توضيح لأهلنا الطيبين بخصوص الأشياء الرنانة في الغرب مثل فلان يعمل بوكالة فضاء وخلافه

11:24 AM June, 22 2018

سودانيز اون لاين
النذير حجازي-بلاد الله الواسعة
مكتبتى
رابط مختصر

على الرغم من أن كميات كبيرة من السودانيين
زاروا الغرب، وبقى في وعي كبير عن الأساطير
التي تروى زي قصص حجاوي المذيع عوض ابراهيم عوض
بانو أمريكا زادت من هجرة السودانيين لتحسين أخلاق
الأمريكان، وبرضو قصص سوداني هاجر دولة أوروبية
ولأنو عبقري شديد قامت الدولة باغتياله علشان
ما ينشر عبقريتو لبلدو، وصلاة النبي عيني باردة

الغربية لازال بعض السودانيين والعرب يصدقون
مثل هذه الخرافات، وقصة صبي الساعة ليست ببعيد
وعملوهو مخترع الساعة كمان، تقول العالم لم يخترع الساعة بعد.

كمان ظهرت حاجة جديدة، النوع البقشر بإنو شغال في ناسا
او البنك الدولي، وبإنو عبقرينو زمانو

هذا البوست للتوعية، علشان تشتغل في ناسا أو خلافها
التوظيف لا يتم على أساس الذكاء، في أمريكا كل الوظائف
الحكومية على وجه الخصوص، وحتى الشركات الخاصة
القانون يجبرها أن تعمل بمبدأ التنوع الأثني وتوزيع
الفرص على الأقليات حتى لا تكون حكرا على البيض،
يعني زول مهاجر فرصته أكبر من الرجل الأبيض،
المهم موضوع التنوع ومميزاته لنا كمهاجرين كبير
جدا ولا يسعه بوست واحد لمناقشته.

النقطة العايز اوضحها، هذه الوظائف عادية وممكن تكون دون العادية،
ولا يعيرها الغربيون انتباها، ولا تدل على ذكاء الموظف،
تقييم الغربيين لذكاء الموظف، بطريقة بسيطة جدا،
وهو كم يأخذ فلوس في السنة وبس.

ألا هل بلغت؟ اللهم فأشهد

سالم النذير و عيدك سعيد

من طبعنا ما بنحب الزول البقشر علينا مهما كان ... لكن النجاح و التميز بعجبنا و من حقنا نحتفى به
ومن طبعنا ايضا نجاح اي سوداني بتعتبره نجح باسمنا كسودانيين ولذك نفرح ونفخر به ..

وجود اي سوداني بمؤسسة متميزة ولها مكانتها العالمية مفخرة لنا او مفخرة لي للتحديد

تحياتي

حبيبنا محمد جبرة،
لمثلك ترفع القبعات يا أصيل،
لكن صدقني الناس دي أكبر Fake

وأكبر خدعة البنك الدولي
ناس كتار رفضوا العمل فيه
من منطلق أنه غير أخلاقي
مع تعامله مع الدول النامية
يا ريت تراجع كتابات د. محمد محمود الطيب
عن أخلاقيات البنك الدولي
الناس الشغالين فيه حثالة وبعد دا
الناس عاملة ليهم قومة وقعدة
ديل أحقر البشر

Quote: وأكبر خدعة البنك الدولي ناس كتار رفضوا العمل فيه من منطلق أنه غير أخلاقي

دي حقيقة، ما عندك بديل غيره إلا مواجهة أساطيل أمريكا
وآخر دولة حتركع هي كوريا الشمالية.


أما قصة السودانيين العباقرة هنا وهناك فدي (طيبة سودانيين) ساكت
وللأسف في نموذج مصغر منها هنا يندرج تحت مصطلح (الكرتونية)

سلام يا أبو الحواتم ومنور البوست*،
لا فض فوك، تعرف يا حاتم شيوعيين
بقشروا وبمجدوا في البنك الدولي
شوفت العالم دا كرتوني كيف؟!
و كمثال د. سلمان محمد سلمان يساري معروف،
والناس عمالة ليهو قومة قعدة بسبب البنك الدولي،
دا موضوعو طويل عايز ليهو بوست منفصل.

