Post: #2 Title: Re: النت دا مليااان غُني سمح إهداء لــ ول أبا � Author: محمد حمزة الحسين Date: 11-13-2018, 12:10 PM Parent: #1
وليدكو دى سمحه دروبا ...عاجبني بي طبعا وأسوبا وليدكو دى...
Post: #3 Title: Re: النت دا مليااان غُني سمح إهداء لــ ول أبا � Author: محمد حمزة الحسين Date: 11-13-2018, 12:41 PM Parent: #2
سواقها قام النيسان من النهود للحمرهـ يباري فج القيزان شال السميحه القمراااا...
: : : : : مع التحيات لله الزاكيات .
Post: #4 Title: Re: النت دا مليااان غُني سمح إهداء لــ ول أبا Author: محمد حمزة الحسين Date: 11-13-2018, 12:47 PM Parent: #3
Quote: سواقها قام النيسان من النهود للحمرة يباري فج القيزان شال السميح القمرة ... الشابه فوقي النيران اللهيب بي جمرة شوق الشتيل الرندل الــ مي من السمرة ...
هج بدور يتقندل خرابة فوق البندر .. سواقها قام النيسان من النهود للحمرة دار ماعمارا فيها الا كان تتبدل شيف هبوب النقعة همبريبه السكر زرعنا داكو البتق تيرابه شيّل خدّر... نموت بي شوقي في السحاب المطر حراية الهجير اكان اموص الحنضل...
كيف ام طريف ماتشوفه شنو البيبورد جوفا.. سواقها قام النيسان من النهود للحمرة ... عيانة تشكي ظروفه عين بالسهر مختوفه تصحي وتنوم بي خوفه دماعها شو مزروفه، الروح قسم شحتافة حاله مي مالوفه علي وحواحة و حليله ديك الروقة...
عيشتا حرام من دونة حِبِيّبْ الليمونة . سواقها قام النيسان من النهود للحمرة... غبينة هم ممحنونة فوق التِكِيل مسجونة... قسم ماطيبة فاقدة الرويحتو حنونة ننم ونقوقي فوق الهموم مدفونة... حردانه الزاد كوز المي حبة تمرة....
سواقها قام النيسان من النهود للحمرة يباري فج القيزان شال السميح القمرة ... الشابه فوقي النيران اللهيب بي جمرة شوق الشتيل الرندل الــ مي من السمرة ...
Post: #5 Title: Re: النت دا مليااان غُني سمح إهداء لــ ول أبا Author: Biraima M Adam Date: 11-14-2018, 11:46 AM Parent: #4
سلام يا ول أبا محمد حمزة
شكراً لهذا الجمال ..
Quote: قسم ماطيبة، فاقدة الرويحتو حنونة، ننم ونقوقي فوق الهموم مدفونة...
طبعاً، الشعب السوداني يعرف أغاني الحنين والشوق .. في الشمال .. كالطنمبور .. لكن لم يستمع لأغاني الحنين .. في رمية الجراري في شمال كردفان ..
المرأة الكردفانية مبدعة في أشعارها ..
تسلم .. وجاييكم بعد الدوام ..
بريمة
Post: #6 Title: Re: النت دا مليااان غُني سمح إهداء لــ ول أبا Author: Biraima M Adam Date: 11-14-2018, 11:58 AM Parent: #5
يا سلام .. شيئ رائع ..
بريمة
Post: #7 Title: Re: النت دا مليااان غُني سمح إهداء لــ ول أبا Author: MOHAMMED ELSHEIKH Date: 11-14-2018, 12:20 PM Parent: #6
الليام دي كاي بوي
Post: #8 Title: Re: النت دا مليااان غُني سمح إهداء لــ ول أبا Author: Biraima M Adam Date: 11-14-2018, 12:20 PM Parent: #6
كتب شاب أرتيري تعليقاً علي هذا الفيديو يقول ..
Quote: Othman Ali
ها انا ذا ولدت في ارتريا وجئت للسودان وعمري 9 اشهر نعم فقط 9 اشهر وها انا ذا اليوم خريج اداره اعمال ولكن اتساءل لماذا كل هذا الحب للسودان اكثر من ارتريا ؟؟ ربما هذا التنوع وهذه الموسيقا وهذا الشعب الطيب الذي وبالرغم من نعته لي بلاجئ لكني احبهم احبهم جدا كلهم غربا وجنوبا وشمال السودان وطني الأم ❤ الذي لم يبخل علي بشئ لاجئ♡
ونحن نحبك يا عثمان علي ونحب الشعب الأرتيري الشقيق .. الموسيقي والغناء السوداني لعبتا دوراً كبيراً في ربط السودان بجيرانه .. ومازال الفن يبدع في أكتشاف علاقات الشعوب.
