تنبيه للجميع

سلام للجميع

ارجو من الجميع التبليغ بالبريد فقط و ليست التلفون لاي مخالفة لقوانيين المنبر
عنواني البريدي
[email protected]

طيب يا حبيب أجدع تلفونك هنا عشان نكون عارفينو ما نقوم نضرب ليك بالغلط

في ملفي Profile

نظافة المنبر و تطويره مسئولية الجميع
و الحاجات الما بشوفها بكري ....بلغ عنها بالبريد اعلاه

هههههههههههه يلا واحد ينزل التلفون

الاخ بكري
لك التحيه والشكر
على المجهود الكبير الذي تقوم به في متابعة المنبر
رغم مشغولياتك ومسؤولياتك الخاصه ونحن نقدر ذلك
ونعلم انك لن تستطيع ان تحيط بكل شيء
والمنبر دارنا جميعاً يجب علينا ان نحفظها ونحافظ عليها
لذا نحن معك ان شاء الله من اجل منبر بلا مخالفات وبلا كتابات خارجه على اللياقه

بريدك المبذول ده يابكري
اكيد بتجيك فيه مائة رسالة كل دقيقة
وعندك الماسنجر اخف واظرف وأكثر آمنا

Quote: ونعلم انك لن تستطيع ان تحيط بكل شيء والمنبر دارنا جميعاً يجب علينا ان نحفظها ونحافظ عليها

نعم استاذ علي المنبر مسئولية الجميع رغم انني عملت التنبيه دا عدة مرات لكن من ساعدني فيه كان قليلا......لو كل زميلا او زميلة او حتي زائر رسل لي الرابط و المخالفة في الايميل اعلاه حا نكنس القبح من منبرنا و تذكروا بكري ما بقراء كل المواضيع فالمرجو مساعدته بالتبلغ عن المخالفات

وشكرا

شكرا يا جميل

اقتراح ي باش مهندس
انت ممكن يكون في بوست للشكاوي بدل الايميل
اي زول شايف حاجه مافي محلها ينقله البوست ولو ما في نثنيه من كم نفر ...ما تتحذف
عشان الناس تعرف الشاكي ..وتكون علي بينه...بدل ما تكون براك كاتم اسرار المنبر

شكرا يا حبيبنا هجو
اقتراح جميل لكن للاسف بهدر لينا الباندوث و بعمل زحمة في المنبر

Quote: لو كل زميلا او زميلة او حتي

ي مواطن لى سنتين بعانى من مشكلة مزمنة
شكرا ي زميلراجع عدد مشاركتى

اقتراح ..اعمل ليك بوست مثبت سميهو
مشاكل الاعضاء او اسم سااهل....
بعد 18 سنة انت مطالب ب اعتذار لى انا
...معقول تعرفنى ب الكبك الكموش؟

السلام عليكم ورحمة الله وبركاته

Quote: السلام عليكم ورحمة الله وبركاته

وعليكم السلام ورحمة الله وبركاته

دا جا من وين الليلة؟

Quote: وعليكم السلام ورحمة الله وبركاته دا جا من وين الليلة؟

يحيي العظام وهي رميم هههههههههههههههههههههه
كيفنك يا الحبيب

Quote: السلام عليكم ورحمة الله وبركاته

لا سلام لا كلام يا زول ...

ان شالله بقيت عقيد في الفيسبوك ؟ و لا ادوك كم شريط !!!

عُد الى اهلك ... و الله انحنا احسن من غيرنا انا بكللللمك ...

Quote: لا سلام لا كلام يا زول ... ان شالله بقيت عقيد في الفيسبوك ؟ و لا ادوك كم شريط !!! عُد الى اهلك ... و الله انحنا احسن من غيرنا انا بكللللمك ...

بالحيل يا الحبيب... عليمي الله اشتهيت الناس ولي ثلاثة اسابيع ما مشيت علي الفيسبوك هههههههههه

الحبيب طارق ود جبريل
مرحب بيك و اخبارك شنو هل لا زلت في المغرب

Quote: السلام عليكم ورحمة الله وبركاته

يازول نحنا مع الجنرال قباني لا سلام لا كلام عد إلى تابوتك

Quote: السلام عليكم ورحمة الله وبركاته

وعليك السلام ورحمة الله تعالى وبركاته حبيبنا طارق جبريل .
يا أحبابنا الكرام رد السلام فرض .
نرجو من الباشمهندس بكرى يسهل لينا عملية ال QUOTE زى ما كانت زمان .

السلام عليكم و رحمه الله و بركاته....

