يا غصن الرياض المايد يا الناحِلني هجرك، وانت ناضر وزايد هاجرني ليه وأنا ليك رايد؟
يا غصن الرياض المايد ما أظن عن غرامك، لو أموت ما حايد جافينى ليه وأنا ليك رايد؟
سهران ليلي طال، والعين صِحَت ما هجايد تعبان قصدي ليمك، وإنت ناضر وزايد فى الجيل يا الجمالك سائد عينيك ليك جنود وانت ليهن قائد شوفتك زى هلال العيد وفيك أعايد يا الهاجر جفيتني، بنظرة لي ماك عايد أنا وحبك ترعرعنا ونشأنا ندايد من زمنن قِبيل، أيامو قُلال وعدايد ما خلِص القديم، وتبين مصايبو جدايد حِن يا حبيب، كفاي مُر العذاب وشدايد يا خُلاصة الحواري، الـمن جِنان وخوالد حُسنك ليك يدوم، لا أم تلِد لا والد راسخ في ظلال مجدو التليد التالد يا الـلابس العفاف حلية وعقود وقلايد فى ليالى هواك، عانيت صنوف واحايد مشكلة بين هواى وجفاك، وانت محايد بس ما ذنبى غير صغت النشيد ونشايد فى مدحك بنيت قصر الرشيد الشايد"
Post: #2 Title: Re: تماضر... Author: عبداللطيف حسن علي Date: 09-14-2018, 07:47 AM Parent: #1
لعلك تعلم .. و لمن لا يعلم ... هذا اللقاء كان يبث على الهواء مباشرة من تلفزيون الجزيرة ... و شاهده كل من يملك جهاز تلفزيون في السودان ... ثم نعى الناعي صباح اليوم التالي لذلك اللقاء التاريخي الراحل رمضان زايد ... كان خبر كالصاعقة ... رحمهم الله جميعاً ...
انتو الحناجر الذهبية دي انتهت مع زمن ابو داؤود و زايد و بقية العقد؟ ☺
الشاعرة تماضر العزيزة وين مختفية يا ست الحفلة 🎈 ياخ اتمنى يوم تناقضاتي تمطر شعر 🌨
Post: #13 Title: Re: تماضر... Author: عبداللطيف حسن علي Date: 09-14-2018, 07:34 PM Parent: #12
كمان انتي خلي الطمع ، دكتورة وشاعرة مرة واحدة
تاني وين حناجر ذهبية ما راحت مع الازمات النفسية
والمعاناة اليومية ، الواحد لو ضحك ساي ياخدو ليهو صورة تذكارية
ابوعركي حداد وعثمان حسين ترزي والكاشف نجار ورمضان زايد مقاول ووردي ومصطفي ومحمد ميرغني
معلمين ابتدائي ووسطي وكلهم كانوا مهمومين برسالتهم الفنية والارتقاء بذوق المستمع
العايشين عليهو لغاية الان مش ناس حمادة بت واضربني بمسدسك وسجل لي شنو كدا ماعارف
تحياتي دكتورة نعمات وكلمي صاحبتك تجينا بهنا ...
Post: #14 Title: Re: تماضر... Author: علي دفع الله Date: 09-14-2018, 07:45 PM Parent: #13
تماضر يا صديقة بطلي تقلة اظهري وباني خسمتكم بالنبي وبي رب المجرات من وجد الفيديو بتاع الحوت عن اغنية غصن الرياض المايد ينزلها عشان قباني دا يعرف حاجة امووووت ليكم نزلوه لطيف او عمر التاج او صمد او الجميعابي او ابو حتوت ود المدير. او اي واحد
Post: #15 Title: Re: تماضر... Author: عبداللطيف حسن علي Date: 09-14-2018, 07:51 PM Parent: #14
بس شيل شيلتك مع قبة
Post: #16 Title: Re: تماضر... Author: علي دفع الله Date: 09-14-2018, 08:27 PM Parent: #15
شكرننننننننن لطيف عليك النبي الحوت ما جضما سيبك من قبة نصيحة لرب المجرات
Post: #17 Title: Re: تماضر... Author: عبداللطيف حسن علي Date: 09-14-2018, 08:53 PM Parent: #16
طبعا ابوعلوة اي اغنية بصوت محمود جميلة
اصلا ذوقو رفيع ومابغني اي كلام
زمان كنت برفض مجرد النقاش حول الفنانين الصغار
بعد فترة طويلة جدا ، قبل وفاته بشوية بديت اسمع ليهو
انتقدت نفسي وقلت ليه انا عملت كدا ، اتضح لي اني رافض
سلوك جيله وليس هو
مرة كنت راكب حافلة والسواق مشغل اغنية للكاشف بصوت
الكاشف ذاتو ، الولد القاعد جنبي قال لي عاين عمك بوظ اغنية
عصام محمد نور كيف !!!!!
