مقال من بتي توتا

09:08 AM October, 01 2018

سودانيز اون لاين
عبدالحفيظ ابوسن-no where
مكتبتى
رابط مختصر

#وقفه!
بوست طويل جدا جدا،لكن لو بديتو ح تكملو،دا ما غرور والعياذ بالله!بس القضيه تستاهل نشوفها.

-كنت بحضر في فيلم هندي اسمو "pink" الفيلم بحكي باختصار عن تلاته بنات طلعوا مع اولاد يتعشوا لانو عزموهم ع سبيل انو ف اتنين منهم كانوا زمايل ف الدراسه،المهم اتعشوا وشربوا وكدا،وفي واحد منهم حاول يختلى بوحده فيهم ويعتدي عليهم رفضت وحاولت تبعدو وم قدرت وفي النهايه ضربتو بالقزازه!
انتهي.
-البنات خافوا وهربوا وم كلموا زول،والولد اتصاب اصابه خطيره والمهم بعد فتره الولد واصحابو رفعوا شكوى ضد البنت "محاوله الشروع في قتل،والدعاره،والابتزاز" اعتقد دي كانت الشكاوي،مع العلم انو الولد ذو نفوذ وكدا.
-المحامي سأل الولد وقال ليهو:
"هل يشربن النساء في عائلتك!"
رد ليهو:
"لا يشربن،فنحن أسره محترمه،الفتيات الفاسدات هم فقط من يشربن ويخرجن مع الشباب"!
فالمحامي رد ليهو رد ما بتذكرو بالضبط فهمو انو " هل فقط لمجرد انها شربت وطلعت معاك افتكرت وسمحت لروحك انك تأخد تصريح انك تعتدي عليها!"

-نقطه تانيه محامي البنت سأل البنت انها كيف رفضت وقالت ليهو شنو،فقالت ليهو انو قلت:
"لا،لا،لا تفعل"
فقال المحامي للقاضي
"لا،ليست مجرد كلمه بل هي جمله قائمه بذاتها،وعندما تقولها فتاه معرفه فقط او صديقتك او حبيبتك او حتي فتاه هوى،فيجب أن تتوقف!"

