Post: #2
Title: Re: هل الطبخ انثوي
Author: Abdullah Idrees
Date: 07-06-2018, 05:13 PM
Parent: #1
غايتو التفوق في الطبخ يخص الرجال
الباقي ما بعرفو
|
Post: #3
Title: Re: هل الطبخ انثوي
Author: نعمات عماد
Date: 07-06-2018, 05:17 PM
Parent: #2
| Quote: غايتو التفوق في الطبخ يخص الرجال |
أكيد لجنة التحكيم كلها رجال ☺
|
Post: #4
Title: Re: هل الطبخ انثوي
Author: تماضر الطاهر
Date: 07-06-2018, 05:29 PM
Parent: #3
ياتو طبخ تقصد؟؟
،
حدد علشان افهم
،
العزيز ابو سن وضيوفو سلام وتحايا
نعمات يا غالية..مشتاقين
|
Post: #5
Title: Re: هل الطبخ انثوي
Author: جلالدونا
Date: 07-06-2018, 05:33 PM
Parent: #4
البوست ده منبثق ولّ شرك
فى الحالتين اعتذر عن اجابة السؤال
|
Post: #6
Title: Re: هل الطبخ انثوي
Author: نعمات عماد
Date: 07-06-2018, 05:40 PM
Parent: #5
سلامات تماضر يا حبيبة
و الله مشتاقين.
سلام ابسن و ضيوفك الكرام.
|
Post: #7
Title: Re: هل الطبخ انثوي
Author: عبدالحفيظ ابوسن
Date: 07-06-2018, 05:45 PM
Parent: #6
صحي يا عبدالله ادريس
مش غريبة !؟
التباخة يتفوق فيها الرجال علي النساء
|
Post: #9
Title: Re: هل الطبخ انثوي
Author: عبدالحفيظ ابوسن
Date: 07-06-2018, 05:48 PM
Parent: #7
يا نعومة امشي اي مناسبة واسألي تلقي الطباخ راجل
المطاعم رجال
مناسبات اهلنا لامن نخلي التباخة للنسوان بكوجنن الحاجات ويبشتنن المواد
نديهم العواسة والعصيدة وملاح الروب والتقلية بس
|
Post: #8
Title: Re: هل الطبخ انثوي
Author: Salah Zubeir
Date: 07-06-2018, 05:46 PM
Parent: #5
يا حفيض إتا لي هسي بتتفرج في
تلفزيون السودان بس ...
كدي قوقل برنامج اسمو Top chief
في MBC-1 ...
بعدين الطبخ صار علم عديييل
أتخصص وبرع فيهو الرجال كما
النساء ...
الطبخ يا سنو ما قطيع بصل ولا
وريق خدره بس ... ههههه
|
Post: #10
Title: Re: هل الطبخ انثوي
Author: عبدالحفيظ ابوسن
Date: 07-06-2018, 05:53 PM
Parent: #8
قالوا يا تماضر
الضاق عضة الدبيب بخاف من مجر الحبل
ههه بقيتو تلاوزو
ما تلاوزي يا صاحبة
ياها التباخة الواحدة دي
سوات الملاح والكسرة
|
Post: #11
Title: Re: هل الطبخ انثوي
Author: عبدالحفيظ ابوسن
Date: 07-06-2018, 05:57 PM
Parent: #10
يا جلال مافي شرك
امكن في فهم ذكوري سوداني عن ان من يجيد الطبخ به انوثة
ويذهبون ابعد من ذلك فيعتبرونه شاذا
دة فهم يكاد يكون عام
دايرين نتوس في دة بس
|
Post: #12
Title: Re: هل الطبخ انثوي
Author: عبدالحفيظ ابوسن
Date: 07-06-2018, 06:00 PM
Parent: #11
دة اذا كنت بتفرج زاتو ياخ
يا صلاح امهاتنا بقولو
التبيخ نفس
في ناس يدهم طاعمة خلقة كدة
بتذكر فلم امريكي عن واحدة تباخة عضمو قايم علي حكمة امهاتنا دي حقت الروح والنفس
|
Post: #13
Title: Re: هل الطبخ انثوي
Author: عبدالحفيظ ابوسن
Date: 07-06-2018, 06:03 PM
Parent: #12
عندنا عمنا تكون بتاكل معاهو
تقول ليهو
الملاح دة سمح خلاس ..