انتو مش هناي كان بي جاي! ولاّ الحصل شنو
يعني ما ننوم تاني ولاّ كيف :)

Quote: نرجو من الباشمهندس بكرى يسهل لينا عملية ال QUOTE زى ما كانت زمان .

أنا شخصياً مدين لك أخي بكري ابوبكر بإنضمامي لهذا الصرح العملاق ...
وعرفاناً لهذا الإمتنان واجب علينا الإرتقاء بمستوي المساهمه في هذا الصرح ...

مولانا عبد الله علي السلامه ياخي أنا نبهت الأخوة الزملاء أكثر من مرة إلي عمل الأيقونات بسقف البوست بطريقة مُثلى كما لم يسبق لها من قبل ...
شكراً بكري ...
شكراً لكل من دعمني ,وآزرني ورشحني للدخول لهذا الحوش ...
:
:
:
:
مع التحيات لله الزاكيات .

تعديل لتصحيح صياغة جملة كامله لتؤدي للمعني الذي اريدهـ

Quote: وعليك السلام ورحمة الله تعالى وبركاته حبيبنا طارق جبريل .

ازيك يا عبد الله ياخ

Quote: يازول نحنا مع الجنرال قباني لا سلام لا كلام عد إلى تابوتك

ود اخت خائن انت ياخ ههههه

Quote: الحبيب طارق ود جبريل مرحب بيك و اخبارك شنو هل لا زلت في المغرب

موجود يا حبيب في المغرب البعيد نحمد الله نكابد في الزمن وهرمنا ههههههههه

يا كابتن بكري تحياتنا
المخالفات دي مقياسها شنو ، قوانين المنبر من زمن بعيد جدا لا تحترم ولا عقوبات علي هذا الفعل فما عرف المغزي من التنبيه دا شنو الأن هل هو لتقويم أم لحاجة في نفس بكري أبوبكر
معاً لمنبر معافا يستطيع جميع أفراد الأسرة الدخول إلي وقراءة ما فيه دون محاذير

لديك علي سبيل المثال خور سيل أطلقت عليه (منبر خاص بكُتّاب الموقع)
وجاء في الخبر لبكري أبوبكر ، أنه مساحة تُحال إليها المواضيع المُشْكِلَة أو غير المرغوب فيها من قبل إدارة الموقع ، أو تلك التي طَلَب أصحابُها إبعادَها من دائرة النقاش. عفواً، لا يمكن رؤية هذه المساحة لغير الأعضاء
(بادارة بكرى ابوبكر)
ما يحتاج لإضاءة يا بكري أبوبكر هو كيف يمكن أن نخلط بين موضوعات مشكلة وقد أثبتها بتشكيل الحروف أنها منوعة أي
miscellaneous topics بكلام الفرنجة حيث تقيم ويمكن التجاوز لو كانت مشكلة trouble أو kink مع موضوعات غير مرغوب فيها من إدارة الموقع وهنا أيضاً ينط إستفاهم ماكن فحواه (فحواه دي تحال لأبي جهينة) ما هي مقاييس إدارتكم الموقرة في الموضوعات المطروحة من ناحية التصنيف بأن تصبح مرغوباً فيها أو مغضوباً عليها.
أنا مع حرية التعبير ولكن للأسف هناك من يسي الأدب ويتطاول حتي علي الذات الإلهية بدعوى الحرية. بعدين قوانينك دي ألا تري أنها بحاجة إلي مراجعة وتعديل وتنقيح خاصة وأن المنبر يضم في عضويته أناس لهم باع طويل في القانون والفن والأدب وكافة ضروب الإبداع ويمكن لهم دون شك أن يساهموا في تعديل قوانين العضوية للأفضل.
كسرة:
شعلقتك لي مقالك هذا في صدر المنتدي لا يعني بأي حال من الأحوال أنك أتيت بما لم تأتي به الأوائل بقدر ما يعني "سمحه المقدرة" بمنطق أنكم سيد الكورة (وش ضاحك لتخفيف العقوبة الحدية المرتقبة)
تنبيه للجميع
فتحي الضو في أستراليا
شرح مفصل و معلومات للتقديم للوتري 2020

Quote: شعلقتك لي مقالك هذا في صدر المنتدي لا يعني بأي حال من الأحوال أنك أتيت بما لم تأتي به الأوائل بقدر ما يعني "سمحه المقدرة" بمنطق أنكم سيد الكورة (وش ضاحك لتخفيف العقوبة الحدية المرتقبة) تنبيه للجميع فتحي الضو في أستراليا شرح مفصل و معلومات للتقديم للوتري 2020

غايتو يا الملا يا خوي، بس بتشفع ليك سنيرتك (دفعة 2002)

الملا عمر كيفنك يا شقي الحال

Quote: مولانا عبد الله علي السلامه ياخي أنا نبهت الأخوة الزملاء أكثر من مرة إلي عمل الأيقونات بسقف البوست بطريقة مُثلى كما لم يسبق لها من قبل ... شكراً بكري ... شكراً لكل من دعمني ,وآزرني ورشحني للدخول لهذا الحوش ... :

وعليك السلام الأخ الحبيب محمد حمزه الحسين , الله يديك العافيه ةشكراً
لك ولحبيب الكل الباشمهندس بكرى أبوبكر لإعادة الوضع إلى ما كان عليه
من السهل الممتنع .

