Post: #2
Title: Re: هل نحن شعب صَفْوة !!!!
Author: اسامة الامام
Date: 11-08-2018, 04:50 AM
Parent: #1
يعني زي توهم إخوانا المريخاب الصفوية
مع الاعتذار لحبايبنا في المريخ علشان ما يزعلوا
|
Post: #3
Title: Re: هل نحن شعب صَفْوة !!!!
Author: اسامة الامام
Date: 11-08-2018, 05:01 AM
Parent: #2
ام بيننا الغث والسمين
مع تقديم السمين على الغث ..بالطبع
وبيننا الشحمان بالمبادئ والقيم
ود القبائل المليان نخوة وشهامة و فزعة
وبيننا الرمة والفطيسة وسجم الرماد
الكل القيم دي ما بتعني ليهو التكتح لا تسوى عنده فص بصلة
زينا و زي بقية شعوب المجرة..!!!
|
Post: #4
Title: Re: هل نحن شعب صَفْوة !!!!
Author: Hani Arabi Mohamed
Date: 11-08-2018, 05:03 AM
Parent: #1
لا
|
Post: #5
Title: Re: هل نحن شعب صَفْوة !!!!
Author: اسامة الامام
Date: 11-08-2018, 07:12 AM
Parent: #4
الأمر جد محير
في بالي كم موقف كنت شاهد عليها
او مشارك فيها بصورة ما
فيها الايجابي جدا
وفيها المقرف حد القرف
ومنها البحير
زي حيرتي لموقف حصل معاي امبارح القريبة دي
ودا الدفعني للتساؤل الفوق دا
وصراحة اصابني بكمية من الاحباط غريب جدا
و قعدتا اسأل نفسي
لي كدا وعلشان شنو
ولي كمية التناقض الفينا دي
مع وهم الصفوية العندنا دا
هل سمعتنا الطيبة دي حقيقة ولا انطباع
عندي قناعة تامة...انو السبب فيها (اعني سمعتنا الطيبة دي )السبب فيها قلة قليلة جدا من الخيرين
حا احول اذكر المواقف الفي بالي عن الموضوع دا بإيجاز ان شاء الله
|
Post: #6
Title: Re: هل نحن شعب صَفْوة !!!!
Author: اسامة الامام
Date: 11-08-2018, 07:24 AM
Parent: #4
اهلين الأخ الكريم هاني ان شاء الله بخير
شاكر مروركم الكريم
الف سلامة عليك يا رب وربنا يكملك بالعافية ان شاء الله
تعرف يا هاني يا اخوي المشكلة يا ريت لو كانت ببساطة
....لا....
ما كنت اتحيرتا ولا حار دليلي
رجاء لو سمحت ظروفك التواصل معي
علي الرقم دا
00966509525861
و اكون من الشاكرين
|
Post: #7
Title: Re: هل نحن شعب صَفْوة !!!!
Author: اسامة الامام
Date: 11-08-2018, 08:27 AM
Parent: #6
ابدا بسرد واقعة ايجابية
علشان ال Negative impact
الحاسي بيهو من امبارح دا يخف شوي
وعلى فكرة الواقعة دي بنشوف زيها كتير
وبتدل على انو بينا ناس تختهم على الجرح يطيب
ابطال الواقعة اغلبهم اعضاء وزملاء اعزاء بالمنبر دا
ويسمحوا لي ويعفوا لي اني اقصم ضهرهم للمرة التانية
بذكر الواقعة البعرف انو مجرد ذكرها بيحرجم
قبل كم سنة نزلت بوست لتقديم مساعدة لشخص كان مريض ربنا يتولاه بالرحمة والمغرة
وكنت في الحقيقة بعيد من موقع الحدث وخطرت في بالي الفكرة بانزال بوست للمساعدة
نزل البوست لفترة محدودة ...وبعديها قمت بقفله بالضبة لاسباب شخصية او فرط حساسية مني امكن
المهم تفاعل مع البوست
اخوة كرام ان شاء الله يوم شكرهم ما يجي
ومدوا يد العون للمريض ..وربنا يجعلها بركة فيهم وفي اهاليهم ان شاء الله
من ديل كان بالطبع الانسان الجميل
ايوا الانسان الجمي الخلوق
والبتشرف بمعرفتو وبعتز بيها من الوقت داك
اخوي معاوية الزبير ربنا يدي الصحة والعافية ..ومقصر كتير في حقو..بسالو العفو
من ضمنهم ود القبايل الانسان الرايع الما كنت بعرفو من قبل
اخوي الاستاذ الامين عبدالرحمن عيسى
وين الزول الاصيل دا مختفي..ان شاء الله يكون بخير ..برضو نسالو العفو لتقصيرنا معاهو
منهم من أصدقاء سودانيزاونلاين
الانسان الشهم
من المملكة الاخ عبدالجليل..اتفاعل مع البوست من اول ما نزل واتصل علي ودليتو يعمل شنو وما قصر
اتمناه بخير وعافية
والأخ الرائع من دوحة الخير
الاخ عبدالجليل محمد عبدالجليل احد متابعي سودانيزاونلاين
ربنا يتقبل منه باذن احد صمد ان شاء الله
|
Post: #8
Title: Re: هل نحن شعب صَفْوة !!!!