------
* رسل الى ع. م. ص. شوال 🍋 ليمون علشان قال بتقزز من الحتة دي هههههههه

معتصم ابراهيم خليل دكتوراة في الكيمياء ومخترع يعمل حاليا

في جامعة الملك سعود ، طلب من السفارة السودانية في المملكة

ارسال خطاب لرئاسة الجمهورية لاقامة مؤتمر علمي عن تكنولوجيا النانو

ولم يتلقي رد حتي الان

كان ذلك في مقابلة تلفزيونية حضرتها قبل سنوات والغريب في الامر

بقناة السودان ، اكتب معتصم ابراهيم خليل فهو مشهور ومؤلف لعدة

كتب في مجال الكيمياء والمناهج بالجامعات

شكرا النزير

سلام يا حبيبنا و أستاذنا لطفي،
نورت البوست،

والله شيء مؤسف يا لطفي أن يتجاهل المتسولون (المسؤولون)
هؤلاء العلماء.

في احدي الندوات عن أسباب وتداعيات انتفاضة سبتمبر ٢٠١٣ والتي راح ضحيتها مايقارب ال٣٠٠ شهيد من شباب هذا الوطن برصاص الغدر كان المتحدث الرئيسي في هذه الندوة الخبير الدولي والاقتصادي بالبنك الدولي وهو من الشخصيات المعروفة في منطقة واشنطون تجاهل هذا الخبير عن قصد دور صندوق النقد الدولي والبنك الدولي في رسم السياسات وإصدار التوصيات لحكومة الإسلاميين وذلك بما يسمي ببرنامج الإصلاح الهيكلي وتم تنفيذه بواسطة النظام في إطار البرنامج الثلاثي ثم البرنامج الخماسي ومن المعروف ان معظم توصيات الصندوق المتضمنة في البرنامج هي توصيات تقشفية تهدف الي خفض الإنفاق العام والخصخصة وتعويم العملة ورفع الدعم عن السلع وهي وصفة تقليدية تؤدي لميزيد من المعاناة للطبقات الفقيرة خاصة بند رفع الدعم عن السلع الاساسية تجاهل هذا الخبير عن قصد الدور الرئيسي لصندوق النقد في وضع هذه التوصيات مما يعكس عدم الأمانة العلمية والالتزام الاخلاقي حفاظا علي مصالحه الخاصة وامتيازاته كموظف في البنك الدولي.

الدكتور محمد محمود الطيب
أستاذ إقتصاد بجامعة هاوارد

الغرض من البوست دا شنو يا النذير يا خوي
اوع يكون وانت (بتخترع) موضوع البوست دا بعد شقاء وتعب وسهر وكد وجهد
اخذ من وقتك وذهنك واعصابك وحتى راحتك .... وهناك في عقلك موضوع اخونا منير
المشهود ليهو حتى من جيرانه في الشعبية بالخُلق والنباهة.
تعرف انحنا اهلك الطيبين ديل من شدة ما طيبين لو لقينا سوداني شغال في (وكالة البلح)
خليك من ناسا عمل حاجة كويسة بنقعد نفرح لامن نبكي

Quote: الغرض من البوست دا شنو يا النذير يا خوي اوع يكون وانت (بتخترع) موضوع البوست دا بعد شقاء وتعب وسهر وكد وجهد اخذ من وقتك وذهنك واعصابك وحتى راحتك .... وهناك في عقلك موضوع اخونا منير المشهود ليهو حتى من جيرانه في الشعبية بالخُلق والنباهة. تعرف انحنا اهلك الطيبين ديل من شدة ما طيبين لو لقينا سوداني شغال في (وكالة البلح) خليك من ناسا عمل حاجة كويسة بنقعد نفرح لامن نبكي

مش الهيلمانه للناس بس لكن كمان حتى لى حاجات موجوده حسب البيئه والمناخ فى مناطق من العالم تلقى الناس عاملين قومه وقعده كانو ماموجوده الا فى السودان وبس مره القنقوليس ومره الصمع ومره ..............
.
الدنيا دى فيها ناس مميزين وناجحين وسفراء لبلادهم واكتر ناس ليهم اسهامات وانجازات فى العالم الاول هم الهنود والصينيين (يمكن لى نسبه المتميزين الى تعدادهم ).
.
التواضع للمتمز ووفائه لوطنه ببذل علمو ومعرفتو .... مثلا .شوف زى مجدى يعقوب وزويل(الله يرحمو) بعد ما اتميزو بقو اكثر ارتباط وبذل لى بلدهم
نحنا هنا الناس المعمول ليهم هيلمانه لما يجو البلد تلقاهم مخالطين اهل السلطان
اما الناس المفروض نحتفل بيهم مش -عشان شغال وين او بقى نائب فى برلمان ولايه او دوله ما - وانما ناس العلم والمعرفه الحقيقى الوجودين فى الظلال مثلا زى الشاعر الفيتورى (اللى اصبح فى متنزه باسمو على ما اعتقد فى البلد اللى اقام فيها اخر ايامو ) وبروف محجوب عبيد طه اللى كان فى جنازتو اهل الحكم فى السعوديه ناهيكعن تلاميذو .....

