Post: #2
Title: Re: بهدوء التشهير والتشفى
Author: عبدالحفيظ ابوسن
Date: 07-27-2018, 11:34 AM
Parent: #1
غض النظر عن حقيقة الحديث او كذبه
|
Post: #3
Title: Re: بهدوء التشهير والتشفى
Author: معاوية الزبير
Date: 07-27-2018, 03:21 PM
Parent: #2
هناك -يا صديقي- حالة سيولة في المجتمع السوداني
هل تذكر مشروع "إعادة بناء الإنسان السوداني"؟
طيب، نجح أصحاب المشروع الحضاري في هدم البناء القديم
ثم صعُبَ الأمر عليهم فتركوه
|
Post: #4
Title: Re: بهدوء التشهير والتشفى
Author: عبدالحفيظ ابوسن
Date: 07-27-2018, 03:30 PM
Parent: #3
صدقت يا صديقي
بعد ان تركوا عاليه سافله
كوموهو وخلوهو
احكي ليك
|
Post: #5
Title: Re: بهدوء التشهير والتشفى
Author: عبدالحفيظ ابوسن
Date: 07-27-2018, 03:36 PM
Parent: #4
قبل كم سنة في كوستي
ظهرت صفحة فيس لبنت معروفة من كوستي
وباسمها كاملا وصورتها
ثم عجت الصفحة بالفحش والدعوة لممارسة الاسمو شنو داك هو
وطلبات الصداقة تطاقش
والتعليقات ما تديك الدرب
والمنشورات كما تقول امهاتنا تسدد منهن اضنينك
والناس تعجبك
دة يكلم دة ويوزعو في رابط الصفحة
ومرقت من الفيس وبقت ونسة بين الناس
فلانة بت فلان
اخت فلان
بت عم .. بت خال .. جدها ياخ كان
جارهم
خرجت من الواقع الافتراضي للواقع الحقيقي كأسوأ ما يكون
|
Post: #6
Title: Re: بهدوء التشهير والتشفى
Author: عبدالحفيظ ابوسن
Date: 07-27-2018, 03:41 PM
Parent: #5
الخبر انتشر واتوزع في كوستي
علي بال ما البت تقفل الصفحة الاصلا هي ما عملتها مرت اسابيع
وفتحو بلاغ
تخيل الفاعل زميلها !!
حزازات في الشغل
عاين وصلت وين
البت بريئة ومشت بسمعتها الركبان
|
Post: #7
Title: Re: بهدوء التشهير والتشفى
Author: عبدالحفيظ ابوسن
Date: 07-27-2018, 03:54 PM
Parent: #6
امكن كان واضح لأي زول انو الصفحة ما حقتها
صعب انو بت تخت صورتها الحقيقية واسمها وتفتح صفحة زي دى
لكن برضو أكيد سببت ضرر نفسي ليها ولاسرتها واهلها
|
Post: #8
Title: Re: بهدوء التشهير والتشفى
Author: محمد محمد قاضي
Date: 07-27-2018, 04:29 PM
Parent: #1
سلام عبد الحفيظ صديق صديقي معاوية
موضوع بنت كوستي دا هكر عديل والبنت أصلا بنت ناس معروفة زي ما قلت
ودا تشهير آثاره مقدور عليها والعارف عزو مستريح كما آية رئيس المريخ داك
لكن وحدة جات بي إسمها الحقيقي وبي جواز سفرها وعلم أهلها وعلم الحكومة
وهي ما خايفة علي سمعتها ولا علي سمعة أهلها ولا علي سمعة السودان ولا شغال
بيكم الشغلة فأنا كسوداني في دبي مثلاُ ليه أكون حريص علي سمعتها؟ ومن ياتو زاوية ؟
منشور ود البشرى أنا ما شايف فيه أي خطأ في نشر الأسماء والأماكن والعنوانين لو كانت
حقيقية ولو في أرقام تلفونات كان يكون كويس.
|
Post: #9
Title: Re: بهدوء التشهير والتشفى
Author: عبدالحفيظ ابوسن
Date: 07-27-2018, 05:19 PM
Parent: #8
صاحب صاحبك صاحبك
هلا قاضي
لو قلت ليك اصلا مفكر فيهو قبل بوست ودو بتصدق اني راجي القطر 😆
وهو مواصلة لبوست مات استلاف ادوات السلطة ..