يقول ليك
سمح الجاب حاجاتو ..
يعني جاب اللحمة السمحة والخدار والبهارات السمحة
كنت بختلف معاهو
نفس الحاجات دي بتختلف من مرة لي مرة
|
Post: #14
Title: Re: هل الطبخ انثوي
Author: تماضر الطاهر
Date: 07-06-2018, 06:13 PM
Parent: #10
اول حاجة خليني أقول بالأكتر لي نعمات
،
الطبخ فن..وإحساس وتذوق
الدراسة في مجاله مفيدة لكن في حاجات ما بتتحقق الا تكون بتحبه
وما اي زوع عمل اكل طباخ
عالم النكهات ده عالم مدهش
ومعرفة البهار المناسب او مجموعة البهارات المناسبة ضرورية
النسوان فيهم الفنانات بالفطرة ..نشأوا على ايدي امهات ماهرات ..مثلاً
وفي واحدات مدعيات ساي.
مع احترامي للرجال وفيهم المبدعين..لكن برضوا بحس في طبخهم في شي جاد او جاف.
،،
طباخين المناسبات في السودان من زمان عندهم المهارة ..ما عايزة اقول هي فئة معينة..بس تحسهم حنينين حبة...هههههه
|
Post: #15
Title: Re: هل الطبخ انثوي
Author: عبداللطيف حسن علي
Date: 07-06-2018, 06:17 PM
Parent: #14
،،
طباخين المناسبات في السودان من زمان عندهم المهارة ..ما عايزة اقول هي فئة معينة..بس تحسهم حنينين حبة...هههههه
|
Post: #23
Title: Re: هل الطبخ انثوي
Author: تماضر الطاهر
Date: 07-06-2018, 06:55 PM
Parent: #15
العزيز جداً عبد اللطيف
يسعد حياتك
|
Post: #16
Title: Re: هل الطبخ انثوي
Author: عبدالحفيظ ابوسن
Date: 07-06-2018, 06:19 PM
Parent: #14
هوي يا تماضر فقعي عديل شنو حنينين حبة
اي مش المقدار بس بل الوقت لاضافة البهار المحدد
الشم والشوف ..
|
Post: #17
Title: Re: هل الطبخ انثوي
Author: ABUHUSSEIN
Date: 07-06-2018, 06:22 PM
Parent: #14
Quote: سلامات تماضر يا حبيبة
و الله مشتاقين.
سلام ابسن و ضيوفك الكرام. |
قايلاني بنسى .....؟؟؟؟؟
طالبك إعتذار .... 😂😂😂😂😂
بخصوص موضوع البوست الطبيخ ذكوري
عمرنا دا كلو بنسمع بالطباخ فلان ....
يوم واحد ما سمعنا بالطباخة فلانة ....
سلام حفيظ و ضيوفه الاكارم ....
|
Post: #18
Title: Re: هل الطبخ انثوي
Author: سفيان بشير نابرى
Date: 07-06-2018, 06:28 PM
Parent: #17
اصلهم الرجال ايدهم طااااااعمة
|
Post: #20
Title: Re: هل الطبخ انثوي
Author: نعمات عماد
Date: 07-06-2018, 06:36 PM
Parent: #17
السلام عليكم ورحمة الله تعالى وبركاته يا ابوحسين
و انا بكتب، قلت ابوحسين ح يجي طاير... و حصل!
يعني يسهل التنبؤ بخطواتك! 😀
يا جماعة أسبقية و سيادة الطباخين في السودان،
اسبابها إجتماعية، زي ما قالوا العادات و التقاليد
و تأخر خروج المرأة للعمل.