اتمني مايكون القصد منير ..لانو منير بكل تواضع شرح دورة في الموضوع وبسطو جدا وحتي هو لم يكلف نفسو عناء نشرة في المنبر ....الموضوع ماكان علي بالو ذاتو ...وذي ماقال الرجل الجميل احمد ياسين ومن بعدو اسامة بابكر لو لقينا سوداني شغال في وكالة بلح بنعلي شانو لحبنا في وطنا واهلنا الطيبين المتسامحين اجمل وانبل مخلوقات اللة في الارض...

الله يبارك فيك يامحمدابراهيم
منير رجل حيي ودا من الحياء والتواضع .. لم يتطرق ابدا للاشياء (الرنانة) بل تلك الاشياء هي التي سعت اليه
ربنا يزيد منير واي سوداني في مشارق الارض ومغاربها علما ورفعة ومنعة وقوة وتواضعا

Quote: اتمني مايكون القصد منير ..لانو منير بكل تواضع شرح دورة في الموضوع وبسطو جدا وحتي هو لم يكلف نفسو عناء نشرة في المنبر ....الموضوع ماكان علي بالو ذاتو ... لو لقينا سوداني شغال في وكالة بلح بنعلي شانو لحبنا في وطنا واهلنا الطيبين المتسامحين اجمل وانبل مخلوقات اللة في الارض...

الجديد شنو
ما برضو فى سودانى اخترع وسيلة جديدة للتمطير و هللتو ليهو
___
تحياتى لى منير ود البلد الاصيل

ياجلال .. اي شي ولا التمباك .. فهو إنتاج سوداني أصيل وكتر خير الزميل حجازي نورنا علي طرق تمطيره حتي نزداد كيفا .. إيه الدنيا غير ختة سفة بعد كباية جبنة ظابطة . :)

كلامك صاح ياالنذير ..
بس تفاعل السودانيين مع اخبار السودانيين فى الخارج نابع من حسن النية والنفوس الصافية التى تحب الخير للآخر مهما كان ..
التفاعل فقط يعكس ايجابية وسلبية النفوس .. فالنفس الموجبة تحس بالغبطة لزولهم مهما كان صغر بذله ومساهمته، والذى يعتبر عادى جداً طبعاً فى بلاد برة .. اامهم أنها تحس نحوه احساس ايجابى ..
أما النفوس السالبة فتقابل مساهمات الآخرين بالحسد والحقد والغيرة بلا مبرر ..
وهكذا الحياة .. وهكذا طباع الناس والطبع يغلب التطبع ..

واتفق معك إنو كونه الصدفة توجد لك شغل فى ناسا او البنك الدولى او esa فإن ذلك فقط محض مصادفة .. وكونه ناسك واهلك شايفنه تميز فذلك بسبب الروح الايجابية التى تحب ان ترى ولد البلد مشارك فى المجالات المقفولة على العالم الأول.. وتلك روح موجبة مفعمة بالخير وحب الخير للآخر ..
المشكلة هى لمن الزول الوضعته الظروف فى مساهمة مميزة يظن أنه اخترق الارض او بلغ الجبال طولا ويقوم يتباهى ويتفرعن على الناس ..

والله يا منير كلامك سمح بلحيل،
لأول مرة أتفق معك في وجهة نظر.
العفو والعافية في القديم والجديد
وكل عام وانت ومحبيك بألف خير.

كسرة: يا أحمد يس، انت زول سمح بلحيل، وسوداني أصيل،
ومرحبا بك في المنبر.

سلام النزير، كما هناك شرفاء سودانيين يفرحون باخوانهم في زمن القحط الابداعي والتميز، هناك سودانيين ايضا تضيق شرايين قلوبهم وهم يرون بني جلدتهم يحققون نجاحا تلو النجاح.
اخونا منير احتفينا به لان مؤهلاته اولا، والتنوع الاثني ثانيا صعدا به الي حيث وصل، في وقت تجد فيه بعض السودانيين مقبوريين بين طبقاات الغل والحسد والرمتلة حتي ياتيهم اليقين -الموت-.

