Post: #1
Title: السفروق
Author: Elsanosi Badr
Date: 08-23-2018, 03:42 PM
Parent: #0
03:42 PM August, 23 2018 سودانيز اون لاين
Elsanosi Badr- عدة اماكن ونطمح في الفردوس
مكتبتى
رابط مختصر قيل ان جبل مره كان بركانا نشطا في يوم ما وقيل انه في احدي ثوراته العظيمة قتل العشرات من العلماء ودمر متحف المدينة ونجا من تلك الحمم رجل اسمه ابكر
قالت خدوج ان ابكر ربما عاش في اقصي المدينة زهاء المئتين عام وانه اول من صمم السفروق كلعبة Frisbee وكانت ابعاده الهندسية مصصمة بدقة قيل ان يتم تعديله الي الة صيد
|
Post: #2
Title: Re: السفروق
Author: Elsanosi Badr
Date: 08-23-2018, 03:49 PM
Parent: #1
كانت مناطق الجبل تعج بالفرح وقيل ان شرق الجبل كان مزارا ومرتعا لاندر انواع الطيور والحيوانات
يقول محمدين ان جده لابيه كان مهندسا بارعا في وسائل الري وزراعة المناطق المرتفعة من الجبل وكانت حلوم تعمل في التمريض وخميس ملهما في العمل الطوعي والنفير
|
Post: #3
Title: Re: السفروق
Author: Elsanosi Badr
Date: 08-23-2018, 04:03 PM
Parent: #2
كانت تقام في المناطق الدنيا من الجبل مهرجانات كل عام بعد موسم الحصاد
يقول عيسي عريف القرية انه قبل مائة عام او تزيد رجلا اسمو الزين
كان الزين سريع العدو وكان يجري مائة كيلو كل يوم ولم تتم دعوته للمشاركة في اولمبياد اثينا!!
وفي يوم الاحتفال اخذ الزين السفروق وحاول رميه ولكنه صوتا وارتبك واهمل رمي السفروق!!
ذهب السفروق بعيد في اتجاه السلطان وارتبك الجميع وتجمد الدم في عروقهم
ركض رجل في السبعين من عمره تجاه السلطان
كان السلطان يلتحف كدمولا من الحرير وتاجا من الياقوت والزمرد
تدلت احدي خيوط الكدمول الحريرية وحجبت عين السلطان من السفروق
وتلفت السلطان فاذا به في مواجهة الرجل السبعيني وهو ممسكا بالسفروق علي بعد يوصتين من وجه السلطان
وهو يقول سلطان "الله ينصريك"
صفق الجميع وتم تدوين ان النظام الغذائي لذلك السبعيني هو
عيش داميرقي
كول
وبعض فواكة الجبل
|
Post: #4
Title: Re: السفروق
Author: Elsanosi Badr
Date: 08-23-2018, 04:07 PM
Parent: #3
وخميس (تويره) كBreakfast cereal
|
Post: #5
Title: Re: السفروق
Author: muntasir
Date: 08-23-2018, 04:33 PM
Parent: #4
سلام سنوسي وكل عام وانت بخير اتخيل لي السفروق ده اقرب لل Bomarang بتاع الابورجينز في استراليا من الفريسبي
|
Post: #6
Title: Re: السفروق
Author: Elsanosi Badr
Date: 08-23-2018, 04:38 PM
Parent: #4
حكي ابراهيم جلاب ان رجلا كثير الكلام كان يجالس مجلس السلطان
كان الرجل صغير السن والعقل
في خضم حلاوة الونسة مع السلطان
رفع الرجل اصبعه وابتدر قائلا
"سلطان الله ينصريك انا كنت في قنيص ولاقيت غزال ضربتو في كراعو لامن تلقة مرق من انافو"
اعتدل السلطان وبد علي وجهه الغضب ووجهة اليه كلاما مباشرا