وتوقعت مثل هذا الربط والربط منطقي للتزامن
بخصوص بوست ودو
امكن المعلومات الفيهو لو شلنا الاسماء معروفة لمعظم الناس
واهم معلومة فيهو كانت مرمزة حكاية مساعد رئيس الجمهورية . والترميز مختوت بشكل مبتذل جدا وساذج ومستفز للعقل
يعني الكاتب دة ضد النظام ومناضل بدليل ذكرة لاهل السلطة والحقيقة هو ذكرهم ولم يذكرهم 😆 والامر إلهاء 😆 وحاول يبعد الشبهة بس
بالنسبة للبت المشت دبي . سي انها عاهرة وممثلة برونو عديل كدة .تظل هي مسؤولة عن سلوكها ومآلاته . وهي حرة غصبا عني وعنك وعننا تعمل الدايراهو . وتخضع للقانون بتحمل مسؤوليتها
صحي هي بالنسبة لينا مدانة
لكن نشر خبرها لا يمسها وحدها
هنا الفرق
|
Post: #10
Title: Re: بهدوء التشهير والتشفى
Author: ABUHUSSEIN
Date: 07-27-2018, 05:23 PM
Parent: #8
سلام
الاعلام زرع حب الفضائح و البحث عنها في الشعب السوداني
الكل اصبح يستهويه قراءة الفضائح أيا كانت ....
في المنبر لو وضعت كلمة (فضيحة) في العنوان حا تجد عدد مشاهدات عالية جدا ...
فضائح الجنس و توابعه تجذب الكثير من القراء ...
حتى انها اصبحت سلاح في اغلب صراعاتنا ...
على قول اخونا محمد المرتضى نحن شعب مستهدف ....
تحياتي
|
Post: #11
Title: Re: بهدوء التشهير والتشفى
Author: عبدالحفيظ ابوسن
Date: 07-27-2018, 05:36 PM
Parent: #10
شوف يا ابوحسين حسب ما اذكر الاتجاه الاسلامي سفر كم نفر من ناسو يدرسو اعلام في امريكا
والكلام دة قبل يستلمو السلطة
الاعلام الامريكي في مخيلتي بعتمد علي الكذبة وتكرارها والتنويع عليها وترسيخها حتي لتغدو كأنها الحقيقة ! والانتباه للرأي العام بتشكيله وبث ما يريده بشكل مقصود ولي اهداف محددة . مش الاعلام للتوعية واجلاء الحقيقة
دة كان نتيجتو الحاصل هسة !!
السيطرة علي الرأي العام وتوجيهه لمصلحة بقاء السلطة وشغل المعارضة
اها يفترض الناس الواعين وطنيا وثوريا ما ينساقو لي دة . يكون واعين جدا
ويفهمو اصل الصراع واحد
والطريق الثوري للخلاص
الملاحظ انو بعض الناس النضال عندهم ياهو اساءة السلطة بالنعوت وتناول فضايحهم المادايرة نشر والمرات بتتعارض مع فهم اصيل للحرية والمبدئية
|
Post: #12
Title: Re: بهدوء التشهير والتشفى
Author: Nasser Amin
Date: 07-27-2018, 09:56 PM
Parent: #11
اب سن سلام
طبعا اتا عارف اكتر صحيفة توزيعا هي الدار و هي مقياس
لمدي اهتمام الناس للثالوث((الجريمة،الجنس و الجن(الدجل))
للاسف اصبحنا شعب يبحث و يتشفى بفضائح الاخرين.
بالنسبة لموضوع الاخ ود البشرى هو عايز يوضح انو النضال
من اجل الوطن و المواطن ليس بالتشهير و هتك الاعراض.