أغلب من يعملون في مهن لها علاقة بالنساء، مثل
مصممين الأزياء، خبراء تصفيف الشعر و التجميل
و الطباخين و حتى بعض اخصائيي النساء و التوليد
يكونوا دائما ألطف و أكثر ذوقاً.
|
Post: #19
Title: Re: هل الطبخ انثوي
Author: جلالدونا
Date: 07-06-2018, 06:29 PM
Parent: #14
كان كده النقول ليك
اساس الطبخ المزاج
الشى التانى .. عملية الطبخ مربوطة بى تلاتة حاجات
الاولى تبدا من خارج المطبخ ... من سوق الخدار .. و الاختيار
يعنى ما ممكن تكون عاوز تطبخ ام رقيقة و تجيب لحمة فخده
وده عامل الخبرة هنا
الشى التانى التوضيب و تحديد المقادير وده بتحكّم فيهو المزاج و النفس
التالت عملية الانضاج ودى مسألة ترتيب وضع المقادير و مراقبة الزمن
بالمناسبة ...اختيار البصل بيفرق كتير فى الحتة دى
يعنى البصل الاصفر مهم فى حالة الطبخ المسلوق
و البصل الاحمر فى حال الطبخ البيحتاج لى تحمير البصلة
الفلفل
فى حالة الرز و البامية المفروكة و الشوربات ... لحم دجاج ..احسن يكون حب سالم
و فى حال القرع و الفاضولية الافضلية للمدروش
و فى بعضها الافضلية للمسحون زى الخدرة المفرومة و البامية الطبيخ
|
Post: #21
Title: Re: هل الطبخ انثوي
Author: تماضر الطاهر
Date: 07-06-2018, 06:42 PM
Parent: #19
يا سلااام يا جلالدونا
احييك
|
Post: #22
Title: Re: هل الطبخ انثوي
Author: نعمات عماد
Date: 07-06-2018, 06:48 PM
Parent: #19
عشرة على عشرة يا جلالدونا 🌸
لو سمحت أنقد (من نقد)طريقة امهاتنا و حبوباتنا في طبخ الخضار مع اللحمة
|
Post: #24
Title: Re: هل الطبخ انثوي
Author: فرح الطاهر ابو روضة
Date: 07-06-2018, 06:58 PM
Parent: #22
مرحب عبدالحفيظ وضيوفه
اولا المجتمع الذكوري فرض علي الانثي الطبيخ
بعد الحكاية اتطورت ودخل فيها البزنس والتخصص
وووو
بدا في مصادرة المهنة بنفس العقلية الذكورية
وبث وهم في عقلية المراءة بانه الطباخين اكثر
اجادة للطبيخ وضبط للكمية وتنظيم بالمناسبة
ودي كلها حجج واهية
لانه الانثي بطبعها انسانة مرهفه وعندها
درجة من الابداع والفن ورهافة الحث
ودي كلها مقومات لطباخ ماهر
لانه الطبيخ نفس وما بصلىة وصلصة وبهارات
|
Post: #25
Title: Re: هل الطبخ انثوي
Author: Frankly
Date: 07-06-2018, 07:01 PM
Parent: #22
الرجال بيتعاملوا مع الطبيخ شغل معادلات كيميائية وفيزيائية بس المواد خضروات ولحوم والمنتج بدل يتمسحوا بيه بياكلوه وأهم من الطعم هو المظهر والورقة الخضرا
النساء بيطبخوا الخضروات واللحوم وبيحقنوها حب وحنان وأكلهن طاعم جداً مع أن الواحدة بتكون بتتونس مع جارتها في التلفون ومتابعة التفزيون وشايلة شافعها في صفحتها وهي بتطبخ وبدل حلة عندها حلتين وتلاتة وطوة وعارفة متين تقلب دي وتسوط دي وتهدي ناري ديك.
عشان كدا حقوا نفرق بين الطبيخ كمهنة والطبيخ في الأسرة
|
Post: #26
Title: Re: هل الطبخ انثوي
Author: جلالدونا
Date: 07-06-2018, 09:48 PM
Parent: #25
حيّاك الله وبياك يا تماضر ولا عدمناك
___
البقول فيهو ده شغل الحبوبات و الامهات يا نعمات
شغل من زمن العطرون
و التسبيك
و المفراكا
هسى الخلاطات خربت شغل المفروك كلّو
حليل البامية ام عيون
|
Post: #27
Title: Re: هل الطبخ انثوي
Author: ABUHUSSEIN
Date: 07-06-2018, 10:17 PM
Parent: #26
Quote: السلام عليكم ورحمة الله تعالى وبركاته يا ابوحسين
و انا بكتب، قلت ابوحسين ح يجي طاير... و حصل!