Author: معاوية المدير
Date: 11-08-2018, 08:39 AM
Parent: #7
يا أُسامة وحات ربي مشتاق ليك .
إتعشيت مع قريبي في شندي، مشينا غسلنا إيدينا غسلت إيدي ؤ لقيّت
الصابونة للماسورة ثم مديتا ليهو، قال إنت من عطبرة !. قتلو ليه ؟. قال لي مرّة
محمد أخوي في مطعم في الخرتوم عمل الحركة دي لوآحد، الراجل
طوالي قالوا، إنت من عطبرة ؟، محمد قالوا أيوه، عرفتني كيف !.
الراجل قالوا، ناس عطبرة بيغسلو الصابونة، وأنا كنت في المدفعية .
غايتو نحن ناس أتبرا مُميزين، ثم يأخي تاني مشتاقين ...
|
Post: #9
Title: Re: هل نحن شعب صَفْوة !!!!
Author: اسامة الامام
Date: 11-08-2018, 08:57 AM
Parent: #8
| Quote: يا أُسامة وحات ربي مشتاق ليك . |
ود المدير يا حبيب
والله حت انا مشتاق ليك ومشتاق لونستك
ومتلوم معاك لوم الشدر
اعفي لي عليك سيدك ود الاحدب المر
شايفك متجدع في السودان من ركشة لركشة لما حسدتك تخيل
والله اتمنيت اصادفك هناك
عليك الله لو استقريت ووصلت بيتك سالم اديني خيت
|
Post: #10
Title: Re: هل نحن شعب صَفْوة !!!!
Author: Othman Al-Hasan Babikir
Date: 11-08-2018, 10:21 AM
Parent: #1
بعد التحية لصاحب البوست وصحبه ،
صفوة مين يا عمي الحاج ؟؟؟!!!
طبعاً لا وألف لا ....
نحن شعب فاكنها في نفسنا ساي ، شعب معلم ، شعب مثقف ، شعب علم الشعوب العربية الثورات ، شعب إيه ، شعب إيه ..... الخ
دي كلها أوهام × أوهام × أوهام وإلا قلي بربك :-
- شعب فيه ما لا يقل عن 15 مليون في المهاجر ودول الإغتراب
- فيه مئات الآلاف لاجئين ونازحين
- الموجودين بالداخل ضاقت بهم الأرض بما رحبت تألفوا وتصالحوا مع الفقر والمرض والجهل والضائقة المعيشية والأوساخ وصفوف الخبز والمواصلات والبنوك ..... الخ
فكيف لشعب بهذه الفئات وهذه المواصفات أن يكون شعب صفوة ؟؟؟؟!!!!!
|
Post: #11
Title: Re: هل نحن شعب صَفْوة !!!!
Author: اسامة الامام
Date: 11-09-2018, 09:55 AM
Parent: #10
Quote: بعد التحية لصاحب البوست وصحبه ،
صفوة مين يا عمي الحاج ؟؟؟!!!
طبعاً لا وألف لا .... |
اهلين اخي عثمان
شاكر مروركم الكريم
عارف يا اخوي الرك كان كلو على المهاجرين ديل
والسمعة الطيبة التركوها
لعكس صورة طيبة عننا وعن بلدنا
ودا الحصل لفترة طويلة بدون مزايدة
بس للاسف في الفترة الأخيرة
هاجر نوعية من البشر ما عارف اقول عنهم شنو
شكلهم حا يمسحوا الصورة الجميلة دي الحافر بالحافر
ويجيبوا عاليها واطيها
|
Post: #12
Title: Re: هل نحن شعب صَفْوة !!!!
