الحكومة تستغل قانون نزع السلاح كسلاح لنهب ممتلكات الشعب

02:05 PM November, 14 2018

سودانيز اون لاين
محمد النيل-
مكتبتى
رابط مختصر

...من اقوال الصحف اليوم:

شراء الكهرباء عبر البطاقة الالكترونية في ديسمبر!

ماهى الا محاولة بائسة اخرى
لاجبار الناس لفتح حسابات والتعامل عبر البنوك لإعادة السيولة اليها
ان النهب لمقدرات الشعب الفقير مازال مستمراً ليلا ونهاراً
عبر استنان قوانين واصدار قرارات غبية تساهم في معاناة المواطن
ومن هذه القرارات اللصوصية اجبار البائع والمشترى للعقار و السيارات ان يتعاملا بالشيكات البنكية من خلال عقد البيع والا لن يكون يوجد تسجيل لممتلكاتهم.
وآخر عمليات نصب الحكومة هو استغلال قانون جمع السلاح كوسيلة لنهب البيوت بعد ان علمت ان الناس قد تحاشوا توريد اموالهم في البنوك وقفلها بخزن حيث انتعشت تجارة الخزن مؤخراً لفقدان المواطن الثقة في النظام المصرفى، لان البنوك تبتلع اموالهم كالافعى ولا تعيدها لهم الا في شكل فتافيت لا تغنى ولا تسمن من جوع
فمؤخرا وباسم قانون جمع السلاح
داهمت قوات الامن بيوت اهلنا بالشرق بعد ان علمت ان الرشايدة يملكون اموالاً في بيوتهم وخاصة من العملات الصعبة وهذا معروف عن هذه القبيلة منذ القدم وهذا من حق اي بشر ان يخزن امواله في بيته
المهم باسم قانون جمع السلاح هجمت على تلك البيوت قوات النهب الامنية ولم يكن تركيز القوات الامنية على السلاح فقط وهو اصلاً سلاح مرخص منذ عقود مضت بل كان تركيزهم وهو السبب في مصادرة ونهب اموالهم النقدية والذهب المدكن.
وستستمر الحملة في جميع انحاء السودان باسم جمع الاسلحة للوصول للاموال المدكنة في بيوت الناس وسنرى ذلك قريباً في ابو ادم والصحافة وكل الاحياء
ومازالت الحكومة كل يوم تطلع بقرارات جديدة لنهب حقوق الناس ومصادرة حريتهم في كيفية التصرف باموالهم
وما اجبار الناس بشراء الكهرباء عبر البطاقات الالكترونية الا خطوة واحدة ستليها خطوات باجبارهم بشراء الرغيف الزيت والملح والشطة والدكوة كمان عبر تلك الكروت
وحتى ست الشاي سيتم اجبارها لحمل جهاز الاكترونى لمحاسبة الزبائن الاكترونياً واجبارها بدفع ايجار الكراسي عبر خصم القيمة غصباً عنها من حسابها في البنك
وغصباً عن عين الجميع سيتم خصم قيمة النفايات والضرائب والجبايات من حسابك
وانت مضطر تورد يومياً قروشك في البنك لتمارس حياتك اليومية
ماذا نحن فاعلون؟؟؟
مرفق ادناه فيديو الكشات الجائرة في شرق السودان..

وقد ذكر المتحدث باسم القوة التى قامت بالحملة المتخصصة بتفتيش السلاح في فيديو لا اعرف كيف احمله هنا في البوست
انهم وجدوا اموالا وذهباً و عملة صعبة
وعملة سودانية مخزنة في البيوت التى فتشوها ساهمت في قلة السيولة قاموا بمصادرتها جميعاً
تخيلوا ناس يحتفظون باموالهم السودانية في بيوتهم آمنين فيها
تنزع اموالهم السودانية على اساس انها تتسبب في شح العملة السودانية؟؟؟
اي قانون هذا
باي وجه حق
هل هناك قانون في كل الدنيا يجبر الناس بتوريد اموالهم في البنوك؟؟؟
وقال انهم وجدوا دهب معد للتهريب
كيف عرفوا انو معد للتهريب طالما هو في بيوتهم؟؟