لما حكيت لشقيقي الاكبر قال لي كان تديهو كف
Post: #18 Title: Re: تماضر... Author: عبداللطيف حسن علي Date: 09-14-2018, 08:55 PM Parent: #17
السلام عليكم نراقب و نرصد مسار هذا البوست بدقة ربما نتدخل في الوقت المناسب لكن إذا سار الغناء كما هو ما بتدخل.
Post: #27 Title: Re: تماضر... Author: عبداللطيف حسن علي Date: 09-15-2018, 00:07 AM Parent: #25
Quote: السلام عليكم نراقب و نرصد مسار هذا البوست بدقة ربما نتدخل في الوقت المناسب لكن إذا سار الغناء كما هو ما بتدخل.
ادوك كم دقيقة عشان نتزاوغ منك
Post: #28 Title: Re: تماضر... Author: هاشم الحسن Date: 09-15-2018, 09:37 AM Parent: #1
يا أخوانا بطلوا تلعبو بأعصابنا ومشاعرنا،،، قريت كلام يحي التحت دا فسمعت الأغنية باحساس مفجوع وكأننا افقتدنا رمضان زايد الآن الآن، كبرنا وبقينا عاطفيين شديد.. والله قربت أبكي أو بكيت...قال:
Quote: هذا اللقاء كان يبث على الهواء مباشرة من تلفزيون الجزيرة ... وشاهده كل من يملك جهاز تلفزيون في السودان ... ثم نعى الناعي صباح اليوم التالي لذلك اللقاء التاريخي الراحل رمضان زايد ... كان خبر كالصاعقة ... رحمهم الله جميعاً ...
ولكن، الحمد لله، كما في كل أحزاننا، سرعان ما كفكفت دمعي، ابتسامة مواسية في كلام معاوية (بكون كتلو الطرب ساي)! قلتا والله صحي الموت حق وأن تموت مبسوطا ومنطربا ومتوحدا بالمعنى السامي فهو خير من أن تموت حزينا مغموما محبطا ومنفصما عن المعنى! بالله شوف رمضان وكيف وكم كان يبدو عليه الطرب. تحسه وكأنه داخل في عالم تاني خالص خالص، وخارجا عن (عالم الانس) زي ما بدلها معاوية، وأنه بكله قد استغرق في الماوراء وارتقى إلى البعيد من السماء قريبا من (عالم الحس) حيث تنتمي تلك التي يغنيها وتتمناها الأغنية! قال معاوية
Quote: الكسرة في أغنية "ليتني زهر" ابتداء من: "أنا ليتني أنتِ في عالم الأنسِ (الحِسِّ ).." رمضان متعة حقيقية في الحتة دي.. بكون كتلو الطرب ساكت.... يا لها من مِيتة. في بالي الكَسرة دي بمشي أنوم بيها أو أموت بيها زي رمضان زايد
أليس هذا كما قول من قال (أنوم بيها ركن وأصبح قطن) وهو كلام بليغ أظن أصله في حقيقة العشق وفي الطرب به حد الموت، ثم جرت به الأيام في مجراتها العجيبة.. وههنا كلمات الأغنية يا لطيف.حسب طلبك. وأنا ليتني طير وأطير.. "انا ليتنى زهر فى خده الزاهى انا ليتنى طير فى روضه لاهى انا ليتنى نهر تنساب امواهى يحلو تلاقينا من غير أكدار ويرف وادينا شوقا شوقا لمزمارى انا ليتنى عود فى صدرك الحانى دنياى تغريد من عذب الحانى والفن محفوظ بقلب فنان فى خفقة القلب تنساب أوتارى بالشعر والحب بالشهد والنار انا ليتنى أنتِ فى عالم الحس أشتاق فى صمت وأحب فى همس وأعود ان عدتِ للمعبد القدس حيث الهوى السامى يسمو بأفكارى وتطيب أيامى من نبعه الجارى" (انا ليتنى أنتِ فى عالم الحس) لو قلبنا الحس إلى (الشعر) فدا لسان حال نعمات الاتكلمت بيهو فوق.. "ياخ اتمنى يوم تناقضاتي تمطر شعر" يا أخوانا في حب للشعر وشعر الشاعرة أكبر من كدا.. يا يحي بالله عليك أفدنا من هو شاعر/ة الأغنية؟ موقعان في النت لم يعرفاه/ها؟
وقلت يا لطيف!
