معقولة مصطفى كان جوازه مرهون في قروش؟؟؟؟؟

Post: #1
Title: معقولة مصطفى كان جوازه مرهون في قروش؟؟؟؟؟
Author: اسماعيل عبد الله محمد
Date: 10-26-2018, 07:19 PM

07:19 PM October, 26 2018
سودانيز اون لاين
اسماعيل عبد الله محمد-
مكتبتى
رابط مختصر
Quote: في مثل هذا اليوم قبل 22 عام
14 / 1 / 1996
الساعة الواحدة صباحا
لوس انجليس كاليفورنيا

نص المحادثة الهاتفية لي د.متوكل مع الراحل المقيم مصطفى سيد احمد اثناء تواجده بدولة قطر :

- آلو منو
- مصطفي يا دكتور متوكل
- أهو كويس عرفتني طوالي
- معقول صوتك يغبى علي
- الله يخليك يامصطفي .. طمني علي صحتك
- اهو الحمدلله عايشين وبنصارع
- ليه صوتك كده ماتضعف أنت راجل شجاع
- يادكتور ...
- معليش يامصطفي والله صدقني كلنا حاسين بآلامك بس شد حيلك وانشاء الله كل شي يكون تمام ،، بالأمس كنت أتكلم مع زميلي وأخي الأكبر د.عمر عبود وأخبرته أن أخصائي أمراض الكلي وجراح زراعة الكلي هنا معنا في جامعة UCLA والوحيدين في العالم الذين لهما أحسن النتائج في مثل حالتك هذه وقد راجعا الملف الطبي بتاعك وهم علي درجة عالية من الثقة بمقدرتهم في التحكم بحالة البطن ونسبة ال Cure فيها عالية ومن ثم الزراعة تكون سهلة خالص وناجحه بأذن الله
- انشاء الله يادكتور متوكل بس أنت ماعارف الشيء ده بيطحن في بطني كيف الله لاوراه لي زول
- صدقني يا مصطفي والله عمر وأنا عارفين بس ده التلفون الثالث مني ولي هسع ماعارف حتجيني متين ؟؟ وريني الحاصل شنو ومنتظر شنو ؟؟
- منتظر الشفاعه يا دكتور متوكل
- الشفاعه ؟ الشفاعه من منو ؟ وفي شنو ؟
- خليها في سرك يادكتور
- لا ماحأخليها في سري أنا طبيب ولازم أعرف الحاصل شنو والممكن شنو أنا ود.عمر والأخوة عمله من هنا يامصطفي أنت عارف نحنا بنسابق بيك الزمن بالله سيب طيبتك وخجلك ده وكلمني المشكله شنو والا ما حأضرب تاني
- ماتزعل يادكتور المشكله الباسبورت
- الباسبورت ؟ باسبورت منو ؟
-باسبورتي أنا يا دكتور محجوز
- يا مصطفي باسبورتك السوداني محجوز !!؟
- أيوه يادكتور متوكل
- منو الحاجزو وليه !!؟؟
- قصه طويله
- شي يحير بالله عليك الله وريني ديل منو والسبب شنو عشان هنا من أمريكا أسل لساني وأوديها لكل الجرائد والمجلات الأمريكية عشان العالم كله يعرف أنو فنان بقامتك كده ومريض في حالتك دي باسبورته محجوز عايزين منك شنو !؟؟؟
- عشان عارفك عمرابي أحمق ماكنت عايز أكلمك لكن حأقول ليك بقدر ما أستطيع بس أنت أسمع وما تعلق عشان ما تعقد الأمور
- طيب يامصطفي وريني الحاصل شنو الله يرضى عليك
- يادكتور باختصار شديد لازم أدفع مبلغ 40 ألف دولار قبل ما يدوني الباسبورت
- 40 ألف دولار لشنو ؟
- جزء من أجرة الغسيل والأدوية