يعني يسهل التنبؤ بخطواتك! 😀 |
البركة في ابوحسين الخلاك تمشي دغري ... 😂😂😂😂
******************
الطبيخ المنزلي انثوي بحكم انو واحد من مهام المرأة (غير العاملة)
لم اصبح مهنة تحتاجها المستشفيات و الفنادق و حتى البيوت و المناسبات و اصبح يدرس في الجامعات امتهنها الرجل و اشتهر بها ..
و تقريبا دراسته لا تستهوي كثير من النساء ......
لذلك بعد ان اصبح مهنة اصبح الغالبية رجال ....
يعني الموضوع ما انثوي او ذكوري ....
|
Post: #28
Title: Re: هل الطبخ انثوي
Author: Asim Ali
Date: 07-06-2018, 10:43 PM
Parent: #27
ابوسن وضيوفو سلام عليكم
اعتقد انو الطبيخ اتورطت فيهو المراه مع بقية المسئوليات المنزلية بحكم دورها كام وارتباطها بالبيت لكن الرجل لما يطبخ ممكن ما مجبور والقصة مزاج ومتعه.
لكن مع تطور الزمن وخروج المراه للدراسة والعمل أصبح الرجل شريك في تربيه الأطفال ومهام البيت بنسب تتفاوت حسب اتفاق الزوجين ووعى الرجل وسعه افقو في مقابل المتعارف عليه اجتماعيا.
.
الأخت نعمات بخصوص الازيء وتصفيف الشعر مره كنا فى نقاش عن القصه دى واتفقنا انو الرجل بتميز في الجانب دا لانو بنتمى للطرف الاخر(الرجال) واحساسو الفطرى بالجماليات عند النساء.
|
Post: #29
Title: Re: هل الطبخ انثوي
Author: امتثال عبدالله
Date: 07-07-2018, 00:29 AM
Parent: #28
هل تعلم يا ود ابو سن ان امهر طباخ في العالم هو رئيس الطباخين في قصر الاليزية وهو قصر الرئاسة في فرنسا
والطباخ رجل،، وكمان للعلم هذا الطباخ يتقاضى اعلى مرتب في العالم ، ومرتبه اعلى من مرتب الرئيس الفرنسي نفسه واعلى
من مرتب الرئيس الامريكي..
مع وافر التقدير والاحترام
|
Post: #30
Title: Re: هل الطبخ انثوي
Author: عبدالحفيظ ابوسن
Date: 07-07-2018, 04:27 AM
Parent: #29
ياعبداللطيف
تماضر بتتزاوغ ساي
حبابك ابوحسين
صحي كلامك ..
يعني شنو سفيان والنسوان يدهن مسيخة يعني؟
يا نعومة بتفق معاك الا في دكاترة النسوان .مشهورين بي فكة اللسان بس
|
Post: #31
Title: Re: هل الطبخ انثوي
Author: عبدالحفيظ ابوسن
Date: 07-07-2018, 04:37 AM
Parent: #30
صحي جلال
لكن المعروف انو الحاجات بجيبها رب الاسرة
لقيتك خبرة لكن يا جلال
من وين تعلمت الطبيخ؟
الرجل بقول اتعلمت عشان عشت عزابي فترة
غايتو يا تماضر ونعومة بعرف حاجة واحدة
العضام بتطعم الملاح
مرحب فرح
لكن هو وهم ؟ جربنا كتير نستغني عن الطباخ واوكلنا المهمة للنساء . مابقول ليك الاكل طلع شين لكن بشتنو المواد وبعزقوها وما تحكمو في الزمن والانضباط
معاك فرانكلي بهتمو بالمظهر . واديك سر عموما ما باكل في المناسبات اكلها ما بنفع معاي بحس بيهو مسيخ
يا جلال والسحانات
امهاتنا ما بحبن البهار المسحون بحبن المدقوق . حتي الويكة
والدتي رحمها الله البوتجاز قاعد ما هبشتو نهائي
اكل الغاز مسيخ
|
Post: #32
Title: Re: هل الطبخ انثوي
Author: عبدالحفيظ ابوسن
Date: 07-07-2018, 04:42 AM
Parent: #31
برضو راي ابوحسين
لكن الوضع تغير . في بيوت عديل بقت مطاعم دكاكينية . ولا امسك قندهار مثلا
مرحب عاصم وجهة نظر مقدرة ذكرتني فلم حضرت عن رجل يستطيع سماع افكار النساء ويسعي لارضائهن وينجح في ذلك واحدة قالت ليهو هل انت شاذ ؟
صحيح امتثال
الطباخ نجم كممثلي الافلام
|
Post: #33
Title: Re: هل الطبخ انثوي
Author: نعمات عماد
Date: 07-07-2018, 09:15 AM
Parent: #32
| Quote: الطبيخ المنزلي انثوي بحكم انو واحد من مهام المرأة (غير العاملة) |
السلام عليكم و رحمة الله و بركاته ابوحسين
انت مش هدوك من التعميم؟ ☺
حتى بالأمارة فتحت بوست إعتذار !