Author: امتثال عبدالله
Date: 11-09-2018, 10:56 AM
Parent: #11
اسامة
الاجابة على سؤالك::
نعم نحن شعب صفوة...
بس ما نجينا المسنوحة بسمات وتقرا كلام ود المدير وتقول نعم اهل عطبرة هم الصفوة..
|
Post: #13
Title: Re: هل نحن شعب صَفْوة !!!!
Author: اسامة الامام
Date: 11-09-2018, 11:15 AM
Parent: #12
احكي حكاية بسيطة حصلت معاي
بتدل قدر شنو الصورة الزاهية الفوق دي اتهزت
وشخشخت وشوي كدا حا تقطع ارسال وتلوس signal
قبل ما احكي
في كم حاجة حابب اوضحه
في المملكة ممنوع منع بات بيع اي مضاد حيوي
حتى لو مس عيون مصنف انو safe
ممنوع من غير وصفة طبية معتمدة
ودا كان مسموح لفترة قريبة بدرجة ما
ممنوع منع بات بيع اي حقن ..فيال..
خارج صيدليات المستشفيات..خاصة كانت ام عامة ..
يعني ممنوع في الصيدليات التجارية الخارجية ان صح التعبير
اخونا الكبير وعميد اسرتنا
ربنا يرفعوا ويتمم عليه نعمة الصحة والعافية ويطمنا عليهو
مر بظروف صحية قاهرة
مما دعى لسفرهم للقاهرة طلبا للعلاج الذي عز في بلادنا العجيبة
كان من ضمن العلاجات الضرورية ضرورة الماء للحياة
مضاد حيوي..نتيجة culture and sensitivity اتعملت
وكانت النتيجة محدودة جدا للاسف
دورنا علي الدواء دا في كل من مصر والسودان
وكنا بنلاقي بعد تعب
بالحبة..حبة من الصيدلية دي حبة من التانية الفي صقط لقط
وبرضو ناقص
المهم
بديت رحلة البحث هنا في السعودية عن المضاد الحيوي دا.
قلت عسى ولعل..
وكما اسلفت للاسف كانت خيارات الزراعة محدودة جدا كنتيجة ايجابية..
اتصلت بكثير من الزملاء
والمعارف دون جدوى
قلت ادخل الصيدليات التجارية ..مع معلومتي المسبقة عن عدم التوفر..
بس بمبدأ سيد الرايحة يفتح خشم البقرة.
معلومة اخرى
سوق الصيادلة في المملكة ..اي العاملين والصيدليات
يسيطر عليه اخوانا المصريين بنسبة تفوق ال 99%
كنت لافي على الصيدليات
لحد حوالي الثانية صباحا
وعندي هدف وااااااحد بس
البحث عن معلومة
هل الدواء دا متوفر في السعودية ولا لا..كمرحلة اولى فقط ..
والباقي سهل ان شاء الله
وكانت اجابة اخوانا المصريين الصيادلة في غاية الادب واللطف..
والله ماعندنا فكرة عن امكانية التوفر من عدمه
لاننا ما بنشتغل فيهو وما بمر علينا
دخلتا احدى الصديليات لقيت دكتور صيدلي مصري بعد عرفتو عن نفسي كالعادة
دلني ..كتر خيرو
اروح اي صيدلة في مستشفى خاص حا الاقي المعلومة...شكرتو وطلعتا
واتوجهت لاقرب مستشفى خاص كبير
اكرر بحثا عن المعلومة فقط لا غير..
والساعة تجاوزت الواحدة صباحا
|
Post: #14
Title: Re: هل نحن شعب صَفْوة !!!!
Author: اسامة الامام
Date: 11-09-2018, 11:18 PM
Parent: #13
Quote: اسامة
الاجابة على سؤالك::
نعم نحن شعب صفوة...
بس ما نجينا المسنوحة بسمات
وتقرا كلام ود المدير
وتقول نعم اهل عطبرة هم الصفوة |
هلا اختنا الكريمة بت عبدالله
ان شاء الله بخير
شاكر مروركم الكريم
ان شاء الله تكون الاجابة بسيطة كدا بأن نعم نحنا صفوة ونص كمان
بس للاسف شكلو جرت مياه اسنة كثيرة تحت الجسر
وعلشان خاطر عزيزنا ود المدير واختنا العزيزة بت الشيخ
رضينا باهل اتبرا كصفوة الصفوة
|
Post: #15
Title: Re: هل نحن شعب صَفْوة !!!!