فقال السلطان " وليد كلبب"
معاك ياتو؟؟
اتا تجي في مجلسنا وترددي شغاليت بتاع كدب
معاك ياتو؟؟
تلعثم الرجل واحس بالورطة التي ادخل نفسه فيها
ثم قال " معاي خالي" وكان خالو يجلس بجوارو
التفت السلطان الي خال الرجل ورادف قائلا" كلام دي سحهي"
تلعثم الخال وعرق
وكان لخال الرجل صديقا من اعلي مناطق الجبل
تدخل الرجل وقال نعم يا سلطان الله ينصرك
قام هذا الشاب باطلاق النار علي كراع الغزال في الوقت الذي كانت تحك فيه انفها واصابت الطلقة الكراع وخرجت من الانف
ضحك السلطان وقال
كان كده سهحي
وعندما خرج الرجال بعد انفضاض المجلس
اخذ الخال بتلابيب ابن اخته وقال له
" شوف يا وليد كلبب ده لاميناهو ليك لكين تاني اكدب كدب مشتت زي دي"
|
Post: #7
Title: Re: السفروق
Author: Elsanosi Badr
Date: 08-23-2018, 04:41 PM
Parent: #6
فعلا يا منتصر من ناحية الشكل وممكن ايضا من ناحية التقنية
افكك وتعال
ههههه
طبعا مصطلح فريسبي جا عرضا هنا كلعبة
لكن تظل فعلا boomerang هي النسخة المطورة للسفروق
|
Post: #8
Title: Re: السفروق
Author: سفيان بشير نابرى
Date: 08-23-2018, 05:12 PM
Parent: #7
الله ينصريك يا السنوسي تابع ياخ تابع
و صف الكدمول و هو نازل علي عين السلطان و مغطيها ما شافت السفروق مبااالغه
تابع ياخ... و عيد سعيد
|
Post: #9
Title: Re: السفروق
Author: Elsanosi Badr
Date: 08-23-2018, 05:29 PM
Parent: #8
ههههه
عيدك سعيد يا نابري وكل سنة انت والاسرة بالف الف خير
خيط الحرير بتاع الكدمول ههههه
ياخي هناك في قصص عجيبة ياخ
بتمني من الاخوان واهلنا في دارفور يحكوا القصص دي
تقول لي كليلة ودمنة
ياخي في دارفور دي في قصص ممكن تملا مجلدات
وياريت لو اتحكت بلغتها المحلية
في فترة المهدية ذهب رحال من جبل مرة موفدين من السلطان الي مناطق الصحراء العليا لطلب الدعم وجلب السلاح الناري لمحاربة عسكر الفرنجة
وجاء معهم الرجال من هناك وقابلوا السلطان وفرح بهم السلطان
وسالهم السلطان ما اذا كانوا يطلبون شئ فقال رئيس الوفد
نحن قوم نحب القتال و التمر والحليب والعيين
فسال السلطان عن ماهية العوين!!
فقال المترجم النساء النساء
فضحك السلطان
وقال وليد كللب عوين ده كلنا ندوروهو
وامر السلطان بتزويج الرجال واعداد الجيوش
وانتصر السودانيون
|
Post: #10
Title: Re: السفروق
Author: محمد الأمين موسى
Date: 08-23-2018, 06:43 PM
Parent: #9
عزيزي القارئ "السفروق" و"القرجة" و"الدقل" و"البسطونة" و"العكاز" و"العكاز المضبب" و"المطرق" (وعصاية إمام الجامع التي يعتلي بها المنبر لا أدري ما اسمها) أسماء لأنواع مختلفة من العصي نستخدمها في غرب السودان.
شكرا أخي السنوسي.
|
Post: #11
Title: Re: السفروق
Author: A.Razek Althalib
Date: 08-23-2018, 07:06 PM
Parent: #10
السفروق..