يا استاذ يوجد نساء كثيرات غير عاملات و لا يطبخن البتة!
يعني هل يعقل ان تسكن احداهن في فيلا، ثم تقضي سحابة يومها
في الطبخ لزوجها و ضيوفه و لعاملات النظافة و السواق و الغفراء.... الخ؟
|
Post: #34
Title: Re: هل الطبخ انثوي
Author: عبدالحفيظ ابوسن
Date: 07-07-2018, 09:18 AM
Parent: #33
هههه شنو يا نعومة ياخ
مارجريت تاتشر كانت بتطبخ لزوجها وهي رئيسة وزراء
عارف الفيمينزيم دي حا يجي زمن يكون في ميلينزيم
|
Post: #35
Title: Re: هل الطبخ انثوي
Author: عبدالحفيظ ابوسن
Date: 07-07-2018, 09:26 AM
Parent: #34
في كوستي في طباخ مشهور رحمه الله
كنا بنجيبو لي مناسباتنا . قالوا كان طباخ نميري وبعمل جدادة مكرفسة بدون عضم ! سألتو قال لي جيب ليك جدادة وبعملها ليك
المهم
ماكان بحب اي مرة تجي محل شغلو .. الطباخ بكون عندو محل منفصل وغالبا بكون بيت الجيران
كان نضيف جدا جدا . الوقت كلو ينفض ويمسح وبخور ام التيمان عابق في الجو
اكلو كان طاعم دون غيره
مرة عندنا مناسبة في البيت .. سلق الجدادة وبنضف فيها . بقا في زغب صغار ما بنشاف طلع ملقط الحواجب ونضف بيهو !
لاحظوا جداد بتاع مناسبة كمية كبيرة
الدقة والاهتمام بالتفاصيل كأنه امر تختص به النساء وحدهن
|
Post: #36
Title: Re: هل الطبخ انثوي
Author: نعمات عماد
Date: 07-07-2018, 09:46 AM
Parent: #34
| Quote: البقول فيهو ده شغل الحبوبات و الامهات يا نعمات |
جلالدونا، لكن ما وصفت و فصلت بطريقة عصرية التقول غوردون رامزي ☺
ما شاء الله.
،،،،،،،،،،
يا ابسن، تاتشر الحديدية لم تكن متزوجة أحد أثرياء الإقتصاد الطفيلي.
عن اطباء النساء و التوليد، انا قصدت اللطف و الذوق العاديات المعروفات
و ليس ما ذهبت اليه تماضر في مشاغبتها عن الطباخين.
الأخ عاصم علي كلامك وجيه و مقنع .