بريمة
Post: #9 Title: Re: النت دا مليااان غُني سمح إهداء لــ ول أبا Author: Biraima M Adam Date: 11-14-2018, 11:02 PM Parent: #8
Quote: اللخيضر التليع كاتلنا بالوجيع انا خفتا من الزمن دا كان قمنا ل النجيع بنخلي البيوت سريع انا خفتا من الزمن دا بنوجه القبله بنموت بلا سبلا انا خفتا من الزمن دا تيرابوا شالوا جي عجاجوا كتكر كي انا خفتو من الزمن دا وتمو ليهو سنين في ليبيا مغتربين انا خفتا من الزمن دا خلي القليب حزين ليهو مشتاقين انا خفتوا من الزمن دا الوادي ابو شبلا بتسمع حنين إبلا انا خفتا من الزمن دا الخيدر التليع كاتلنا بالوجيع انا ختا من الزمن دا
بريمة
Post: #10 Title: Re: النت دا مليااان غُني سمح إهداء لــ ول أبا Author: هاشم الحسن Date: 11-15-2018, 03:20 AM Parent: #9
يا سلام يا دجانقو، في ياتو خلا نشبتك نشاشيب الفيديو دا! ياخي دا يمكن يكون أحلى وأصدق فيديو لأشغال الجن الكردفاني دي. الأداء غير المتكلف ولا المصطنع واللمحات الراقصة العبرة جدا والمناظر والجمال الطبيعي يمين الزول مدين بشكر كبير خالص للزول العمل اليوتيوب وقرب مننا البعيد..
Post: #11 Title: Re: النت دا مليااان غُني سمح إهداء لــ ول أبا Author: معاوية الزبير Date: 11-15-2018, 04:23 AM Parent: #10
يا محمد حمزة الناس مودّين البلد للشرق، انت مالك مغرِّب
هذا والطيبات الصلوات لله
Post: #12 Title: Re: النت دا مليااان غُني سمح إهداء لــ ول أبا Author: Biraima M Adam Date: 11-15-2018, 05:49 AM Parent: #11
ود المدير، أستلم .. يا حليلنا الفول نجح .. يا حليلنا الفول نجح .. يا حليلنا الفول نجح ..
بريمة
Post: #13 Title: Re: النت دا مليااان غُني سمح إهداء لــ ول أبا Author: Biraima M Adam Date: 11-15-2018, 07:07 AM Parent: #12
ول أبا هاشم، تعال شوف النموذج دا من دار حمر .. الشعب السوداني مبدع أبداع بلا حدود ..
بريمة
Post: #14 Title: Re: النت دا مليااان غُني سمح إهداء لــ ول أبا Author: علي عبدالوهاب عثمان Date: 11-15-2018, 07:38 AM Parent: #13
حبيبنا محمد حمزة .. مودتي شكراً للبوست الرائع .. الفن الكردفاني الرائع الذي غزا الوطن بالقفاز الناعم في السبعينات والاجمل أغاني التراث رغم صعوبة اللغة بالنسبة لي .. ولكن مع وجود اديبنا الرائع بريمة يزداد الامر جمالاً وعمقاً .. المهم في البوست هو إستدعاء الاديب الرائع بريمة المترع بكل جمال أهلنا في الغرب والمبدع الاستاذ الحبيب هاشم الحسن .. وإذا حضر الرائع محب التراث والفن كبر يكون عقد الجمال والروعة والاصالة قد إكتمل صدقوني يا جماعة كردفان هبة من الله تعالى للسودان نموذج للجمال في كل شي .. بشر .. حجر .. شجر .. تخيلوا غزوة كردفان للوطن بالنغم والطرب .. عبدالقادر سالم ، عبدالرحمن عبدالله ، ابراهيم موسى .. إلخ .. وزمان ام بلينة والثنائي .. قريبي الاديب حمزة الملك طمبل رحمه الله .. قال (( طبيعة كردفان وجمالها كشفت عن شاعريتي )) كان عمل إداري هناك ..
شكراً الحبيب محمد على البوست .. وشكراً كثير لإستدعائك هذا الرائع بريمة ..
Post: #15 Title: Re: النت دا مليااان غُني سمح إهداء لــ ول أبا Author: محمد حمزة الحسين Date: 11-15-2018, 11:03 AM Parent: #14
Quote: المهم في البوست هو إستدعاء الاديب الرائع بريمة المترع بكل جمال أهلنا في الغرب والمبدع الاستاذ الحبيب هاشم الحسن .. وإذا حضر الرائع محب التراث والفن كبر يكون عقد الجمال والروعة والاصالة قد إكتمل
ومعك أخي علي عبد الوهاب نهدي للأخ الجميل كبر وبلاشك هو مخزن دسم لهذا الضرب من التراث المشبع بالحنيه ...
أخوووي معاويه الزبير ... أنا من قناعتي نحرص علي الغرب كما حرصنا علي الإنقاذ والله يا معاوية خسارتنا في الجنوب لن نعوضها إلا بإلإستفادهـ من الدرس ... والحرص علي هذا الإمتداد ... لفت نظري نوع الشعر وهو قديم قبل هجر الشعراء شعر التفعيله ... لأول مرهـ تقول دا كلام موقع لكن سمحه دلوكتو لكن بالتدقيق تجدهـ يضاهي ضروب الشعر الحديث ... وهو قديم واصيل كا قِدَمَهم واصالتهم ... أين أنت يا ول أبا محمد النور كبر ... : : : مع التحيات لله الزاكيات .
