الشهادةالسودانية غيرمعترف بها في كينيا!

05:00 PM October, 04 2018

سودانيز اون لاين
زهير عثمان حمد-السودان الخرطوم
مكتبتى
رابط مختصر

كما وعدت الجميع بموضوع الشهادة السودانية غير المعترف بها في جمهورية كينيا... القصة كالاتي
تقدمت بطلب لدراسة ماجستير في الصحافة الرقمية بجامعة Day star تم تحويلي الى مفوضية الدراسات العليا لتقييم شهادتي الجامعية. لحدي هنا تمام، مشيت مفوضية الدراسات العليا او لجنة التعليم العالي اسمها Commission for university education
الناس ديل قالو لي تجيب لينا الشهادة السودانية " لاحظ الشهادة السودانية وليست الجامعية" احضرت الشهادة السودانية #ام_شدوق. طوالي حولني لحاجة اسمهاKenya national examination council لمعادلة الشهادة السودانية. مشيت لمجلس فحص ومعادلة الشهادات. لقيت طلاب من مختلف بقاع الارض. اها الجماعة ديل قالو لي بالحرف الواحد الشهادة السودانية ما عندنا ليها معادلة يعني ما بنعادلا بشهادتنا الكينية. ونحن خاطبنا حكومة السودان بذلك الامر " نحن طلبنا منهم بعض الاشياء ولم توضح". اها انا ما وقفت اتصلت برئيس الجالية السودانية في كينيا كجهة رسمية. رئيس الجالية السودانية في كينيا بروفسور السناري استاذ في احدى الجامعات الكينية. البروف قال لي "ايوه صحيح الناس دي طلبت تشوف المنهج ونحن كجالية خاطبنا السفارة والسفارة خاطبت وزارة التربية التعليم. قامت وزارة التربية السودانية بالرد في خطاب من كم وسبعين ورقة لكن الكينيين طالبوا بالمنهج نفسه ككتب منهج الاساس والثانوي وده الوزارة ما جابتو" انا ما وقفت هنا رجعت لمفوض الجامعات تاني وقدرت اقعد معاه. استفسرت انو الاسباب شنو. اولاً الراجل طلع عامل ماجستير في التربية في جامعة الخرطوم بداية السبعينات!. قال لي في معني حديثة انه تم متابعة القادم من السودان في الفترة من 2010 الى الان ووجدو ضعف في المستوى. على سبيل الدراسات العليا استقبلت كينيا عدد من الطلاب السودانين في الدراسات العاليا نسبة 92% من الباحثين لم يتسطيعوا اكمال البحث بسبب ضعفهم الاكاديمي. ونسبة الـ 8% المتبقية استطاعت اكمال الدراسات العليا ولكن كلهم مكثو في الجامعات 4 سنوات بدلاً عن سنتين بسبب عدم المقدرة على تجاوز الفصول الدراسية. هذا الامر قاد وزارة التعليم لمحاولة دراسة المنهج السوداني لمعرفة الاسباب ولكن السلطات في بلادكم لم ترد فاضطرنا لعدم قبول اي طالب فوق الثانوي قادم من السودان بما في ذلك المنح الدراسية. رجعت تاني لمجلس التقييم بتاع الشهادات وقابلت 2 من لجنة التقييم قالوا تم ايقاف استيعاب الطلاب السودانين في الدراسات فوق الثانوي لامر متعلق بمنهج السودان ونحن في انتظار رد من السلطات السودانية وهذا القرار مخطرة به حكومة السودان منذ العام 2016 المهم انو انا عندي خطابات رسمية من مفوضية التعليم العالمي ومن لجنة التعليم في كينيا من اعلى الجهات. ساقوم بنشرها في مادة صحفية متكاملة عن هذا الامر. يلا بالنسبة للسودانين العندهم رغبة دراسة في كينيا اوصيكم بعدم ضياع الوقت والمال فالامر يحتاج حلول جذرية متعلقة بالمنهج السوداني او اتصالات على مستوى الخارجية ووزارة التربية والتعليم وثالثة الاسافي هو ان ما تقوم به كينيا ستقدم عليه كل دول الاقليم الشرق افريقي.


منقول من صفحة الفيسبوك للصديق فيصل سعد

الحبيب زهير ..
يمكن عشان المنهج السوداني بالعربي

حسب جامعة الدول العربية

هذا إجتهاد مني ..

تحياتي ..