""كنس القبح من منبرنا""
عبارة اوسكار خمسة نجوم....
وهذا واجب جميع اعضاء المنبر ....صوت من لا صوت له....

نشكرك و لا نستطيع شكرك..
شكرا لك على كل شئ! على طول بالك و هدوءك و صبرك علينا.. شكرا على تضحياتك التي لا يعلمها أحد غيرك! لكن لابد للتاريخ من رجال و من نعمة الله عليك جعلك منهم! نعيما!

Quote: نشكرك و لا نستطيع شكرك.. شكرا لك على كل شئ! على طول بالك و هدوءك و صبرك علينا.. شكرا على تضحياتك التي لا يعلمها أحد غيرك! لكن لابد للتاريخ من رجال و من نعمة الله عليك جعلك منهم! نعيما!

تحياتي وأشواقي لكما معاً

ألف تحية

السلام عليكم ورحمة الله وبركاته

--------------------------------

وعليكم السلام



حولاااااااااااااااااااااا

الليلة بكري شرك لك بجرادة عشر؟

السلام عليكم...............................

التحية لك الاخ الباش مهندس بكري على كل ما تبذله من جهد عبر هذا المنبر الذي اصبح ملاذا امنا لنا منذ ان وطأت اقلامنا أرضه ... تقف كلماتنا عاجزة عن شكرك بأن جعلت هذا ممكننا ومتاحا لنا ,,
والتحية لكل الاخوة والاخوات الزملاء الذين ظلو صامدين عبر السنين والأزمان ....


تحياتي : ياسر العيلفون ....

Try to create an icon that converts all unwanted topics to the Dump area automatically
وعلي المتضرر الإهتمام بالشعبطة والكنكشة والتمسك جيداً بأستار المنتدي حتي لا يجرفه السيل وكت يتحدر ميمماً صوب الخور الكبير
تخريمة:
قربت أرسلها ليك في إيميلك لكين خفتك تفخخ لي ردك وأصبح من المغضوب عليهم مع أننا كلنا في إتجاه الشمال وللنيل شرق إنت من حلفاية الملوك كوكب منزه في علوك يا جميل وأنا بعدكم بمحطتين تلاته يعني لمن نصل الحلفايا بناخد جمه.
والحال كذلك حبذا لو تقدم لنا محاضرة عن كيفية رفع الصور وتفعيل الخطوط والألوان في الموضوعات (فالمنتدي يعج بالغوغاء والدهماء علي شاكلتي وكل من ليس لهم حظاً في التقنية أو التقانة) يمكن تألف بين القلوب هنا لأنه حتي اللون الحرجلي الذي يغطي المنتدي أو ما يعرف بالخلفية أو الـ background يبعث في النفس البؤس بغير شفقة (وجهين ضاحكين لزوم to cool down) فحبدا لو قبلت العمل بإقتراحات الأعضاء بعد دراستها وتمحيصها وقابليتها للتحقق طبعاً في كل ما من شأنه رفعة وتطوير وتقويم المنتدي يا أخي ناس بيبسي كولا علي سبيل المثال بغيروا شعارهم من فترة لأخري حتي لا تمل النفس من تكرار الصورة .
فكدي أبدأ بي دي وبعدين شوف حكاية التمرد والخيران والخروج عن النص يمكن إضفاء بعض الجمال علي المكان يؤثر في الأعضاء الخارجين عن القانون والمغردين خارج النصوص في عرفكم لأن الكائن إبن بيئته يؤثر فيها ويتأثر بها وبالتالي تصبح الكتابة طاعمة والموضوعات كما يتمنى الجميع هنا
فمَن منَّا يجيءُ بغير نقصٍ؟
ومن منَّا بلا نقصٍ يروحُ؟

أري في هذه المداخله أنها أخرجت مقالكم هذا من غياهب الجب بعد أن مشي للصفحة التانية ميمماً صوب التالتة حيث يصبح حينهاعصياً حتي علي وارد السيارة أن ينتشل مقالكم بدلوه أو حتي بالاتصال بـ 911 ليخرجه إلي صدر المنتدي.