Post: #16 Title: Re: النت دا مليااان غُني سمح إهداء لــ ول أبا Author: هاشم الحسن Date: 11-15-2018, 11:31 AM Parent: #15
يا ود الحسين، ياخي أعذرني على المرور من هنا بدون تحية ضيوفك ولا شكرك على بث الجمال دا نحو بريمة بالذات الذي بالتأكيد سيعيده إليك/إلينا مضاعفا. تحيات للجميع وشكرنا يا محمد حمزة.
وكنت أنوي، لو أذنت ول لا ههها، الاستفادة من نماذج في هذا البوست للاستشهاد بها في بوست (السميحة القمرة) ليحي قباني... خاصة النموذج النادر الاضافو بريمة.. هو الشغلني عن نفسي والواجب. لكن أيضا، فكرت: حقوا نترس البوست دا بالأشغال الكردفانية العجيبة، ومثيلاتها شرقا زي (بنية في فتوار) وأشغال فهيمة مع البشرى والربابة وغيره. كلها غنا سمح ويعكس حقيقة واصول التنغيم والطرب السوداني مما صمت عنه الإعلام طويلا. لكن ليس بعد الآن. لا أظن، ولا مجال للتراجع..
Post: #17 Title: Re: النت دا مليااان غُني سمح إهداء لــ ول أبا Author: محمد حمزة الحسين Date: 11-15-2018, 02:44 PM Parent: #16
أخي الأكبر هاشم الحسن لك ما تريد يحي زول سمح إلا بس عيبو باكل والخطبه شغاله الأكبر دي كيف معاك بالله مرورك مرتين في الخيط شرف كبير لي أهديه للأخ ول ابا كبر ليعطر البوست بمقال دسم نتوقعه قريباً ... : : : : مع التحيات لله الزاكيات .
Post: #18 Title: Re: النت دا مليااان غُني سمح إهداء لــ ول أبا Author: Ahmed Yassin Date: 11-15-2018, 03:06 PM Parent: #17
طير بينا يا ابورنة .. دار الاهل جنة فيها اخيلة شعرية عجيبة ..كانك بتشوف لوري التيمس ىوهو يشق الرمال والكثبان والوديان
Post: #19 Title: Re: النت دا مليااان غُني سمح إهداء لــ ول أبا Author: ABDALLAH ABDALLAH Date: 11-16-2018, 05:21 AM Parent: #18
Post: #20 Title: Re: النت دا مليااان غُني سمح إهداء لــ ول أبا Author: ABDALLAH ABDALLAH Date: 11-16-2018, 05:50 AM Parent: #19
معذره أحبابنا الكرام وزى ما قال أخى العزيز هاشم جينا داخلين بدون تحيه وسلام ولعل سبب ذلك ربما ترنيمات النغم الكردفانى من قديم الزمان تطربنا بمثلما جذبت استاذنا الفنان الكبير شرحبيل أحمد . تحياتى الأخ محمد حمزه ولضيوفك الكرام وتحيه خاصه لحبيبنا بريمه .
Post: #21 Title: Re: النت دا مليااان غُني سمح إهداء لــ ول أبا Author: Kabar Date: 11-16-2018, 10:24 PM Parent: #20
ول ابا محمد حمزة الحسين..حبابك يا صديقي وحباب ضيوفك هنا.. كتر خيرك على المناداة..انا يا قريبي (شنيبي راح في الجبنة)..! ليك ولجميع الأصدقاء هنا.. يا هاشم عاين تلقائية البنية الصغنونة القاعدة مع الجمهور وبترقص برقبتها تجاوبا مع غنية (الزول بلا اهل شن عزا).. تحياتي لصديقنا ول ابا علي عثمان عبد الوهاب الذي يطرانا دوما بالخير..
كبر
Post: #22 Title: Re: النت دا مليااان غُني سمح إهداء لــ ول أبا Author: Biraima M Adam Date: 11-17-2018, 02:43 PM Parent: #21
يا سلام يا أخي محمد حمزة .. لقد جمعت كل الجميليين .. شفت يا محمد الناس ديل حبيبنا علي عبد الوهاب مولانا عبد الله عبدالله ول أبا هاشم الحسن ول أبا كبر وول أبا أحمد يسن
وهذا حضور فخيم .. يدل يا ول أبا محمد حمزة إلي فطنتك وحسن أختيارك .. وفوق ذلك أنت إنسان لماح جداً .. مثلك تماماً ول أبا أحمد يسن .. وأنا شخصياً مقدر الدور البارع الذي تقومون به ..
