رجاء خاص من الاخوان شرح مدلول ( عكشوه ) (ود ام زقده )

12:26 PM July, 19 2018

سودانيز اون لاين
علي عبدالوهاب عثمان-جدة
مكتبتى
رابط مختصر

رغم ما بلغ بنا العمر ولكن بعض المصطلحات العامية نجدها صعبة الفهم بالنسبة لنا
( ناس ضواحي الدنيا ) وبما أنني أعتبر نفسي من عشاق التراث السوداني فلدي الرغبة
في معرفة أصول ومدلولات مثل هذه العبارات . لذا أجد نفسي في حالة أندهاش من بوستات
أديبنا كبر والرائع بريمة

فهمت ما قصده ودالباوقة من العبارة أن المجرم تم القبض عليه ..

ولكن سؤالي :
من هي أم زقدة ولماذا هي ؟
عكشوه ؟
لدينا في النوبية ( الهكش حلي يعلق في الاذن والصغير منه قمربوبا .. والاخوة العرب ينطقوه عكش)
إذا كان التعكيش الذي يقصده ودالباوقة هو مأخوذ من عكش .. فالعكش حلي رقيق
يعلق في الاذن والمعروف أن الاذن حساسة جداً .. ولا أظن الشرطة سوف تتعامل
مع المجرم بتعكيش بل بقوة وسطوة ..

أعرف أن العامية السودانية فيها إثراء وكلمة واحدة ممكن تعبر عن صفحات ..

التحية للاخوة الاحباب ..

الحبيب على عبدالوهاب عثمان لك التحية
عكش يعكش كلمة عربية فصحى

عكش فلانا امسكه

شكراً حبيبنا حسن
كش ملك حتى في الشطرنج

الكشه .. معروفة هي مداهمة الشرطة

دوالباوقة قال ( عكشوه )

شكراً الحبيب حسن .. تحياتي ..

Quote: فهمت ما قصده ودالباوقة من العبارة أن المجرم تم القبض عليه ..

كتير من الكلام المتداول ما حتلقى ليهو معنى واضح (مصدر) .... عشان كده ريح نفسك وما توصلت ليهو من سياق الكلام هو المطلوب.

أضف لذلك، هناك لغة متجددة لا تخضع لقوانين، شخصياً البلحقو بلحقو ... الما بلحقو ما بلتفت ليهو.

ثم إنو ود الباوقة بينجر من راسو المافي ده

حبيبنا علي عبدالوهاب سرن آقمي إر سى .. والله إكي مشكرو
ود ام زقدة
دي فيها ثلاثة اشخاص : الولد وامه واخته (زقده) يعني عبارة ثلاثية المفعول
وهي ناقصة اصلا لانه التعبير فيها بكون مع نظرة (تشفى) وشماتة لان المهزوم مستسلم لانه كان
قبل (الوقعة) المهببة دي كان يعتبر من اهل القوة والشكيمة والشدة والبأس الشديد .. لكنه في الاخر وعند اول امتحان
او موقف سقط ارضا، ومفروض بعد النظرة حقت التشفي والشماتة دي وبعد ما الشخص الشامت يقول العبارة دي
مفروض يتم الناقصة بـ (ما قلتو نوبة)

حبيبنا أحمد يسن .. أيقون إكي جليري .. وو أمبس ..

ما شاء الله عمق في النوبية وفي العامية السودانية .. ( هكذا تكون نموذج )

يا سلام يا أحمد يسن .. هذا هو الاثراء .. أن يكون الشخص ملم باللغات وخاصة العامية وشعرها ومفرداتها
تعرف الانسان عندما يكون إتجاه واحد تكون أدوات الابداع لديه محدودة ..
في الالحان والكلمات اذا تعددت الثقافات والمعايشة مع التنوع تجد الشخص مبدع حقيقي لأن مجال الاختيار لديه يكون واسع ولامحدود
شوف وردي جمع الالحان النوبية .. ( يا ملاك الله لليل يا يالليل ) ولحن ( يا مرمي تحت الشمس للقيله ضليه )
وإنت من أهل الفن والابداع ..
وأهلنا الشوايقه وتنغيم الكلمات النوبية ..