و حسنا" فعل انه استبدل الاسماء و العناوين بي X and Y
النضال لن يكون بالتشهير و تتبع عورات الناس والاساليب الرخيصة
|
Post: #13
Title: Re: بهدوء التشهير والتشفى
Author: Nasser Amin
Date: 07-27-2018, 10:33 PM
Parent: #11
مكرر
|
Post: #14
Title: Re: بهدوء التشهير والتشفى
Author: عبدالحفيظ ابوسن
Date: 07-28-2018, 05:25 AM
Parent: #13
تحياتي ناصر
وهل ثبت ان هذا الموضوع كاتبه مناضل ؟!
لكن ممكن اقول بعض المناضلين شايلنو وناقزين بيهو
ودة لتفشي ثقافة التشفي والتشهير بالناس
ودى الكارثة ، لأنو يفترض من يقف ضد هذه السلطة يكون واعي جدا انو ضدها ليها
اقتصاديا وثقافيا وسلوكيا
ثم لا ينحدر
|
Post: #15
Title: Re: بهدوء التشهير والتشفى
Author: عبدالحفيظ ابوسن
Date: 07-28-2018, 08:07 AM
Parent: #14
اعرف قصة واعرف ابطالها
حدثت في دولة خليجية
المصدر الوحيد للحكاية كاتبها ! يتهم اسرة بخداعه وسرقة ماله وهو مبلغ ليس ضخما جدا
وآثر ان ينشر كل ذلك في الفضاء الواسع مشهرا بهم في الاسافير .
وبل في اغلب قروبات مدينتهم
والواحد بسأل بالجد هل الهدف استعادة المال ؟ وهو ليس مبلغا ضخما جدا . يمكن تدبره لو سعي صاحب المطالبة لمعارف الاسرة المطلوبة
لكن يبدو لي الهدف الاساسي هو التشهير والتشفي والغيظ
فتجاوز التشهير الاسرة الصغيرة للاسرة الاوسع
وتذكرت قول ابن خلدون
المغلوب مولع بمحاكاة الغالب !!
|
Post: #16
Title: Re: بهدوء التشهير والتشفى
Author: عبدالحفيظ ابوسن
Date: 08-28-2018, 06:09 AM
Parent: #15
حصل لينا شنو نحن
سأعود
|
Post: #17
Title: Re: بهدوء التشهير والتشفى
Author: محمد حمزة الحسين
Date: 08-28-2018, 11:35 AM
Parent: #16
الأجندهـ يا شيخ العرب ...
الأجندهـ إنها هي الأجندهـ وليس غيرها...
وبما إن للنظام أجندهـ وامكانيات أعلي فدائماً ما تجد الغلبه تميل ضد كفة اجندة النضال...
وتيبقي النظام ممداً أرجله الي حين ...
إتخيل من تحدث عن فعلتها مثمن او مبخس نسيا او تناسي اعتذارها رغم إنهم جميعاً
يتفقون علي إعلاء قيمة الإعتذار ...
:
:
:
:
:
مع التحيات لله الزاكيات
|
Post: #18
Title: Re: بهدوء التشهير والتشفى
Author: علي عبدالوهاب عثمان
Date: 08-28-2018, 12:22 PM
Parent: #17
حبيبنا ابوسن .. موضوع مثير لللاهتمام ..نشر الفضائح والاخبار المثيرة .. غالباً ما يكون اسلوب هؤلاء الذين ليس لديهم مقدرة أو موهبة الكتابة في مواضيع مختلفةولذلك يكون توجههم نحو أسرع الطرق لجذب القراء عن طريق ( الاثارة ) والانسان بطبعه يميل لمعرفة الاشياء المثيرة ولو مر بها مروراً عفوياً وإذا صحت العبارة هو ما يطلق عليه اليوم مصطلح (( التمصــــدر ))والمقصود به هو الرغبة في أن يكون الشخص هو المصدر الرئيسي بدون منافس
و (( التمصدر )) هو مرض شائع في هذا العصر بعد إنتشار التواصل كما أن التمصدر من أسهل الطرق للشهرة والظهور
لأنه لا يحتاج إلى مؤهلات ، فقط نوع من عدم الحياء .. ثم يشار إليه بالبنان .. وتجده يمشي الخيلاء بين الناس في المناسبات
ومقابل ذلك كم يجلس الاديب والشاعر والمفكر والكاتب ... إلخ ليعرفه الناس
اللهم الشفاء لكل من أصابه مرض (( التمصدر ))
تحياتي الحبيب أبوسن .. ربما خرجب بالموضوع إلى مسار آخر
|
Post: #19
Title: Re: بهدوء التشهير والتشفى
Author: محمد حمزة الحسين
Date: 08-28-2018, 01:59 PM
Parent: #17
جيت راجع الاستدرك واقول لك ...