تحايا طيبة للجميع
.......

الملة عمر
انت من وين يا اخوي
معاك واحد من اهلك ناس واوسي الشيخ عبدالقادر
......
سلام وتحايا

اوعى يا ملةعمر
تكون داسي الفجة زي اللسم؟
واكون اتعديت على خصوصية
بس ياخ المداخلة بتاع شمال النيل وشرقو
وتاخد انجمامة لمن تصل الحلفاية بلد الملوك
اكلت معاي جمب كما يقول الشباب
دحين ليك من الحرية مطلقها
ان ترد او تتجاهل
وفي جميع الاحوال محبتك في القلب سابقة
وشرق النيل لشرق النيل رحمة
وطبعا معانا بكري ابوبكر ذاتو....

يا عبد المنعم ود الطيب ود حسن شرف كبير لي مداخلتكم فأنت حسابيا إبن عمي من منطق الناس بتتغزر بالشوك وبعدين يا أخوي ما في خصوصية في أي حاجة واوسي عندي فيها أهل ناس كورينا وآخرين والجيلي والشيخ عبد القادر وأنا أصلا أنا من الشهيناب من غرب النيل وشمال السروراب والشيخ الطيب لكن ولأن الناس الشرق أكثر حضارة منا حيث دخلتهم الكهربة وعرفو التلاجة والتلفزيون ولقاطم بي البوكس أم كف ونحن مع شديد الأسف أقل شكله بين إثنين تستخدم فيها الطورية والسكين وربما جميع أنواع الألات الزراعية. كدي النتفكفك من بوست المهندس بكري أبوبكر الأسد النتر وبجيك في بوست تاني نفرده للكجبي والعواطفه وأم دهب والحويته ، دي ماا أسماء فراعنة دي جزر نقوم بحراثتها كل عام وننتظر الله وكرمه يا البصل والبطاطس ودنك السماء ذات الحبك يا غتسن حجرك ووصلنك الخور سئ ذكر

Quote: يحيي العظام وهي رميم هههههههههههههههههههههه كيفنك يا الحبيب

حباب طارق بن جبريل

يا حليلك وين كنت لابد يا عشاي ؟

اى حد داير تلفون بكرى يحول مئة دولار للخردة كوستاوى
او مئة وخسين دولار للاجنبى دينق

اوووه
الملةعمر انت اخ ومنطقتنا واحدة
انا شتلتا البصل في كجبي وانا بعد صبي
وقلعته وقد اشتدت صبينتي
وورشلتا الموز في كجبي وقطعت السبيط لاحقا
كنا نذهب مع عمنا محمد ود دفع الله وزوجته حبوبتنا
فاطمة بت علي القرم
وهي والدة استاذنا بشرى والد اصدقايي ورفقاء الدرب والقراية
ام دق الدكتور اسامة وطارق
وفي الشهيناب اهلنا ناس ود السيمت والفنان قرض
ولا تنسى زملايي في الجيلي الثانوية
من الشهينات وكان معانا من ام كتي محمد الريح وهب الله
وابوذر موسى فضل الله
والعوض محمد حمزة الشفيع
ومن الكوداب زميلي في الجيلي الثانوية والمنصورة
حمزة الحسين عباس
وفي الجيلي درسنا المتوسطة والثانوي
منطقتنا واحدة رغم النيل الما هان علينا
ونحن زاتنا القال فينا ود مسيخ
العرشوا الشدر بالناس!
وعم كورينا قريبي وناس واوسي كلهم اهل
ونمشي شمالنا وشمالكم جدي زاتو
جاء من الجزيرة اسلانج لاصوله
غفل راجعا لواوسي
اضاع لنا اراضي خصيبة هناك
ولكن العلاقة مستمرة مع ابناء عمومتنا هناك
وسلام يا ابن عمي
ويا رويف
الله يخليك
وسلم لي على البطاطس
التي اقترب موسم تقطيعها
وغرسها في الخصيب
تلك الاراضي السمحة
الغادرا النيل لتوه
ولكنه ترك طميا خصبا لدرجة انه قد يشرق (بكسر الياء والراء وتسكين الشين) البطاطس
وسلام يصلك في مكانك
حيث حضارة الشهيناب شاهد على عراقة اهلها...

.........
بكري سلام ومتاسفين على احتلال البوست
ولكن اعذرنا فما في كل بوست بنلقى ود اعم...

