عضو سودانيزاونلاين يساهم في اطلاق مركبة لاكتشاف عطارد.

03:58 PM June, 18 2018 سودانيز اون لاين
محمود الدقم-London
مكتبتى
رابط مختصرانه الاخ منير حيث زف لنا خبر عبر صفحته في الفيس بانه قد تم تكليفه في وضع لمساته للمشاركة في اطلاق مركبة لاكتشاف كوكب عطارد.استميح الباشمهندس منير في انقل هذا الخبر الي الاصدقاء والاعضاء هنا في المنبر وارجو ان يلتمس لي العذر لاني لم اخد منو اذن وكدا، بس من شدة الفرح.المصدر: https://m.facebook.com/story.php؟story_fbid=10156766158535139andid=705480138https://m.facebook.com/story.php؟story_fbid=10156766158535139andid=705480138فيhttps://m.facebook.com/story.php؟story_fbid=10156766158535139andid=705480138https://m.facebook.com/story.php؟story_fbid=10156766158535139andid=705480138في حال الرابط ما اشتغل الرجاء نقل اللنك copy and past في غوغل.

التحية للزميل منير
M.A.A

خدمة الانسانية ليس لها حدود

شكرا على نقل الخبر....

الاخ محمود الدقم
كل عام وانت بخير
من تفرحه وتسعده نجاحات الاخرين فهو صاحب نفس مطمئنة
وسيصيبه خير كثير ان شاء الله
اهنيك اولاً لهذا الفرح ودعوتك للأخرين ان يفرحوا معك
وفخورون بمشاركة المهندس الاخ منير
ونسأل الله ان يسدد خطاه فيما يسعى اليه ويكون لنا فخرا وذخراً
وكل عام وانتم بخير

محمود الدقم
انت بالله بتتكلم جد!!!
والله هذا خبر سعيد جدا ومفرح جدا جدا ليس فقط للباشمهندس منير واسرته واصدقاؤه واعضاء
منبر سودانيزة اون لاين ولكن ايضا للسودان ....
ونقول للباشمهندس منير الف مبروك لهذا النجاح الباهر فانت فخر للسودان والسودانيين ...
ونرجو يا محمود ان تكتب لنا مزيد من المعلومات عن منير ، وهل هو يساهم مع وكالة ناسا الامريكية
وشكرا لك لنقلك لهذا الخبر المفرح الجميل فان كل نجاح لاي سوداني داخل وخارج السودان يفرحنا والله ...
ودمت بالف خير وصحة وعافية

استاذة بسمات الشيخ تحياتي واحترامي المركبة ستنطلق من وكالة الفضاء الاوروبية، بحسب قناة الجزيرة اقتبس هذا الكلام ادناه من صفحة مهندس منير، احترامي .. (الاستعداد لإطلاق مركبة تستكشف كوكب عطارد ..فى أحد أجهزة هذه المركبة تقبع الأحرف الأولى لـصاحب البوست Munir Munir M.A.A 😊 منقوشة فى الشريحة الالكترونية التى تمثل قلب الكاميرا الأيونية المسماة PICAM ، وذلك اختصار لـ Planetary Ion CAMera المخصصة لتصوير أيونات العناصر المكونة لكوكب عطارد وأجوائه (تحليل طيفى) .. دورى فى هذا المشروع كان تصميم الجزء الأمامى من الدائرة الالكترونية الدقيقة فى PICAM.. وأنهيت العمل فيه سنة ٢٠١١ .. 😊المهمة الفضائية اسمها بيبى كولومبو ـــ Bepi Colombo ــ على اسم العالم الايطالى الذى تمكن من حساب المسار المؤدى لمدار الكوكب .. المشروع هو عمل مشترك بين وكالة الفضاء الاوربية ESA واليابانية JAXA .. وتحت مظلة ESA شاركت عدة مراكز بحوث من فرنسا وبلجيكا والنمسا وايطاليا وهولندا ..المركبة الآن تم نقلها لقاعدة الإطلاق بعد تأجيل لعدة سنوات .. رحلة المركبة من كوكب الأرض حتى تستقر فى مداراتها حول عطارد ستستغرق سبع سنوات ..موقع المشروع فى ESA هو:http://sci.esa.int/bepicolombo/http://sci.esa.int/bepicolombo/)انتهيhttp://sci.esa.int/bepicolombo/http://sci.esa.int/bepicolombo/http://sci.esa.int/bepicolombo/http://sci.esa.int/bepicolombo/)انتهيhttp://sci.esa.int/bepicolombo/http://sci.esa.int/bepicolombo/.