بريمة
Post: #23 Title: Re: النت دا مليااان غُني سمح إهداء لــ ول أبا � Author: هاشم الحسن Date: 11-19-2018, 06:58 AM Parent: #1
سلام على الشعب الطروب.. ومولانا الطروب الأكبر. يا ود الحسين شنو شابكني أخونا الأكبر جدنا الأكبر إت آزول ما كنت بتتحاوم معانا في مرسى شمبات وشوف عيني تقرطع في الفانتا؟
يا كبر: البت الصغيرة بالغت.. بالغت.. مش قلنا الذائقة دي بتتربى مع الزول/الزولة؟ راعوها شوية!! بس ياهو دا!! لكن، الشريط كلو وفي نفسو دي، عجيب مرة واحدة.. لازما تفكفكوا لينا. هل هي تنويعات أخرى أم انزياحات تعبيرية من جنوبي شمال كردفان/أم هو شرق جنوب كردفان. أنماط مختلفة.. وتنويع جديد.. كردفان صحي غرة وغرقانة فنون. شوف البوست دا إلى الآن فيه كم نمط، عرفتهم ليك، إلا الجبتو إنتا دا لازم تفكفكوا يا كبر.
انصاف فتحي، قاصدة الفن السمح، في تنويع من فرنقبية (ولّ شنها يا أحمد يسن؟) كأنها لقتها تتحاوم في صقع الجمل شرقي دارفور غربي كردفان دار القمر، السيمحة القمرة هدى عربي تغني شوق البنية للسميح القمرة في طمبور مهجن بموسقة الجراري، نشفوا ريقنا. الجراري الأمو بت أعم أبوه البتغني فيهو البت الجميلة الكأنها ثم تغني للرباعة تحت القمر. شريط يجب أن يتكرر بتصوير أنضف. جراري تاني: الجزار وصباح في إضافة للغنائية السودانية من دراما الغناء الكردفاني.. حتى الأرتري قعد يكورك: مكتول هوالك يا كردفان. كدنداية حمر، مجنونة جن.. كما أحب أن اقول لما تجنني.. شوف الرقصة وشوف الشبال.. يتهاطل عليك بالفرح. كدنداية حمر تاني، من فنان حمر الكبير (نسيت اسمه) صاحب (الجدية أم قنفة) التي تغنيها فهيمة . فهيمة عبدالله، بهدوء، ولكن كأنها مارقة لمهمة ثأرية لجمع التراث.. محل ما تقبّل تلقاها تغني من تلك القبلة.. الله يكتر من أمثالها. شرحبيل، على أيامه في التنقيب السوداني، الغالي تمر السوق في محكمة زانوق.. من محل الجراري أصلي بلادو. (زانوق) دا ظنيتو جدا أولاني للعارف والشاعر والملحن الكردفاني وزميلنا د. أحمد التجاني ماهل.
وطالما في سيرته، الجاي دا جراري كلماته ولحنه لأحمد التجاني ماهل زاتو، ومن غناء منار صديق.. الفرقان الشالن، قماري قوقن يا يمّا.
والفيديو الشين ودشن دا طمبور جابودي جراري عجيب (افرزوه يا العارفين) كردفان في حجر العسل.. قماري قوقن برضو.. أودعه اليوتيوب زميل المنبر عبدالله شم. بالله عاين في الشعب السوداني وأسمع كلامهم.. وأطرب.. كما يطرب هذا الشعب.. ملعون أبوها الفرقة والغربة..
هذا مع الحب والتحيات لله الزاكيات.
Post: #24 Title: Re: النت دا مليااان غُني سمح إهداء لــ ول أبا � Author: هاشم الحسن Date: 11-19-2018, 08:00 AM Parent: #23
اللخيدر التليع كاتلنا بالوجيع.. انا خفتا من الزمن دا كان قمنا للنجيع بنخلي البيوت سريع .. انا خفتا من الزمن دا بنواجه القبلة "بنموت/نبكي" بلا سبلة .. انا خفتا من الزمن دا ترابو شال وجي عجاجو كي يكتر لي .. انا خفتا من الزمن دا وتمو ليهم سنين في ليبيا مغتربين .. انا خفتا من الزمن دا خلى القليب حزين ليهو مشتاقين .. انا خفتا من الزمن دا في الوادي ابو شبلة بنسمع حنين إبلا.. انا خفتا من الزمن دا ============ بنركب نضاربلا .. أنا خفتا من الزمن دا اللخيدر التليع كاتلنا بالوجيع .. انا خفتا من الزمن دا
بالله شوف التليع دي.. علّت زولها حد علو الجبل.. قامة ومقاما ودوحة فيحاء. بختك يا اللخيدر.
