اليوم داك اتحفنا لؤي شمت الجميل بالتسجيل العجيب ده
و كتب ما يلي :
أندر تسجيلات وردي على الإطلاق
بعد إنتهاء خسوف قمر هذه الليلة
واستقبالنا ليوم 28-يوليو-2018
تماماً في مثل هذا اليوم
الثامن والعشرون من يوليو
من العام 1982
قبل ستة وثلاثين عاماً من اليوم
قدّم وردي بشكل جديد
أغنيته الكبيرة
مرحباً يا شوق
للشاعر الجيلي عبد المنعم عباس
والتي كان قد قدّمها أول مرة
عند تسجيله لها في الإذاعة
في العام 1963
ولم يقم بغنائها منذ ذلك الوقت
وكعادته التجديدية لأعماله القديمة
فقد قرر بعد تسعة عشر عاماً
أن يغنيها لجمهوره
فكان مسرح قاعة الصداقة بالخرطوم
شاهداً على تلك الأمسية الفريدة
والتي وقف فيها خلف وردي ليلتها
هاشم هريدي على البنقز
الزبير محمد الحسن على الطبلة
الفاتح يس علي بدر على البيز
أحمد دو على الترومبيت
وليد عجاج على الساكسفون
عبد الهادي عثمان بدر على آلتي الفلوت والبيكلو
وحيد جعفر على التيزا
عبد العزيز حسن محجوب على الأكورديون
وعلى الكمانات
علي ميرغني
محمدية
بشير صالح
عمر ميشيل
عوض رحمة
صلاح عبد الرازق
الجيتاران كانا غياب يومها لطارئ صادف أن يتسبب في غيابهما معاً رغم حضورهما للبروفات واستعدادهما للحفل للعب صولو جيتار في الأغنية وهما صلاح خليل وشاكر عبد الرحيم ولعب صولو الجيتار يومها الأورقن والذي عزفه أحمد ساطور
وكان مشرف الصوت
أحمد عجاج
وقد تغنى وردي يومها
بالأغنيات التالية
مرحباً يا شوق
يا ناسينا
حنية
أنا مجنونك
فرحة
وطنّا
أسمح زي
هذا التسجيل هو بمثابة أندر تسجيلات وردي على الإطلاق
أطلقه في يوم ميلاده السادس والثلاثين
وعيد ميلاد الأغنية الخامس والخمسين
راجياً وآملاً أن تكون المعلومات المتعلقة بالتسجيل مرافقة له عند نشره وتوزيعه
شكرا لؤي شمت
____________________________________
بالله عليك تحدثنا عن الحفل و عن التسجيل العجيب ده ...
Post: #2 Title: Re: يا ترهاقا ده شنو السويتو ؟ .. مرحبا يا شوق . Author: يحي قباني Date: 08-07-2018, 06:25 AM Parent: #1
لم اسمع هذا التسجيل العجيب من قبل ...
تحفة فنية و ابداع لا نهائي ...
التحية موصولة للصديق الجميل لؤي شمت ...
و للباشمهندس صلاح عبد الرازق زميل الدراسة و عازف الكمنجة الماهر ...
عبد الهادي عثمان جلّع الفلوت حد البكا ...
و عبد العزيز عصفور رحمه الله ادب الاكورديون ادب ...
التحية للصديق الفاتح يس و الذي قابلته قبل اسبوع بعد عودته الى كندا من السودان ...
فرقة ماسية بحق ...
Post: #3 Title: Re: يا ترهاقا ده شنو السويتو ؟ .. مرحبا يا شوق . Author: MOHAMMED ELSHEIKH Date: 08-07-2018, 06:28 AM Parent: #1
يا قبة مالك علينا عاوز ترجعنا للسبعينات؟ وايام وردي وحفلات عبد اللطيف عبد الغني في عموديتي عطبرة والدامر وابداعات صديقنا ساطور(ترهاقا) في تلك الأيام انا الأيام دي قايم على نوع الغنا دا وبحفظ بس . في العربية اكرر ليك الأغنية طوال اليوم حتى تبرأ اولادي من ذوقي الفني.
نسوي شنو عاد يا قبة ياخي انا لو ما سمعت الطير المهاجر و رجعنالك ويناس انتو بكون مصدع طول اليوم.
