Post: #1
Title: الدولار وملجة الخضار
Author: عبدالحفيظ ابوسن
Date: 08-09-2018, 06:31 AM
Parent: #0
06:31 AM August, 09 2018 سودانيز اون لاين
عبدالحفيظ ابوسن-no where
مكتبتى
رابط مختصر ممكن نقرأ العنوان
الدولار واقتصاد ملجة الخضار
ولا
الدولار وثقافة ملجة الخضار
ولا
اقتصاد ملجة الخضار في دوران الدولار
|
Post: #2
Title: Re: الدولار وملجة الخضار
Author: عبدالحفيظ ابوسن
Date: 08-09-2018, 06:38 AM
Parent: #1
من البداهة في علم الاقتصاد
لو داير قروش لازم يكون عندك سلعة تبيعها
أي سلعة تندرج تحتها مسميات كتيرة ... سلعة مادية ولا معنوية ولا خدمة
طبيعة السوق بتحدد طبيعة نقودك
يعني فارش جوة السودان اياهو الجنية حقنا دي
داير قروش ما سودانية معناتو تبيع برة بلدك
تبيع برة بلدك دي فيها نظر
يعني لازم تختار بضاعة مرغوبة برة وغالبا ما عندهم او شحيحة عندهم
بداهة حد واحد زايد واحد يساوي اتنين
|
Post: #3
Title: Re: الدولار وملجة الخضار
Author: عبدالحفيظ ابوسن
Date: 08-09-2018, 06:47 AM
Parent: #2
الليامات دي الطماطم عندنا غالية
وحرمنا المصون مصرة اصرار شديد عليها
وانا زايغ ومتحايل عليها
فيها ريحة مبيد
ضاربة
وتقول لي ناس فلان جابوها والله سمحة سماحة حلات الدنيا عليها
فشلت كل حيلي في اثنائها عن الطماطم
الملاح بدون طماطم مسيخ والصلصة ما بتحل محلها . واللون والطعم
اها بقيت مع خط الالتماس
طماطم طماطم
اربعة حبات قدر الليمونة بي 30 نهائي بعد مجابدة ومفاصلة وحراق روح
يا زول يوم اشتهيت الموليتا العصر وقالوا جيب معاك ليمون
بتاع الخدار عندو ليمون واربعة كيمان طماطم
اديني ليمون بي عشرة
طيب ما اديك معاها طماطم اخر اربعة كيمان ومعاهن زيادة
ابيت
ما قالوا لي جيب طماطم
شيل دق
شلت الاربعة كيمان طماطم ومعاهن زيادة وبصل ابيض وشطة خدرا وفلفلية وعجور بي 40 ج
انا اخوك الطماطم !!
عرفت ليك الاقتصاد
العصر بمشي اصاصي من بعيد واحدد الضحية . اصلو ما بقول داير طماطم اخليها صدفة بس
اخم الطماطم بي رماد خشما
|
Post: #4
Title: Re: الدولار وملجة الخضار
Author: عبدالحفيظ ابوسن
Date: 08-09-2018, 07:05 AM
Parent: #3
يعني السلعة الواحدة ممكن يكون عندها سعرين في يوم واحد
والسعرين يتفاوتن تفاوت شاسع
ليه؟
لأنو سوق بدائي ومتخلف
ولا يمت للعلم بصلة
والقائمين علي امره ناس بسطاء ومتواضعين في معارفهم
وكذلك الدولار
|
Post: #5
Title: Re: الدولار وملجة الخضار
Author: عبدالحفيظ ابوسن
Date: 08-09-2018, 08:01 AM
Parent: #4
اذكر مرة نقد حكي قصة عن تاجر وسماه بأسمه
نادا السماسرة وعرض ليهم مليون دولا للبيع . والسماسرة خشو عرضو الدولار
الدولار نزل .. وخش اشتري المعروض
وعاد الدولار لسعره القديم وارتفع قليلا
باع ما اشتراه وكسب كم مليون . مليون زمان والمليون دولار حقو قاعد في خزنتو
|
Post: #6
Title: Re: الدولار وملجة الخضار
Author: محمد حمزة الحسين
Date: 08-09-2018, 10:26 AM
Parent: #5
يا شيخ العرب لو كل مواطن اشتغل بنظرية الغالي متروك ويوماً فاتك سوقوا عدو (إعتبرهـ) ربح ...