الميديا وسهوله تناولها والتعامل بها صار ثمة وقد يضغط ذر صغير لصديق عزيز لإطلاعه
علي ما يدور ولا يدرك حينها كم هو اخطأ بخروج الامر من بين يديه ...
صديق عزيز االيوم اطلعني علي فديو مصور علي الوات ساب لرجل تربص بزوجته
وهو يعلم خطأها حتي ضبطهم وصورهم لحدي هني الأمر محتمل الغير محتمل نشرهـ للفديو
وهو يقول انا عارف لكن جيت بالتي هي احسن عشان اقبضك بالثابته ...
يا راجل اختشي مرتك وعرضك خليها تمشي بيت ابوها ولا حد محتاج منك تشهير وتشفي ...
:
:
:
:
ما اقادر ازجيك التحايا فتقبلها يا شيخ العرب
الأمر جد محزن ومحبط ....
|
Post: #20
Title: Re: بهدوء التشهير والتشفى
Author: محمد البشرى الخضر
Date: 08-28-2018, 02:43 PM
Parent: #19
يا ود الحسين ما تحبط ساي فا للفيديو بقية
|
Post: #21
Title: Re: بهدوء التشهير والتشفى
Author: سفيان بشير نابرى
Date: 08-28-2018, 03:15 PM
Parent: #20
Quote: الاعلام زرع حب الفضائح و البحث عنها في الشعب السوداني
الكل اصبح يستهويه قراءة الفضائح أيا كانت ....
في المنبر لو وضعت كلمة (فضيحة) في العنوان حا تجد عدد مشاهدات عالية جدا ...
فضائح الجنس و توابعه تجذب الكثير من القراء ...
حتى انها اصبحت سلاح في اغلب صراعاتنا ... |
بتفق مع ابو الحسين في كلامه دا بس بزيد انو إعلام السلطة و من قبل إعلام الكيزان و ممكن الناس تراجع جريدة (الراية) بتاعة الكيزان و تاريخها و بعد داك تعالوا ماشين على عصرنا الحالي و ليس للحصر ممكن نقول آخر ساعة و المشاهير و اللوان في كثير من اصداراتها و الوفاق في كثير من اصداراتها و الدار و ممكن نسمي كثير من العمدان الصحفية.
تحياتي ابو سن و الجميع هنا.
|
Post: #22
Title: Re: بهدوء التشهير والتشفى
Author: محمد حمزة الحسين
Date: 08-29-2018, 10:02 AM
Parent: #21
| Quote: يا ود الحسين ما تحبط ساي فا للفيديو بقية |
فعلاً عندما كتبت المشاركة كان الفديو الثاني لم يتنزل ولم أعتقد إن له صلة بسابقة ...
يا ود البشري فالأمر كما جاء في الخيط تشهير وتشفي وتشهير وابتزاز ...
لا حولة ولا قوة إلا بالله العليّ العظيم..
الأمر جد محزن حد الإحباط الناس فقه السترهـ ما سمعوبيهو يا ود البشري 
:
:
:
:
:
قول يا لطيف
|
|