كل عام وأنتم بخير..
|
Post: #12
Title: Re: السفروق
Author: Elsanosi Badr
Date: 08-23-2018, 09:23 PM
Parent: #10
| Quote: عزيزي القارئ "السفروق" و"القرجة" و"الدقل" و"البسطونة" و"العكاز" و"العكاز المضبب" و"المطرق" (وعصاية إمام الجامع التي يعتلي بها المنبر لا أدري ما اسمها) أسماء لأنواع مختلفة من العصي نستخدمها في غرب السودان |
الحنفة برضو يا دكتور
الحفنة عصاية مفلطحة لها احدوداب في اخرها وتستعمل لقتل الثعابين
قيل ان رجل من دارفور جاء عابرا السوق الكبير بامدرمان بالقرب من زنك الخضار وقريبا من امهاتنا الببيعن الطواقي الحمر ديك (زمن عجيب ياخ) وراي جمهرة من الناس يركضون خلف ( سراق)
وكان اللص يحمل في يده طوبه (قميرة) ويركض زي الحصان تجاه زريبة القش وفي منتصف الطريق قابله الرجل ويدعي تيراب واومأ الية بالحنفة عله يتوقف ولكنه نط بعيد وكسر عدة احد الامهات في السوق فما كان من تيراب الا ان يضربة بالحنفة
سقط السراق مغشيا علية وفر الناس واقترب منه تيراب وعرف ان الرجل (مفهوق)
الفهق هو اعتلال في عظام الرقبة ويعالجة الدارفوريين بالقندال
والقندال هو جر الرقبة عموديا مع التحريك في الاتجاهات بحكمة حتي يتقياء الشخص سائلا مثل (النخامة ) او المخاط
وضع تيراب الحنفة علي الارض ثم وضع قدمية علي ركبتي الرجل وجر رقبته الي اعلي حتي طرش الرجل المخاط واعقيها بملاح ( خدرة)
ثم شهق عاليا ونط بعيدا واختفي بين زريبة القش
ضحك تيراب وقال في سرة وليد كللب تاني اسرقي من ناس وانا نكون مريتا من هنا
شكرا دكتورنا وكل سنة وكلكم طيبين
|
Post: #13
Title: Re: السفروق
Author: Elsanosi Badr
Date: 08-23-2018, 09:28 PM
Parent: #12
يا هلا يا اب رزقة باخ
كل سنة انت والاسرة بال الف خير
تعالو احكو عن دارفور ونيالا البحير هي ام المدائن في الاحاجي لا تضاهي مدينة في القصص الشعبية سوي مراكش
|
Post: #14
Title: Re: السفروق
Author: Elsanosi Badr
Date: 08-24-2018, 02:50 AM
Parent: #13
| Quote: (وعصاية إمام الجامع التي يعتلي بها المنبر لا أدري ما اسمها) |
بنسميها الشعيبة (تصغير لكلمة شعبة) وهي عصا من السدر في الغالب ولها فرعين اشبة بأذني ابو حليمة وهو الثعلب
واعتقد الاخوان ناس محجوب دورشيد واب رزقة واخوانا في الغرب الأدنى ممكن يكون عندهم ليها اسم تاني
صراحة يا دكتور اكتب وانا طولت طولة شديدة ياخ من هناك
وكم اتمني ان احقق امنية هي التقاعد في تلك الربوع
|
Post: #15
Title: Re: السفروق
Author: محمد بدرالدين
Date: 08-24-2018, 05:20 AM
Parent: #14
روعة يا السنوسي
متابعة باستمتاع
متعك الله بالصحة و العافية..
و حفظ الله أهلنا بدارفور من كل سؤء
مودتي و تقديري
السفروق موجود بذات التسمية ف شرق السودان
|
Post: #16
Title: Re: السفروق
Author: ABUHUSSEIN
Date: 08-24-2018, 05:41 AM
Parent: #15
.سلام اخونا السنوسي و ضيوفه الكرام
و كل سنة و انتو طيبين
سمعنا كتير عن السفروق و حكايات عن احترافية استعماله من اهلنا في الغرب
و كيف بلحقو بيه الهارب خاصة الحرامية ....
موضوع شييق ...
تحياتي و احترامي للجميع
|
Post: #17
Title: Re: السفروق
Author: عبدالحفيظ ابوسن
Date: 08-24-2018, 06:13 AM
Parent: #16
اظن السفروق لصيد الارنب
في الافلام شايف الخواجات عندهم سفروق زي اللعبة كدة
يا سنوسي متعة قصص وامثال دارفور بلهجتها المحلية
|
Post: #18
Title: Re: السفروق
Author: Biraima M Adam
Date: 08-24-2018, 06:21 AM
Parent: #17
ول أبا دكتور السنوسي،
والله رائع ..