Author: هاشم احمد ادم
Date: 11-10-2018, 03:43 AM
Parent: #14
سلام أستاذ اسامة
نعم (نحن ) صفوة .
والاجابة وجدتها ليس من تقيمى الشخصى
بل من تقيم (الاخر ) .
حيث اتاحت الحياة لى فرصة التعايش
لفترة طويلة ( اكثر من عشر سنوات )
مع مجموعات مختلفة ( اسمها زى الامم
المتحدة ) وقد وجدت الصورة التى
يحملوها للسودانيين مختلفة تماما
وايجابية فى مجملها العام ، بل هناك
أفراد منهم والذين عاشوا فى السودان
أو تعاملوا مع السودانين عن قرب
لا يخفون إعجابهم وحبهم للشخصية السودانية .
اما اتجاه تسألك ، والذى فى رأى ناتج
من انفتاح المثقف السودانى بإعداد كبيرة
للعالم الخارجى من خلال الهجرة والاغتراب
فى السنوات العشرين الاخيرة ( ولا تنسى
دور الانترنت ) ، وهذا العالم الخارجى
كنّا نعرفة من خلال التعليم والقراءة ،
وكان وعى إلانا محصور فى التجارب
الشخصية.
وأختم بعبارة كنّا نتداولها ايّام الجماعة
ان معظم مثقفى السودان من اجيال ما قبل الإنقاذ هم ( اولاد الحكومة) .
|
Post: #16
Title: Re: هل نحن شعب صَفْوة !!!!
Author: عبدالحفيظ ابوسن
Date: 11-10-2018, 05:57 AM
نعم
|
Post: #17
Title: Re: هل نحن شعب صَفْوة !!!!
Author: اسامة الامام
Date: 11-10-2018, 11:38 AM
Parent: #16
Quote: سلام أستاذ اسامة
نعم (نحن ) صفوة . |
اهلين اخي هاشم ..علك بخير
شاكر مروركم الانيق والمشاركة الدسمة
ما ياهو دا سبب البوست يا عزيزي
هل نحن فعلا زي ما بفتكر عننا الغير
وهل الانطباع دا حقيقي ولا زايف
وهل الصورة دي تغيرت بفعل عوامل الحداثة من نت وغيره
ام ما زالت كما هي
|
Post: #18
Title: Re: هل نحن شعب صَفْوة !!!!
Author: محمد البشرى الخضر
Date: 11-10-2018, 12:45 PM
Parent: #17
تحياتي اسامة
اساسا لا يوجد "شعب" كامل صفوة - استحالة طبعا
ممكن تقول مثلا شعب تغلب عليه السمات الفلانية, ولن يخلو بالطبع من افراد او مجموعات تعاكس الاغلبية
دائما يتبادر للذهن الشعب الياباني عند الحديث عن النظام و العمل و التهذيب وما إلى ذلك
اها اليابانيين ديل فيهم عصابات ياكوزا اجارك الله اخير المافيا لا تترك موبقة إلّا وبشتغلوها و طبعا كعادة اليابانيين بجيدوها و يجضّموها :)
المهم عودة لسؤالك, لا لسنا صفوة ولم نكن في يوم من الأيّام
نعم تغلب لدينا اخلاق جميلة و تظهر غالبا في الغربة لكن كمان الاخلاق السيئة ما شوية
لا ديك تجعل منا صفوة ولا دي بتقلل من قيمتنا كشعب, في النهاية الخلق دا مسالة فردية و تعميمه على جماعات وقبائل و شعوب مسالة فيها انطباعية و تجاوز
أخيرا.. كدي كمّل قصة الدوا !
|
Post: #19
Title: Re: هل نحن شعب صَفْوة !!!!