- بالله يامصطفي وصلت كده ؟ يحجزو على باسبورت مريض زيك عشان ما قادر يدفع قروش ؟؟
- والله ده الحاصل يا دكتور
- طيب يا مصطفي أخوانك السودانيين في الغربة عملو شنو؟
- والله المساعي جاريه
- جاريه مع منو ؟ وبيحنسو في منو ؟ ولشنو ؟
- لو ماعندهم القدره وده كلام أنا ماقادر أفهمه طيب يخلوك كان تعمل حفلات وتدفع قروشهم من عرق جبينك ولاجميلة أي واحد فيهم
- اها يادكتور ماتتحمق تصدق أنا طلبت منهم يدوني باسبورتي أمشي بيهو الامارات أعمل حفلات وأدفع ليهم قروشهم
- والحصل شنو ؟
- برضوا رفضو
- يا مصطفي الماسك باسبورتك منو بالتحديد !!؟
- اها فورت زي أي سوداني زي ماقلت ليك عارفك عمرابي أحمق لو وريتك عاوز تعمل شنو؟
- أنت بس مالك وريني وأنا بتصرف
- بوريك بس ماهسع
- ليه؟
- لأنه في مساعي جاريه
- ده كلام فارغ سيبني من المساعي والزول الزيك لو في بلادنا في ذره من التقدير للفن كان يعملو ليه تمثال مش يحجزو باسبورته !! أصلها جبانه هايصه وعشان كده ما حتقوم لينا قايمه مش لو جانا بترول والله لو قلبو ليهم البحر طحنيه ما منهم فايده
- يادكتور اها ولعت حاسب علي كلامك شوية أحنا ما في السودان
- ولابحاسب ولاحاجتين
- عارفك عمرابي أحمق .. أقول ليك وعد أديني أيام وحاأحلها صدقني يا دكتور
- مصطفي الله يرضي عليك مافي زمن أنت عارف نحنا بنسابق الزمن بمرضك ده وأنت عارف عندك شنو
- عارف يادكتور
- طيب يامصطفي حأديك 72 ساعه وبعدها ...
- وبعدها حتسوي شنو يعني حتسوي انقلاب هاهاهاهاها
- والله ياكا مصطفى بتضحك حتي في لحظات الألم الشديد والظلم والله أنا عايز أطرشق هسع
- عارفك كدي بالله خلينا .. أنا رسلت ليك شرائط وفيديوهين جميلات وصلوك ؟؟
- أيوه وصلو والله من التعب لسه ما شفتهم ولا سمعتهم
خليك من الشرائط يلا انتهي وقوم تعال بسرعه أنا راجيك
- حاضر يادكتور ربنا يخليك ويحفظك لينا
- ربنا يحفظك ويخليك لينا أنت السودان ممكن يجيب مليون زي متوكل لكن ما أظن يجيب واحد زيك بالساهل تاني
- أفو يادكتور سودانا عظيم وحيجيب مليون زي مصطفي ده شعب ترهاقا ومهيره بس أصبروو
- يلا يا مصطفي أنا ماشي أنوم الساعه بقت اثنين صباحا
- بالله الساعه أتنين صباحا في أمريكا وانا عندي ظهر وحا أتغدى بي باميه وتقول لي العسيلات تحذر أمريكا
- هاهاهاها الله يجازيك يا مصطفي شفتها في صوره في جريدة الشرق الأوسط امبارح
- بالله شفتها يادكتور
- مصطفي أي شفتها أيوه العسيلات تحذر أمريكا أصلوو الكلام بقروش ،، يلا تصبح علي خير أنا في انتظار مكالمتك بعد 72 ساعه فقط
- حاضر جنابك
- تصبح علي خير
- وأنت سالم يا دكتور

........................................

بعد 3 ايام ...
لوس أنجليس كاليفورنيا
السابع عشر من يناير
التلفون يرن الساعة الرابعة صباحا !!