هل قبضوا اصحابه وهم على حدود الدولة يحاولون التهريب؟؟
كيف علموا انه للتهريب؟؟
وهل الاحتفاظ بالعملة الصعبة في البيوت ممنوع بالقانون؟؟؟
لا يوجد تفسير لذلك غير انه نهب دولة منظم لمواطنين دون وجه حق
اذا افترضنا انه مهمتك نزع سلاح
فليس لديك امر آخر بالقيام باي مهام اخرى
خلط غريب

......سيسير الشعب كالنعاج امام الحكومة
تفعل فيهم ما تشاء
ستجبرهم بتوريد اموالهم التى في ايديهم في البنوك
ستجبر صاحب الدرداقة حمل جهاز الكترونى لمحاسبة الزبون في قيمة التسالى والفول المدمس والنبق والقونقليس والمنقة بالشطة
وتاخذ من كل عملية رسوم (transactional fees) ضريبة اجبارية
وكذلك مع بتاع الركشة والفارش طماطم وبايع المساويك
فضلا عن البقالات والدكاكين والاكشاك وبتاع اللبن
سيصل تدريجياً استحمار الشعب
وعندما تتم السيطرة الكاملة من الحكومة على السيولة
سيتم ابتزاز الناس من قبل الدولة
الدولة ح تكون دايرة تعرف كل المشتروات والمبيعات والسيطرة عليها لتضرب اكبر كمية من الجبايات
تدفع قروش للمدرسة ح يعرفوا دفعت لمنو وكم وليه
وح يكون عليها رسوم اضافية تدفع للجبايات
تشترى قطعة ارض ح ياخدوا منها ضريبة مبيعات
كل الاوراق ح تكون مكشوفة
واللي ح يكون شايل عملة ورقية في ايدو ح يكون مخالف للقانون لانو ما فتح حساب بنكى بيها
ول ح يجى يوم وتصبح العملة الورقية expired منتهية صلاحية الاستعمال تبلها وتشرب مويتها لانك ما وردتها في البنك في التاريخ المحدد
لن تستطيع شراء ما تريده عبر الكرت الالكترونى كما تشاء
فمثلما اصبحت الصرافات لها حد اقصى للصرف ستكون هناك حدود لاستعمال الكرت
ستذهب الى الترزى لشراء جلبابين
سيقول لك الترزى
الكرت رفض يسحب رغم وجود المليارات في حسابك
يطلب منك الاتصال بالبنك لمعالجة الامر
دا اذا البنك فاتح
ولو صادف البنك فاتح
سيسألك الموظف عايز تشترى كم جلابية
تقول ليهو اتنين
يقول ليك ح نصرح ليك بشراء جلابية واحدة كفاية عليك الليلة
بكرة ح نسمح ليك بشراء التانية
انت اصلا ح تلبس الاتنين الليلة؟؟
ولو عملت جوطة
يقول ليك لو ما عاجبك اتصل بجهاز الامن الاقتصادي
ولو مشيت طلمبة البنزين كرتك لن يصرف اكتر من خمسة جالون في اليوم او الاسبوع وفي طلمبات محددة لكل كرت تختلف من صاحب الكرت الاخر
وكرتك ذااااتو يوم التلاتاء ما بيصرف بنزين الا يوم الاحد والخميس
لو التنك بتاعك فاضى تقول لى ود خالتك ياخ لو كرتك بيصرف يوم الخميس يلاك يا محبوبى نغنى ليهو
برجع ليك صرفك يوم الاحد
كلام يبدو خيالى
لكن كلو وارد
...

كلما طال امد الخنوع لهذه السلطة
كلما تحكمت واستفحل ظلمها
كان في التركية السابقة يجمعون الجبايات بوضع كديسة داخل سروال المواطن لاجباره لدفع الضريبة
الان الكديسة سيحل محلها الكرت الالكترونى
الكرت الكديسة

فبدلاً ان تستغل الحكومة التكنلوجيا لمصلحة الشعب
ستسخدمها كسلاح فتاك محرم ضد الشعب

توقعوا من ثعلب الحكومة كل شيئ
الان البداية بكرت الكترونى لشراء الكهرباء فكرة خبيثة
بل هو الجمرة الخبيثة الحقيقية
التى ستفتح آفاق حرجة

الناس ح تقيف صف عشان تورد قروش في البنك عشان تمشي تشترى الكهرباء
واغراض أخرى مستقبلا ًتخيل!!!!!!