Author: Sinnary
Date: 11-10-2018, 01:48 PM
Parent: #18
تحية وحب للجميع
الأخ أسامة
طبعاًالمسألة قد تتوقف في البداية على تعريفنا لمفهوم صفوة
هل هو مفهوم تمايز ولا مفهوم تميز (التمايز لا يكون دوماً محموداً على عكس التميز)
المهم أن كل شعب بمر عبر الزمان بمراحل تحددها وتتحدد بها أشكال البنى الإجتماعية السايدة فيه
أقصد العناصر المؤثرة في المجتمع مثل
شكل النظم السياسية وتوزيع الثروة والثقافة والقيم الإجتماعية المهيمنة والدين
الإقتصاد بيعتبر أهم العوامل المؤثرة في هذه العناصر أعلاه
وبيسمى البنية التحتية التي تقوم عليها البنى الفوقية الأخرى
عشان كدا علماء الإنثربولوجيا بقولوا مافي حاجة اسمها هوية دايمة لأي مجموعة بشرية
أي شعب هو دائماً ممتاز وآخر هو على مر التاريخ وضيع
الناس بتكتسب قيمها وأخلاقها في جزء كبير منها من المؤثرات الذكرتها أعلاه
شكل هذه المؤثرات في السبعينات تختلف عنها اليوم
أقصد الإقتصاد ونظام الحكم ومحتوى التعليم والقيم الإجتماعية (أصبح القرش أهم من الزول)
هوية مختلفة تماماً
عندك مثال السودانيين في السبعينات كانت تأثيراتهم في الدول التي هاجروا لها
لا سيما الخليج إيجابية جداً وأسهموا في تعليم أبناء هذه الدول ومعالجة مرضاها
لكن مع تدهورات وتشوهات البنية الإجتماعية والتي غشيت القيم والأخلاق والثقافة
ظهرت سلوكيات تعبر عن هوية مختلفة هوية متردية ونطيحة وعرجاء للسوداني
أتمنى أن لا تدوم هذه البنية طويلاً مفرزة تشوهاتها في أجيال عديدة قادمة
|
Post: #20
Title: Re: هل نحن شعب صَفْوة !!!!
Author: Abdullah Idrees
Date: 11-10-2018, 02:06 PM
Parent: #19
اتفق مع السناري وود البشرى تماما
|
Post: #21
Title: Re: هل نحن شعب صَفْوة !!!!
Author: nour tawir
Date: 11-10-2018, 02:11 PM
Parent: #20
ولا دا وهم ساكت وتوهم مننا !!!
...
نعم...
هو وهم ساكت و توهم مننا و طولة لسان رّجعتنا للعصر الحجرى...
|
Post: #22
Title: Re: هل نحن شعب صَفْوة !!!!
Author: اسامة الامام
Date: 11-10-2018, 03:08 PM
Parent: #21
ود ابسن حبابك
عارف يا حبيب ال نعم بتاعتك دي
النون بتاعتا اتلحست وعدمت النقطة
والعين اتاكلت وبقت حوصا وفيها رمد وغشاوة
ما ظنيت بقى عندنا منها باقي غير الميم وحيدة في الصقيعة
ودلالتها.. الدالة على... ممممممم..بمعنى حيرة وارتباك
شاكر مروركم الكريم أخي
|
Post: #23
Title: Re: هل نحن شعب صَفْوة !!!!
Author: عبدالحفيظ ابوسن
Date: 11-10-2018, 03:46 PM
Parent: #22
تحياتي اسامة
وضيوفك
هههه طول بالك ياخ
عن ياتو شعب بتحدث ؟
المواطن السوداني الكادح غير المسيس ولا غيرو ؟
انا بتحدث من واقع معايشتي الآن . شعب شهم ومضياف وشيال تقيلة . وبشيل فوق الدبر والدم . ومليان حس وانسانية
بحصل بشكل يكاد يكون اسبوعي . يجي محتاج او محتاجة ونعمل نفير سريع ومرات لمبالغ طائلة . ما حصل مرة خذولنا ابدا . بسطاء الناس وفقراء
في بيوت البكيات والافراح تعال شوف التكاتف والمساندة
امشي اي مطعم ولا قهوة قول لي صاحب المحل انا مفلس
ولا اركب وسيلة مواصلات وكلم الكمساري بس
الناس شايلة بعضها مع شظف العيش وقلته
ساندين بعض
|
Post: #24
Title: Re: هل نحن شعب صَفْوة !!!!
Author: عبدالحفيظ ابوسن
Date: 11-10-2018, 03:51 PM
Parent: #23
لننهض يجب ان نحترم انفسنا ولا نستهين بها
ونحترم ونعز تراثنا وقيمنا وفننا
نحن ماقايمين بروس بل جذورنا ضاربة في اعماق الارض وراسخة
بل نعتز جدا بالانسان السوداني
وماذا يتبقي لنا لندافع عنه ان كان رأينا في انفسنا اننا مجرد وهم
أكذوبة
نحن ليس وهما سادتي
ولا اكذوبة
نحن شعب محتل بواسطة سلطة قمعية وغاصبة تسعي نحو هزيمة روحنا
|
Post: #25
Title: Re: هل نحن شعب صَفْوة !!!!
