ازمة السودانيين الطارئة في مدينة العين الاماراتية

05:20 PM October, 06 2018

سودانيز اون لاين
زهير عثمان حمد-السودان الخرطوم
مكتبتى
رابط مختصر

كنا قلائد جيد الدهر فانفرطت وفي يمين العلا كنا رياحينا , كانت منازلنا بالعز شامخة لا تشرق الشمس الا في مغانينا )

قصدت ان تكون بداية العنوان لانها ازمة حقيقية دخيلة علي الجالية السودانية في الامارات مناظر مؤسفة تقشعر لها الابدان من ناس نايمين في الشارع وشارين ملابسهم في الطرقات لاحولا لهم ولا قوة باعداد كبيرة بدون اكل وشراب بدأت القصة بمجموعة من الناس اللي باعوهم الوهم من السودان وركبو طيارة علي اساس حايجو يلقو شغل وسكن من باب الطيارة وتجمعوا في مناطق متفرقة في مدينة العين في الصناعية وفي السوق المركزي وامام مرأي الشرطة الاماراتية التي تعرف تاريخ الانسان السوداني بعزته وكرامته والاسماء التي كتبت تاريخ الامارات وكان توقيعها بان هنا الانسان السوداني باني الحضارة الاماراتية

لندخل ونتحدث عن الواقع الان
تم تسفير عدد 60 شخص بحمدالله وتبرع احد الخيرين الان بعدد 25 تذكرة ودارت الاجتماعات المتواصلة ما بين وضع حلول لتجفيف المنبع من السودان حتي لا يتعود كل من خطرت في باله فكره ( اركب الطيارة وامشي ساي وانوم في الشارع ) لانو البلد دي فيها قوانين لا تسمح بالتسول او النوم في الشوارع وكل الصورة المهينة لشخصو حايلقاها هنا واكتر من داره ..
حوالي 30 شخص انتشروا مابين الصناعية والجبل مع البتان
السفارة جمعت عددية اخري واتفقت مع طيران للناس الماعندهم مخالفات مقابل رسوم رمزية تدفعها السفارة لشركة الطيران هذه 100 درهم

السيل مازال متدفق فمنهم من ( باع القدامو والوراهو ) وماعاوز يرجع ويكمل نومو في الشارع ومنهم من تشتت وتوزع في ارجاء المدينة وفي الاقتنع بالواقع ومنتظر تذكرة العودة
الموضوع دا اذا كان بالاجراءات القديمة لخارجية السودان والسفارة كان تم بسرعه ولكن المستحدثات لا تستحمل الوضع الاكبر من طاقة الاندية السودانية فا نرجو من كل هميم غيور متابع اولا لازم يقيف الموضوع دا من الخرطوم عشان دي سمعة بتاعت سنين بتدمر في ايام وانو نساهم مع النادي السوداني الذي اجتمعنا معاهو بالامس في تقليص العدد وتوفير تذاكر للناس دي

المنشور دا خلوهو يصل لكل الاطراف عشان اصحاب الضمائر الصاحية في السودان يساعدونا والناس الهنا تقيف معانا بي اي مبلغ حتي لو 10 درهم مقابل اعدادنا الضخمة دي في قروبات الواتساب حانعمل حاجة
بالمقابل الجهات الاماراتية اكيد صبرها حاينفذ وماحاتسكت لي موضوع زي دا فا الناس تحاول تنجز الموضوع ( زيتنا في بيتنا )

تعرض مئات السودانيين لأكبر عملية احتيال بالإمارات
.......................
تعرض مئات السودانين بدولة الإمارات لاكبر عملية احتيال وخداع من قبل وكالة سفر وسياحة قامت بتكملة إجراءات سفرهم لمدينة العين بحجة إيجاد فرص عمل لهم.
إلا أن المفاجأة كانت اختفاء صاحب الوكالة في ظروف غامضة وتركهم دون إقامة وهم الآن يفترشون طرقات مدينة العين في مشهد مأسوي كأول ظاهرة تحدث في دولة الإمارات.
وكشفت مصادر تحدث لصحيفة الأخبار، أن وضع السودانين الضحايا يحتاج إلى تدخل عاجل من السفارة لإعادتهم لأرض الوطن في وقت سارع فيه عدد من أبناء السودان الخيرين لإستضافة بعضهم إلا أن العدد وصف بالكبير ويفوق إمكانياتهم.

لك التحية يا حبيبنا .


حقيقة حاجة اغرب من الخيال !
الناس زمنها دا كلووووو تتكلم عن احتيال ناس
الواكالات والعقود المضروبة في كل وسائل التواصل
الكمية المهولة دي ما عرفت الموضوع دا ؟؟؟

إلا أن العدد وصف بالكبير ويفوق إمكانياتهم.
زي كم كدا يا زوزو ؟

يا ناس الخليج كااااااافة نترجاكم ان تساعدوا اخوتكم المضيومين
لانها دي اول واخر سمعتنا . ولانهم هم اتخدوا برضو فعليكم ..
اغلي ما عندكم تساعدوا اخوتكم .

اللهم نسألك الستر في الدارين .

لم أفهم

هل كاتب المقال خائف على "سمعته" في الإمارات، أم أنه بصدد إيجاد حلول سريعة من أجل مساعدة السودانين المغشوشين؟

حقيقة هي ازمة اطلت برأسها .. وفي الامارات القوانين تمنع أي مظهر من مظاهر التجمع او أن تهيم على وجهكـ
ممكن أن يطبق قانون التسول او التشرد .. ناس العين الآن كلهم على قلب رجل واحد والتبرعات ممتازة
وستنتهي هذه الأزمة في غضون ايام قليلة .

