من وحي أزمة رغيف الخبز

04:28 PM August, 14 2018 سودانيز اون لاين
almulaomar-WALO SAFAR
علاء جا شايل كيسو ووصل الفرن لقي ليك كل الحلة واقفة في الصف الجا من الجريف وناس الجبل وهو من عمق كل تلك المعاناة كان مقرر إنه يجب عيش بأي طريقة خاصة وأن الدقيق الفي البيت كمل بعد أن أكلو آخر قراصه في العشاء الأخير ولم يبقي في بيتهم حاجة حتي لو كسرة ناشفه يمكن إعادة تدويرها لزوم سد الرمق. أها علاء الدين هذا لمن عرف نفسو إنو ما حا يصل للفرن من طول الصف قام بمخاطبة الجموع ونادي دون أن يحشر فالناس أصلها محشورة من قبله والدليل ترتيبه المليوني في صف الرغيف أهاقال للناس لمتين حا نصبر علي هذا الهوان البحصل دا كيف نرضي بيهو ونحن ساكتين وصلونا الحد ناس الحكومة ديل القروش عندهموالعلاج ليهم يودو أولادهم بره للقراية ويتعالجو برا يا أخوانا سكاتنا دا شين خلي يموت مننا خمسين ميه بس نبقي وقود لي ثورة تقود لتغيير الحاصل .المهم الناس تتصبب عرقاُ وتهش في الضبان يقيف موتر يترجل منه واحد ليهو عنقره ولابس سفاري ونضارات كمان ويقوم يطلع موبايلو ويصور في صاحبنا وهو يخطب والناس تغمز ليهو تلكز فيهو وهو سادر في خطبته كأن الأمر لا يعنيه ، بل تعدي ذلك بأن إتلفت علي الزول أب سفاري وقال له مخاطباً بالله تعال شيليني وديني ورا الشمس أصلو الليلة ما بسكت أقول ليك حاجه جيب دفار خم الناس دي كلها ودخلنا في خرم إبره ولا أقول ليك أعمل الداير تعملو إنت أصلك من كلاب الحراسة لا أكثر ، في اللحظه دي صاحبنا الخطيب إتلفت يشوف ردود أفعال الناس ما لقي غير سيد الطابونه ومتضاري كمان أها إبتسم وقال مخاطباً سيد الفرن بالله أديني عيش بي عشرين وأدي الزول الأنيق دا عيش بي 15 جنيه ، وبعد أن حاسبوا سيد الفرن قال لي سيد الموتر أها بكره فرن نمره إتنين.---وصلتني بالواتس وأدخلت عليها بعض التعديلات لزوم الشلاقة

يا المُلا
سيأتيك ( عنتر ) شايل سيف انك بتنكت والنَّاس تعاني
اذا انت كوز بن كوز وقصدك تشتت الكورة

شكراً أخي زكريا فاضل علي المرور والتنبيه ، وأقول
الروح في المثل بلا يومها ما بتنسلا
مرحب بعنتره ومرحباً بسيوف الهند زاتا ، يا سيدي إذا رأي الآخر المختلف في هذا الكلام الذي أعجبني ونقلته هنا بعد أن أضفت له من دقنوسي دا إمعاناً في الشراكة وتحمل كامل المسئولية في موضوع أعجبني ، لهواً وعبثاً وتشتيتاً للكورة في الزمن بدل الضايع فليوقف الزمن ليحقق مآربه. أؤمن يقيناً بأن أحلي النكات تولد من رحم الأزمات والدكتاتوريات والحجر علي الرأي الآخر الذي ربما يصل بأي حوار إلي تسفيه وإقصاء وربما إخصاء عديل كده.
نحن نضحك علي مآسينا يا سيدي ، وفوأتاكي الباب مردداً قول سيد الشعر نزار قباني من دفتر النكسة:
السر في مأساتنا
صراخنا أضخم من أصواتنا
وسيفنا أطول من قاماتنا