Author: Kamal Alalla
Date: 11-10-2018, 08:59 PM
Parent: #1
نحنا شعب اوسطى
يلا جيبو المونة
ومهما تكن عند امرئ من خليقة .....وان خالها تخفى على الناس تعلم
لسان الفتى نصف ونصف فؤاده......فلم يبقى الا صورة اللحم والدم
برغم العدد الكبير من المتعلمين والمثقفين نحن شعب خجول وغير فصيح وفي كثير من الاحيان لا تسعفنا الكلمات لنعبر عن أنفسنا fluently
لاحظ فقط لبض الاخوة العرب من مصريين وشوام ومن عامتهم ودعه يتحدث عن اي موضوع ستجد انه يتحدث بطلاقة بدون تأتأه واسمع
من بروفيسور سوداني وهو يتحدث وان كان كلامه فيه الكثير من الحقائق فهو unfluent
بلاغة الحديث وفصاحته صفة مهمة للقيادة لذلك يفشل كثير من السودانيين في المواقع القيادية التي يستحقونها بالخبرة والدراية والمعرفة
لانهم لا يستطيعون ان يعبروا عن انفسهم وافكارهم بصورة جيدة.. مع وجود بعض الاستثناءات
والاشراقات بطبيعة الحال...
|
Post: #26
Title: Re: هل نحن شعب صَفْوة !!!!
Author: اسامة الامام
Date: 11-10-2018, 11:19 PM
Parent: #25
Quote: تحياتي اسامة
اساسا لا يوجد "شعب" كامل صفوة - استحالة طبعا
ممكن تقول مثلا شعب تغلب عليه السمات الفلانية, ولن يخلو بالطبع من افراد او مجموعات تعاكس الاغلبية
دائما يتبادر للذهن الشعب الياباني عند الحديث عن النظام و العمل و التهذيب وما إلى ذلك
اها اليابانيين ديل فيهم عصابات ياكوزا اجارك الله اخير المافيا |
مرحبتين حبابك يا هندسة
عارف يا بشرى اصلا ما خطر في بالي المقارنة مع شعوب بعيدة
لانو اصلا مافي مقارنة لا من قريب ولا من بعيد
حتى لو جينا لحاجة بسيطة زي الالتزام بالزمن .دا في محيطنا دا كلو معدوم
كان فكرتي المقارنة في محيطنا القريب دا..ناس قريعتي راحت ديل
هل نحن فعلا بنستحق السمعة الطيبة الكسبناها بجهد الاخرين السبقونا
ولا بهت النقش وتداخلت الحروف وبقى عاليها واطيها
والنت دا حا يضيع حتى الصيت الكنا عايشين عليهو مدهQuote:
المهم عودة لسؤالك, لا لسنا صفوة ولم نكن في يوم من الأيّام
نعم تغلب لدينا اخلاق جميلة و تظهر غالبا في الغربة لكن كمان الاخلاق السيئة ما شوية
|
في الحتة دي بالذات انا بتفق معاك بنسبة كبيرة
وازيد..حتى الاخلاق الجميلة الكانت بتظهر في الغربة
في الشي الشايفة دا شكلها ايلة لزوال
Quote:
أخيرا.. كدي كمّل قصة الدوا ! |
جايلك لحتة الدواء دي ان شاء الله
وما تتخيل الموضوع دا زعلني كيف
شاكر جدا مرورك الكريم والمشاركة القيمة
|
Post: #27
Title: Re: هل نحن شعب صَفْوة !!!!
Author: هاشم احمد ادم
Date: 11-11-2018, 01:53 AM
Parent: #26
التحية لعبد الحفيظ
وهذا المقتبس
أوجز مقالة الطيب صالح ( من أين جاء هؤلاء ؟ )
|
Post: #28
Title: Re: هل نحن شعب صَفْوة !!!!
Author: طارق عبد الله
Date: 11-11-2018, 07:16 AM
Parent: #27
نحن شعب مثلنا مثل غيرنا لدينا الصالح والطالح، الجميل والقبيح لكن الخير يخص والشر يعم وهذا ما أوصلنا للهوة السحيقة التي نحن فيها الآن
|
Post: #29
Title: Re: هل نحن شعب صَفْوة !!!!