عزيزنا محمود سلام وكل عام وانت بخير
في عالم سوداني كان استاذ رياضيات في جامعة ليدز في uk
وهو يتعاون مع ناسا .
لو كان هو المقصود انا اصدق الخبر يا اخ محمود والله .
لكن الرجل ما مشترك في منبر سودانيز .
ولا داير يتعرف .

سلامات Osman Musa عيدك مبارك، لا انا اقصد منير.منير السوداني الهولندي :) وهو عضو معنا من قولة تييت :)
وبحسب كلام اخونا منير ان المشروع كان عام 2011 وهذا ما جاء في صفحته..هو عضو معنا ووالده كان توفي واتعمل ليهو بوست عزاء هنا في منبر سودانيز..
كتب الاخ منير:
(شكراً لكم جميعاً اخوتى الكرام ..
الحقيقة أن مهمتى انتهت سنة ٢٠١١ 😊 ونسيت الموضوع وانتقلت للعمل فى مكان آخر .. إلى أن جاء هذا الفيديو واقع لى قدامى فى الفيسبوك وذكرنى أيام الشغل الشاق والسهر صباحى والمشاوير مابين ESTEC مركز معامل ESA التكتولوجية ، ومدينة فلورنسا فى ايطاليا حيث مركز الاختبارات .. كانت ايام مليئة بالتحدى ..)

شكرا لكم جميعا واخص المك Ali Alkanzi علي كلماتك الرقيقات الطيبات واعذرني ما قدرت رديت عليك طوالي والسبب "ابكرونا" سيد الحوش سمح لي بثلاث مداخلات في اليوم والليلة.
اشكرك يا كنزي يا اصيل وحري بنا كلنا ان نفرح باخونا بروف منير...شكرا لكم جميعا

حبيبنا سيف اليزل وينك يا معلم؟ نعم صدقت فقلت واوجزت..تسلم.

اخ محمود كل عام وانت بخير وشكراً جزيلا على الخبر المفرح جداً
حبيبنا منير مزيد من التقدم والتوفيق .

صديقى العزيز محمود الدقم .. شكراً على اهتمامك وسرورك بهذا الخبر الذى كما قلت انه وقع لى بالصدفة فى التايم لاين بتاعى من قناة الجزيرة .. والحقيقة انو انا اشتركت فى تصميم دائرة الكترونية chip لأحد الأجهزة التى ستكون ضمن مجموعة كبيرة من الأجهزة المضمنة فى هذه المهمة الفضائية .. والبداية كانت سنة ٢٠٠٧ وانتهيت من الجزء بتاعى سنة ٢٠١١ .. ومنذ ٢٠١٣ انتقلت للعمل فى شركة أخرى ونسيت موضوع الـ bepi colombo ده.. وحتى انى ظنيت انه المشروع زاته وقف .. لغاية ما امبارح فاجأنى فيديو قناة الجزيرة ده ورجعنى للماضى 😊 فقلت أوثقه فى صفحتى ..
لكن بالجد المشروع انصرفت فيهو اموال طائلة تصل 1.6 مليار دولار ومجموعات بحثية كثيرة وما أخوك إلاّ وجه مغمور ومتواضع فى الزحام .. يعنى زيما بيقول احد الاصدقاء : ما أنا إلاّ people ساى 😁

الاخوة سيف اليزل، على الكنزى، بسمات الشيخ، عثمان موسى وعلاء سيداحمد .. لكم ابشكر والتقدير..