جنوبنا وجنوبكم
بدلا عن شمالنا وشمالكم
اختلطت عندي الاتجاهات
جاطت حروف الاحداثيات
قبال اكتبا

تتبارك ايامك ..ويوم شكرك ان شاء الله ما يجي.. يا هندسة.
سوف ندعم هذا الاتجاه بالمشاركة فيه باذن الله.

ملاحظتين:
1- جزء من اي صفحة المنبر المفتوحة تكون خارج نطاق مساحة الشاشة \...لو في طريقة تعمل فاين تونينق للفيو من عندك
2- بعض الاخوان يكتبو بخطوط مزعجة جدا . ..ببونط عريض جدا وضخم جدا وبولد جدا \...لو في طريقة تقلل الخيارات للفونت او تثبت بعضها

انا قبيل لمن نبهت للماسنجر الداخلي كان في بالي عظم المسؤوليات الماسكها بكرى في اياديه البيضاء والسوداء، فهو بشير المنبر بلامنازع يدير المنبر ويطور تقنياته ويسن لوائحه ويفصل دساتيره ويكتب فيه ويعلق مواضيعه التي يكتبها وبعض مواضيع الناس ويمسح ويكسح مايراه هو غير مناسبا ولا يلتفت في ذلك لتعليق معلق ولا رجاء مترجي ويستخدم رقابته القبليه والبعديه على البوستات ولا يحتاج في ذلك لجهاز أمن أومخابرات وبعد كل هذا ينظر في البريد الخارجي والداخلي ليقرأ شكاوى الناس والأعضاء والأصدقاء،
سيدي الرئيس انت في حاجة لمؤتمر يمنحك استراحة محارب بين الفينة والأخرى، أو بالعدم رئيسا للوزراء يحمل عنك بعض العبء وهموم الرئاسة المطلقة المستدامة.
ختاما قال أحد الحكماء، لو استبدلنا مقولة الحيطان أذان بمقولة للملائكة أقلام لخرج لنا جيل يراقب الله ولايراقب الناس ولا احتاجت المنابر للرقابة.

بكري إنتبهنا وشخصياً إنتبهت لمن قربت أبقي نبيه بري أو زكي عبد الكريم عديل كده ، طيب ماذا بعد؟
موضوعك بكل ما حظي به من متاوقات وتعليقات تقهقر إلي صفحات المنتدي التي لا يراه فيها أحد وهأنذا وللمرة الثانية أنكشه وأعيده إلي صدر المنتدي بكيبوردي وماوسي حتي كادت ترتارة الماوس الصغيرونة ديك تتعطل وتتوقف عن الدردقه للجهد المبذول ، كل ذلك علي أمل أن تمارس شيئاً من الديمقراطية أو الشوري منصتاً لإقتراحاتنا في تعديل أو تنقيح أو تطوير قوانين المنبر وتغيير لون الخلفية إلي لون زاهي يجعل أولئك الذين ينتمون إلي الطبقة غير المستنيرة من أمثالي أكثر قابلية للتطور والتحضر ، وأصحاب الطبقة المستنيرة يتواضعون ويخفضون لنا أجحتهم فنشعر بالإنتماء لهذا المكان الذي آخى بيننا (المعذرة شادي لي كيبورد جديد أب تفاحةً مقرومه داك أها وحاتكم ربع ساعه كايس لي حرف الياء البدون نقطتين ولقيتو بعد تعب عشان أكتبو في كلمة آخى) المفتاح الموجودة فيهو ما ليهو علاقة بالحرف مطلقاً فيه تلاته حروف واحد لاتيني (N) والتاني (إ) والأخير (ر) أها دي تلاته حروف علاقتها بي حرفي شنو غايتو العمل الكيبورد دا ما عافي ليهو. سالت صاحبي المتفيقه في علوم الحاسوب والعالم بكماين الطوب عن سبب الدسدسه والغتغته والتطفيش والتفرقه الذي تمارسه شركة ماك بت أبل فقال لي يا إنسان دا غالباً ما يكون ويرلس كيبورد نسخة العام 2011 وقال لي أول ما تدوس علي مفتاح الـ F3 بتكون عملت mission control أكلت في حناني لكين لمن لقيت الراجل عنده إستعداج يسترسل دست ليهو مفتاح الـ F8 بعد ما عرفت إنه يعني pause حتي لو تبوظ علاقتنا وواصلت مرددا أيوه جاي ياخ مع إنه ما في زول ناداني ، نظام مخارجة.
وفي كل الأحوال هذا الفعل الذي أقوم به الأن سوف يمثل آخر scratch من شخصي لي your back وبعد داك شوف ليك قناية أو يد مكنسه حك بيها ضهرك عفواً أنتشل بيها موضوعك من الأعماق السحيقة