Post: #1
Title: استفسارات عن مصر: شراء شقق طريقة العيش فيها وعن البلد عموما
Author: النذير حجازي
Date: 10-06-2018, 01:03 PM
01:03 PM October, 06 2018 سودانيز اون لاين
النذير حجازي-بلاد الله الواسعة دي، كل شهر في بلد
مكتبتى
رابط مختصر سلام يا شباب،
ياريت تفيدونا عن اسعار الشقق في مصر،
والاحياء الجيدة للأجانب، وطريقة العيش
فيها، وكذلك الأمن فيها خصوصا موضوع
التحرش الجنسي هل هو كما يقال عنها،
وكذلك من ناحية الأمن والجرائم عموما،
وكذلك تكاليف العيش فيها لمن يملك شقة
تمليك.
|
Post: #2
Title: Re: استفسارات عن مصر: شراء شقق طريقة العيش فيه
Author: Haju Muktar
Date: 10-06-2018, 01:08 PM
Parent: #1
النذير استفسارات....اليومين ديل شايف استفساراتك كترة خلاص
مره قص معده ومره ايزيز وهسع جابت ليها شقه في القاهره
الله يستر علي البروفسور عبدالله طيب في مرقده
سلامات ...مداخله استفساريه بس ي صديقي
|
Post: #3
Title: Re: استفسارات عن مصر: شراء شقق طريقة العيش فيه
Author: النذير حجازي
Date: 10-06-2018, 01:11 PM
Parent: #2
هههههههههه@ حبيبنا هجو
والله يا هجو قلنا نستفيد من الخدمة
المجانية اللي بقدمها لينا بكري دي،
والله يديهو العافية
|
Post: #4
Title: Re: استفسارات عن مصر: شراء شقق طريقة العيش فيه
Author: أبوبكر عباس
Date: 10-07-2018, 01:30 AM
Parent: #3
قلت يا زول، أشوف لي بوست من بوستاتك الكتيرة أنزل فوقو الأقتباس دا والرد،
بدل البوست الأصلي
عشمان البوست الأصلي يفتق نقاشاً حول المرحوم البنيوية
ويمكن واحد يبادر نقاش بمقولة بولا: "الجنيات أبان خرتايات"
Quote: نعم يوقفوا طوالي، يا إما يجتهدوا ويتحسنوا يا أم يشوفوا شغلة تانية،
لأنه لا يوجد شيء يقدمونه للناس علشان كده بهاتروا في البوستات.
بمعنى كلامك دا المدارس ما تنشر نتائج الطلاب، ويكون الموضوع
سراً! |
يعني هسّ يوم التصحيح حقي جاء، وأديتني أعد؟!
إما أتحسن؟ أو أتوقف عن الكتابة؟
يا زول، أنا قاعد أكتب كلام مفيد، ووجودي بالمنبر فيهو الكثير الذي قدمته للناس
لذلك لن آخذ بنصيحتك ولن أتوقف عن الكتابة
|
Post: #5
Title: Re: استفسارات عن مصر: شراء شقق طريقة العيش فيه
Author: Elmoiz Abunura
Date: 10-07-2018, 01:53 AM
Parent: #4
سلامات اخى النذير
انت عاوز ليك تانى عشرين سنة عشان تتقاعد, و جنبك هاواى, كوستاريكا, بليز, الجزر العذراء, سان كيتس و نيفز, وتانى بتفكر فى سوق ام دقسو, القاهرة الكبرى!!!!!
يااخى احسن ترجع الجزيرة مقرات, ارض الاجداد
|
Post: #6
Title: Re: استفسارات عن مصر: شراء شقق طريقة العيش فيه
Author: سفيان بشير نابرى
Date: 10-07-2018, 02:17 AM
Parent: #5
و الله أبو نورة اداك النجيضة و انا قبل أسبوعين كنت في هاواي في هونلولو تحديداً ياخ دي بالجد بلد التقاعد غايتو انا بتقاعد فيها
|
Post: #7
Title: Re: استفسارات عن مصر: شراء شقق طريقة العيش فيه
Author: النذير حجازي
Date: 10-07-2018, 03:49 AM
Parent: #6
Quote: يعني هسّ يوم التصحيح حقي جاء، وأديتني أعد؟!
إما أتحسن؟ أو أتوقف عن الكتابة؟
يا زول، أنا قاعد أكتب كلام مفيد، ووجودي بالمنبر فيهو الكثير الذي قدمته للناس
لذلك لن آخذ بنصيحتك ولن أتوقف عن الكتابة |
هههههههههه، الله يجازي محنك يا مستنير، انت ما عندك وسط؟!
يا تقيم نفسك يا شرط يا الأرض؟! هههههههه
صدقني لم يخلد ببالي قط عند ردي السابق أنت ولا الشريحة التي تنتمي إليها من الكتاب يا المستنير،
فأنا أعتبرك من الأقلام الصديقة، وعادة لا أطلق نيران صديقة، لكن لو مصر على تقييمي الثقافي لك، فأنت من الأقلام فوق الوسط في هذا المنبر، وما بقدر أضعك في مرتبة الخواض جنبا إلى جنب، أو حتى قريب منه لأني ح أفقد مصداقيتي على حساب مجاملة الأصدقاء.
