هل يمكن أن تصدق كلام البشير هذا ؟!#

07:17 AM November, 20 2018

سودانيز اون لاين
زهير عثمان حمد-السودان الخرطوم
مكتبتى
رابط مختصر

البشير- ندير البلاد للتقرب الى الله

وصف ا البشير الأزمة الاقتصادية التي تعصف بحكومته بأنها ” ابتلاء من الله” في وقت أكد فيه ان ادارته لشؤون البلاد من اجل ” التقرب الي الله”.
وقال خلال حشد من طلاب حزب الموتمر الوطني الحاكم الاثنين انهم لن يتقربوا لله بغش وخداع الناس، مشيرا الي ان حزبه لن يزور الانتخابات المقبلة.
ويمر السودان بأزمات متواصلة منذ انقلاب البشير على السلطة الشرعية بانقلاب عسكري وصنفت مؤسسات أكاديمية السودان من ضمن الدول الفاشلة مثلما يجي ترتيبه متقدماً ضمن أكثر الدول فساداً في العالم.
وأضاف ان الصعوبات الحالية في البلاد الي زوال.
مشيرا الي ان المرحلة المقبلة ستشهد تحسنا اقتصاديا عبر تنفيذ عدد من المشاريع التنموية.
وجاري البشير الطلاب الذين كانوا يهتفون ويطالبون بترشحه لفترة رئاسية جديدة
وردد معهم شعارات إسلامية لم تعد ترددها قيادات الإسلاميين في السلطة مثل ” لا لدنيا قد عملنا نحن للدين فداء …فلترق كل الدماء”

* هو حتي ما عارف عقيدة الاسلاميين تغييرت بقت نحو النقاء !!!

سلامات

أشهد الله على قولي التالي:

بعد اتخرجنا من الجامعة دخلت الخدمة الإلزامية (الشرطة الشعبية)، وتم توزيعنا على الأقسام حسب منطقة السكن، اتوزعت على قسم الدروشاب، معاي دفعة من المعسكر، كنا 12 جامعي موزعين نبطشيات وفي يوم قالوا بكرة كل الجامعيين يجمع، ما كنا عارفين ليه، سلحونا بكلاشات (من غير ذخيرة) وركبنا البوكس الميتسوبيشي الكحلي واتجهنا صوب أبو حليمة شال بحري (ود اب حليمة عند البعض) طبعا عرفنا اننا ماشين شكل تأمين لزيارة السيد الرئيس لتدشين مشروع بابورات ابو حليمة، أكيد أننا مشينا منظر ساااااي، لأنهم سلمونا سلاح من غير ذخيرة (لا أعتقد أنه لو الكلاش مذخر كان في زول ح يفكر إنه يغتال البشير) المهم،،

بدا الاحتفال ب( هي لله، و لا دنيا قد عملنا، و (الزمن داك كان لسة) أمريكا روسيا قد دنى عذابها) وإذ فجأتن (بعد إذن أستاذنا جبرة) يصعد السيد الرئيس ليبدأ الطربقة، وصدقوني، لمن تسمع الطربقة مباشرة من التلاليش إلى صيوان الأضان تحتلف لمن تسمعها من التلفزيون أو الرادي، سمع الطربقة مباشرة بيخلعك، ويخليك تتلفت وتتسائل، (يا ربي الزول دا قال الكلام دا؟؟!!!!!)

قال خادم القرآن السيد الرئيس (وكان هوس البترول واستخراجه وآماله وأحلامه في أوجها):

"يا جماعة، حكى لينا مواطن سوداني قال يا جماعة كبيت بنزين من طرمبة، بنزين سوداني يا جماعة قال لمن طلعت من الطرمبة سمعت كركبة من التنك، قال يا جماعة وقفت العربية وفتحت التنك، عارفين لقى شنو يا جماعة؟؟؟" الجماعة كلهم صانيييين، كرر السؤال "عارفين لقى شنو يا جماعة؟؟؟؟" لسة الصنة مستمرة من غير أية همهمة

"لقى التنك بيكبر يا جماعة الله أكبر، الله أكبر"

أقسم بالله العلي العظيم أنه عمر البشير قال الكلام دا وأنا شاهد على مقولته دي، يبقى فعلا ح أصدق أنه قال أنه حكمه تقرب لله

واللة يالمعز دي اوسكار عديل ....!!!!

لووول

مغير الأحوال من التنك كان بكبر...لي الحديد تسب ليهو دين عشان يشتغل

هذا كما يقولون حديثُ الـمُسْتَمْلَحُ من الكذِبِ بأن تحارب القرود معنا أو يكبر خزان الوقود كما ذكر فخامته لوجود بنزين أو نفط سوداني في إحشائه. فالساسة وكل من إعتلي منصة لا ينطق إلا كذباً ومع طول مدة مكوثهم وبالضرورة كذبهم أصبح حديثهم افكا ولو صدقوا – ويقيني أنهم لم يفعلوا ولن يفعلوا – حتي أصبح عندنا السياسي الناجح هو من يتقن فن الكذب والخداع.
الخالق عز وجل ميزنا بالعقل عن سائر المخلوقات لنسمو بأنفسنا فوق هذه الخرافات والمعتقدات البالية والتي ما أنفكت تساهم في تخلف المجتمع وتسئ حتي للعقيدة.
وكفي بالمرء كذباً أن يحدث بكل ما سمع فخامة الرئيس