-متوكل .. الو يا سلام يا مصطفي والله في مواعيدك ذي ما وعدت .. أها انشاء الله تكون حليت مشكلة الباسبورت وجايني متين ؟؟ أنا منتظرك ياخي يلا تعال
- يا متوكل أنا ما مصطفي أنت منتظر منو محادثة ولا شنو؟
- أيوه ...أنت منو؟
- الله ماعرفتني أنا د. عمرعبود
- معليش يادكتور عمر أصلو انا متوقع تلفون من مصطفي يوريني فيه جاييني متين علي حسب ال أنت وأنا بنجهز ليهو فيه
- متوكل هو مواعدك الليله دي عشان يوريك حيجيك متين ؟
- أيوه يا دكتور عمر لأنو أنا أصريت علي كده ما أنت عارف نحن بنسابق بيهو الزمن .. ليه الحاصل شنو ؟

- متوكل شد حيلك وانشاء الله البركه فيك مصطفى اتوفى

- الو .. الو .. متوكل أرفع السماعه الو .. الو متوكل شد حيلك وأرفع السماعه خليني أحكي ليك الحصل شنو
الو الو الو الو طيب يا متوكل حأتكلم معاك وقت تاني أنا عارف كيف الخبر ده حيكون صعب عليك في الغربة بس شد حيلك يلا أضرب لي لمن تكون عاوز تتكلم أنا حأنتظرك .

.....................................................

ومشيت معاك كل الخطاوي الممكنة وبقدر عليها وبعرفا أوفيت وما قصـّرت في حقك ولا كان عرفة غيرك أصادفا

مالدنيا كلها انتظار والارتحال قدر الفصول 💔

#غنيناك_وبنغني 💙
منقول من الفيس بوك.

Post: #2
Title: Re: معقولة مصطفى كان جوازه مرهون في قروش؟؟؟؟؟
Author: ابو جهينة
Date: 10-26-2018, 07:58 PM
Parent: #1

رحمه الله وغفر له

تحياتي أخي إسماعيل

Post: #3
Title: Re: معقولة مصطفى كان جوازه مرهون في قروش؟؟؟؟؟
Author: عبدالعظيم عثمان
Date: 10-26-2018, 08:03 PM
Parent: #2

مصطفى سيد أحمد له الرحمة والمغفرة
سلامات سمعة
المؤسف أن يتشرد المبدعون في السودان ويبحثون عن أوطان بديلة
قاتل الله الإنقاذ

Post: #5
Title: Re: معقولة مصطفى كان جوازه مرهون في قروش؟؟؟؟؟
Author: سفيان بشير نابرى
Date: 10-26-2018, 08:33 PM
Parent: #3

سلامات يا سمعة
ايوة انا سمعته أو قرأت قصة زي دي قبل كده
رحم الله مصطفى و تقبله القبول الطيب الحسن
و جعل الخير في دكتور متوكل و دكتور عمر عبود.

Post: #7
Title: Re: معقولة مصطفى كان جوازه مرهون في قروش؟؟؟؟؟
Author: اسماعيل عبد الله محمد
Date: 10-26-2018, 08:42 PM
Parent: #5

Quote: جعل الخير في دكتور متوكل و دكتور عمر عبود.
فعلاً يا سفيان ... دكتور عمر عبود و دكتور متوكل يطلق عليهم إسم الجنود المجهولين...

Post: #6
Title: Re: معقولة مصطفى كان جوازه مرهون في قروش؟؟؟؟؟
Author: اسماعيل عبد الله محمد
Date: 10-26-2018, 08:36 PM
Parent: #3

Quote: قاتل الله الإنقاذ
قاتل الله المنافقين يا أخي عبد العظيم... التكافل الاجتماعي لا علاقة له بالحكومات..

Post: #4
Title: Re: معقولة مصطفى كان جوازه مرهون في قروش؟؟؟؟؟
Author: اسماعيل عبد الله محمد
Date: 10-26-2018, 08:33 PM
Parent: #2

Quote: رحمه الله وغفر له
أخي أبو جهينة ما علينا إلا أن نقول غفر الله له ..
ولا حول ولا قوة الا بالله ..