Quote: درويشة ومتناقضة ذاتيا لصالح تشطيب القصيدة حقلا مفتوحا للتداعيات الداخلية القابلة للوصف دون الانتهاء عند حدود معينة تماضر ممكن تكون شاعرة غنائية، هي بتكتب دون قيود يقودها احساسها الداخلي، ولكن يبدو بسبب حرصها الشديد علي وضع مراقبة المجتمع في الاعتبار، تأتي قصائدها مسجونة شيئا ما....
يا لطيف، لطفا، (مبدئيا هدفك يا حليلو، إلا تستعدلو ليك تماضر) كلامك دا عن تماضر الشاعرة (الواصلة إلى الآذان والقلوب مباشرة وإذنها الشعري معاها)، ذكرني بي بوست فيسبوكي شهير لعزيزتنا دينا خالد الله يطراها بالخير، وكان مخصصا للنظر في تجربة عاطف خيري الشعرية الأخيرة، والنظر داك فحسب ما اعتقدته بوقتها، قد كان انطلاقا من منصّات المعجبين وبناء على ما يطلبه المستمعون. مثلا، قالوا؛ تديّن ابن خيري وصبأ عن دين الشعراء في الرفض والفوضى والتمرد على الدين والنظام العام وكتب شعرا متدينا ومستسلما وأمر من هذا القبيل! هذا بالرغم من أن هذا الشعر المعني بالنقد، لعاطف خيري، قد كان هو هو الشعر، ومن نفس قبس الشعرية المجيدة أُم الشعر الأولاني، بل ربما قد يكون أجود شاعرية!! ولكن تقول شنو؟ كل منهم يريد من عاطف أن يغني ليلاهم هم أو أن يستمر يغني لهم ليلاه لكن بالطريقة التعجبهم هم، ! قلنا: وطيب يا هم ويا أنتم، وين الهو ووين الأنا ووين ليلى الشاعر؟ ليلاهو البتخصو، ليلى الشعر، حينوبها شنو من حقيقة الغنا البنطلق من سجنو الأصيل فيها ليرك على حريات غريبة عنهما، أو فقط كما تشتهيها أو ترجوها أو تحددها منصات المعجبين القدامى؟ في ظني، أول انطلاقة الشعر من سجن اللاشعر ومن ربقة الطلب العام، هي في أن يصفد نفسه بأصفاد الصدق مع حقيقة نفسه.. فبغيرها، ما كان له أن يكون، أو عنّو ما كان!!
Quote: يا لطيف انت واثق بأنك قادر تستعدل البوست ده في اللحظة المناسبة؟ كان عندي هدف محدد ولكن البوست حاليا اتجاهو اتغير البوست يمكن إعتباره إحتفالية بشاعرتنا المجيدة تماضر
Quote: (انا ليتنى أنتِ فى عالم الحس) لو قلبنا الحس إلى (الشعر) فدا لسان حال نعمات الاتكلمت بيهو فوق.. "ياخ اتمنى يوم تناقضاتي تمطر شعر" يا أخوانا في حب للشعر وشعر الشاعرة أكبر من كدا.. يا يحي بالله عليك أفدنا من هو شاعر/ة الأغنية؟ موقعان في النت لم يعرفاه/ها؟
انت هناك .. خليك معانا خليك مع الزمن يا شايفك دا وقتو !!؟؟؟ لحطة يا (دي حاجات رمضان زايد ) و عبدالعظيم حركة و(الباص) لا يهدأ مع الايقاع رواد (الرستاتيف) ودي يعني الغنا الحر او الاسترسال الحر في الغنا .. الواحد يقوم بالحفلة من تمغرب وللصباح بهجة في بهجة وهجيج .. نسمر ونغني لامن ديكنا يصيح.. الاتنين ديل كانوا رواد الحضور المسرحي الفذ .. كانوا ملوك الاداء هل تعرفوا ان (رمضان زايد وحركة) استعان بيهم رائد الطب النفسي الدكتور طه بعشر في معالجة كثير من الحالات النفسية المستعصية كانوا بغنوا كل خميس في مستشفى بحري وفي التجاني الماحي امدرمان وبحضور د. حسبو سليمان ومرضاه ... كانوا بغنوا بدون مقابل وبدون اجر بس عشان مساهمة في علاج هؤلاء المرضى ايييييييييييييييييه منو الجاب سيرة رمضان زايد دا ؟ خلي يصبر لي
Post: #37 Title: Re: تماضر... Author: مامون أحمد إبراهيم Date: 09-15-2018, 09:37 PM Parent: #36
يا سلام م م م !! الله يمتعكم بالصحة والعافية ويطرب مسامعكم بكل شجي وجميل وراقي !!!!
يعني ضيعتوا لينا الكسرات المنبر ده اصلو ما فيهو بوست بمشي عديل هو اصلا الكسرات ذاتها كانت كَسرة لموضوع البوست فـ مافي عوجة الله يبعد عننا الكسرات والكسور