مع تقديري الذي تعلم
|
Post: #8
Title: Re: استفسارات عن مصر: شراء شقق طريقة العيش فيه
Author: النذير حجازي
Date: 10-07-2018, 03:58 AM
Parent: #7
سلام يا حبايبنا بروف معز وسوفي،
يا جماعة باستثناء الجزيرة مقرات،
فما اقترحتوه فهو غالي ومكلف،
ومعاش التقاعد قليل جدا، ومصر اخترتها
من الناحية الاقتصادية وكذلك من الناحية
الثقافية، ممكن الواحد يقضي يومه في
حضور الندوات الثقافية وقراءة الكتب
بأسعار زهيدة، وأشياء أخرى كثيرة
لا تحصى ولا تعد تتماشى مع اهتماماتي.
|
Post: #9
Title: Re: استفسارات عن مصر: شراء شقق طريقة العيش فيه
Author: أبوبكر عباس
Date: 10-07-2018, 05:21 AM
Parent: #8
أنا طبعاً ليس لدي أقلام صديقة.
أنت تفقد مصداقيتك حين تنكر أنني المقصود بالمداخلة
أو نقول:
يا ملاسي، النذير ليس فقط لا يقرأ،
انه لا يعي ما يكتب
يا زول، نحن الزول البشرد، ما عندنا معاهو كلام
|
Post: #10
Title: Re: استفسارات عن مصر: شراء شقق طريقة العيش فيه
Author: النذير حجازي
Date: 10-07-2018, 05:33 AM
Parent: #9
رسالتك وصلت
|
Post: #11
Title: Re: استفسارات عن مصر: شراء شقق طريقة العيش فيه
Author: Mahir Mohammed Salih
Date: 10-07-2018, 09:46 AM
Parent: #10
حياك الله النزير
شوف هنا ،، أقع طوالى فيما تفكر فيه ،، دائما أقول أن مصر هى الدولة الوحيدة
التى لا يشغر فيها السودانى أنه أجنبى ،، تمشى عزابى زى العسل تمشى عوائل زى العسل
عندنا مجحموعة من الأصدقاء وبعضهم من أهلنا أخذوا شقق فى مصر والله ماشة معاهم باسطة
طوال العام شققهم بتكون مؤجرة ،، بيجوا فى أجازة المدارس بيأخدوا أولادهم وطوالى لمصر يقضوا
أجازتهم هنالك.......... وهكذا ،، بس شرط شقتك تكون فى مناطق نص البلد زى عابدين والسيدة والمهندسين
والجيزة وكدة ،ـ ما تجى تقولى 6 أكتوبر والا حدائق الأهرام والا المخططات البعيدة الراقية زى مدينتى والا حتى
مصر الجديدة .
الشقق تقريبا فى المناطق اللى أنا زكرتها دى فى حدود من 500 إلى 900 حسب الموقع والدور ،، وهى متوسطة
الأعمار من 10 إلى 15 سنة .
أنشاء الله أكون أفدتك ببعض المعلومات
|
Post: #12
Title: Re: استفسارات عن مصر: شراء شقق طريقة العيش فيه
Author: muntasir
Date: 10-07-2018, 10:50 AM
Parent: #11
والله يا أبوالنيز بتحرر في سوقك ساكت تحرش جنسي شنو عليك في الحر ده
|
Post: #13
Title: Re: استفسارات عن مصر: شراء شقق طريقة العيش فيه
Author: النذير حجازي
Date: 10-07-2018, 11:07 AM
Parent: #11
حبيبنا ماهر، يديك الف عافية،
يعني في حدود ٣٠ ألف دولار
بتجيب شقة محترمة؟!
أنا كانت عاجباني ٦ اكتوبر لانو فيها أجانب كتار،
مثل العراقيين والسوريين، ليه استبعدتها من القائمة؟!
علشان بعيدة من وسط البلد؟! بمقدار كم؟!
|
Post: #14
Title: Re: استفسارات عن مصر: شراء شقق طريقة العيش فيه
Author: Mahir Mohammed Salih
Date: 10-07-2018, 11:19 AM
Parent: #13
حبيبنا ماهر، يديك الف عافية،
يعني في حدود ٣٠ ألف دولار
بتجيب شقة محترمة؟!
أنا كانت عاجباني ٦ اكتوبر لانو فيها أجانب كتار،
مثل العراقيين والسوريين، ليه استبعدتها من القائمة؟!
علشان بعيدة من وسط البلد؟! بمقدار كم؟!