Author: اسامة الامام
Date: 11-12-2018, 02:11 PM
Parent: #28
Quote: قبل ما احكي
في كم حاجة حابب اوضحه
في المملكة ممنوع منع بات بيع اي مضاد حيوي
حتى لو مس عيون مصنف انو safe
ممنوع من غير وصفة طبية معتمدة
ودا كان مسموح لفترة قريبة بدرجة ما
ممنوع منع بات بيع اي حقن ..فيال..
خارج صيدليات المستشفيات..خاصة كانت ام عامة ..
يعني ممنوع في الصيدليات التجارية الخارجية ان صح التعبير
|
اكمل الحكاية يا ودالبشرى
مع انها فقدت معناها
بالمداخلات الدسمة من الزملاء الاعزاء
لهم الشكر
.....
وقفتا سيارتي ودخلتا المستشفى
بحثا عن معلومةفقط لاغير
هل الدواء دا متوفر في المملكة..ولا لا..
بما انو الساعة تجاوزت الواحدة صباحا
المستشفى ..والصيدلية كانت فاضية من الزبائن
والله يا جماعة
اول ما دخلتا الصيدلية
وشوفتا الصيدلي فرحتا وقلبي اتشرح
وقلتا في نفسي خلاص ..دون شك غرضي اتقضى
وما حا ارجع الا وفي ايدي المعلومة
ودي اول مرة تقريبا الاقي فيها سوداني شغال في صيدلية
سلمتا علي سلام معرفة والله..زي عادتنا كسودانيين
كاني اعرفه من زمن
رد السلام باقتضاب
ما اهتميت
عرفتو بنفسي
وطلعتا الموبايل
ووريتو صورة الصندوق بتاع الدواء.كان في رسالة
لو سمحت ياخ بالله الدواء متوفر هنا في المملكة ؟
رد
دا مضاد حيوي ..وممنوع من غير وصفة
رديت بكل ادب
انو انا طبيب...وعارف المعلومة دي
بس بسأل.. في المرحلة دي ..
هل الدواء دا تحديدا موجود ولا لا
سكت مسافة
كررتا السؤال
رد..علي باقتضاب
موجود لمرضانا بس
قلت لي انا ما دايرك تصرف لي الدواء
انا عايز معلومات بس عن الدواء دا
رد بعد مسافة
قلت ليك الدواء دا in patient بس
بكل لاَّمَّة الدنيا
والله يا جماعة في اللحظة ديك قربتا اطق
سكتا شوي ..وقلتا لي داير اسالك سؤال
شنو سبب العدائية البتتعامل بيها دي
ياخ انت ما سوداني ولم ازد
ومشيت على الباب علشان اطلع
وانا في الباب سمعتو قال كلام فارغ
جيت راجع
قلت لي اقسم بالله انت حرام تكون سوداني
وطلعتا
وفي بالي القصة السمعنا بيها ونحن اطفال
بتاعة...
السوداني الراقد مستشفى
ادا الرشته لواحد وقال لي
اديها اي سوداني يقابلك في الشارع يجيبا لي
بالله دا كلو طلع وهم ساكت..!!!
ولا دا زمان غبر
|
Post: #30
Title: Re: هل نحن شعب صَفْوة !!!!
Author: امتثال عبدالله
Date: 11-12-2018, 03:37 PM
Parent: #29
اسامة
اشك في ان الصيدلي ده سوداني ...او على اقل تقدير يكون عاش في السعودية عمره كله مما هو طفل ولم يشب ويترعرع في السودان...لان السوداني هو المثل الانت ضربته في نهاية القصة القال ادي الروشتة لاي سوداني ماشي في الشارع......
|
Post: #31
Title: Re: هل نحن شعب صَفْوة !!!!
Author: اسامة الامام
Date: 11-12-2018, 05:04 PM
Parent: #30
Quote: اسامة
اشك في ان الصيدلي ده سوداني ...
او على اقل تقدير يكون عاش في السعودية عمره كله
مما هو طفل ولم يشب ويترعرع في السودان...
