Post: #2 Title: Re: استفسار: في زول عندو فكرة عن عملية قص المع� Author: عبدالحفيظ ابوسن Date: 10-02-2018, 06:38 AM Parent: #1
ونسة ساي مع جارنا عملها قبل عشرة سنة في مصر نظام اكل قاسي جدا بعدها . فالمعدة اقل شئ بملاها انخفض وزنه انخفض السكري عنده صار رشيقا سنوات ما مشي بي كرعينو بقا يمشي اي مشوار ناجحة جدا جدا توكل ساي
Post: #3 Title: Re: استفسار: في زول عندو فكرة عن عملية قص المع� Author: النذير حجازي Date: 10-02-2018, 06:41 AM Parent: #2
الله يطمنك يا عمدة
Post: #4 Title: Re: استفسار: في زول عندو فكرة عن عملية قص المع� Author: عبدالحفيظ ابوسن Date: 10-02-2018, 06:46 AM Parent: #3
بالتوفيق وكان ما بصوم بقا يصوم
Post: #5 Title: Re: استفسار: في زول عندو فكرة عن عملية قص المع� Author: Haju Muktar Date: 10-02-2018, 06:56 AM Parent: #4
النذير سلامات انا قاصين لي 70% من المعده ..السته شهور الأولي شوربه قدر فنجان والكأس شمومه من حيطة الجيران تقيف لط..عمليه ساهله ...اتو كل علي الله ويديك العافيه وما تشوف شر
Post: #6 Title: Re: استفسار: في زول عندو فكرة عن عملية قص المع� Author: عبدالمنعم الطيب حسن Date: 10-02-2018, 07:09 AM Parent: #4
زميلنا في المكتب وزن عادي مشى عمل العملية دي وجاء راجع كان اسدا ولكن اصبح يكتفي فقط بفنجال قهوة طوال اليوم ومعلقة زبادي نهاية اليوم وايام ما يزور الحمام اهاااااا وزنو انخفض جدا وامتلا بالتجاعيد وهو الشاب....
لوكان الوزن اوفر خالص معليش اما اذا كان الوزن عادي وباحث عن الرشاقة فالامر لا يستحق كما هو الحال عند صاحبنا دايما اقول ليهو لما اشوفو يعاني دي الرشاقة الكتلت اشراقة ...... الف سلامة يا باشا
Post: #7 Title: Re: استفسار: في زول عندو فكرة عن عملية قص المع� Author: محمد المسلمي Date: 10-02-2018, 07:16 AM Parent: #6
سلام يا النذير وقف السكر نهايي وقلل كمية اكل الخبز والأرز وركز علي الخضار واشرب 2 كوب ماء واحد قبل البدء في الاكل والآخر اثناء الاكل خلال شهر النتيجة واضحة شديد
---- ابعد من العملية والربط الاتكون خيارات غيرها مافي 😡😡😡😡
Post: #8 Title: Re: استفسار: في زول عندو فكرة عن عملية قص المع� Author: النذير حجازي Date: 10-02-2018, 07:55 AM Parent: #7
البوست دا جاب الناس الحلوين كلهم، يا هجو منور البوست يا عزيز وربنا يطمنك، النعوم هههههههه أنا مازي صحبك وزني 120 كيلو وجابت عليها اعراض سكري كمان، لو ما لحقت نفسي السمنة بتجيب امراض القلب والشرايين، علشان كده بعد كلام أبو سن وهجو، توكلت على الله.
يا ود المسلمي لمن كتبت لي وقف السكر، فهمتها وقف شراب المريسة هههههههه، وعلى نمط البلاغات المدورة في المنبر، طوالي فكرت افتح فيك بلاغ قذف هههههههه، لكن لمن قريتها بضم السين الله مرقك هههههههه، والعفو والعافية ليك ولاخوك ابو السيد
Post: #9 Title: Re: استفسار: في زول عندو فكرة عن عملية قص المع� Author: Nasser Amin Date: 10-02-2018, 08:50 AM Parent: #8
سلامات الاخ النزير
استفسرت ليك من قريبي شاب خضع للعملية وكان وزنه 140 كجم و الان 78 كجم في 3 انواع من عمليات المعدة:
1- القص 2-الربط 3- تحويل مسار جزء من المعدة ( نوعين : تقليدي , مصغر) و يوصل بالامعاء الغليظة و هي الخيار الافضل ( دا كان الخيار بتاعو)
قال في التحويل نزوا الوزن بكون تدريجي حوالي 15 كيلو في الشهر ولو عندك سكري من النوع التاني او ضغط ح يزول بعد العملية في الشهر الاول سوائل خفيفة و الشهر التاني سوائل تقيلة و التالت اكل مهروس و بعدها تاكل عادي.
