Post: #1
Title: أعلى مافي كيبوردك أنقرو
Author: ابو جهينة
Date: 10-08-2018, 05:51 PM
Parent: #0
05:51 PM October, 08 2018 سودانيز اون لاين
ابو جهينة-السعودية _ الرياض
مكتبتى
رابط مختصر ( على غرار : اعلى مافي خيلك. اركبو )
***
قاصْدَك عديل
أسلوبي كالتالي
لو بقيت أحسن مثالي :
طِيرْتَك .. و إن طارت : غنماية
و غنمايتك كان حلبوها .. حِدَّاية
و أحْسِبها زى ما تحب
تصدق ؟
ما بعرفك لا شفتك ..
لكن كارْهك من زمان
سيرتك الذاتية ما قدر المقام
و بين اسمك و صورتك .. بايْن الإنفصلم
قاصدك عديل
كومك إنت و كومي ...
زي خطين سكة قطر ...
و رغماً عن كدة
كبير احتمال ... يحصل صِدام
أحياناً ما تجي في مزاج يومي
أو ألقاك تعوم عكِس عومي
و قصدْتك عديل
( المهم ) ... جايز شخصنة
و ممكن شفْتنة
أنا زولاً كَلَس ... وجهاً لوجه ما بْتقْدرو
و أعلى مافي كيبوردك .. أنْقرو
أو سميها ثورة ضد الأنْسنة
لما لقيتك مليان أدب و كُلك مسْكنة
ناوي أجوطك و أبشْتِنك آخر بشتنة
سميها زي ما شئتَ
أو قول حَجًَْراً على أفكارك ...
بنط فوق جدار نافوخك ..
و هات يا قرصنة
و لو لقيتك فايق و رايق ...
قول جاك زول العكننة
قاصدك عديل
ما في أسف .. و ما بتراجع ..
لو صادق ... و حلفت مليون يمين
ما إنت إلا كاذْباً أشِر
يا مُضِر ..
يا أكبر مُفِر ...
يا سيف العُشر
أنا فارس الحوبة المُكِر
قاصدك عديل
مهما تتظارف
أو تجيب مليون وش بيضحك ..
برضك ثقيل
قاصدك عديل
أها شِنْ قولك ؟
يا جلابي .. يا إرهابي
قايل نفسك ما ليك مثيل ..؟
مهما كنت
و مهما تكون
أنا قاصدك عديل ...
يا مهمَّش .. يا مهشَّم ... يا مُفَرْمِل تروس التنمية
جيب أجاويدك .. رُش كلام الترضية
برضو قاصدك عديل
ود حزبك مش مُؤدْلَج ؟
و الظُلُم عندو باين و أبْلَج ؟
أنا شايف رايو أعوج
لو كلامو في استقامة السيف ..
ما بِسْوى عندي غير هرْجاً مُكعْوَج
و أنا قاصدك عديل
يا هوا الكتاحة المُهَدْرَج
يا عضو الدهماء ابْ راياً مرجرج
كلامك نُصُّو مبْهم .. لأنك بالكامل مبنج
قاصدك عديل ..
أنا برضو قاصدك عديل
( و هكذا .. تستمر شهرزاد الأسافير و لا تسكت رغم تعاقب الليل و النهار .. بينما شهريار السيرفر يئن تحت وطأة هذا السجال و لا يسمع منه غير : قاصدك عديل )
|
Post: #2
Title: Re: أعلى مافي كيبوردك أنقرو
Author: النذير حجازي
Date: 10-08-2018, 07:29 PM
Parent: #1
مبااااالغة
أعجبتني حد الثمالة
ممكن برضو تسميها قصيدة كاريكاتيورية للمنبر
يديك ألف عافية أستاذنا أبو جهينة
|
Post: #3
Title: Re: أعلى مافي كيبوردك أنقرو
Author: ابو جهينة
Date: 10-08-2018, 10:39 PM
اخونا العزيز النذير حجازي
ليك وحشة والله يا زول
مشكور على المرور الباذخ
عنوانك فعلا يتناسب والنص
دمتم ابدا
|
Post: #4
Title: Re: أعلى مافي كيبوردك أنقرو
Author: almulaomar
Date: 10-09-2018, 02:44 PM
Parent: #3
الرائع حد الدهشة جلال بن داؤود المسكون إبداعاً وإمتاعاً عليك السلام إبتداء ولك التجلة والتقدير دائماً في منبر
يا أخي نظرت في كي بوردي فلم أجد أعلي من esc بكلام الفرنجة فكرت في الهروب لكن تذكرت أن الجري دا ما حقي فعملت يو تيرن ميمماً صوب موضوعكم حاولت النقر علي أعلي ما في الكيبورد فوجدت أربعة عشر مفتاحا حسوماً ، وأنا بين الفكرة والأخرى قومي يا الكهربه أقطعي فقبطع الكمبيوتر وأنطفأ السراج وسكتت التلاجة التي تحاكي تلاجة فخامة السيسي في المحتوى ولف المكان صمت رهيب لم يقطعه إلا الطرق علي الباب من جارتنا عفاف التي بادرتني بسؤال كهربتكم قطعت ولأن القطع عام ولأن العام والأعوام التي سبقته وربما التالية أعوام رمادة ولأن الرماد كال حماد صنقرت ودنقرت وصنقعت وقبلت ذات اليمين وذات البتاع وقلت ليها لا كهربتنا كملت
|
Post: #5
Title: Re: أعلى مافي كيبوردك أنقرو
Author: ابو جهينة
Date: 10-09-2018, 06:25 PM
Parent: #4
اخي الاديب الاريب الملا عمر
تحايا مقيمة وسلام ماكن
اما بعد
بالتأكيد كلماتك احاطت بالنص واهدته بعدا اخر، الا وهو البعد الذي يعني بان الكيبورد خاصتك لا يتوغل في بحور الخصام المتلاطم امواجه بالمنبر ولا يقبل باي ملاسنات.
دوما تجمل المواضيع بهذه الفلسفة العميقة
فلك الشكر
دمتم
|
Post: #6
Title: Re: أعلى مافي كيبوردك أنقرو
Author: MOHAMMED ELSHEIKH
Date: 10-10-2018, 09:40 AM
Parent: #5
pause بس
في البوست دا
تحياتي لكم
|
Post: #7
Title: Re: أعلى مافي كيبوردك أنقرو
Author: ابو جهينة
Date: 10-10-2018, 09:56 PM
Parent: #6
تحياتي اخي محمد الشيخ
اين انت يا زول
تشكر على المرور
دمتم
|
|