وحدثني عليه الرضوان، العبيد ود المقدم، حديثا سخيا ماتعا وعارفا ومنسابا كجدول رقراق يصدر عن أصل ينابيع ذلك الحنين... فأطربني بها مرة بعد، وزيادة من حلو الكلام... وقريبا من لفظ ما قال المقدم، سأورده أدناه:
"هذا لحن جميل يا شيخنا. ناس كردفان حنينين. حُنان لدرجة. متل حنين الشايقية في طنبورهم. بحنوا للمكان ولتفاصيله ولتفاصيل الحياة. وطروبين.. الناس أول ما كانوا يعرفونهم.. الأغنية دي جراري جميل. وشوف حلاوة الكرير والصوت الشجي والطرب. فيها من خبر رحلة النشوق، أي نعم، نجوع الأبالة جنوبا لفترة قد تستمر لخمسة أو ستة شهور. الغياب والحنين كثير في ها الغنا.. كتير خالص. في السبعينات، على أيام هجرة الكردافة إلى ليبيا.. يا ما ماتوا شباب. قرى كاملة هجرت وأقفرت من شبابها.. هجرة كبيرة.. باب طويل.. وحنين لا أول له ولا آخر. قالت المغنية: "ان شالله يا ليبيا تعقري وتعدمي الشيك الخدري سقتي العيال من بدري من شبعان ولي فقري" أيّا ياها البغنوها ناس عقد الجلاد. والأخرى غنت للعائدين: "يا ليبيا البي بَسَبُورِك وسيد فازير مو زولك الولد البيَعرف دورٍك جابها سفنجة تكورك" سيد فازير دا سيد الحمار.. أي، ماهو زول ليبيا.. والأغنية العاجباك دي، أي والله سمحة خلاص مافي كلام، هي أغنية قديمة ومشهورة.. من غنا الجراري.. ذكرها حسن نجيلة في كتابه (ذكرياتي في البادية) ولكنها غيرت فيها شوية؛ تقول: في الوادي أبو شبلة بسمع حنين إبلا بتوجه القبلة وبموت بلا سبلة.. غيرت فوكها شوية.. الموت دا زي الكأنو مبالغة منها. في الأصل هي: بتوجه القبلة وببكي بلا سبلا. أي نعم، ببكي. الموت دا مبالغة منها.. فرط حنين جابو الزمن المخيف دا. تقول، أي، بسمع حنين إبلا (إبله) وبركب بضاربلا (أضارب إليه) أضرب إليه كبد الفيافي.. قدر قدرة المشتاقة. أي اتوجهت إلى مضاربه التي هناك، بعيدا في الوادي أبو شبلة المضارب ذاتها بعيده، إلا ركوبا إليها.. حنين شديد آ زول.. حنين شديد.. أها خليتك بالسلامة آخوي" تسلم يا المقدم..
كلامك عجيب يا كردفان.
زول.. يعيد انتاج الفيديو دا، نفس المغنية والسيناريو والإخراج، ويصلح معاهو الصوت والصورة.. لله..
التعديل بعد مراجعة لحديث المقدم ولاستعدال الكلام على مقتضاه.. ليبيا البي بسبورك. سفرا قاسي والله، الدايرلو باسبورت دا!
Post: #25 Title: Re: النت دا مليااان غُني سمح إهداء لــ ول أبا � Author: Ahmed Yassin Date: 11-19-2018, 09:34 AM Parent: #24
سيدي هاشم ود سيدي الحسن و بيني و ما بين عيون القمرة عذابات المِهجر و وعثاء الطريق و حنين الرجوع
طبعا دي عبقرية انسان ذلك المكان ياهاشم لليلة العاديك محروس فوق الدبيسه تحوس جودتهم النجوس بدرع أمات لبوس --
جقلة أم لبن ا دوي أم ضيفا” ما ببيت قوي وبدور الوقفن زومة زي دور الحكومة ود التاجر البومة ما يغشك بهدومها الأبل ليهن رنة صغير البيت شالنا من البلد بعدنا علي ميدوب ودنا هجين الود ياحلاتا سابل القود لأماتا سمع صوت الزغرادة لعب كاروشة وتاتا
Post: #28 Title: Re: النت دا مليااان غُني سمح إهداء لــ ول أبا � Author: هاشم الحسن Date: 11-19-2018, 10:39 AM Parent: #25
Quote: بيني وما بين عيون القمرة عذابات المِهجر ووعثاء الطريق وحنين الرجوع
(حنين) الود ياحلاتا سابل القود لأماتا سمع صوت الزغرادة لعب كاروشة وتاتا بس كدا..
أسمع يا فنان.. حبك للتراث دا عندي فوقو كلام.. وآمال.. الكلام تراهو شاويني شي، لكن نخليهو لي (ليل الصب) أو غده.
Post: #26 Title: Re: النت دا مليااان غُني سمح إهداء لــ ول أبا � Author: Kabar Date: 11-19-2018, 10:22 AM Parent: #24
بقر كاجا يا هاشم..
كتب هاشم الحسن:
Quote: لكن، الشريط كلو وفي نفسو دي، عجيب مرة واحدة.. لازما تفكفكوا لينا.
ول ابا هاشم الحسن..حبابك يا صديقي..
اول بالتبادي..كتر خيرك انك هنا يا صاحب..وهذا يكفي..
وبعد..
نفكفك شنو ولي منو يا هاشم؟..ياخي شعب امسودان ، خصوصا المثقفين ، بلا اخلاق..تجتهد وتفكفك والناس تفحط باجتهادك زي السلامو عليك..وعاملة فيها ده نجرها الخاصة..!!..بالله عليك دي امة يرفعوا ليها علم؟؟!!
الفات خليهو..
اهو نص ..ناس كتيرة سمعتو..لكن ما قالت بغم فيهو..!
في النت مرفوع بعنوان (تراث كاجا)..!
كاجا شعب في الجزء الشمالي الغربي من كردفان، بعضهم زغاوة وبعضهم دواليب يرجعون بنسبهم الى اهلنا العنج..ناس ملكة علوة الكانت عاصمتها سوبا..!!
