خواطر أمدرمانيةّ ّ من حي العرب !

07:40 AM July, 15 2018

سودانيز اون لاين
زهير عثمان حمد-السودان الخرطوم
مكتبتى
رابط مختصر

( جارتنا سودانية امدرمانية بت قلبا عديل كده، لكن قلبا مكسور،
حكت القصة التالية: راجلي في امريكا شغال في السفارة العربية اصحابو العرب وزوجاتهم بزورونا في البيت، الحريم مصاحبني صحبة شديدة، لو ماشين المول ما بطلعو بدوني، نحوم "دي سي" بكراع كلب، ناكل سوا ونشيش سوا، محبة كده ما بتحصل الا بين الاخوات.. ياخ انا بقيت اسمع محمد عبده عادي،
وهن يقلبن في انصاف مدني اها اجازة الصيف الماضي ونحنا قايمين علي امدرمان، حلفن قالن الا اغشي معاهن في السكة الدوحة، يا جماعة اعفوني، حلفو وخسمو وجزمو، تمشي معانا لاهلنا نكرمك، زوجي قالي انتي متاكده؟ طيب بالسلامة الاقيك في حي العرب. ركبت الطيارة الدرجة الهايلوكس، شي ضحك وقزقزة وقرقراب، ابو النفط زاتو، نحنا الحبيبة الجاتنا نهبوها الصحابة ديل٠ وصلنا الدوحة الدولي، وساقونا علي الليموزينات طمنطاشر عجل، اركبو اركبو..
ركبت وانا منتشية، السواق طوالي طلع، عاينت لقيت روحي راكبة مع وجوه غريبة، من جنسيات متعددة، قلت بطيبة قلبي للسواق، يا معلم وين ناس رنا وسنا وموزة صاحباتي؟ قالي وهو بعاين قدام... سمو اميرات في ليموزين تاني .. هذا خدم وهشم ليموزين.... يا فليبو هوي هشم شنو انت مافاهم الرصة.. ناس موزة ديل مع بت قلبا اخوات عديل.. وطوالي بالموبايل، ادق وادق، مافي رد، تيكستات... يا بنات انا ركبت في العربية الغلط لوووووول تصدقو..
ولا حياة لمن تتكس....
العربية كاسحة وانا بديت احس باليأس واقول الله يكضب الشينة، ساعة ووصلنا قصور فخيمة، وهناك من بعيد شفت ليموزين صاحباتي، قلت اول ما نوقف انط من العربية الشوم دي والتحق بركب الشيخات صاحباتي من واشنطن، فجاة الركب انقسم، عربيتنا مشت علي بوابة علي الجهة اليمين، وعربية الشيخات انحرفت يسار، والخدم والهشم المعاي مستغربين بعاينو لي نظام الحشمية دي مالا بتتنطط؟ اخيرا الليمو ربطت.. وانا الفيني مرقت، متملكني شعور اني مختطفة، فجأة تلفوني رن... الو معاك موزة يا جانكوفة.. اصابني الانشراح والفرح والانفلاق الحقوني لوووول ياموزة لوووول ركبت في عربية الحشم بالغلط.. الناس ديل ماعارفين......
قاطعتني لا لا لا مافي غلط.. خليك معاهم .. بعدين احنا بنجي لعندك ناخدك للفسحة.. ما نقدر ندخلك معانا من الباب الكبير، عندنا اهلنا شيوخ كبار في السن ما يقبلون افارقة يجون من باب القصر الرئيسي... تدرين العقلية ال.... انا في اللحظة دي اتكشح فيني قلاب رملة مسخنة... فقعتها بكية وكواريك وسكلي... وعازمني من الاول ليه يا جاهليين يا جرب، انا بت قلبا ....
يضربن في التلفونات وانا حلفت ما ارد وحلفت ما ادخل جناح الخدم والحشم، وقفت في الصقيعة.. وبباقي شحنة الموبايل رسلت زي مية رسالة وتسب، لعموم اهل السودان في الدوحة... ربع ساعة كان في زي مية سيارة فارهة وعمم وتياب، حملة انقاذ زي بتاعة فريق الكورة الفلبيني، الهشم زاتم قربو يركبو معانا..
في الطريق لبيت بت عمتي، قلت للولد السواق الحليو ، بالله غير محمد عبده ده ادينا ام در يا حنينة وبطول حسي اب كدووووك وود نوباوي والمهدي الامام .....
وبعت تيكست مستعجل للاميرات؛ تاني في واشنطن تعالو قولي نمشي مول ولا زفت طين...
انا زاتي عندي شيوخ كبار ما بحبو الانطلاقة دي،
و ح نغير اسم حي العرب ده زاتو.

زهير سلامات

قريت الكلام في بوست تاني ..
وده نوعية من الكتابات ستلقى رواج كبير بين الناس ...
الا انو للاسف الصحيح حكاية خيالية جدا ومفبركة ومفصلة خصيصا لموضوع مقتل الرياضي السوداني في دولة قطر ..

سيتلقفها عدد كبير من الناس
ستمر على بعضهم .. وسيعلم بعضهم المحتوى المفبرك حال قراءته .. الا ان هذا لن يمنعهم من الاستمرار في تداولها .. وربما سمحوا لانفسهم ان يبنوا عليها الاحكام طالما ان غالبية الناس لن تتحرى مصداقية القصة ..

مودتي وتقديري

سلامات يا زهير ومحمد المشرف

والله يا المشرف أنا برضو قريت القصة في بوست آخر، والحقيقة قلبي أكلني أنها كتابة خيالية ساكت، والآن كتابتك زادت الشعور دا. ربما تكون بعض الممارسات أسوأ مما في الحكاية ولكن حتما سيكون الاستثناء وليس القاعدة.


ياسر

اكيد خيالية لانه تم حذف الفقرات الأولى وهي
جارتنا يا تاجو، سودانية امدرمانية بت قلبا عديل كده، لكن قلبا مكسور، مالك في شنو؟ قالت لي ياعزو اسكت بس مصراني ده مهرود، قلنا الشمار فرطقنا " في سري اتمنيت يكون عبودي اتقبض في الفيس عشان نطعم خشمنا" فحكت بغير ما تمنيت:

فهي اما من قصص زميلنا تاج السر الملك أو أريد لها أن تكون مثل قصصه فمن بصماته عزو وبني كجة وغيرها

تحياتي يا ياسر ..

حقيقة هناك معلومات كثيرة مغلوطة .. وهناك شهية مفتوحة لتلقف هذه التلفيقات ...