فقط المطلوب من الناس أن لا تنخدع تاني مع ناس الوكالات .. والتعامل يكون مع أصحاب السمعة الجيدة
لقد كثر الاحتيال ...
بعدين الناس تخلي بالها الا تحضر الى الامارات بفيزة زيارة الا بتذكرة ذهاب واياب ..

في البداية الشكر لكل الاحباب علي المرور
الاخ دينق تحياتي

قد لا يعلم البعض أنا في العين عدد مقدر من البورداب بل بينهم المخضرمين ولقد أرسل نص هذا البوست أحدهم لان هنالك أتفاق علي ما أظن بينهم أن لاتذكر قضايا السودانيين في هذه المدنية علي المنبر
لك كل الود

Durra Gambo
52 mins ·
الصحف التي تفرد خطوطها الأساسية لخبر اكتشاف حساب مزيف في مجموعة نسائية ، كانت فيه عملية استدارج لخصوصية جنسية، كان أولى بها أن تفتح صفحتها الأولى وعنوانها الرئيس لكارثة السودانيين المشردين في شوارع مدينة العين الإماراتية، فحين قطعت أسرهم (من لحمها الحي) ليسافر أولادها لأمان الخليج، بدلا" عن ظلمة البحر المتوسط في الطريق لأوربا، لم تكن تنتظر أن تدفع عشرة جنيهات لقاء أخبار مجموعة نسائية لا تتعدى عضويتها السبعة آلاف بكثير، ولا كانت تلك هموم الأسر.
هب أن كل المجموعة كانت مخدوعة ، بل هب انها كانت كلها منخرطة في هذه القصة الجنسية، ماذا يضير المواطن منها؟ وماذا يستفيد حين يصبح على دولار تدخل حكومته فيه ديربي مع تجار العملة ، وقبل أن يفهم ماهيتها، يجد طبق البيض صار رفاهية والفول من متع الحياة؟!!!
هل فكرت تلك الصحف في سؤال الحكومة وبنكها المركزي عن العبرة من تحويل المغترب أو المهاجر عن طريق البنك ، ليجد انه بعد خصم العمولة البنكية فقد جنيها" من كل مائة دولار وان على وكيله هنا ان يستلم المبلغ بالقطاعي كل يوم ألف جنيه فقط؟
دي هموم المواطن يا سادة..ودي الصحافة العايز يشوف المواطن نفسه فيها، تمثله، تعبر عنه، تعكس قضاياه
ما يحدث في مجموعة نسائية لا يعني الشارع في كثير..المجموعة دي لا هي حزب سياسي ولا كيان ثوري ولا تنظيم سري.. لكن اسألوا انفسكم عن ما هي الصحافة في فهمكم ؟ ثم أجيبونا وأجيبوا القارئ قبل أن يخسر أيضا" ثمن بضع قطع خبز

Quote: من قبل وكالة سفر وسياحة

اسم الوكالة شنو ؟
ومن هو صاحبها ؟
واين موقعها ؟
وهل تم عمل اجراءت قانونية تجاه هذه الحالة ؟
أسال الله ان ييسر امرهم ..

Quote: فقط المطلوب من الناس أن لا تنخدع تاني مع ناس الوكالات ..

ليست المرة الاولى ..ولن تكون الاخيرة بكل اسف.....

ليست المرة الاولى ..ولن تكون الاخيرة بكل اسف...
======================
حبيبنا محمد الحسن .. تحياتي ..
تعرف نحن مشكلتنا في القنصليات والسفارات .. معظم أوقاتهم في الاحتفالات والتكريم والعزائم
من المفترض عليهم متابعة تلك الشركات التي تأكل الاموال المساكين وتشوه سمعة البلد
ماذا لو جاء مندوب من القنصلية وجمع المعلومات عن تلك الشركات .. وفتح بلاغات في الخرطوم والامارات
وأشهرت بهم في الصحف والمواقع .. ولكن هم في الوادي والناس في وادي ..
نحن هنا في جدة متعودين على مثل هذه الممارسات ولكن لدينا جمعيات مؤجرة بها كل شيء نوم أكل تلفزيون ... إلخ
تخيل قرى دنقلا والمحس عدد الجمعيات في جدة فقط 198 جمعية .. لأن العقار هنا ليس على مستوى الامارات من حيث النظام والغلاء
وايضاً الضبط الامني والمطاردة والمتابعة أخف بسبب العمرة والحج والامارات ومدنها مساحاتها محدودة يمكن تغطيتها بكميرات
الله يعين أخواننا في مدينة العين .. أعرف أنهم أهل شهامة ومروؤة ..

وأخواننا في الامارات من ذوي الكفاءات والمقدرات .. يمكنهم متابعة مكاتب الغش وتجارة البشر وتوريطهم ..

تحياتي للجميع .. وياريب السفارة أو القنصلية تكون واجهة الوطن ..

الحمد لله تم تسكين السودانيين بدار النادي السوداني

وجاري العمل علي تسفيرهم السودان وباذن الله نتوفق في الخطوه دي باسرع وقت ممكن

الاخ الكريم abas
لكم كل الامتنان وهذا دوما سلوك أهل السودان وما كنا نتوقع منكم أيها الرهط الافاضل