-طيب انت حاليا بتقولي الكلام دا كلو لييه!
-خلونا من الهنود ودراماتهم،لو جينا عاينا للمرايه وشفنا نفس المشاهد بس بدراما سودانيه! احنا كمان بنعاني من نفس المشكله.
الفكر السائد دايما انو انت م دام بتعرفي اولاد معناها "قليله ادب" اصلي انت لو بتهظري مع اولاد معناها "قليله ادب" طيب انت لو عندك اصحاب اولاد وبتطلعي تأكلي معاهم برا معناها "قليله أدب"،
اقول ليك خليك من ديل كلهم انت م دام بت معناها " قليله أدب"!!!
-المحامي قال للولد عباره جميله جدا:
"انت رغم انك درست في جامعه بريطانيه،ومن أسره ثريه الا انك ما زلت بذاك التفكير القديم المعادي للمرأه"
واحنا رغم انو الزمن اتطور والمرأه بقت تشغل نفس مناصب الرجل،لكن ما زال الناس المتعلمين والجامعيين والعاملين بنفس ذات الفهم،وعشان اكون منصفه أكتر في بنات بعاينوا للبنات بنفس نظره الاولاد دي.
ولو جبت بنت عمرها م اتكلمت مع ولد،وبنت تانيه عندها "اصحاب" اولاد وقلت ليهو: "بالله ياتا المحترمه فيهم؟"
ح يقول ليك: "يا فرده انت جادي!"
ودا المتوقع طبعا لانو احنا ناس "قشر" فقط،بمعني أوضح احنا ناس "ظاهر من شكلها اساسا انها بتاعت حركات"
-احنا عمر النظره دي م حتتغير ولو بعد قرون ح نفضل بنفس العقليه دي، المرأه بالنسبه لمعظم المجتمع ان لم يكن كله هي "عوره" فقط،لاا م اخدوها بأنو ياخ المرأه جوهر ولازم يصونها!، لا ابدا هم اخدوها بمبدأ "المرأه عوره ولازم تتستر"!
كانوا زي م كلنا عارفين انو زمان بدفنوا البنات احياء لانو بجلبوا العار،والولد عمرو ما كان يجلب العار، لييييييه!
" هو ولد عادي،لكن هي بنت ما ينفع"!
المحامي قال عباره أجمل تانيه:
"لقد كنا نوجه مجهوداتنا في الاتجاه الخطأ دوما،فنحن ان علمنا أبنائنا وحفظناهم سنضمن سلامة بناتنا"
دا بعبارتو دي جاب التاااايهه.
-الولد ليه بتمادي وليه بدي لنفسو التصريح والرخصه!
-لا لو سمحتي،ما نظلم الاولاد ساي،هم ما ادوا لنفسهم الرخصه،المجتمع هو اللي اداهم الرخصه دي بعباره "دا ما ولد" بالعباره دي بس هو ادي لنفسو فرصه "التحرش،والاعتداء،والاغتصاب" من غير ما يخاف من العواقب.
-ايواااا بس العواقب دي اقيفي هنا!
لو جينا سألنا روحنا، "ليه معدل الاغتصاب والتحرش زاد كدا"؟
ما هو طبيعي يزيد،لانو ماف قضايا بتصل المحكمه ولو وصلت بتصل عشره من اصل ميه،لانو الاهل بفتكروا انو بنتهم هي المذنبه!
او انو المجتمع لو عرف ما حيرحمهم ولا ح يرحم بنتهم!
او انو ماف واحد تاني ح يقبل يتزوج بنتهم،أصلي في حد "اغتصبها".
طب انتو فاهمين يعني ايه " اغتصبها" يعني بالاكراه والجبر، يعني يا الاهل البتقولوا "بنتي ضيعت شرفنا،بنتي رمت رأسي في التراب،بنتي جابت لي العار" بنتك رفضت،وحاولت،ورفضت م عشانك ولا عشان رأسك وشرفك،بل عشان عرضها.
احنا لو بس اي قضيه اغتصاب تحصل،اهل البنت يصلوا المحكمه والناس تقيف معاهم،لما "الوحش" دا يأخد جزاتو، م اظن في واحد ح يقدم ع الخطوه دي قبل م يفكر ألف مره هو حيحصل ليهو شنو لو الناس ديل بلغوا!!!؟
-دايما بقولوا "الولد اي بصاحب البنات وبتونس معاهم،بس لما يجي يعرس بعرس البنت المحترمه"!
ايوا،اصلي ديلك م محترمات لانو كانوا " بتكلموا" معاهو،اللي هو مع الولد نفسه دا اللي في نظر المجتمع محترم رغم انو اتكلم زيهم ويمكن اكتر عشان نكون واضحين!
طيب لحظه هو انت بتعاينوا للموضوع من ياتو ناحيه بالضبط،لانو لو بتعاينوا ليهو من ناحيه دينيه ودي ياها نظرتكم للموضوع تبقي دي "كرثه"،او غالبا دا ما الدين الاسلامي البنتكلم عنو!
-طيب بس مثلا تعال شوف معاي لو في وحده ما بتتكلم مع الاولاد خااااالص
"لا يااخ دي معقده"!!!
-"هو في انفصال في الشخصيه ولا حاجه حضرتك!!!
-ليه كل بنت بتتكلم مع ولد معناها بتحبو،يعني لو بتتكلم مع عشره بتحبهم كلهم!
"سوبر وومن" ولا ايه!
احنا م شعب محافظ،احنا شعب مريض بالشك.
-السعوديه رغم انها من اكتر الدول المحافظه وكميه الحدود فيها لا تحصى،بس من اكتر الدول في معدلات "الاغتصاب،والزنا"
بقولوا "كلما كثرت الحدود،كلما سهل تجاوزها"
-انا م عارفه احنا متين ح نصل لمرحله ندرك فيها انو الولد بجلب العار زي ما البنت بتجلبو،ويمكن اكتر.
وانو الاب ليه زمان مثلا بزعل اذا الاستاذ ضرب بنتو في الفصل لانها غلطت،رغم انو فلنفترض دا "حقه" لانها غلطت، بس ما بزعل اذا واحد تاني كان عايز ياخد "حقها" رغما عنها افتراضا منو انو "حقه"،ممكن عشان نكون عادلين برضو هو بزعل ايوا بس ما زي زعلو انها ضيعت شرفو وعرضو!!!
-نقطه اخيره رغم انو الكلام كتير جدا، في الفيلم لما البنت كانت ماشه مع المحامي في الطريق معظم الناس بتأشر عليها فهي لبست طاقيتها وغطت وشها،المحامي م اتكلم بس " نزل الطاقيه من رأسها"
لانو انت م غلطتي،وم دامك ما غلطتي ف ليه تنزلي رأسك وتدسي!
اللي علي حق عمرو ما يخاف حتي لو كان المجتمع كله ضده.
-خلونا في النهايه كدا نتفق علي حاجه
"عندما نولد اناث،فنحن نولد قضايا"
#نقطه.

#تهاني_أبوسن

ربنا يحفظها ليك ياعمنا

كتاااااابه،،، مع اسلوب بسيط و مهضوم

بس الملاحظه انها استعملت كلمه ( اصلى )ثلاثه مرات ، ولا مره ما قدرت افهم معناها.

شكرا تهانى .... شكرا ابوسن

تشكر يوسف مرتين
مرة لجلبك المقال من اقاصي اضابير المنبر
ومرة تانية لدعواتك
شاكر فضلك
تسلم خالد واشكرك
اظنو تكنيك سردي . كأنه صوت آخر يبدي اعجابه بتحليل السبب في سخرية
لاحظ

الفكر السائد دايما انو انت م دام بتعرفي اولاد معناها "قليله ادب" اصلي انت لو بتهظري مع اولاد معناها "قليله ادب


**
او انو ماف واحد تاني ح يقبل يتزوج بنتهم،أصلي في حد "اغتصبها"
**
-دايما بقولوا "الولد اي بصاحب البنات وبتونس معاهم،بس لما يجي يعرس بعرس البنت المحترمه"!
ايوا،اصلي ديلك م محترمات لانو كانوا "