اعرف كذا بروف سوداني في البنك الدولي يستحقون الاحترام، وعباقرة في مجال الطب مثل البروف حسن الجيلي "بريطانيا" والبروف احمد العاقب " متخصص في الطب النفسي" جامعة يورك..الخ.
اذن عندما نجد عباقرة متخصصين في علوم الفضاء مثلا اقلاها نفتخر بهم معنويا عوضا ان نبخس نجاحاتهم كما تفعل انت في بوستيك التعيس هذا.

Quote: بس تفاعل السودانيين مع اخبار السودانيين فى الخارج نابع من حسن النية والنفوس الصافية التى تحب الخير للآخر مهما كان .. التفاعل فقط يعكس ايجابية وسلبية النفوس .. فالنفس الموجبة تحس بالغبطة لزولهم مهما كان صغر بذله ومساهمته، والذى يعتبر عادى جداً طبعاً فى بلاد برة .. اامهم أنها تحس نحوه احساس ايجابى .. أما النفوس السالبة فتقابل مساهمات الآخرين بالحسد والحقد والغيرة بلا مبرر .. وهكذا الحياة .. وهكذا طباع الناس والطبع يغلب التطبع ..

منير رجل حيي ودا من الحياء والتواضع .. لم يتطرق ابدا للاشياء (الرنانة) بل تلك الاشياء هي التي سعت اليه
ربنا يزيد منير واي سوداني في مشارق الارض ومغاربها علما ورفعة ومنعة وقوة وتواضعا

====================

حبيبنا أحمد ياسين .. مودتي ..
كلامك جميل ..
حبيبنا منير كانت له مداخلات معي في بوستات التراث عن أهلنا في الشمال .. يا سلام يا منير
تواضع العلماء .. هذا الرائع يحمل الوطن في أعماقه ..
وأنا مفتكر الزول تربال زينا كده .. شكراً منير ..
شكراً الحبيب النذير حجازي على البوست الذي عرفنا من خلاله على منير

Quote: كلامك صاح ياالنذير .. بس تفاعل السودانيين مع اخبار السودانيين فى الخارج نابع من حسن النية والنفوس الصافية التى تحب الخير للآخر مهما كان .. التفاعل فقط يعكس ايجابية وسلبية النفوس .. فالنفس الموجبة تحس بالغبطة لزولهم مهما كان صغر بذله ومساهمته، والذى يعتبر عادى جداً طبعاً فى بلاد برة .. اامهم أنها تحس نحوه احساس ايجابى .. أما النفوس السالبة فتقابل مساهمات الآخرين بالحسد والحقد والغيرة بلا مبرر .. وهكذا الحياة .. وهكذا طباع الناس والطبع يغلب التطبع .. واتفق معك إنو كونه الصدفة توجد لك شغل فى ناسا او البنك الدولى او esa فإن ذلك فقط محض مصادفة .. وكونه ناسك واهلك شايفنه تميز فذلك بسبب الروح الايجابية التى تحب ان ترى ولد البلد مشارك فى المجالات المقفولة على العالم الأول.. وتلك روح موجبة مفعمة بالخير وحب الخير للآخر .. المشكلة هى لمن الزول الوضعته الظروف فى مساهمة مميزة يظن أنه اخترق الارض او بلغ الجبال طولا ويقوم يتباهى ويتفرعن على الناس ..

يشهد الله انك رجل مهذب وانا احييك لهذا الرد الجميل و احبك في الله من اجل هذا السلوك يا رجل يا جميل

Quote: والله يا منير كلامك سمح بلحيل، لأول مرة أتفق معك في وجهة نظر. العفو والعافية في القديم والجديد وكل عام وانت ومحبيك بألف خير.

