Post: #1
Title: بمناسبة المطر ... عينات الخريف
Author: أبوذر بابكر
Date: 08-17-2018, 08:45 AM
08:45 AM August, 17 2018 سودانيز اون لاين
أبوذر بابكر-
مكتبتى
رابط مختصر اهلنا فى السودان
زى م بعرفو منازل وفصول السنة ومقسمنها بشكل دقيق جدا
اعتمادا على النجوم فى الغالب وعلى الرياح برضو وعلى اشارات تانى مختلفة فى الطبيعة
قالو الخريف مدته 91 يوم تبدا من يوم 21 يوليو بالتاريخ الميلادى وتنتهى فى 21 اكتوبر
طبعا دى التواريخ البتوافق تواريخهم هم حسب تسميات الشهور عندهم، زى مثلا سايق وقصير ورجب والكرامات والضحية الخ
الخريف فيه 7 عينات كل عينة مدتها 13 يوم
والمجموع بكون 91 يوم، ما عدا عينة "الجبهة" فهى فىالحقيقة 13 يوم وربع يوم، لكين الناس بفتكروها 14 يوم زى ما شرح ابو جعفر
ترتيب العين بكون كده
الضراع
وده بداية الرشاش ودخول الخريف
والهوا فيه بتحول ويبقى من جيهة "الصعيد" يعنى من جيهة الجنوب
الطرفة
ودى بكون فيها المطر شغال طواالى وما عنده مواعيد وبكون متزن وهادى وكتير
والناس بخافو منه لأنه بسقى البيوت
الملاحظ انه العينة دى جات السنة دى بشكل مختلف تماما وما متوقع
وده الاتسبب فى السيول والفيضانات الغريبة دى
النترة
عينة النترة بتطلع هوام الواطا والحشرات وفيها بتوالد النمل والجراد وباقى الحشرات بشكل مكثف وشديد
الجبهة
المطر بكون كتير فيها برضو والسحاب بكون اكتر من غيرهفى العين التانية
ودى العينة الزائدة عن باقى العين بمقدار ربع يوم
عريج
وعندها اسم تانى وهو الخيرصان
ودى عينة الرعد الشديد والقوى والبرق والصواقع
مع انه ما بكون فيها مطر كتير
العوا
العينة القبل الأخيرة فى الخريف
وفيها بكون فى محاصيل كتيرة مرقت ووصلت مراحل معينة باختلاف نوع كل محصول
السماك
آخر عينة فى الخريف وبتكون عبارة عن "تشطيب" وخلاصة لفصل المطر
فى كل عينة بتظهر نجوم معينة فى السماء برضو بكون عندها دلالات واشارات بعرفوها ناسنا وبستفيدو منها فىتريب امورهم حقت الزراعة والرعى وما شابه
ده ملخص بسيط بدون تفاصيل كتيرة
لأنه كل عينة لو الزول نضم فيها بتكون دايره ليها كتاب كامل
بعد كده اى زول لو عايز يعرف هو فى ياتو عينة من الخريف
يحفظ الترتيب ده ويحسب كل عينة 13 يوم من 21 يوليو
ان شاء الله بس ما اكون نسيت او غلطت فى حاجة، ومعتمد اساسا على الذاكرة السماعية المتراكمة و الذاكرة بقت تعبانة ومقدقدة
|
Post: #2
Title: Re: بمناسبة المطر ... عينات الخريف
Author: عبداللطيف حسن علي
Date: 08-17-2018, 05:11 PM
Parent: #1
تحياتي ابوذر
الخريف يبدا في مايو اواسط السودان
اها ورينا نحن وين وكم تبقي لنهاية الكوارث
|
Post: #3
Title: Re: بمناسبة المطر ... عينات الخريف
Author: أبوذر بابكر
Date: 08-18-2018, 01:27 AM
Parent: #2
كيف الحال يا عبد اللطيف
ما عندى علم تحديدا
لكن يبدو ان التداخل بين الشهور الميلادية و الهجرية هو البغير ضبط بداية العينات
الكوارث والماسى حتنتهى قريب باذن الله
|
Post: #4
Title: Re: بمناسبة المطر ... عينات الخريف
Author: أبوذر بابكر
Date: 08-18-2018, 10:24 AM
Parent: #2
تحديد بداية و نهاية فصل الخريف ب 21 يوليو و 21 اكتوبر، على التوالى، بخضع لتقسيم الميتيولوجى و الدورة الفلكية الشمسية
اما تعيين عينات السودانيين فغالبا بتخضع لمنازل القمر، ومن هنا ببدا الإشكال فى فروقات واختلافات التقويمين، الشمسى و القمرى
مثلا رمضان ممكن يكون فى شهر مايو وبعد كم سنة ممكن يجى فى شهر نوفمبر وهكذا باقى المناسبات القائمة على التقويم القمرى او الهجرى زى ما بسموهو
وده بحصل سنويا من قرون طويله
|
|