Quote: عزيزي القارئ "السفروق" و"القرجة" و"الدقل" و"البسطونة" و"العكاز" و"العكاز المضبب" و"المطرق" (وعصاية إمام الجامع التي يعتلي بها المنبر لا أدري ما اسمها) أسماء لأنواع مختلفة من العصي نستخدمها في غرب السودان.
شكرا أخي السنوسي. |
أنت نسيت الهبوت .. عصي كبيرة وطويلة .. يحملها الأنسان بكلتي يديه .. ثم يهبت بها علي الشيئ ..
ههههاي
بريمة
|
Post: #22
Title: Re: السفروق
Author: Elsanosi Badr
Date: 08-24-2018, 03:27 PM
Parent: #18
هلايا بريمة وكل سنة وانت طيب ياخ وكل الاهل معاك
| Quote: أنت نسيت الهبوت .. عصي كبيرة وطويلة .. يحملها الأنسان بكلتي يديه .. ثم يهبت بها علي الشيئ .. |
والعنجاوي او القربعوية
طبعا يا بريمة زمان في حاكم اقليم جا الفاشر وهو اظنو دكتور وشايف نفسو
اها في واحد من خطبو قام قال ليهم ياخي انا بروفيسور
اها في واحد من الحضور ماسك سفروق
سال اخوه الجنبو قال ليهو
اساغة اتا بروفيسور ده شنو؟؟
رد ليهو وقال ليهو "بروفيسور ده زول قرا كي قرا كي لامن شوطنت"
|
Post: #21
Title: Re: السفروق
Author: Elsanosi Badr
Date: 08-24-2018, 03:19 PM
Parent: #17
هلا يا اب سن وعيدكم سعيد انتوالعقاب
| Quote: يا سنوسي متعة قصص وامثال دارفور بلهجتها المحلية |
طبعا يا اب سن دارفور ممكن نقول انها
الجبل والسهل والصحراء وهذا تنوع عجيب وهجين ثقافي ثر
الغة المحكية والعامية لها جذور عميقة في الرواية الشفاهية
دارفور اعلب سكانها غير عرب او من اصول غير عربية
اعتنق سكانها الاسلام باخلاص وتشربوا قيمه وتحدثوا بلغته فصار هذا الهجين اللغوي الجميل
انظر الي اللهجة دي بما فيها من تعابير بديعية ووصف شفاهي
هذا رجل غضب من امراه فقال لها
"يا منجوهة، يا عايبة، يا فتّاشة تقول منخاس. زي السحاب حايمة، ما بتقعدي في الوطا.. لمّن داهو عرب الخلا شافو ولادتك"
|
Post: #20
Title: Re: السفروق
Author: Elsanosi Badr
Date: 08-24-2018, 02:46 PM
Parent: #16
هلا ابو حسين وكل سنة وانت والاسرة بالف الف خير
Quote: سمعنا كتير عن السفروق و حكايات عن احترافية استعماله من اهلنا في الغرب
و كيف بلحقو بيه الهارب خاصة الحرامية |
طبعا يا ابوحسين البتاع ده فن قائم بذاته ابتداء من نوع العود من ياتو شدرة
انتهاء بالشكل الهندسي ومتيت بيكون مفلطح ومتي يكون مدبب
السفروق هو تقنية ممكن تستعمل في ضرب حاجة وهي طايرة ويجيك راجع
وبرضو بتعتمد سرعة السفروق الي مهارات مطلقة وقوته الجسمانية
قيل ان احد السلاطين في دارفور امر بمنع الصيد
في واحد اختلي خلسة ومشي يصيد
واطلق السفروق نحو ارنب في حديقة السلطان !!