عبقرية النص ده يا هاشم انو اقصر نص غنائي على وجه الأرض..ويجري هكذا:
بشيل الليل سراجا ، بقر كاجا ، ملني عجاجا..!
القرار (يبدأ بي فوكال نسائي فردي ، ملحوق بي فوكال نسائي جماعي)..ثم جواب بي فوكال رجالي فردي ، ملحوق بالجماعية في شكل كرير..!!
الكرير شغل نفرين ، الــ Setting عشرة انفار (ستة بنات واربعه اولاد)..
الأولاد ، واحد متقدم وراقص..التلاتة فيهم واحد صاحب الفوكال..واتنين قاعدين يشتغلوا كرير (هدية لأخونا عبد الحفيظ اب سن..ياهو الكرير البنعرفو)..!
لغاية هنا الموضوع عادي..!
المصور القام بالشغل ده ، هفت ليهو يركز في حتة عجيبة خلاص يا هاشم..!
اقدام الراقصة والراقص..!
الراقصة عشان تضبط الزمن (الريتم) كانت شغالة بالقدم اليسرى..ولكنها (بالفطرة) اكتشفت انو الراقص (زميلها) شغال بالقدم اليمني..وبسهولة ويسر..حولت ضبط الزمن لقدمها اليسرى..وزميلها الراقص..استوعب الفكرة..وبعد شوية دقس..فما كان منها الإ ان تشتغل باقدامها الإتنين..!!..والله صحي يا هاشم..!
الــــ Trick عشان الناس دي (الراقصة/الراقص) يغطوا على دقسة ضياع الزمن بتاع الراقص..عملوا الحكاية شكل رقصة (مرة ماشين لي قدام ، مرة راجعين لي ورا)..!!..وبالتقريب مافي زول ح يحس بالدقسة دي..!
اهو ..اديك ستة شهور من هنا لي قدام يا هاشم..لو ما جيت ولقيت واحد متجدع بالفكفكة دي وعامل فيها رايح..شنبي يقوم في الزلط..!!
بالمناسبة (بقر كاجا) مفروض يكون عنوان لخيط ، منفصل ، في مقاربة التراث السوداني في ملمح لغاية الليلة مافي زول جايب ليهو خبر..لكن تقول شنو يا قريبي..!
كتر خيرك يا هاشم..!
كبر
Post: #27 Title: Re: النت دا مليااان غُني سمح إهداء لــ ول أبا � Author: Kabar Date: 11-19-2018, 10:31 AM Parent: #26
انا ذاتي بقيت زي قريبي الراقص..شتارة عجيبة..
تصحيح..
الفقرة يجيب ان تكون هكذا:
الراقصة عشان تضبط الزمن (الريتم) كانت شغالة بالقدم اليسرى..ولكنها (بالفطرة) اكتشفت انو الراقص (زميلها) شغال بالقدم اليمني..وبسهولة ويسر..حولت ضبط الزمن لقدمها اليمنى..وزميلها الراقص..استوعب الفكرة..وبعد شوية دقس..فما كان منها الإ ان تشتغل باقدامها الإتنين..!!..والله صحي يا هاشم..!
كبر
Post: #29 Title: Re: النت دا مليااان غُني سمح إهداء لــ ول أبا Author: محمد حمزة الحسين Date: 11-19-2018, 11:03 AM Parent: #24
شكراً للجميلين الذين مروا من هنا :- ول ابا هاشم الحسن ياخي كولنا في هذا العشق للجراري سوا حتي قبل نعرف اسمو جراري...
ول ابا احمد يس إنت عندك اذن موسيقيه مرهفه اما نحن او انا شخصياً مقلد ومتشبه بالآذان المرهفه ليس إلا..
ول ابا معاويه الزبير انا عندي قناعه اهلنا الواحد كان هجع للغرب كان بقي شين ببقي سمح ... قالوا في الغرب عندهم مقوله بتقول عيال دار صباح هملانين مو كُبار بعدين الفرح سلوك اصيل عندهم...
كتر خيرك كتير ول ابا محمد النور كبر بريمة ما قصر وانت وهو إضافه ثرهـ لي في هذا البورد... ياخي تعجبني المحنا عندكم اخوووييي ود ابوك ودعمتي توقير الصغير واحترام الكبير والتمسك بالاهليه وإن تكالبت عليها السنون... ياخي الفزع ما زال عادة متاصله في الغرب وفي الشمال ...
إمبس علي عبد الوهاب إنت رجل ثر بتواضعك وتواجدك حيث الجمال يا جميل كمبو ميييه ...
الرجل القامه مولانا عبد الله عبد الله ياخي دخولك البوست براهو سلام معظم ربنا يقدرنا نحب شرحبيل كمان ...
قريبي ود الشيخ إستريح وشوف الجمال والوصف الناعم دا يا زول بعد العمر دا نحن نبعد من ضرب الصوط وكع كرع ديك... : : : : مع التحيات لله الزاكيات .
