احمد ياسين، برافو ..انت من الناس السمحين في المنبر العام

04:36 AM July, 01 2018

سودانيز اون لاين
Basamat Alsheikh- نيويورك
مكتبتى
رابط مختصر

عزيزنا الفاضل احمد ياسين
عادة لا اتداخل واعلق في بوستات المشاكل ولكن قرأت لك جملة اعجبتني وخلتني اتأكد انك من الناس السمحين ذوي الاصالة والسماحة وهي قولك""وانا اذا وجهت ليه كلمة ما في محلها اكون متأثر اسبوع كامل لغاية ما اعتذر ليه ""
شكرا ليك احمد ياسين والله يكثر من امثالك يا ملك ..
ودمت بالف خير وصحة وعافية

والله في ناس هنا في المنبر العام قلوبهم بيضاء ونياتهم صافية كاللبن الصافي
وتختهم في الجرح والجرح يطيب،،، وفي قليلين جدا لسانهم يفقع المرارة ،،والحمد لله
الناس السمحين كتار ، واولئك قليلين ،،،
ودمتم بالف خير وصحة وعافية

شكراً يا أختنا فعلاً احمد ممكن ينضاف لينا

سلام يا شباب

يا سفسفة تقصد احمد يس فل( من فلول)؟؟؟

شكراً يا بسمات

الصديق العزيز احمد ياسين سودانى بمعنى الكلمة ومن طينة ارضنا المعطاء ..

له ولكٍ الود .

التحية لاحمد ياسين زوووووول دوغرى

ما ذكرتيه عن الأخ / أحمد يسن هو الصدق

شكراً بتنا وشكراً للأخ أحمد يسن

العزيزة .. العزيزة
(الفوق ديل بى نفس اللحن)
بسمات بت الشيخ
وطفقت تملأ سيرتك الحلوة ارجاء المكان بالاشراق والبسمات
خليني اسبر اغوارك السمحة دي بى عميق المحبة والود والتقدير
من امبارح حمدت الله اني كنت موجود .. ولو اتاخرت شوية ومالحقت نفسي كان بقيت الشبح
وتخيلي موقفي من ودالمشرف وجلالدونا وودالمدير واستاذي في التاليف يوسف الموصلي
ومن بقية الاخوة الكرام حيكون كيف!
انا كنت راكب (قطار الهم) السواقو هاشم صديق الشايل هم ارض الطيبة والطيبين
وانتي كدة حولتيني لى قطر (كريمة مشترك) .. حتى نعاود المشاركة
شكرا لانك كدة خليتي رايات المحبة والانسانية تزداد خفقان

سلام بتنا بسمات
الزول طلع حتي صورة الزمبارة الخاتيها دي حقتو بحق و حقيقة.


______________
سمعنا تحت تحت انك برضو طلعتي شبح

نعم يا بسمة مع التحية
هو أقرب إلى ملائكة المنبر وان تجملت له بعض الشياطين
وانت زاتك يا فاطمة السمحة معرفتك في المنبر الا السمحين

وعشان كده يا محجوب قلنا نتخارج بكرامتنا وقبل ما مرارتنا تنفقع...وقبل كده انفقعت فعلا وشفنا الموت بعيونا ..واسفي كله حيكون حوشكم الجميل ده ما بقدر اقعد فيه معاكم واشرب معاكم القهوة ونتجادل فيه بروح من المحبة والود ...وكفاية علينا الواتساب تقرأ فيه صباح كل يوم يوم جمعة جمعة مباركة ونسمع فيه نكات جديدة تخلينا نضحك لحد الهستيريا..ونودعك بأحر نكتة في الواتساب..واحد قبضوهو ناس الأمن في سوق سعد قشرة يوزع في منشورات ولمن فتحوا اول ورقة لقوا الورقة فاضية وما مكتوب فيها شئ قالوا ليه دي شنو البتوزع فيها دي ..قال ليهم زي ما شايفين منشورات ضد حكومتكم قالوا ليه لكن دي اوراق فاضية ما مكتوب فيها شئ قال ليهم عليكم الله الحاصل علينا ده عاوز ليه كتابة ..ما كل زول عارفه..
.ودمت بالف خير وصحة وعافية

بتنا بسمات
و بكدا حيكون سودانيز اونلاين مكان للوحشين فقط.
لا لا لا
بالله كلمي اميرة السيد ترجع و ما في ليكي طريقة للمخارجة من هنا.

______________
بالله هسي اللخة الكثيرة دي ما احسن من بتاعة "جمعة مباركة" ديك. يا اخي حتي الواحد ما بخسر يكتبها, يجيبها مبروزة.

عندنا قروب في الواتساب عاملينو مخصوص لجمع تبرعات بخصوص بناء مدرسة في منظقتنا.
اها بنقول للناس مواضيع جمعة مباركة دي ما تجيبوها لينا هنا. هنا دايرين قروشكم بس.
في جماعة ولا شغالين بالكلام ده و لو الادمن مسح ليهم مواضيعهم يقولو ليك ديكتايورية.

المهم سودانيز اونلاين احلي

صدقتى يا بسمات

وانتى زاتك جميلة الروح والدواخل