ولمح من بعيد موكب السلطان
وانطلق الرجل خلف السفروق
وماهي الا لحظات حني امسك الرجل السفروق قبل ان يضرب الارنب
|
Post: #19
Title: Re: السفروق
Author: Elsanosi Badr
Date: 08-24-2018, 02:39 PM
Parent: #15
هلا يا محمد كل سنة وانت والاسرة بالف الف خير
| Quote: السفروق موجود بذات التسمية ف شرق السودان |
ههههه يا محمد السفروق ده ماركة مسجلة هناك ممكن يكون عندكم واحد تاني لكن سفروقنا ده مطور جدا
في بواكير الصبا اتيحت لي فرصة التعايش مع اهلنا البجة بحكم تواجد اخي الاكبر في مناطق الزبيدية بشرقنا الحبيب واندهشت من ارتباط اهلنا في الشرق بالسفروق
وده يا محمد بيديك احساس انو البلد دي وانسانها السوداني يرتبط بالاخر ارتباط عضوي وثاقفي حتي في ادق التفاصيل
|
Post: #23
Title: Re: السفروق
Author: Elsanosi Badr
Date: 08-24-2018, 03:43 PM
Parent: #19
| Quote: "يا منجوهة، يا عايبة، يا فتّاشة تقول منخاس. زي السحاب حايمة، ما بتقعدي في الوطا.. لمّن داهو عرب الخلا شافو ولادتك" |
المقطع منسوب لاخونا الأستاذ الدكتور/ إبراهيم آدم إسحق في احدي رواياته وهي رواية بالعامية
|
Post: #24
Title: Re: السفروق
Author: Elsanosi Badr
Date: 09-26-2018, 04:01 AM
Parent: #23
فوق لحين تيسير
|
Post: #25
Title: Re: السفروق
Author: walid taha
Date: 09-26-2018, 07:12 AM
Parent: #1
ويُقال أنه يعود لراميه إذا لم يبلغ هدفه والله أعلم
|
Post: #26
Title: Re: السفروق
Author: بابكر قدور
Date: 09-26-2018, 09:09 AM
| Quote: في بواكير الصبا اتيحت لي فرصة التعايش مع اهلنا البجة بحكم تواجد اخي الاكبر في مناطق الزبيدية بشرقنا الحبيب واندهشت من ارتباط اهلنا في الشرق بالسفروق |
الأخ السنوسي وضيوفه الكراملكم الود والتحايا الطيباتبوست يتميز بالظرف .. فضلاً عن أنه يضيف الكثير من المعرفة عن أهلنابدارفور .... إسم هذه العصى لدى البجا في شرق السودان هو (الكُوْلَايْ)وهو سلاح مهم لا تحلو منه يد البجاوي .. بجانب أسلحته الأخرى .. وهو لا يتم شراؤه من السوق بل كل واحد (ينجر) الكولاي الذي يحمله.... وكما هوالحال في دارفور فهناك الكثير من الأدبيات حول الكولاي .. وأعتقد أن هذهالعصى تعرف أيضاً بإسم (الطُرُمْباش) في مناطق السودان الأخرى وعلى الأخصمناطق الجعليين .... شكري وتقديري أخي السنوسي ....
|
Post: #27
Title: Re: السفروق
Author: الطيب رحمه قريمان
Date: 09-27-2018, 05:33 AM
Parent: #26
الاخ السنوسى بدر ..
ذكرت اسماء عدد من العصى .. و اسمح لى ان اذكرك بالكنجال ..
تحياتى ...
