نفحة من اوتار أحمد ربشه و دفقة من انغام على السقيد و رعشة من جذب احمد شاويش
عالم مهول من الطرب الباذخ، وحضور آسر وجذاب
مجاهد عمر اخر الناس السمحين
تبدا السمع فى حضرته الوثيرة، وما تشعر تانى الا و انت أسير عند حشود جبارة من التطريب والتنغيم و التنعيم العالى يدخلك من كل نواحى الجمال ويستعمر فيك كل أقاليم الدهشة
مجاهد كائن جميل و فنان اصيل فى ابداعاته الخاصة و فى غناء التانين
مسك دربه من البداية بعد ما اينع و اخضر مع عقد الجلاد، وعرف انه مثمر و ممكن يستطيل ويلامس هامات و ذرى الطرب الحقيقى ثبت اصله فى ارض السمع السودانى الحقيقى، و امتدت فروعه لغاية سماوات الابداع المجيد
يكفى انه هو السمع و عرف و انصت و طرب ل صوت و اداء اسرار بابكر، واهدانا تكملة حلقات الاسورة البديعة المكونة من عائشة و منى و فاطمة و مهلة
شكرا يا مجاهد
شكرا ليك و عليك
يا اخوانا قاعد تسمعو مجاهد ؟
Post: #2 Title: Re: مجاهد عمر --- آخر السمحين Author: Ahmed Yassin Date: 11-15-2018, 08:21 PM
هسي انت يا ابوذر بابكر الواحد يقول ليك شنو؟ يا سلام ياخ.. كل يوم الواحد بكتشف فيك حاجة سمحة سمحة سمحة عارف ذوقك دا .. يدل على انك فيك جينات فنية حاحدد ليك كم فنان .. اكيد واحد منهم عنده صلة دم معاك .. اصلا دي خبرة عبدالحميد يوسف - عثمان حسين - حسن عطية - احمدالمصطفى لازم واحد يكون قريبك مجاهد .. منو مابسمع مجاهد بقلبو
Post: #3 Title: Re: مجاهد عمر --- آخر السمحين Author: يحي قباني Date: 11-15-2018, 08:58 PM Parent: #2
شكرا ابا ذر ... مجاهد زول جميل جميل جميل ...
( الأهلية .. محمد ود الرضي )
الأهلية كملت يا حبيب راحت
يا حليل شمس المحنة الغربت طاحت
بسم الله ابتديت متل البرق لاحت
فى الشين والفسل بقينا نتباحت
طال الكان قصير والعالى اتاحت
والصولات حليلن ملكتن راحت
مالك يا زمان شبعتنا هولا
لبست الناس تيابا حاشا مى هولا
يات من كان يجي دماعو مبهوله
ولله راحت بقت البواجهولا
مالك يا زمان شبعتنا وح ووحيح
صح الدون كضب
كضب العوالى صحيح
يات من كان انا جعلتو لى صليح
عقرب حزّه لى ويا نفسي زين ومليح
فى احوال الزمن صار الفكر حاير
والياباك خلو عندو شن داير
فوق اهل الفكر كاس الوحيح داير
نفد سوق النفاق سوق السمح باير
تب الشباب ان بقا كواس
تب الصبى ان قطع المروة خلاص
تب الشايب ان بقى وسواس
تب الاقربين الاتفاتتو الامغاص
Post: #4 Title: Re: مجاهد عمر --- آخر السمحين Author: جمال ود القوز Date: 11-15-2018, 09:14 PM Parent: #3
مجاهد بيغني بأحاسيسه وغناهو مليان تطريب ..
شكر أباذر ..
Post: #7 Title: Re: مجاهد عمر --- آخر السمحين Author: أبوذر بابكر Date: 11-15-2018, 09:30 PM Parent: #4
ود القوز
يا جمال دنيانا
ياخ بالغت والله
قبل ما اشوف جمالك هنا
حلفت قبانى و خسمتو يدينا الغيمتين
وهدا انت ظللتنا من هجير الشغف بيهن
شكرا ياخ
من هنا لغاية ابعد غيمة فى الكون
Post: #6 Title: Re: مجاهد عمر --- آخر السمحين Author: أبوذر بابكر Date: 11-15-2018, 09:25 PM Parent: #3
ازيك يا قبانى
بالله شفت الزول ده سمح كيف
وبختار يغنى ل منو و ل شنو ؟
عليك الله يا يحيى
فضلا لا امرا
الكائن العجيب ده عنده شغل اسمه
غيمتين بونسو فينى بيك
سالتك بالذى ركز الطرب معبد وسوى النغم عليه مقام
"ونعتذر ل شيخنا القدال، عشان لخبطنا ليه كلامه"
تنزل لينا الاغنية دى هنا
وخلى الناس تطرب و تسعد
Post: #5 Title: Re: مجاهد عمر --- آخر السمحين Author: أبوذر بابكر Date: 11-15-2018, 09:20 PM Parent: #2
احمد ياسين والحضور السنين و ثمين
شكرا ياخ على حسن ظنك وسماحة فنك
عارف الحاج عبد الحميد و معاه ابو على ديل كانو اولاد حلة الوالد
وابو عفان و الوالد كانو اولاد كار واحد زى ما بقول اهل مصر
اما احمد المصطفى بركات يمكن عرق المحس شارى فينا و رابطنا معاه
والاهم من ده كله
اننا كلنا من طين السودان الطاعم و عمر و مليان نعمه و فن و جمال
شكرا تانى يا فنان
Post: #8 Title: Re: مجاهد عمر --- آخر السمحين Author: يحي قباني Date: 11-15-2018, 09:36 PM Parent: #5
غيمتين بونسوا فيني بيك ...
تحياتي ابو ذر ... اسعدتنا في حضرة الزول الجميل ده ...
Post: #9 Title: Re: مجاهد عمر --- آخر السمحين Author: أبوذر بابكر Date: 11-16-2018, 10:40 AM Parent: #8
تسعد ايامك يا يحي
مجاهد زول متفرد والله بالجد
تناغم حميم بين الصوت والاداء و العزف
والنتيجة إبداع طربى عالى و مبهج
Post: #10 Title: Re: مجاهد عمر --- آخر السمحين Author: أبوذر بابكر Date: 11-16-2018, 10:47 AM
صوت مجاهد
زى جريان المويه فى الجداول و داخله بتسقى فى الحيضان
و صوت العود عند مجاهد
ممكن يرويك لو كنت عطشان
والله جد
Post: #11 Title: Re: مجاهد عمر --- آخر السمحين Author: عمر نملة Date: 11-16-2018, 01:23 PM Parent: #10
سلام سنين قليلة كنت في مغية هذا الص ت الشجي القوي الصافي التحية له اينما كان...عمر زقازيق
Post: #12 Title: Re: مجاهد عمر --- آخر السمحين Author: أبوذر بابكر Date: 11-17-2018, 12:13 PM Parent: #11