Post: #8
Title: Re: معقولة مصطفى كان جوازه مرهون في قروش؟؟؟؟؟
Author: عبدالعظيم عثمان
Date: 10-26-2018, 08:50 PM
Parent: #4

يا سمعة تبدل حال السودانيين بعد الإنقاذ وتاهو على وجوههم في الأرض بعد أن ضاقت بهم أرض السودان.. حاربت الإنقاذ الإبداع و طاردت المبدعين، وحولت البلد لي سجن كبير.. قاتلها الله 100 مرة

Post: #9
Title: Re: معقولة مصطفى كان جوازه مرهون في قروش؟؟؟؟؟
Author: اسماعيل عبد الله محمد
Date: 10-26-2018, 09:40 PM
Parent: #8

Quote:
يا سمعة تبدل حال السودانيين بعد الإنقاذ
يا عظمة مهما يكون لابد للجانب الإجتماعي من وجود... عندما توفى مصطفى لم يمض على الإنقاذ سبع سنوات ..

Post: #10
Title: Re: معقولة مصطفى كان جوازه مرهون في قروش؟؟؟؟؟
Author: اسماعيل عبد الله محمد
Date: 10-26-2018, 09:46 PM
Parent: #9

وقسماً بالله لو طلبوا مبلغ ال ٤٠ الف دولار من طلاب الجامعات كان وفروه..

Post: #11
Title: Re: معقولة مصطفى كان جوازه مرهون في قروش؟؟؟؟؟
Author: احمد حمودى
Date: 10-26-2018, 10:11 PM
Parent: #10

لك الرحمة والمغفرة يا مصطفى تحياتى ابو السباع

Post: #12
Title: Re: معقولة مصطفى كان جوازه مرهون في قروش؟؟؟؟؟
Author: اسماعيل عبد الله محمد
Date: 10-26-2018, 10:15 PM
Parent: #11

Quote: لك الرحمة والمغفرة يا مصطفى تحياتى ابو السباع
يا أحمد حمودي ... مصطفى مكانته رفيعة في وجدان الإنسان السوداني ... لو يعلم السودانيون..

Post: #13
Title: Re: معقولة مصطفى كان جوازه مرهون في قروش؟؟؟؟؟
Author: حسن ادم محمد العالم
Date: 10-27-2018, 07:20 AM
Parent: #12

اسماعيل ولد عبدالله سلام
الانقاذ اخرجت اسوء ما فينا
سؤال هل نحن شعب مثلنا مثل سائر الشعوب نأكل ونشرب ونمشي
في الاسواق نمارس الفضيلة احيانا والموبقات المهلكات وجاءت الانقاذ اخرجت المسكوت
اما نحن شعب مثالي ومعلم قدره الانقاذ هذا الشيطان الرجيم الذي
احال حياتنا لجحيم
رحم الله الاستاذ محمد سيد احمد بقدر ما اثري وجداننا

Post: #14
Title: Re: معقولة مصطفى كان جوازه مرهون في قروش؟؟؟؟؟
Author: MOHAMMED ELSHEIKH
Date: 10-28-2018, 06:54 AM
Parent: #13

في عام 91 كنا مدورين كشتينة (بلوت ههه)في احد احياء طرابلس .
من ضمن الماسكين الورق المرحوم صديقنا وقريبي بابكر حسن العالم.

جاء زول داخل وقال " جاء خبر قالوا مصطفى سيد احمد توفي"

رد عليه بابكر وهو من اشد المعجبين بمصطفي وممسكا بالورق وسجارته لاتفارق شفتيه:
" دي تكون اشاعة ساكت . مصطفيى عندوا رسالة لو ما كملها ما حايموت"

وفعلا طلعت اشاعة
وواصل مصطفى اكمال رسالته من على فراش المرض اللعين وصدق ود البكري

وبعد سنوات رحل مصطفى
واصيب أيضا بابكر بنفس الفشل الكلوي ورحل ملتحقا برفيقه بعد مدة وجيزة
رحمهما الله رحمة واسعة