|
Post: #33
Title: Re: السفروق
Author: Elsanosi Badr
Date: 09-30-2018, 07:57 PM
Parent: #28
Post: #30
Title: Re: السفروق
Author: Elsanosi Badr
Date: 09-29-2018, 04:33 AM
Parent: #26
| Quote: وكما هوالحال في دارفور فهناك الكثير من الأدبيات حول الكولاي |
يااسلام يا بابكر قدور ياخ
ياريت ترفد البوست بتلك الادبيات عن السفروق
طبعا خلال تواجدي في شرقنا الحبيب لاحظت ارتباط اهلنا البجة بالاسلحة البيضاء من سيف وسفروق وعصاية تقريبا نفس الناس هناك مع اختلاف طفيف في حمل وتوشح السيف الا في نطاق ضيق عند بعض المجموعات السكانية مثل الكنين وبعض العرب في المناطق الشمالية
لكن بصورة عامة السفروق وسكين الضراع والعكاز اكثر ما يميز انسان دارفور
ونتيجة لتنوع المناخ في دارفور تلاحظ تنوع الغطاء النباتي فتجد السفروق يختلف من حيث الحجم والقوة
فمثلا هناك سفاريق صغيرة لمطاردة الارانب والحيوات الصغيرة وصيد الطيور وهناك سفاريق كبيرة لكف اذي الانسان والحيوان
السفروق سلاح مهم قبل نزول كارثة الاسلحة النارية وانتشارها
شكرا كل كثيرا يا بابكر ياخ
|
Post: #29
Title: Re: السفروق
Author: Elsanosi Badr
Date: 09-29-2018, 04:19 AM
هلا وليد طه
وعساك طيب آآزول
السفاريق انواع وتعتمد علي نوع الشجرة وطريقة النجر وشكلو وبرضو علي حامله ومطلقه وراميه
طبعا في واحد قريب من الboomerang الذكرو اخونا منتصر فوق وهو سفروق تقريبا تتساوي فيهو الاضلاع واكثر فلطحة والتواء في المقبض وده يمكن النوع البتقصده وهو فعلا ممكن يجيك راجع لو فكيتو بطريقة معينة
طبعا اهلنا هناك في دارفور وخاصة الشباب بارعين في اصابة الاهداف بالسفروق وقبل الاحداث اللعينة التي حلت بتلك الديار في تباري لبعض الشباب في رمي السفروق وطريقة نجرو
|
Post: #31
Title: Re: السفروق
Author: Elsanosi Badr
Date: 09-29-2018, 04:54 AM
Parent: #29
هلا يا الطيب وحبابك ياخي| Quote: ذكرت اسماء عدد من العصى .. و اسمح لى ان اذكرك بالكنجال |
طبعا الكنجال دي اظنها المخراش او الخرشة زي ما بيطلق عليها هناك وهي عصاية من الخيزران ولها احدوداب شبه دائري لتسهيل مسكها وبرضو ممكن تستعمل ككنجال يكنجلوا بيها الزول من عرقوبو عشان ما يقوم جاري خاصة الشفع في الخلوة ههههه
طبعا الخرشة دي بتختلف من المحجن او المحجنة وهي العكاز الراسو مدبب داك والمحجن ده سلاح خطير بيستعملوهو اخوانا البقارة ولا اعرف ماذا يطلقون عليه لكن اعتقد برضو ممكن بيسموهو المحجن وهو ممكن يضببوهو بسير جلد بقر ويكون سلاح محترم ضد السراريق وافات الزمن ، لكن انا اعتقد ان السفروق هو اكثر الاكتشافات اشراقا لسهولة حمله واصابته للهدف بدقة اكبر كما انه يحتاج الي مهارات
|
Post: #32
Title: Re: السفروق
Author: عبيد الطيب
Date: 09-29-2018, 06:45 AM
Parent: #31
تحياتي يادكتور السنوسي وسلام ومعزة
السَّفروق والقرجة يتشابهان، ولكن السفروق من (حنفته) مستفيمة، اشبه العدد ستة، وأحيانا له "قنيبير" صغير
ويسمي ايضا (الطرباش/الطرماش) وفي كردفان وتحديدا البادية الغربية إسمه(طرباش)، قال شاعرهم يصف الناقة:
ينجينا الله يا أم راسا تقول طرباش
كاتلة عزيز ورامية سطية فوق الناس
والقرجة أحيانا حجمها لا يساعد علي القنص
توجد الدّلدماية، حنفاء وراسها مدلدم
وغالبا تكون من شجر الك/قتر أو الإندارب والقمبيل
البسطونة من الخيزران وتكون مستقيمة
ويشبه به قوام الحسناء
ديفة الأريب الحاروك وسمعان نقرة
بسطونة الفتح لي مباعو وراد أبوصقرة
ونفس شكلها يكون العكّاز ولكنه يكون من القنا
أوكت الحديث شوك شوك.