تحياتي التي تعرف
Post: #5 Title: Re: يا ترهاقا ده شنو السويتو ؟ .. مرحبا يا شوق . Author: يحي قباني Date: 08-07-2018, 06:32 AM Parent: #3
Quote: يا قبة مالك علينا عاوز ترجعنا للسبعينات؟ وايام وردي وحفلات عبد اللطيف عبد الغني في عموديتي عطبرة والدامروابداعات صديقنا ساطور(ترهاقا) في تلك الأيام انا الأيام دي قايم على نوع الغنا دا وبحفظ بس . في العربية اكرر ليك الأغنية طوال اليوم حتى تبرأ اولادي من ذوقي الفني.نسوي شنو عاد يا قبة ياخي انا لو ما سمعت الطير المهاجر و رجعنالك ويناس انتو بكون مصدع طول اليوم.تحياتي التي تعرف
ود الشيخ يا صديقي ...
ياخ ده تسجيل مخيف .. الخوف الواحد ده ...و الله خايف اكتل لي زول ... ياخي 36 دقيقة مشحونة جمال و ابداع و مزيكا ...
رحم الله علي ميرغني و محمدية و عمر ميشيل ...
Post: #4 Title: Re: يا ترهاقا ده شنو السويتو ؟ .. مرحبا يا شوق . Author: Ahmed Yassin Date: 08-07-2018, 06:31 AM Parent: #1
قباني وترهاقا براي سويتا في نفسي وقلبي الحبا ما واعي هسي في داعي للعذاب دا يا قباني ويا احمد ساطور ؟
Post: #6 Title: Re: يا ترهاقا ده شنو السويتو ؟ .. مرحبا يا شوق . Author: يحي قباني Date: 08-07-2018, 06:35 AM Parent: #4
Quote: قباني وترهاقا براي سويتا في نفسي وقلبي الحبا ما واعي هسي في داعي للعذاب دا يا قباني ويا احمد ساطور ؟
فراش بكا يا احمد يا صديقي ...
تسمع و تبكي بس ...
هو زاتو ود رفاعة الاسمو الجيلي عبد المنعم عباس ده زول ما نصيح ...
دي ما حفلة و بس ...كانما كان العازفين يحتفون بوردي في يوم ميلاده ...
Post: #7 Title: Re: يا ترهاقا ده شنو السويتو ؟ .. مرحبا يا شوق . Author: محمد أبوالعزائم أبوالريش Date: 08-07-2018, 07:43 AM Parent: #1
شكراً يحي، أول مرة أسمع التسجيل. ملاحظتي إنو وردي - على غير عادته - لم يغير شئ يذكر في الأداء من التسجيل الأول (ملاحظة إيجابية بالنسبة لي).
الشئ التاني، لاحظت إنك قلت غنى في نفس الحفل (وطنّا) ... كنت أظنه غناها بعد الإنتفاضة ... أو يكون الكبر دخل.
Post: #8 Title: Re: يا ترهاقا ده شنو السويتو ؟ .. مرحبا يا شوق . Author: محمد أبوالعزائم أبوالريش Date: 08-07-2018, 07:46 AM Parent: #7
Quote: ترهاقا ( بدون سب دين ) ...
بدون سب دين يا كبير؟ أخدت ساتر من الطوب؟
Post: #9 Title: Re: يا ترهاقا ده شنو السويتو ؟ .. مرحبا يا شوق . Author: Zakaria Fadel Date: 08-07-2018, 07:53 AM Parent: #7
الكبر دخل يا ابو الريش....
وطنا تم تقديمها لاول مرة في حفل رأس السنة (ديسمبر 1981 ) ..وجاء وردي للحفل ملتفحا علم السودان عندما قدَم الاغنية .... يومها كان جهاز الامن يسبب مضايقة كبيرة لوردي......ززز تحياتي قباني ومن عبرك التحايا لاخونا الجميل لؤي شمت
Post: #10 Title: Re: يا ترهاقا ده شنو السويتو ؟ .. مرحبا يا شوق . Author: يحي قباني Date: 08-07-2018, 02:48 PM Parent: #9
Quote: شكراً يحي، أول مرة أسمع التسجيل. ملاحظتي إنو وردي - على غير عادته - لم يغير شئ يذكر في الأداء من التسجيل الأول (ملاحظة إيجابية بالنسبة لي).
الشئ التاني، لاحظت إنك قلت غنى في نفس الحفل (وطنّا) ... كنت أظنه غناها بعد الإنتفاضة ... أو يكون الكبر دخل.
ابو الريش يا دفعة ...
جميل يا صديقي اننا بعد كل ما سمعناه عبر السنين ... و كل العمر الذي عشناه .. :) ياتينا تسجيل ( جديد ) لم نسمعه من قبل ...