Post: #1
Title: سجمكم، معتز صدمكم
Author: عمر التاج
Date: 09-13-2018, 05:43 PM
Parent: #0
الصدمة في اللغة تعني:
أن يضربك الضريب شقاق العناقريب ويلحقك أم لهيب
واصطلاحا هي أن تلم فيك الحكومة، تجوعك وتمرضك
وتفلس بيك وتعصرك لامن تجيب البنزين،
وبعد ما تكمل البقية الباقية من قريشاتك وصحتك وأحلامك،
تقوم تعمل حاجة تخليك تتمنى الموت في الصفوف والاكل بالكفوف
تبدأ اولا برفع أسعار كل شئ عشرين ضعفا بالضرائب والرسوم،
العيشة تبقى بعشرة جنيه، والدولار يعمل 100 جنيه، وست الشاي تبيع الموية ساي
ثم بعد أن تبلغ الروح الحلقوم والقلوب النخرين، وتتمنون ايام بكرى وصفوف البنزين ..
تقوم الحكومة تنقص الأسعار شوية وترجع الناس لفترة تشبه فترة الكفاف الحالية،
الدولار ينزل لاعن 60 جنيه والعيش بي خمسة جنيه وتتوفر فقط بعد الناس ماتنوم ،
عندها يشعر الناس بالراحة والاطمئنان والعيش في امان
ويهتفوا للرئيس ونوابه الخمسطاشر،
يعيش معتز، يحيا بكري، يدوم البشير، يغور الشعب.
.
.
دي صدمة ولا مي صدمة يامتعلمين يابتوعين سودانيز.
|
Post: #2
Title: Re: سجمكم، معتز صدمكم
Author: عمر التاج
Date: 09-13-2018, 05:58 PM
Parent: #1
أسلوب الصدمة الاقتصادية العايز يصدمكم بيهو معتز ده
اتجرب في عدة دول كانت على وشك الانهيار،
وطبعا النتيجة انو الدول دي انهارت اكتر بعد الصدمة،
جسمها ما اتحمل البنج والكيمياوي معا..
ولولا تدخل صندوق النقد والأمم المتحدة
والمحكمة الجنائية كانت الدول دي لحقت أمات السودان ..
أما في حالة معتز فالحالة غير ان شاء الله..
انا متفائل جدا انو الراجل ده قبل كده كان بتاع كهرباء
وحا ينجح في صدمكم صدمة بت لزينا، يلحقكم بيها بنات نبقة.
Quote: استراتيجية الصدمة او عقيدة الصدمة هو أسلوب للتلاعب
تستخدمه الحكومات والإعلام لخصخصة التعليم والمنافع العامة
التي يملكها الشعب ورفع الرقابه على الأسواق استجابة لسياسات الرأسمالية العالمية,
الجزء الأكثر فاعلية في هذا التلاعب يهدف إلى وضع الناس في حالة صدمة
يعاني بعدها الناس من الرهبة وفقد القدرة على الحركة في هذه الحالة يصبحون
غير قادرين على التفاعل مع فقدان الحقوق الوحشي الذي قد يتعرضو له
نشأت عقيدة الصدمة في الخمسينيات من القرن العشرين في مجال الطب النفسي
فقد تعاونت وكالة الاستخبارات الأميركية مع الطبيب النفسي الكندي البارز
أيوين كاميرون دونلد أيوين كامرونومولت أبحاثه عن استخدام الصدمة الكهربائية
على أدمغة المرضى النفسيين بهدف تحويل أدمغتهم إلى صفحة بيضاء لإعادة
كتابة المعلومات الملائمة عليها. كان كاميرون يعتقد أن ثمة عاملين مهمين
يتيحان لنا الحفاظ على إدراكنا البيانات الحسية التي ترد لنا باستمرار،
والذاكرة. لذلك حاول إلغاء الذاكرة بواسطة الصدمات الكهربائية والمهلوسات،
وحاول إلغاء البيانات الحسية بواسطة العزل التام. |
هذا وحسبكم الله وانا لله وانا اليه راجعون
|
Post: #3
Title: Re: سجمكم، معتز صدمكم
Author: عمر التاج
Date: 09-13-2018, 06:40 PM
Parent: #2
صدمة معتز دي انا خايفها تكون زي ضربة ودقبورة،
قالوا ودقبورة كان بتفاخر قدام نسابتو، قال ليهم:
على بالطلاق أمس لقيت لي تمساح جنب القيف
جيتو من ورا براااحة وكع ضربتو في ضنبو وطفرت وراي
وتاني جيت أدبي لامن وصل نصو َََ كع ضربت كراعو وطفرت لي ورا
وتاني جيت براحة وقطعت كراعو التانية وطفرت ورا..
أها اشتغلت بالطريقة دي لامن قطعت كرعيه الأربعة..
الجماعة سألوه: طيب يا ابقبورة ماكان تقطع راسو... فرد عليهم:
الراس مالقيتو مقطوع😁
أسه انا خايف معتز يرجع للبشير ويقول له_
الشعب مالقيتو مصدوم.
|
Post: #4
Title: Re: سجمكم، معتز صدمكم
Author: najma
Date: 09-13-2018, 11:17 PM
Parent: #3
دقشة ودقسة😆
|
Post: #5
Title: Re: سجمكم، معتز صدمكم
Author: عمر التاج
Date: 09-14-2018, 02:24 PM
Parent: #4
دهسة عديل يانجمة
والمثل بقول: مافي دهسة بدون فرم
كر عليكم.
|
Post: #6
Title: Re: سجمكم، معتز صدمكم
Author: عمر التاج
Date: 09-15-2018, 08:28 PM
الان وبعد اعتذار د. حمودك، الفرصة أصبحت سانحة لمعتز ليصدمكم صدمة ماتقوموا منها إلا يوم البعث
https://youtu.be/BO4WrLhoFP0https://youtu.be/BO4WrLhoFP0
|
|