ــــــــــــــــــــــــــــــــــــــــــــــــــــــــــــــــــــــــ
يا النزير المشكلة ما فى المسافة ،، المشكلة فى الزحمة طبعا ،، هو حقيقة تقريبا لو ما غلطان زى 35 كلم من وسط القاهرة
طيب الناس البتجى تأجر الشقق إما سياح أو ناس كايسين علاج أو طلبة فى الجامعات والمعاهد ،، عشان كده ما دايرين الأطراف
والأماكن البعيدة عشان المواصلات بصفة رئسية وربما يتمشوا برجلينهم على النيل و ميدان التحرير والأسواق المشهورة والسينمات والملاهى الليللية والفنادق
المسافات لو ما مشكلة عندك أوكى فى مدينتى و ناس 6 أكتوبر والحدائقيات ( حدائق الأهرام ، خدائق القبة ، حدائق الجيزة ) وما شاكل ذلك
فالشقق هناك أرخص بكل تأكيد
مع التحية ،،
|
Post: #15
Title: Re: استفسارات عن مصر: شراء شقق طريقة العيش فيه
Author: حامد محمد حامد
Date: 10-07-2018, 11:44 AM
Parent: #14
السلام عليكم
اخى النذير سؤال قبل الإجابة هل تريد الشقة استثمار ام شقة خاصة لك للسكن
طيب بفرض الاستثمار اقع في كلام محمد صالح الفوق وممكن تضيف ليهم 6 أكتوبر وحتى فيصل كمان وحتلقى الشقق رخيصة بس زيد ال 30 الف شوية .
اما اذا رغبت في امتلاك شقة لك ولاولادك وللمستقبل وتنشد الامن فابعد من الأماكن المذكورة فوق وخليك في المدن الجديدة كمدينتى والرحاب والشروق ومصر الجديدة في بعض اماكنها والتجمع الخامس اى القاهرة الجديدة .
أتمنى لك التوفيق
حامد مقيم سابق بالقاهرة
|
Post: #16
Title: Re: استفسارات عن مصر: شراء شقق طريقة العيش فيه
Author: عباس محمود
Date: 10-07-2018, 11:50 AM
Parent: #14
سلامات يا النذير
طوالى أتزكرت البوست العملتو زماااان بتسأل فيهو عن مدينة العين
بعدها بأشهر لقيناك فى نص العين .
احد الأصدقاء بعد كم وثلاثين سنة فى باريس أختار مصر بلد للتقاعد
من ضمن أسباب كثيرة عددها زكر لى الرخصة والقرب ويسر السفر للسودان .
سلامى للمدام والشباب .
|
Post: #17
Title: Re: استفسارات عن مصر: شراء شقق طريقة العيش فيه
Author: علي عبدالوهاب عثمان
Date: 10-07-2018, 02:09 PM
Parent: #16
.
اما اذا رغبت في امتلاك شقة لك ولاولادك وللمستقبل وتنشد الامن فابعد من الأماكن المذكورة فوق
وخليك في المدن الجديدة كمدينتى والرحاب والشروق ومصر الجديدة في بعض اماكنها والتجمع الخامس اى القاهرة الجديدة .
==========================
مع التحية للحبيب النذير .. بوست مفيد ..
حامد .. أننقا مسكاقمي ..
صدقني يا حامد كلنا فكرنا القاهرة .. هي ورثة الاباء .. رجعنا لزمان
من كثرة إدمان مصر زمان أهلنا كان يقولوا أنا ماشي السودان عندما يكون السفر جنوباً
عارفك يا حامد من ايام المدرسة إنت زول ذواق وأنيق ..
الأماكن التي أشرت إليها .. إذا الشقة 3 غرف وصالة .. كم القيمة .؟؟
عندي ناسنا في القاهرة كثيرين .. لكن قلت أرجع ليك ..
تحياتي حامد أننقا ..
|
Post: #18
Title: Re: استفسارات عن مصر: شراء شقق طريقة العيش فيه
Author: النذير حجازي
Date: 10-07-2018, 03:52 PM
Parent: #17
شكرا ليكم يا حلوين فردا فردا،
وعاجز عن شكركم، وربنا يكتر من أمثالكم
|
Post: #19
Title: Re: استفسارات عن مصر: شراء شقق طريقة العيش فيه
Author: Hassan Farah
Date: 10-07-2018, 04:57 PM
Parent: #5
يااخى احسن ترجع الجزيرة مقرات, ارض الاجداد
-------------------------------------------------------------------------------------------------
قريبى المعز ابونورا لك التحية
هو بالله النذير دا برضو من اهلنا؟؟؟
هههههه مساختنا اصلها لا تخفى...
النذير تحياتى
|
Post: #20
Title: Re: استفسارات عن مصر: شراء شقق طريقة العيش فيه
Author: النذير حجازي
Date: 10-07-2018, 06:36 PM
Parent: #19
هههههههههه@ حسن فرح
يا أبو الحسن عندك علاقة بالعمدة فرح الملاوي؟!
غايتو لو طلعت قريبو أنا وبروف معز نعملك البودي قارد حقنا في المنبر هههههههه،
العمدة فرح الملاوي عليه الرحمة اشتهر بالقوة الخارقة
|
|