بستعزوا ب السهوك
عككَّز بزرنا الجوك
قرّان بقر مجوك
الحنَّوفة وهي القنقباية بتكون محنوفة،من الأعلي
من الخيزران ومن القنا(قاف معطشة)
(الليلة اصبحت حنوفة وقناها رقاق
ودومتك جايبة حِرتا دفّقو المحراق)
القصّاصية أشبه بعكاز القنا ولكنها أقصر وأنحف وتكون خضراء، من شجر الإندارب "القمبيل"
أقيم العصي هي عصاة السّلم أهل البادية يتفاءلون بها جدا.
|
Post: #34
Title: Re: السفروق
Author: Elsanosi Badr
Date: 09-30-2018, 08:57 PM
Parent: #32
ام كونيبا وكت تجيك كاشه
وتلوي عيونا بطرباشا
بتساويك رفيق مع الباشا
هلا باديبنا الرائع العبيد ود الطيب المن التراث عالم وقرِّيِّب
لاحظت ان اهلنا فوق في البادية الغربية اظنهم بيدغمو الميم في الباء وبعملوا اظهار او قول اقلاب ليحل حرف الميم حرف الباء، فمثلا الطرمباش بقولوها الطرباش هل في تفسير اخر لهذه الاختلاف الحرفي؟
دي يا ود الطيب طولت طوله شديدة خلاس ما سمعتها وذكرني النحكيلك قصة الكباشي الباع جملوا في دراو للمصريين وما عجبتوا معاملتهم للجمل حتي بعد ان ختا قروشو في جيبو وقام عليهم بالقصاصية واجبرهم علي احترام الجمل ومعاملته كاحسن ما يكون
وجودك هنا مهم
بجيك صاد يالحبيب
|
Post: #35
Title: Re: السفروق
Author: ناذر محمد الخليفة
Date: 09-30-2018, 10:26 PM
Parent: #1
سلام من بادية القصيم اخ السنوسي ...
من عنوان بوستك دا وقبل ما ادخلو اتذكرت حادثة طريفة حصلت لينا ونحن في بوادير فترات المراهقة في الخرطوم ..
كان في جوة الحلة داخلية طالبات .. اجرو ليهم بيت واسع وعملوهو داخلية . في الزمن داك نحن اولاد الحلة كنا شايفين العربات المظللة مارقة وداخلة تشيل وتنزل في البنات .. فكنا بنعمل غارات ليلية يومية
على الداخلية ..نرجع من سينما جنوب بعد نحضر فلم هندي كااارب ..نقوم نتسلح بي حجار وانصاص طوب وحصحاص .. نجي مارين بالداخلية دي نقوم نردما حجار ونقوم جارين ونحن بنضحك وصوت خلعة البنات وصريخن واصل اضنينا ..
اها بعد فترة المسؤولين من الداخلية دي عملو كشك خشبي قداما .. فيهو غفير دارفوري شرس جدا لي هسي متذكر شكلو ونظرات عيونو .. شعرنا بيهو من ملامحو لامن نمر قدامو .. واضح عليهو التربص والشك لي اي زول ..
اها مرة جايين من ابو حمامة ضاربين باسطة وحليب قلنا ندي الداخلية دي غشوة ونرجما طوب .. انا اعترضت قلت ليهم الغقير الجديد دا ما بيطمن .. واحد فينا متحمس شارب 4 لتر لبن و2 كيلو باسطة وبسبوسة اصر ..
قلنا ليهو انت امشي ونحن ننتظرك في اخر الشارع .. الزول دا مشى وهو محمل بالطوب والحصحاص وصل قريب الداخلية وبدا يطلق ذخيرتو في سقوف الزنك وقام جاري . انا من بعيد شايف فجاة كدة من جوة الكشك عمنا الغفير
العمرو كان فوق الخمسين جرا وراهو واتجهو الاتنين ناحيتنا .. فجاة عمك دا يسل من جلابيتو حاجة كدة ويفنها علي ولدنا دا .. اشوف ليك الولد اتكعوج ودرررردلب جا واقع الواااطة .. !!! قبل عمك يصلو قام من الارض وربك رب الخير
كان في عربية واقفة زولنا دا لف حواليها عمك وصل بكان الوقعة وشال الحاجة الفناها وحاصر الود مع العربية .. الكلام دا قريب جدا من محل قاعدين عمك رافع الشي الغريب دا وهو لافي حول العربية وزولنا يلف معاو محتمي بالعربية
وعمنا كل مرة يرفع الشي يقول لي زولنا اقيف عشان ما انيشك .. الوضع اتطور بعد كم لفة حول العربية لحدي ما سيد العربية جا مارق من البيت سال من الحاصل ورضى الغفير واقنعو يمشي وعنف الولد ودا كلو قدام عيونا ..