وكنت دائماً أتابع الكابلي زمان في الاذاعة وكمان في التلفزيون عندما يشرح أغاني الحماسة والاغاني الشعبية
أمد الله في أيامه هذا المبدع العظيم .. وكمان الطيب محمد الطيب ( الله يرحمه )

تحياتي أحمد أمبس ..

كتير من الكلام المتداول ما حتلقى ليهو معنى واضح (مصدر) .... عشان كده ريح نفسك وما توصلت ليهو من سياق الكلام هو المطلوب.

أضف لذلك، هناك لغة متجددة لا تخضع لقوانين، شخصياً البلحقو بلحقو ... الما بلحقو ما بلتفت ليهو.

ثم إنو ود الباوقة بينجر من راسو المافي ده

============

تحياتي الحبيب أبوالعزائم .. مودتي لك
أنا لم أنشغل بالموضوع وبعده السياسي أو غيره .. وهضربة ود الباوقة هههههه
فقط توقفت عند لفظ ( عكشوه .. وام زقده)
صدقني الحبيب أبوالعزائم أنا عاشق للتراث حتى الثماله
حليل زمان كان شرح لشعر البطانة في الاذاعة والتلفزيون
أمد الله في عمر الكابلي .. وأتمنى أن يرجع للتوثيق والاثراء

شكراً كثير الحبيب أبوالعزائم .. رغم سنين العمر لكن مازلنا نصبو إلى التعلم

الاخ علي عبدالوهاب
ايها الحبيب الذي يصلى على الحبيب
قرأت في زمان مضى في هذا المنبر طرح عن
ود ام زقدة
واليك الرابط
ود أم زقدةود أم زقدة

حبينا الكنزي .. مودتي
بوست الصلاة جعل الله في ميزان حسناتك
يومياً أول بوست أبدأ به
===================
في الرابط وجدت مداخلة للحبيب ودالشيخ كالتالي :


والله يا جماعة الكلمة دي شغلت بالي لمن سكيتا
سك شديد ولقيت انحنا بننطقها غلط وبنقول زقده
ولكن الصاح ود ام زقتَ ودي عاميه سودانيه جمعها
زقاقيت وهي تعني السمين او الضخم وقالو فوق الساقية
تيرانا زقاقيت والعهد على الراوي دكتور عون الشريف
ودي زي ود الجخس أو يا جخس يعني سمين وما ومنو فايدة
والله اعلم

ود الشيخ

شكراً الكنزي الحبيب .. مع التحية ..

واظن اني قرأت قصيدة في هذا المنبر
او جاءتني عن طريق الواتساب
قصيدة بعنوان


ود ام زقدة

شكراً حبيبنا الكنزي على المتابعة والاثراء

الاخ على عبد الوهاب
عكشوه ايضا مستخدمة فى العامية المصرية كما فى أغنية
كرشنجى ضبح كبشه
يا محلا مرقة لحم كبشه
(عكشو) فركش
نكشو طنش
قلشو آقلش

حبيبنا سيف اليزل .. تحياتي ..
هكذا أضفت عمق آخر للكلمة ..
(عكشو ) فركش ..
أفتكر يا الحبيب سيف هنا الكلمة وضدها
بمعنى عكش الضد هو فركش
وبما أن فركش يعني ( فرتق) يعني عكش ( الربط والتماسك )

شكراً سيف على هذه السياحة والاجتهاد الذي أدخلتنا فيه
إخوانا المصريين عندهم شنشة رائعة

تحياتي الحبيب علي

غايتو "عكش" دي بنعرفها وهي لغة عربية فصحى ومعناها "أمسك"

ود ام زقدة دي بنعرفها سياقاً