عملية تحويل مسار المعدة بالمنظار - شرح كامل للعملية وكيفية إجرائها
الفرق بين تحويل المسار التقليدي و تحويل المسار المصغر
عملية تحويل المسار وتأثيره على مريض السكر
Post: #10 Title: Re: استفسار: في زول عندو فكرة عن عملية قص المع� Author: النذير حجازي Date: 10-02-2018, 09:02 AM Parent: #9
يا أبو نصرة كفيت ووفيت ويديك العافية
Post: #11 Title: Re: استفسار: في زول عندو فكرة عن عملية قص المع� Author: محمد حمزة الحسين Date: 10-02-2018, 10:48 AM Parent: #10
Quote: سلام يا النذير وقف السكر نهايي وقلل كمية اكل الخبز والأرز وركز علي الخضار واشرب 2 كوب ماء واحد قبل البدء في الاكل والآخر اثناء الاكل خلال شهر النتيجة واضحة شديد
أضيف عليهو نصف فنجان زيت زيتون علي الريق الصبح و3 حبات ثوم ... وجهز حالك بمنشفه للعرق عادي ممكن تغير ملابسك في اليوم مرتين لو بقيت أخرق هههههه او تلاته مرات معقوله ، انا من 107 كيلو نزلت لي 89كيلو ووقفت علي كدا في الأسرة عندنا تقلة العضم ههههههههههه
يا شيخ المسلمي المويه خليها بالحوجه لان زيت الزيتون والثوم بعطش...
اما العمليه
Quote: ابعد من العملية والربط الاتكون خيارات غيرها مافي 😡😡😡😡
: : : مع التحيات لله الزاكيات
Post: #12 Title: Re: استفسار: في زول عندو فكرة عن عملية قص المع� Author: عادل الباهي عبدالرازق Date: 10-02-2018, 11:07 AM Parent: #11
عمو النذير تحياتي ياحبوب نصيحة ابعد من العمليات انا من 94 وقعت الرياضة وبشرب كوم ماء قبل الاكل ووقفت السكر والخبز نزلتا وثبتا في وزني المثالي 85
عمو دي زعل ساي بتنزلك عشرة كيلو هههههه
Post: #13 Title: Re: استفسار: في زول عندو فكرة عن عملية قص المع� Author: muntasir Date: 10-02-2018, 11:13 AM
أبو النز من الصفوة طردوك نجضتنا يوم تمطير تمباك ويوم ربط قناة ڤالوب وتفك أدولف تمسك في السويسري 😂
Post: #14 Title: Re: استفسار: في زول عندو فكرة عن عملية قص المع� Author: النذير حجازي Date: 10-02-2018, 12:42 PM Parent: #13
هههههههههه شكرا يا حلوين محمد حمزة ود الباهي ابو سطر
Post: #15 Title: Re: استفسار: في زول عندو فكرة عن عملية قص المع� Author: محمد الشيخ أرباب Date: 10-02-2018, 01:16 PM Parent: #14
النذير
ابعد من العمليات وغير النظام الغذائي بتاعك وكتر من الشاي الاخضر بالزنجبيل
Post: #16 Title: Re: استفسار: في زول عندو فكرة عن عملية قص المع� Author: دفع الله ود الأصيل Date: 10-02-2018, 04:15 PM Parent: #15
يا ود حجازي إتا فعلن جااادي بي صحك؟! ياخي موش كفاية خشومنا، يعني گمان گايسين تكمكمونا بي( تحت). ياهو الناقص و الله.ثم وينن زاتن الگروش مع صفوف الرغيف و الجاز . ياخي هديل گلابنا من الهزال الواحد لامن يجي يبول لامن تب ينتكل على أقرب حيطة. و برضو يدغمس لك الحقيفة يقولك: خايف يغرقا(تنماص) تقع. فا شنو غايتو عليكن جنس غايتو !؟
Post: #17 Title: Re: استفسار: في زول عندو فكرة عن عملية قص المع� Author: النذير حجازي Date: 10-02-2018, 04:56 PM Parent: #16
هههههههههه@ ود الأصيل، والله السمنة دي واحدة من إبتلاءات الغربة، الواحد طلع من السودان ضعيف زي السوط.