لن أنفي واقعة حجز جواز الراحل ولا أعرف كيف تمت
لكن يصعب علي تصديق انه بعد ثلاث أيام من المحادثة أعلاه يرحل مصطفى
أعتقد انه هناك " شوية" دراما تدخلت على الواقعة بطلها وسائل التواصل وخاصة ال"فيك بوكس"

تحياتي ياسمعة والمرور

Post: #15
Title: Re: معقولة مصطفى كان جوازه مرهون في قروش؟؟؟؟؟
Author: usama Babiker
Date: 10-28-2018, 07:13 AM
Parent: #14

طيب ن اصدقاء مصطفى القادننا بي مصطفى عمل وعمل ... وهلكوه وطلعوا ميتين اهلوا بي جلسات الاستماع... معقول الدوحة كلها مافيها 80 سوداني في 500 دولار يفكوا جواز فنان وقامة زي مصطفى ؟؟

Post: #16
Title: Re: معقولة مصطفى كان جوازه مرهون في قروش؟؟؟؟؟
Author: nazar hussien
Date: 10-28-2018, 07:25 AM
Parent: #15

ياخ دا كلام محزن لما يطمم البطن....اول مرة اقراه....
لا أظن هذه الرواية صحيحة وبالدوحة يمكن لشخص واحد من اصدقاء مصطفي ان يدفع هذا المبلغ
او يتكفل بجمعه من المجموعة....او يقترضه....او .....او....حتي اذا كان مصطفي ممانعا

هنالك كؤسسات خيرية كثيرة يمكنها التكفل بعلاجه...
الجالية السودانية كبيرة ومعظمهم يعملون في مناصب ونافذين...
فالدوحة التي دفعت لدارفور الملايين لن يعجز نافذيها من السودانيين
الحصول علي 40 الف دولار او الاعفاء منها...

Post: #17
Title: Re: معقولة مصطفى كان جوازه مرهون في قروش؟؟؟؟؟
Author: usama Babiker
Date: 10-28-2018, 07:49 AM
Parent: #16

Quote: ياخ دا كلام محزن لما يطمم البطن....اول مرة اقراه....
لا أظن هذه الرواية صحيحة وبالدوحة يمكن لشخص واحد من اصدقاء مصطفي ان يدفع هذا المبلغ
او يتكفل بجمعه من المجموعة....او يقترضه....او .....او....حتي اذا كان مصطفي ممانعا

هنالك كؤسسات خيرية كثيرة يمكنها التكفل بعلاجه...
الجالية السودانية كبيرة ومعظمهم يعملون في مناصب ونافذين...
فالدوحة التي دفعت لدارفور الملايين لن يعجز نافذيها من السودانيين
الحصول علي 40 الف دولار او الاعفاء منها...

والله كنا نتمنى اجي واحد من شباب الدوحة وينفي هذا الكلام .... لكن صمتهم هذا يعني صحة المعلومة ...

Post: #23
Title: Re: معقولة مصطفى كان جوازه مرهون في قروش؟؟؟؟؟
Author: اسماعيل عبد الله محمد
Date: 10-29-2018, 09:18 AM
Parent: #16

Quote:
ياخ دا كلام محزن لما يطمم البطن....اول مرة اقراه....
وانا كذلك اول مرة احصل على هذه المعلومة المؤلمة عن الراحل و عن طريق الصدفة ,, لوقت قريب ظلت صورة اللصيقين به جميلة و نبيلة حتى اطلت علينا هذه الرواية الصادمة,,

Post: #22
Title: Re: معقولة مصطفى كان جوازه مرهون في قروش؟؟؟؟؟
Author: اسماعيل عبد الله محمد
Date: 10-29-2018, 09:13 AM
Parent: #15

Quote: طيب ن اصدقاء مصطفى القادننا بي مصطفى عمل وعمل ... وهلكوه وطلعوا ميتين اهلوا بي جلسات الاستماع... معقول الدوحة كلها مافيها 80 سوداني في 500 دولار يفكوا جواز فنان وقامة زي مصطفى ؟؟
امر يحير والله ,,

