يتصور ذلك !
لم تصر رواية مشهورة وعالمية إلا بعد الكتابات التفاعلية .
وهذا لا ينقصها بل ان بعض القراء الاذكياء لفتو لها انظار قراء اذكياء آخرين . فنحن نميل لأخذ المشهورين والمعروفين بجدية أكثر من غيرهم بغض النظر عن النص المكتوب كأنطباعية
بخصوص الانسنة
مالها يا مشرف . خليها انسنة فنحن لم نقل ملائكية !

المشرف، حفيظ وهاشم وإخلاص بيتداخلوا في البوست دا بمحبّة شديدة.

كلموني كيف نقدر نخلي الخواض ينظر لنا بمحبّة؟
هو بالرغم من عدم جعوليته، ما عارف ليش ما قاعد ينسى زعلو!!

الخواض مالو؟
والله ماعندو حبة من الزعل.
لايفوتني ان ابارك لبكور في هذا البوست
تحليلاته السياسية في بوست امر نسيت اسمو
المهم كل وكالات الانباء والجزاير قالوا انو محمد بن سلمان ماعندو حصانة رئيس ممكن يتم اعتقالو.
بكور قال ابدا طالما بمثل الملك اذن محصن.
الليلة ناس نيابة الارجنتينا اكدو كلامو.
انا جبت الكلام دا هنا لانو البوست عندو ستة اتجاهات

اها نسيت
مرة قريت كلام للطيب صالح بدري شديد قبل النت
انو بطل قصتو هو محميد . لكنه تفاجأ بطغيان شخصية مصطفي سعيد وتحوله لبطل القصة

بالتأكيد يا ود الشيخ، ناس نيابة الأرجنتين بكونوا قروا التعليق بتاعي هنا في سودانيز

الما عندو محبة .. ما عندو الحبة

..
تلك هي المحجة السمراء

طبعاً يا مشرف، أنا عندي محبّة مع الطبيعة
موضوع حزب الخضر على الواقع دا جادي فيهو
الفترة الفاتت كونت لي جمعية بالدامر منبثقة من فكرة الحزب الأخضر، سميتها:
جمعية أصدقاء الحمير
طبعاً الطب البطري في السودان دا فيهو تلاتة حاجات رئيسية والباقي ونسة ساكت:
- التطعيمات الدورية ضد الأمراض المعدية
- مضاد حيوي اسمو أوكسي تترا سايكلين
- دواء تاني ساحر جداً اسمو أيفرمكتين بشيل كل الطفيليات الداخلية والخارجية

أول نشاط محبّة تجاه هذا الكائن العجيب الجميل الاسمو الحمار
بدينا نجرع حمير الدامر بمعجون هذا الدواء الساحر الذي يعيد الحيوية للحمار بخروج الديدان وشفاء جلده

عندي صورة حديثة وسط خمسين حمار كدا
دخلناهن في مزرعة خضراء

الحمار دا في السودان قدم وما زال يقدم خدمات جليلة
التحيّة لكل حمير السودان من دون فرز

مرّة قلت ليكم لو متّ وجوني الجماعة ديك في القبر وسألوني عن أكثر شيء أدهشني في الدنيا؟
قلت ليهم فوز أوباما
لكن هسّ بقول أكتر حاجتين أدهشني محلياً في السودان هنّ:
التراكتر والحمار
التحيّة كمان لجميع التركترات، الدسكات، الحراتات، والحصادات.
لو ربنا مدّ في المحبّة
بجي أحكي ليكم ليش شركة كاتربلر سموها كاتربلر

Quote: الكتابة التفاعلية مختلف حولها من حيث إبداعيتها... وهو مضطلح موجود، والبيطار يكذب بادعائه ، وهذا ليس من شيم الاستنارة الضاحكة؟؟؟ وانما خصيصة أصيلة عند: المتفسّحين ، وهم "سائحو "الانترنت هههههه اهتمامي بالموضوع قديم جدا : هاك هذا الرباط من "لاهوت الوردة":

ابوبكر يقصد بالكتابة التفاعلية - حسب فهمى- بتوفر نص ما (فكرة ) فى ذهن الكاتب بدون
التفاصيل او التداعيات الكاملة او لنقل كخطوط عامة ويطرحها فى الاسفير - ماعون المتلقى -
عندها يتداخل "الاسفيريون" سلباً ، إيجاباً ،إختلافا او حتى (شتما احيانا كما وصفتها يا خواض*)
هذه التداخلات/ التفاعلات هى التى تصنع روح النص المتبقى وإتجاهاته ...و يعتمد عليها فى تكملة الحكى
وفى غيابها نجد الكاتب يفقد القدرة/ الحماسة على مواصلة الكتابة .
* هذه الشتيمة قد تحدث انحرافا كاملا للسرد حسب رؤية الكاتب - تجنبا لمأزق اخلاقى لم يقصده اثناء
الكتابة مثلا- عندها يلجأ الى الشرح / التعديل الخ كل ذلك يتم داخل النص الغير مكتمل بعد..