لان السوداني هو المثل الانت ضربته في نهاية القصة
القال ادي الروشتة لاي سوداني ماشي في الشارع...... |
استأذن واقطع تسلسل الردود وارد عليك يا امتثال
ابدا والله شكلو جاي من السودان ونص كمان
ويتمتع بجلافة غريبة لا تخطيها العين
لما شكيت اني شحدتو حق الدواء..او لعله خاف ذلك
بس زي ما قلت ..هاجر في الفترة الاخيرة دي نوعية من البشر
شغالة مسح ساااااااكت في التاريخ الطيب اجارك الله
اقول ليك حاجة
انا شغال في عيادة وبمر علي عشرات المرضى والمراجعين
من جنسيات مختلفة
وكعادتنا غير الشكاوي ما بنسمع شي
ما فاكر مر علي مريض..الله اعلم
الا وابتدرت حديثي معه..حسب جنسيته
بعبارة
الف سلامة عليك ان شاء الله
او ماتشوف شر
او اي كلمة تدل على انسانيتنا في المبتدأ
|
Post: #32
Title: Re: هل نحن شعب صَفْوة !!!!
Author: اسامة الامام
Date: 11-13-2018, 09:02 AM
Parent: #31
Quote: تحية وحب للجميع
الأخ أسامة
|
العزيز د.سناري
ان شاء الله بخير
شاكر جدا مداخلتك القيمة
التي تصب في صلب الموضوع
والتي لا شك انها تثري النقاش حول الموضوع
واتفق معها بشكل كبير
Quote:
المهم أن كل شعب بمر عبر الزمان بمراحل تحددها وتتحدد بها أشكال البنى الإجتماعية السايدة فيه
أقصد العناصر المؤثرة في المجتمع مثل
شكل النظم السياسية وتوزيع الثروة والثقافة والقيم الإجتماعية المهيمنة والدين
الإقتصاد بيعتبر أهم العوامل المؤثرة
عشان كدا علماء الإنثربولوجيا بقولوا مافي حاجة اسمها هوية دايمة لأي مجموعة بشرية
أي
هوية مختلفة تماماً
عندك مثال السودانيين في السبعينات كانت تأثيراتهم في الدول التي هاجروا لها
لا سيما الخليج إيجابية جداً وأسهموا في تعليم أبناء هذه الدول ومعالجة مرضاها
لكن مع تدهورات وتشوهات البنية الإجتماعية والتي غشيت القيم والأخلاق والثقافة
ظهرت سلوكيات تعبر عن هوية مختلفة هوية متردية ونطيحة وعرجاء للسوداني
|
فعلا البنية الاجتماعية مش بس تدهورت وتشوهت..
دي تكاد تكون تدمرت دمار شامل
شاكر مروركم الكريم
|
Post: #33
Title: Re: هل نحن شعب صَفْوة !!!!
Author: اسامة الامام
Date: 11-16-2018, 03:17 PM
Parent: #32
| Quote: اتفق مع السناري وود البشرى تماما |
مرحبا بالاخ عبدالله ادريس
شاكر مروركم الكريم
|
Post: #34
Title: Re: هل نحن شعب صَفْوة !!!!
Author: اسامة الامام
Date: 11-16-2018, 03:21 PM
Parent: #33
Quote: ولا دا وهم ساكت وتوهم مننا !!!
...
نعم...
هو وهم ساكت و توهم مننا و طولة لسان رّجعتنا للعصر الحجرى. |
الاخت العزيزة نور.نور الله ايامك بالخير
دا الخايفين منو ..يطلع وهم ساكت..ونفخ في الفاضي
|
Post: #35
Title: Re: هل نحن شعب صَفْوة !!!!
Author: اسامة الامام
Date: 11-25-2018, 10:42 AM
Parent: #34
Quote: نحنا شعب اوسطى
يلا جيبو المونة |
مرحبا بيك الف أخي كمال بسودانيزاونلاين
ونتمني أن يطيب لك المقام ويطيب بك
فعلا ملاحظتك في محلها
نحن من اكتر الشعوب الما بتعرف تعبر عن نفسها
في اي حوار علني يكون
طرفو واحد سوداني..غالبا بكون هو الحلقة الاضعف
بس البحير
السودانيين في مجتمعاتهم الخاصة
السودانية صرف
يناطقوا الحجر..ووناسين جدا
اما عن وسيطنا الكنا بنمتاز بيها
شكلها رايحة في ستين داهية
مع كمية التطرف الحايم دا
تطرف من كل النواحي اجارك الله..كانها عدوة
|
|