Post: #21
Title: Re: معقولة مصطفى كان جوازه مرهون في قروش؟؟؟؟؟
Author: اسماعيل عبد الله محمد
Date: 10-29-2018, 09:12 AM
Parent: #14

ود الشيخ تحياتي
Quote: وفعلا طلعت اشاعة

ما بين 1990 و 1996
طلعت كمية من الشائعات بموت مصكفى لا تحصى و لا تعد ,,

Post: #20
Title: Re: معقولة مصطفى كان جوازه مرهون في قروش؟؟؟؟؟
Author: اسماعيل عبد الله محمد
Date: 10-29-2018, 09:10 AM
Parent: #13

عزيزي ولد العالم - سلام ,
هنالك امور يجب علينا عدم حشر الانقاذ فيها
خاصة المتعلقة بالتعاضد و التكافل الاجتماعي
و بالأخص حول شخصية اسطورية
مثل ابو السيد
في تسعينيات القرن الماضي
و ما يزال يمثل ظاهرة اجتماعية ثقافية سياسية
التف حولها الناس بمختلف مشاربهم ,,
حسب ظني أن وسائل التواصل كانت محدودة
لو حدث ذلك في عهدنا هذا
لاستطاع منبر سودانيز لوحده حل المعضلة ,,

Post: #18
Title: Re: معقولة مصطفى كان جوازه مرهون في قروش؟؟؟؟؟
Author: Adam Youssif
Date: 10-28-2018, 09:30 AM
Parent: #1

اسماعيل عبدالله محمد
سلام
Quote: واقف براك
والهم عصف
ريحاً كسح زهرة صباك
ليلاً فتح .. شرفة وجع
قمراً رحل فارق سماك
*******
مطر الحزن عاود هطل
جدد عذاب الأرصفة
ضى المصابيح البعيد
أتعب عيونك .. وإنطفا
لمتين مواعيدك .. سراب
والريد شقا .. حرقة .. وجفا

رحم الله الفنان الانسان مصطفى سيد احمد

Post: #19
Title: Re: معقولة مصطفى كان جوازه مرهون في قروش؟؟؟؟؟
Author: MOHAMMED ELSHEIKH
Date: 10-28-2018, 12:02 PM
Parent: #18

واقف براك
والهم عصف
ريحاً كسح زهرة صباك
ليلاً فتح .. شرفة وجع
قمراً رحل فارق سماك
*******
مطر الحزن عاود هطل
جدد عذاب الأرصفة
ضى المصابيح البعيد
أتعب عيونك .. وإنطفا
لمتين مواعيدك .. سراب
والريد شقا .. حرقة .. وج

---------------------------------

رجعتني كم وعشرين سنة
لمان قلت بنلعب في الكشتينة
والله العظيم دي الكلمات الكانت مدورة .... في مسجلنا اياه
وتنتهي لتبدأ من جديد!

يا لتوالد* الخواطر !

* نعم توالد

تحية تانية يا آدم

Post: #24
Title: Re: معقولة مصطفى كان جوازه مرهون في قروش؟؟؟؟؟
Author: اسماعيل عبد الله محمد
Date: 10-29-2018, 09:20 AM
Parent: #18

سلام وتحية لك أخي آدم
Quote: واقف براك
والهم عصف
ريحاً كسح زهرة صباك
ليلاً فتح .. شرفة وجع
قمراً رحل فارق سماك
*******
مطر الحزن عاود هطل
جدد عذاب الأرصفة
ضى المصابيح البعيد
أتعب عيونك .. وإنطفا
لمتين مواعيدك .. سراب
والريد شقا .. حرقة .. وجفا

هذه الكلمات وكأنه يرثي بها نفسه بنفسه ,,
الا رحم الله هذا الرجل الشفيف بقدر ما اعطى لأمته السودانية ,,