معانا في الشلة واحد من اهلنا ناس دارفور ما كان حاضر الموقف .. حكيت ليو قلت ليو عمك الكبير دا ناش الولد في كرعيو وفنقلو علي وشو من بعيد كدا كيف .. ضحك لامن اتنفقل وقال لي ناشو بي سفروق !! ودي كانت اول مرة اسمع فيها الكلمة دي ..!!
بعد فترة في الثانوي وانا نسيت الموقف داك .. واحد من شلتنا من ناس دارفور اتناقر مع واحد تاني في موضوع ما متذكرو .. لمن زهج منو قال ليو امشي عامل راسك زي السفروق ..!!
بعد داك من كم قصص وحكاوي عرقت فايدة واهمية السفروق دا لي بعض القبائل في السودان وانو واحد من اهم الاسلحة للزول البدوي البيطلع الخلا وخاصة لي صيد الارانب عند ناس شرق السودان ..
ونحن صغار كان في لعبة صينية كدة عبارة عن علبة زي علبة المياه الغازية وفوق ليها مروحة بي جناحين على شكل زاوية منفرجة .. كنا بنملاها بي زنبلك وندوس زر .. تقوم المروحة دي تنطلق
بعيد لي مسافة معينة خمسة او ستة امتار وانت واقف في محلك تشوفا بتنور اخضر واحمر واصفر تلف وتجيك في محلك زاتو تمسكا وتركبا في العلبة وتملاها من جديد واظنو دي نفس نظرية السفروق ..!!
علا بدور اسعلك .. ناس القصيم بيصيدو الضب دا كيفن ؟ بي سفروق ولا حاجة تالنية . ؟!
تحياتي لي اكتر من 3 سنوات ما كتبت قدر دا في المنبر بس القصص استهوتني ..
|
Post: #36
Title: Re: السفروق
Author: walid taha
Date: 10-01-2018, 07:13 AM
Parent: #1
"جبورة فجاغ السراريق " مؤكد بيمتلك واحد :)
|
Post: #37
Title: Re: السفروق
Author: علي الكرار هاشم
Date: 10-01-2018, 09:53 AM
Parent: #36
الاخ السنوسي
لك التحية
مقال اكثر من رائع وجميل
السفروق
جاء في المسرحية السودانية
المك نمر
التى تحكي قصة الشكرية والبطاحين للشاعر ابراهيم العبادي
فلاحة العربي داب سفروق يدرب كلبو
|
Post: #38
Title: Re: السفروق
Author: علي الكرار هاشم
Date: 10-01-2018, 10:31 AM
Parent: #37
كنت اعتقد ان اللكلمة بجاوية
لاننا عرفناها عند جيراننا البشاريين
والسفروق عندهم عصايه طولها متر او يزيد قليلا
وهو منحني او محنى
وغالبا يستعمل في الصيد حيث ترمي به الارانب والغزلان
|
Post: #39
Title: Re: السفروق
Author: بابكر قدور
Date: 10-01-2018, 11:42 AM
Parent: #38
الكولاى أو السفروق
لحين عودة
|
Post: #40
Title: Re: السفروق
Author: عبيد الطيب
Date: 10-02-2018, 06:27 AM
Parent: #39
سلمت استاذنا بابكر قدور وتحياتي
السفروق عندنا بالبادية الغربية يختلف قليلا في الشكل ، ماعندي هسع صورة لكن أقرب إلي حرف 6 والأفقي قصير والراسي طويل وأخف من القرجة
|
|
|