Post: #30 Title: Re: النت دا مليااان غُني سمح إهداء لــ ول أبا Author: Biraima M Adam Date: 11-19-2018, 01:06 PM Parent: #29
يا سلام .. روائع ..
بجيكم ..
بريمة
Post: #31 Title: Re: النت دا مليااان غُني سمح إهداء لــ ول أبا Author: علي عبدالوهاب عثمان Date: 11-19-2018, 01:27 PM Parent: #30
حبيبنا حمزه تود .. تحياتي يا جميل .. الله الله لقد حضر الجمال .. بريمة .. هاشم كبر أحمد بالله في الجمال أكثر من كدا .. مربع الفن والجمال والتراث كردفان في اللاشعود برمزية الجمال والفن يا سلام هاشم وكبر واصلوا هذا الابداع كيف يكون مثل هذا الحديث محصوراً في سودانيز الموضوع يستحق برنامج تلفزيوني .. والمشكلة أن العالم إنتقل من القراءة إلى المشاهدة .. عشرات القنوات تبث خواء وهراء وغث يا جماعة تواصلوا مع القنوات أنا متأكد 100% أنهم في حاجة لمثل هذا الابداع حرام أن يضيع هذا المجهود .. إطار سودانيز محدود جداً مقارنة بطرحكم .. أكثر من 20 قناة سودانية برامجها ( تكريم وتكبير ... إلخ ) مسخ وهش بالعصي
واصلوا هذا الابداع .. أنتم مبدعون ..
Post: #32 Title: Re: النت دا مليااان غُني سمح إهداء لــ ول أبا � Author: Hassan Farah Date: 11-19-2018, 04:20 PM Parent: #1
والرقصة دى من عندكم يا بريمة... جنوب الجبال
Post: #33 Title: Re: النت دا مليااان غُني سمح إهداء لــ ول أبا � Author: Biraima M Adam Date: 11-20-2018, 03:50 AM Parent: #32
أستاذنا حسن فرح، سلامات .. يا أخي مالك عايز تسوقنا بالحنين والشوق إلي تراث الجبال .. طبعاً .. أنا وول أبا كبر مولودين ومتربين في الجبال .. نوبة عديل لو جينا لتراث الجبال .. هذه الأغنية التالية .. أنزلها في اليوتيوب الغائب الحاضر، ول أبا عثمان نواي .. ولكن الشخص الذي نقلها للبورد هو ول أبا كبر .. وهذه لونية محددة من تراث الجبال .. تسمي أغاني الجبنة (والجَبَنَة هى القهوة .. البن والواحد دا .. وتطلق كلمة جَبنة علي عدة القهوة والقهوة نفسها) ..
بريمة
Post: #34 Title: Re: النت دا مليااان غُني سمح إهداء لــ ول أبا � Author: Biraima M Adam Date: 11-20-2018, 04:02 AM Parent: #33
وها يا أستاذنا حسن فرح .. مع رقصة البخسة .. يكاد يكون أكبر مخزون تراثي في افريقيا جمعاء .. يوجد في الجبال .. تقدر مساحة الجبال بحوالي 32 ألف ميل مربع .. بقعة صغيرة جداً .. لكن توجد بالجبال أكثر من 100 جبل .. كل جبل له لهجة وتراث مختلف ..
بعضهم يقولوان أن الجبال 99 جبل .. وأستاذي يوسف كوة مكي .. هو الجبل نمرة 100 ..
بريمة
Post: #35 Title: Re: النت دا مليااان غُني سمح إهداء لــ ول أبا � Author: Biraima M Adam Date: 11-20-2018, 04:46 AM Parent: #34
فرصة .. نشوفكم النموذج دا من غرب السودان .. قبيلة أولاد راشد ..
ناس محافظين جداً حتي في الرقص ..
بريمة
Post: #36 Title: Re: النت دا مليااان غُني سمح إهداء لــ ول أبا � Author: Biraima M Adam Date: 11-20-2018, 05:24 AM Parent: #35
أنا غايتو لو رجعت السودان .. واقع دار حمر .. وبالأخص أعز أصحابي من دار حمر ..
إبداع بلا حدود ..
بريمة
Post: #38 Title: Re: النت دا مليااان غُني سمح إهداء لــ ول أبا � Author: Kabar Date: 11-20-2018, 06:34 AM Parent: #36
شديرة المحلبية
التحية لأهلنا شباب البرتي..غايتو عزيتو (شديرة المحلبية) عز شديد ياااااخ.. انا كنت قايل الطواقي الحمرا دهرها ولى..!
ومن دارفور جانا زاير لا مس كول لا رسايل عشان بلدو مقطعية (مقطوعية) شديرة المحلبية.. الشديرة الفنجرية..يا بنية ومن دارفور جانا زاير لا مس كول لا رسائل عشان بلدو مقطعية
التحية لشديرة المحلبية..!