كان كل شئ قعد في علبو ...
أنا لسع مستغرب علاقة منوجاتنا المحليه بالدولار يطلع او ينزل شنو ...
كل الإقتصاد في البلد ملجة الدولار كان بي 38ج طن الاسمنت بي 3500ج
الدولار ارتفع لـــ 42ج طن الاسمنت بقي 8000ج ...
الدولار لم ينزل من الــ 42ج لكن نزل السوق اسمنت قنا المصري ...
طن الاسمنت نزل بقي 3700ج دا اسمو شنو ...
والله الملجه زاتا تزعل مننا ...
:
:
:
:
:
:
:
مع التحيات لله الزاكيات
|
Post: #7
Title: Re: الدولار وملجة الخضار
Author: عبدالحفيظ ابوسن
Date: 08-26-2018, 07:54 AM
Parent: #6
صدقت محمد
لكن نحن زاتنا عجيبين خلاس
|
Post: #8
Title: Re: الدولار وملجة الخضار
Author: Frankly
Date: 08-26-2018, 08:26 AM
Parent: #7
كل عام وأنتم بخير عبد الحفيظ وضيوفه
الحل في الزراعة المنزلية والأسرة المنتجة
حوض متر في متر من الطماطم غير محدود النموء بيكفيك أغلب السنة وتجفف منه بدل حوض الزهور الما معبره زول.
جركانة بلاستيك واحدة أو قفة سعف تخت فيها بطاطساية تطلع ليك 20-30 بطاطساية اعمل منهم خمس جركانات أو قفف.
وشجرة برتقال ومنقة وليمون بدل النيم والبان والجهنمية.
لكن نحن صرنا شعب استهلاكي بتميز, كل شيء لازم يكون جاهز ومن برة.
موية وضوء مهدرة وندفع الألاف لتغطية الحوش بالسراميك ولو حوش ترابي نهدر الكثير من الوقت لكنسه والكثير من الماء لرشه وهو مع ذلك يظل أجرد وتقريباً نفس هذا الجهد والماء كان ممكن أن يكون لنبات مثمر.
طبعاً كلامي دا ما بيعني إبراء السلطة من واجباتها تجاه الشعب وتوفير مقتضيات الحياة الكريمة للفرد والأسرة والمجتمع لكن لفت انتباه لدورنا تجاه إدارة الأزمة.
|
Post: #9
Title: Re: الدولار وملجة الخضار
Author: عبدالحفيظ ابوسن
Date: 08-27-2018, 06:41 AM
تشكر فرانكلي
واتا واسرتك بخير
والله ماباقي للمواطن الا يبقا دولة براهو
يكون عندو مولد للكهربا وبير موية ومزرعة لاستهلاكو ومدرسة ووو
الحكومة رفعت يدها منو وما رافعه كراعها من رقبتو
|
Post: #10
Title: Re: الدولار وملجة الخضار
Author: Frankly
Date: 08-28-2018, 10:56 AM
Parent: #9
أخطر قنبلة موقوتة في مجال الخدمات هي تلك الأعداد المهولة من السايفونات للغابة الأسمنتية في المدن جراء رفع الدولة يدها عن تقديم خدمات مجاري الصرف الصحي والسطحي.
هناك كميات خيالية من الفضلات الآدمية تذهب لجوف الأرض كل يوم خاصة في ولاية الخرطوم بمدنها الثلاث ومحلياتها وكثافتها السكانية الكبيرة.
كم لتر من الفضلات يمكن لباطن الأرض أن يحتمل؟
ومتى ستحل الكارثة وينتشر الوباء أم تراه انتشر ونحن لا ندري؟
|
|