شكراً يا حبيبنا ود الأرباب على النصائح الغالية، لكن نحن وصلنا آخر العلاج الكي.
Post: #18 Title: Re: استفسار: في زول عندو فكرة عن عملية قص المع� Author: دفع الله ود الأصيل Date: 10-02-2018, 08:59 PM Parent: #17
هههههااااي يا حليل سمنة الغربة أم دهنن بالسداغات و للكوع.علا ميها سمنة حبيبك و بي ميز ؛ موش متل شغلنا المشاتر بهنا؛ الواحد تلقاه الرقبة لامن محورتة من أكل اللغاويس و المنتهي. و ماد سويقاتو متل مساويك الهشاب و كمان معتللو فوقن كرش تنوء بحملها العصبة أولي القوة.سمح أقول ليك حاجة ، عندي لي بوستن قديم بعنوان: (ساق النملة و گرش الفيل) ؛ هسي فتشتو بالموبايل غلبني؛ فلي باگر كان لميت فوقو ؛ باكر باللاب طوب بجيبو.
Post: #19 Title: Re: استفسار: في زول عندو فكرة عن عملية قص المع� Author: مني عمسيب Date: 10-02-2018, 09:08 PM Parent: #18
حبيبنا النذير مساء الفل .
لو سمحت يا نذير اياك والقص ممكن تعمل ربط عادي انا لما قريت الموضوع دا لما حيلي برد لانه في اللحظة البكتب ليك فيها دي صاحبتنا عملت قص للمعدة واسه شبه منتظرة يومها كل يوم ظاهر ليها مرض جديد !! باختصار تحت اي لحظة التلفون يضرب بتوقع خبر ما كويس فلوسمحت يا حبيب اربط فقط ابعد من القص تمامآ . التكنلوجيا الربانية دي ما تغيرو فيها كتير .
ربنا يحفظكم ويديك العافية .
مع وافر الحب .
Post: #20 Title: Re: استفسار: في زول عندو فكرة عن عملية قص المع� Author: احمد حمودى Date: 10-02-2018, 09:21 PM Parent: #19
حبيبنا ابو النزيز امسك فى كلام الحبيبة بت عمسيب قوى
Post: #21 Title: Re: استفسار: في زول عندو فكرة عن عملية قص المع� Author: Anas Babekr Date: 10-02-2018, 10:06 PM Parent: #20
كما ذكر الاخوة فى المداخلات السكر السكر السكر اقيف منو و اعمل برنامج غذائي محدد بمواعيد ثابتة ,
انا مريت بالمرحلة دي من سنتين وكان وزني فوق الطبيعي واقل حركة و مجهود بتعب خصوصا هنا الجو بارد بيساعد علي شرب المشروبات الساخنة و الاكل فى اي وقت بدون مواعيد
من سنة تقريبا عملت لنفسي برنامج غذائي ثابت الفطار عبارة عن كوب لبن خالي الدسم زائد شريحة من الخبز التوست مع الجبنة برضوا قليلة الدسم ,
الغذاء اغلب الاوقات سلطة او تونة او صدور فراخ و مرات بكسر القاعدة لاكن يوم واحد فى الاسبوع ,
لاكن كنت بشرب قهوة ( نسكافية بلاك ) كتير بدون سكر بدل منا الشاي لان الشاي بدون سكر ما ليهو طعم ,
وفي العشاء عبارة عن تفاحة او حبتين موز ,,,, صحيح البرنامج شوية صعب فى البداية لاكن بعد فترة هيكون تعويدة للجسم و روتين يومي طبيعي ,,,
الحمد لله و الشكر لله بقدر البس ملابسي الطبيعية بالحجم الطبيعي وان شالله الواحد يقدر يحافظ علي الوزن
اتمني لك التوفيق فى تلك المعركة الشرسة ,,,,,, سواء بالدايت او عن طريق الاطباء
تقبل سلامي و احترامي ,,,,,
Post: #22 Title: Re: استفسار: في زول عندو فكرة عن عملية قص المع� Author: نادر الفضلى Date: 10-03-2018, 02:46 AM Parent: #21
النذير
تحياتى