رفقا بالمستنير لو كان ابكر اقتبس موضوعو من يحيى فضل الله ثقوا يحيى هيمسلف اقتبس تداعياتو من اشيني وا شيبي صاحب الرواية المشهورة الاشياء تتداعىthings fall apats
فشنو دعوا المستنير ما دعاكم
وجميعا نتتاعى
المافي شنو
Carry on Mustaneer

ابوبكر
فجأة كده هف لي انو كلامي بتاع الماعندو محبه ممكن يتقري غلط ..
لمن كتبتها كان ببالي ان ارد على كلامك اللطيف بانو نحنا ذاتنا غير المحبة عندنا شنو ..

لا أبداً وحياة المحبة يا مشرف

Quote: سلام الاستاذ الخواض تارى الدكتور سارح بى غنم ابليس و يبيع فى اللبن المسكوب .. اصلوا ما كنت متخيلوا يغرف من المنبع ويسقى عطشى المنبر .. كان كده نفتش ليهو عن اسم تانى يليق بالمنزلة الجديدة .

أهلا أستاذ نواي

وماذا نفعل مع "المتفسّحين" ؟؟؟ههههههه

متابع لما يكتب .

فقط قرّرت أن أمزج الطريقة القديمة بالتفاعل اللحظي،،،،

ليه؟؟؟

حتى نعود إلى فضيلة "الاستماع إلى الآخرين" بعمق واحترام وتوقير،

وأن نفكّر كثيرا قبل أن نرد عليهم،

خاصة أن المواضيع هنا ترتبط بالمؤلف الضمني والحقيقي والتأويل وموت المؤلف وحياته أو بعثه من جديد...

في مقالاتي عن "استعمال النص " تطرّقت إلى طرف يسير منها....

أرقدوا عافية...

Quote: خاصة أن المواضيع هنا ترتبط بالمؤلف الضمني والحقيقي والتأويل وموت المؤلف وحياته أو بعثه من جديد...

و الواحد لما تقفشو بالثابتة
يقول ليك كنت قاصد اتناصص مع فلان !
غايتو حكاية التناص دي بقت مرّاقة ساي !!

...
ياخ اذا كان حتى مصطلح ( التلاص) المستحدث
حاول البعض نسبته لأنفسهم !
معقولة بس ؟!!!
يعني عز الدين المناصرة راح في الكازوزة ! 😏

يا أخوانا، لاعب الوست بتاع لندن دا، الجابو بوستات المثقفين دي منو؟!

جاني طلب عبر المحيطات من واحدة معجبة إعجاب شديد بكتاباتي الأدبية،
وطلبت مني طلب رقيق أرقّ من شنو كدا ما عارف
قالت لي: خصمتك بدنقلا وآثار أقدامك في الرمال
تتم لينا بوست دوار عطبرة والنوباوية وكرِيقة القهوة

لا لا كان كدا خلاس !😏

التنطع كعب

مرّة في ستة وتسعين زرت مع مامون التجاني ببرلين سودانية اسمها سهير متزوجة ألماني مسمي نفسو عبد الله،
عبد الله كارثة كبيرة وبعرف زقاقات أن درمان والسودان أحسن من سهير وسودانيي برلين،
قصّة معرفتو الكبيرة دي كانت مارضة ليك السودانيين مرض شديد،
المهم قبل نفاج عبد الله دا يكبر
دخلنا أنا ومأمون شقة عبد الله وسهير لقيت في الصالة صورة كبيرة لزول راكب حمار وشايل قش،
قبل السلام والتعريف قلت ليهم بشلاقتي المعروفة:
الصورة دي في دنقلا جنب البنطون
سهير قبل تسلم علي قالت:
الليلة يحلنا الحلّ بله من عبد الله
وبس عبد الله مسك ليك في الصورة ودنقلا وجرى جاب البروجكتر
وهاك يا صور
برانا ليك جنس بري
البري دا كلو بالعامية السودانية وجاب العود غنى لينا بالدنقلاوي
أول مرّة في حياتي زول يهزمني في النقّة والدجل
كان عبد الله دا
يعني أنا لمان قلت الصورة في دنقلا
نظام الولد مقددا
جاب لي بيرة قلت ليهو: ما بشرب
قال لي: نجيب ليك عرقي معفن

بعد داك اكتشفت انو البيرة كانت خالية من الكحول