و انت رجل رائع يا اخي النذير بهذا السلوك الرائع

تحياتى لك اخ النذير
لايغرنك تواضع منير:) العالم بحق
نتفق جميعا على عامل الصدفه فى العمل بهذه المؤسسات العلميه الضخمه ولكنها صدفه محدوده الاجل بمعنى إذا لم تقدم ما يفيد مشروع البحث او الفكره العلميه المقصود يتم الاستغناء عن جهودك بلطف وذوق(قرأت ذات نهار سعيد بدايه تجربه احمد زويل رحمه الله وإندهاشه من ميزانيه ضخمه قدمت له كمبتدئ مع احتمال النجاح والفشل وتزيد الميزانيه حسب تقدمه فى العمل )
فى حاله اخونا منير النجاح بين وموثق فى افلاك بعيده وهذا موضع إعزاز لاطراف كثيره بما فيها رفاق سودانيزونلين
والرجل محرج من ضجه هنا اثارها الموضوع لطبعه ولكنها ضجه بحق وحقيقه
جزئيه الموضوع عن الامم المتحده وفساد مؤسساتها اتمنى ان تتعمق فيه
فتلك المؤسسات من اكثر ادوات الفساد العالمى تحكما فى العالم الثالث الغالبيه العظمى من الاستاف القيادى محصور بين الاوربين والأمريكان ولابأس من ترك القياده السياسيه لشخصيه من العالم الثالث بشروط اختيار محدده لايخرج من إطارها طمعا فى ولايه ثانيه

Quote: بس تفاعل السودانيين مع اخبار السودانيين فى الخارج نابع من حسن النية والنفوس الصافية التى تحب الخير للآخر مهما كان .. التفاعل فقط يعكس ايجابية وسلبية النفوس .. فالنفس الموجبة تحس بالغبطة لزولهم مهما كان صغر بذله ومساهمته، والذى يعتبر عادى جداً طبعاً فى بلاد برة .. اامهم أنها تحس نحوه احساس ايجابى .. أما النفوس السالبة فتقابل مساهمات الآخرين بالحسد والحقد والغيرة بلا مبرر .. وهكذا الحياة .. وهكذا طباع الناس والطبع يغلب التطبع .. واتفق معك إنو كونه الصدفة توجد لك شغل فى ناسا او البنك الدولى او esa فإن ذلك فقط محض مصادفة .. وكونه ناسك واهلك شايفنه تميز فذلك بسبب الروح الايجابية التى تحب ان ترى ولد البلد مشارك فى المجالات المقفولة على العالم الأول.. وتلك روح موجبة مفعمة بالخير وحب الخير للآخر .. المشكلة هى لمن الزول الوضعته الظروف فى مساهمة مميزة يظن أنه اخترق الارض او بلغ الجبال طولا ويقوم يتباهى ويتفرعن على الناس ..

يا سلام عليك...يا سلام

أيييه يا النذير،

Quote: الدكتور محمد محمود الطيب أستاذ إقتصاد بجامعة هاوارد

الصادقات لا يجب أن تعميك عن الحقيقة ..
زولك دا رغم أنه مكنة قديمة ومكركبة .. هو في جامعة هاوارد .. وهى من أدني الجامعات الأمريكية مرتبة .. جامعة أسست تحديداً لتبييض وجوه السود بعد نيلهم لحقوقهم المدنية.
في ذات الوقت تحاول النيل من الخبير الدولي دكتور سلمان .. أخر كتاب قدمه لنا في منطقة واشنطن عن أتفاقية نفاشا .. في أكثر من 600 صفحة .. توثيق مهول .. جمع فيه كل الوثائق المتبادلة بين أطراف الحوار ..


حاجة تانية أنت نسيتها يا النذير، ألقاب دكتور .. وما شابهه هنا تعتبر أشياء "كرتونية" .. أرجع لحاتم إبراهيم في قصص الكراتين .. والتفوق الحقيقي في الغرب في القطاع الخاص ومراكز البحوث .. والأهم من ذلك كله .. أعظم أنجازات الغرب جاءت من شباب حديث التخرج ..
أو شباب لم يتخرجوا أصلاً .. أمسك عليك بيل غيت (مايكروسوفت)، السوري الأصل أستيف جوب (أبيل)، مايكل زكيربيرج (فيس بوك) .. سيفرات لينكس ذائعة الصيب .. أسسها لينس تورفالدس في أوروبا .. طالب خريج وما لاقي شغل .. الناس مفروض ترجع وتدعم جهود الأجيال الناشئة بدل الجري وراء الكوامر المعمرة.


------------------------------
التحية لول أبا منير ..

بريمة

Quote: والله يا منير كلامك سمح بلحيل، لأول مرة أتفق معك في وجهة نظر. العفو والعافية في القديم والجديد وكل عام وانت ومحبيك بألف خير.

مرحبا ومسا الخير
كن عندك عفو امسح البوست الكلو تعميم ده