ياخ أحسن تقص المأكولات التى تتسبب فى زيادة الوزن من أن تقص حتة من جسمك خلقت ربنا دى ما تلعب فيها والمعدة جهاز رئيسى .. والقص لا عودة منه لو ما نفع
دأذكر احد مذيعى التلفزيون كان بيشارك فى برنامج الصباح من مانهاتن يسأل المارة أسئلة سريعة ..أظنه مستمر حتى اليوم .. الزول دا كان ضخم الجثة سمييين عمل عملية قص المعدة .. الزول دا وزنه نزل لكن شكله يوحى بمعاناة صحية وشكله كان أحسن قبل العملية
عندى تجربة مع زميلة عمل أمريكية عملت عمليه قص المعدة بان عليها ذبول الوجه وكأنها تعانى من سؤ تغذية .. ووزنها لم يتناقص بطريقة متوازنة لكل الجسم فوجها من دائرى أصبح طولى .. منطقة البطن والخصر فرحانة بتقول أصبحت تلبس مقاس أقل للبنطلون .. لكن الضراعات والوراكين ياهم فى حالهن زذى كانت مشلتها الحقيقية .. الحاجة الوحبدة الإيجابية وجها بدى أكثر شباباً وإن أصبحت عيناها جاحظتين .. قالت لى بعد إنقاص حجم المعة فهى تشعر دائما بالجوع ومفروض تأكل على فترات أقصر لتفى بإحتياجات الجسم التى يترجمها لها شعور بالجوع
غايتو لست خبيرا ولكن من ملاحظاتى لا أنصح بتقليص حجم المعدة .. وشوف البدايل الأخرى .. بدلا من الحلول العقابية للشخص والجسم.
ياخ مرات كده بتكون فى ولائم شهية دايرة الواحد يستمتع بالط. ذكرتنى زمان فى العمل بالسودان كان عندما مناسبة كده زى حفلى شاى فيها تورتات وفواكه عجب .. أحد الزملاء مسح مسح صح ما خلى فرقة فى معدته .. وبعذ داك إتحسر وقال .. الله يلعن الماعون الضييق .. ههههه ما تضيق ماعونك ساى!
Post: #23 Title: Re: استفسار: في زول عندو فكرة عن عملية قص المع� Author: النذير حجازي Date: 10-03-2018, 05:28 AM Parent: #22
شكرا ليكم يا حلوين فردا فردا وشاكرا لكم نصائحكم الغالية
Post: #26 Title: Re: استفسار: في زول عندو فكرة عن عملية قص المع� Author: هاشم احمد ادم Date: 10-03-2018, 05:47 AM Parent: #23
سلام ود حجازي السؤال الأهم ال health insurance. بتاعك بغطى العملية التجميلية ؟
Post: #24 Title: Re: استفسار: في زول عندو فكرة عن عملية قص المع� Author: Ashraf El Bagir Date: 10-03-2018, 05:34 AM Parent: #22
سلام النزير
نصيحة ابعد عن اي عملية والتزم بانقاص الوزن مع التمارين الخفيفة
اول نصيحة مني لانقاص الوزن , اياك تاكل وجبتك الرئيسية وانت جعان .. حاول كل ساعة او ساعتين تشرب كوب ماء مع قطعة خيار او جزر
Post: #25 Title: Re: استفسار: في زول عندو فكرة عن عملية قص المع� Author: النذير حجازي Date: 10-03-2018, 05:45 AM Parent: #24
شكرا يا عزيزنا اشرف الباقر على النصائح الغالية
Post: #27 Title: Re: استفسار: في زول عندو فكرة عن عملية قص المع� Author: النذير حجازي Date: 10-03-2018, 06:22 AM Parent: #25
سلام يا حبيبنا هاشم، سؤال جيد، لا يغطيها التأمين، التأمين يغطي في حالة كتلة الجسم أعلى من 45 وأنا كتلتي 39 والكتلة = الوزن بالكيوغرام مقسوم على الطول بالمتر تربيع
ح أضطر أدفعها كاش
واحد من الظرفاء قال لي طيب زيد وزنك أربعين كيلو زيادة علشان التأمين يغطيها ليك وتوفر قريشاتك هههههههه