العزيزة إمتثال
لما تبقى رئيسة الإليزيه سيدة، عندها ستفوز طباخة بجائزة افضل
طباخ في العالم .
|
Post: #37
Title: Re: هل الطبخ انثوي
Author: Ahmed Yassin
Date: 07-07-2018, 10:21 AM
Parent: #36
طبعا الطبخ رجالي خاصة الطاعم منو
لانه الرجل بيدخل المطبخ بمزاج عالي .. والطبخ بقى يفتحو ليهو مدارس عالمية ودراسة جميع اطباق العالم
احيانا كتثرة هنا في فنادق عالمية بتعمل مثلا (American food) او (Mexican dishes)
او اطباق اوروبية واسيوية .. ويستمر المعرض تقريبا لمدة شهر
وكل الاعداد بالحجم الهائل دا تلقاهو من رجال
انا يخيل لي في البيت عشان بقى روتين للمرأة انها تطبخ يومي بتكون يدها (فكت)
من الملل وشغل المطبخ دا غالبية النسوان بكرهوهو وبحبذوا الجاهز
بعض اصاحبنا لمن كنا عذابة تلقى الواحد يعمل ليك (حلة) اصلا ما تشبع منها
ما زي حلة جمال سعيد في مسرحية تقريبا (في انتظار البترول) .. هرج في خشبة المسرح وبقولوا (لازم نشوف لينا حل)
والممثلين جيئة وذهاب وكل واحد يدو ورا ضهرو وعينو للارض بفتش عن حل الا ان صاح جمال حسن سعيد
بسسسسسسس .. لقيت الحل .. لقيت الحل ..كلهم هرعوا نحوه واتجمعو حواليه قام قال ليهم وهو يقرب اصابع يديه من بعض
الحل انو نحن نعمل (حلة)
|
Post: #38
Title: Re: هل الطبخ انثوي
Author: ABUHUSSEIN
Date: 07-07-2018, 11:27 AM
Parent: #37
Quote: السلام عليكم و رحمة الله و بركاته ابوحسين
انت مش هدوك من التعميم؟ ☺
حتى بالأمارة فتحت بوست إعتذار ! |
عايني لي جاي .. و عليكم السلام
الإعتذار ما كان عن التعميم الإعتذار كان لي زول خاطبتو على انو زول تاني ... يعني بحكم اني من كبار السن و عادي الواحد يتلخبط في الاسماء و كدا .... بطلي تزوير الحقايق لو سمحتي ... 😂
Quote: يا استاذ يوجد نساء كثيرات غير عاملات و لا يطبخن البتة!
يعني هل يعقل ان تسكن احداهن في فيلا، ثم تقضي سحابة يومها
في الطبخ لزوجها و ضيوفه و لعاملات النظافة و السواق و الغفراء.... الخ؟ |
كتر خيرك الأستذتيني ... 😂
يخيل لي شرعا المرأة اللي بتكون في بيت ابوها ما بتشتغل طبخ و نظافة و غسيل المفروض في بيت زوجها يكون عندها خدم و حشم زي بيت ابوها ...
يعني من حقها ما كرم من زوجها يعني ما بالضرورة المرأة تكون بتعرف تطبخ ....
بعدين المرأة الغير عاملة حا تملأ وقتها بي شنو لو ما طبخت ... ؟؟؟
مسلسلات و افلام و قدام المرايه ... ؟؟؟ 😂😂😂😂
***************
| Quote: وبخور ام التيمان عابق في الجو |
اسمو بخور التيمان امهم دي جبتها من وين ... ؟؟؟؟
هم تيمان و عندهم محل عطور و ببيعو البخور دا ...
عشان كدا سموه بخور التيمان ...
انا حايم في المنبر مصحح و ناشر للعلم و الثقافة ...
اتعبتوني ياخ ... 😂
********************
Quote: طبعا الطبخ رجالي خاصة الطاعم منو
لانه الرجل بيدخل المطبخ بمزاج عالي .. والطبخ بقى يفتحو ليهو مدارس عالمية ودراسة جميع اطباق العالم |
شايفك حايم في المنبر بي نفس مفتوحة ....