كبر
Post: #37 Title: Re: النت دا مليااان غُني سمح إهداء لــ ول أبا � Author: Ahmed Yassin Date: 11-20-2018, 06:22 AM Parent: #35
بريمة سبحان الله .. الان كنت متواصل مع اخوته (النور و قاسم) في اليابان في اوساكا وطوكيو
Quote: وأستاذي يوسف كوة مكي .. هو الجبل نمرة 100
الله يرحمه .... ولد الجبل في 1945م وسقط الجبل في 2001م كمرد : يوسف كوة مكي تية CMDR) Yusif Kuwa Makki Teia. The Right to be Sudan Nuba Mountains) The death of Commander Yusif, to the average Nuba, is tantamount only to that of a fallen mountain
Post: #39 Title: Re: النت دا مليااان غُني سمح إهداء لــ ول أبا � Author: علي عبدالوهاب عثمان Date: 11-20-2018, 07:28 AM Parent: #37
الحبيب حمزة تود .. مودتي .. هكذا الاحباب بريمة وهاشم وكبر متى ما حضروا حضر التراث والاصالة والجمال لقد لاحظت أمس في التلفزيون من خلال الدورة المدرسية أن صغارنا لديهم شغف ورغبة وعشق للتراث تم عرض بعض الرقصات من غربنا الحبيب.. يا سلام مبالغة التحية لأطفالنا الحمدلله أن هذا التراث سيبقى لأجيال قادمة
تحياتي لهذا الابداع ..
Post: #40 Title: Re: النت دا مليااان غُني سمح إهداء لــ ول أبا � Author: محمد حمزة الحسين Date: 11-21-2018, 12:22 PM Parent: #39
أستاذي ول ابا محمد النور كبر والحبيب بريمه محمد ادم اخجلتم معارفنا وريتم شغفنا بترانيم تلك الديار الحبيبه ... لكم الشكر ... أخوتي أحيمد يس وعلي عبد الوهاب مروركم محل فخر وعطور تراثيه فخيمه بهذا البوست ... لكم الشكر ... الدورهـ المدرسيه هذا العام سيكون لها طعم خالد دون سوها لإقامتها في عمق التراث وهكذا هو السودان ... : : : : : مع التحيات لله الزاكيات .
Post: #41 Title: Re: النت دا مليااان غُني سمح إهداء لــ ول أبا � Author: MOHAMMED ELSHEIKH Date: 11-21-2018, 12:38 PM Parent: #40
انتو يا مجرمين لابدين بي جاي ومخليني اتهاوش مع ولدنا حاتم بي غادي.
المهم انا احب كردفااااان
ليه؟
طيب 1989 لاول مرة ازور الأبيض لزواج صديقي مهندس الأستديو بالتلفزيون محمد الطيب الزمان داك وصاحب دربكين بتاع واطة (دربكين الأرض) اليوم . انا وصاحبي مهدي سافرنا بالطيارة ال 737 . بالله العظيم القبيلة كلها تلاقينا بي سيرة في المطار بالدلوكة والبنيات والوليدات والعريس والحافلة مقشوطة لي عينها.
ايام الزواج ماعارف نفسي انا في فتوار وللا في الابيض من الحب والألفة والجمال الذي احتوانا بيهو هؤلاء الناس في الحفلة قمنا حتيناهو قرض ( ما شباب وكدى) وظبطنالك المردوم دا زي ما ربو خلقو مع انو نحن ناس دلاليك وشتم وفي افضل الأحوال طنابير.
العبد لله لمان رجع يقعد ام العريس حلفت قالت " ود الخرتوم دا لازم يرجع تاني" ود الخرتوم دا انا؟؟؟؟؟
ياحليل ديك البليد وياحليل السيرة التي تحركت من الأبيض نحو مدينة الرهد والغدا في عرديبة تحت ظلال اشجار المانجو ي ديك بلد عجيبة وناسها أعجب بدأت قبل سنوات كتابة خيط عن تلك الرحلة هنا ولكن انقطع عند وفاة شقيقتي .
يا ناس الأابيض ود الطيب دا وين ؟
Post: #42 Title: Re: النت دا مليااان غُني سمح إهداء لــ ول أبا � Author: محمد حمزة الحسين Date: 11-21-2018, 01:48 PM Parent: #41
Quote: يا ناس الأابيض ود الطيب دا وين ؟
رغم إن هذا البورد جامع لكن ذكرتني جدي الحاج العبادي مرهـ مشي اتبرا والزمن ضايق عليهو وقرر يبيت مع عمتو بت راجين الله ... اصلها مرا اصيله ورغم بساطة مسكنها لكن النفس ترتاح عندها ولامن ماتت بنادوها بي عمتي ... جدي الوصف ما واقع له ومتذكر فقط في تاكسي اصيفر بقيف قدام بيت جارهم واظن اصلو ما شافو اتحرك ... بتاع التاكسي لمن لقي الوصف رايح عليهو قال له مافي علامه ظاهرهـ بتتذكرا اقدر اساعدك بيها قال ليهو جارم القدام منهم دا عندو تاكسي زي حقك دا بوقفو قدام الباب رغم إني ما سافرت كتير لكن ملاحظتي طيبتم ومطايبتم مع بساطه لا تخلو من عزة نفس ... زد علي ذلك تأثيرهم الكبير لمن تربي في حوزتهم ... : : : : مع التحيات لله الزاكيات .