حتى بوستات (العضة) بتشارك فيها .... !!!!!!
|
Post: #39
Title: Re: هل الطبخ انثوي
Author: علاء سيداحمد
Date: 07-07-2018, 12:11 PM
Parent: #38
Quote: البقول فيهو ده شغل الحبوبات و الامهات يا نعمات
شغل من زمن العطرون
و التسبيك
و المفراكا
هسى الخلاطات خربت شغل المفروك كلّو
حليل البامية ام عيون |
سلام اب سن وضيوفه الكرام
نعم يا جلال المفروكة لازم بالمفراكة واللحم الضانى وللنكهة شمار اخضر
يا اب سن
سبب تفوق الرجال لانهم يلتزمون بالوصفة والمقادير وخاصة فى الفنادق والمطاعم الكبيرة وهنا لا يتم توظيفهم الا بشهادات معتمدة
اهلنا النوبة ( دناقلة - محس - حلفاوين ) مشهورين جدا فى الطباخة داخل السودان وفى الخارج اعرف شخصيا الطباخ الشخصى لملك الاردن
وكثير من الاصدقاء يعملون فى قصور الامراء فى السعودية والخليج وفى اوربا وامريكا ويتقاضون رواتب مجزية جداً ..
بالمناسبة يا حفيظ انا شهرتى فى القطر قام .
|
Post: #40
Title: Re: هل الطبخ انثوي
Author: عبدالحفيظ ابوسن
Date: 07-07-2018, 12:15 PM
Parent: #38
هههههه ابوحسين قالوا المابعرف ما يدوهو يغرف ياخ دة تراث !! اتا قايلو جا من الخرطوم !!ام التيمان مرض بصيب الزول وبلوي العنقرة واهلنا بعتبروهو مس من الجن. علاجو كان يجيبو مرة والدة تيمان وقبل ما تنزل من عنقريبها الصباح تطا ليهو عنقرتو .. ويتبخر بي بخور اللبان المخلوط معاهو حبة العروس والكمون الاسود وكسبرة .. عشان كدة سموهو بخور ام التيمان والنزيدك
بخور اللبان براهو النسوان بحرقوهو وبعملو دلال او كحل
قوم لف السودان وخلي قعاد الخرتوم
معقولا نشتغل معاكم تدريس تراث وتغالتونا
التعديل في حرف خش بقوم قيامتي خشيت حذفتو
|
Post: #41
Title: Re: هل الطبخ انثوي
Author: Ahmed Yassin
Date: 07-07-2018, 12:29 PM
Parent: #40
ههههههههههههه
Quote: شايفك حايم في المنبر بي نفس مفتوحة ....
حتى بوستات (العضة) بتشارك فيها .... !!!!!!
|
صحي انت جنك بامية مفروكة؟ وبتشربا شراب زي طارق احمد ادم كابتن الهلال زمان
|
Post: #42
Title: Re: هل الطبخ انثوي
Author: ABUHUSSEIN
Date: 07-07-2018, 06:22 PM
Parent: #41
.Quote: هههههه ابوحسين قالوا المابعرف ما يدوهو يغرف ياخ دة تراث !! اتا قايلو جا من الخرطوم !!ام التيمان مرض بصيب الزول وبلوي العنقرة واهلنا بعتبروهو مس من الجن. علاجو كان يجيبو مرة والدة تيمان وقبل ما تنزل من عنقريبها الصباح تطا ليهو عنقرتو .. ويتبخر بي بخور اللبان المخلوط معاهو حبة العروس والكمون الاسود وكسبرة .. عشان كدة سموهو بخور ام التيمان والنزيدك
بخور اللبان براهو النسوان بحرقوهو وبعملو دلال او كحل
قوم لف السودان وخلي قعاد الخرتوم
معقولا نشتغل معاكم تدريس تراث وتغالتونا
التعديل في حرف خش بقوم قيامتي خشيت حذفتو |
جنك غلاط ....
اسأل ناس ام درمان بقولو ليك وين محلهم و بعرفو ليك بخورو ...
خاصة ناس الجبنة و مزاجها ... لانها ما بتظبط إلا مع بخور التيمان ...
ام التيمان دي بتكون حقتكم انتو الكوستاب .... 😂
*****************
| Quote: صحي انت جنك بامية مفروكة؟ وبتشربا شراب زي طارق احمد ادم كابتن الهلال زمان |
بقيت مشهور من حيث لا تدري او تتعب ....
شهرة تكوسا و شهرة تكوسك .....
قلت ليك ديونك بقت كتيرة ....
الله يقدرك على ردها .... 😂
|
|