ياسيف اليزل انا طبعاً المخوفنى انه فى الـchip كتبت الانيشيالز M A A وعشان كده خايف فى الفضاءات البعيدة ديك يلم فيهو جن واللا شيطان واللا مصيبة زمان يختنى فى راسه 😁😁😁😁

يا منير بطل التواضع ياخ، هنا الواحد كان ركب طيارة ساي بفتح ليها بوستات وهاك يا سيلفي وهاك يا حكاوي😊

بعدين يا خوانا سودانيز ما تستهونوا بيها ساي، فيها علماء
الزميل محمد سليمان شارك ككونتراكتر مع ناسا في تنفيذ العربة - اعتقد اسمها روفر - المشت على سطح المريخ
وكان في عضو باسم زول ابن زول دا احد علماء ناسا عديل كدا وما جاب سيرة للقصة دي كيلة فترة عضويته نشطة وما عرفناها الا بعد زمن من تركه للبورد
وعندك المستنير عالم في مجاله برضك 😁

من دواعي الفخر و الاعتزاز.
ابن الشعبية . الخرطوم بحري.
الاخ الفاضل منير عبدالرحيم
نجده كما عودنا دايما علي القمة.
منذ صغره كان نابغة فذ.
و يشار إليه بالبنان.
لعلو همته و طموحة الشاهق.
رفعت راسنا فووووووق ي منير.



عزالدين عباس الفحل
ابوظبي

طبعاً يامحمدالبشرى كونه الشغل كان ضمن مهمة لـ ESA ليس هو المثير بالنسبة لى فى حد ذاته ، فغالباً كثير من بحوث ESA و CERN وغيرها هى عبارة عن مشاريع قارية تشارك فيها كثير من المراكز والجامعات حسب تخصيص البحوث.. يعنى ممكن طالب دكتوراه يكون مشارك فى مشروع فضائى ضخم او احد تجارب CERN ضمن رسالته.. وهناك مشاريع لـ ESA لربما يكون الباحثين فيها بالعشرات والمئات من جميع بلاد اوروبا ومن المهندسين والفيزيائيين والكيميائيين و الطلبة والفنيين ووو ..
فالشغل الاشتغلته لا يعدو كونه واجب فى الشغل زيى وزى كثيرين .. بس المثير بالنسبة لى هو أنى كاتب حروف اسمى فى الـ chip ، وطبعاً تقوم تتخيل انو اسمك ده حيطير كـ hardware ويخترق الفضاء .. يعنى اسم زول ساى سودانى يلبس العراقى والسروال ويقعد تحت العمود وياكل كسرة وويكة وفول يكون مسافر سبعة سنة عشان يرك قريب للشمس !! .. دى النقطة البتخلينى اتبسم وانا اقرأ الخبر وأعاين للفيديو .. 😊😊😊
وزى ماقلت الضمان شنو الاسم ده ما يجيب لى الهوا؟🙌

فرّحتنا والله يا منير، بس لو كان كمّلت جميلك وختيت الـ1.6 مليار دولار وديعة في بنك السودان، كان ريّحت جارك عمر في الأراضي المنخفضة من التصاوير والمطاردة والشعبطة الحاصلة بين الدولار والجنيه!
وعشان تعرف إنو أنا زول صاحبك و(بجاه الملوك نلوك) الـM A A تصلح كذلك كاختصار لمحمد الأمين وهكذا نكون في الهوا (الفضاء) السوا.
شكرا أخي محمد الدقم

زمااااان يا منير.
مرة ذهبت الي الدكتور عادل شكوكو.
زيارة خاطفة في المستشفي في دبي .
قلت ليهو :-
بالله اخبار النابغة منير عبدالرحيم وين اثرو ؟
قال لي :-
منير عبد الرحيم دا وصل لدرجة البروف.
و هو حسه شغال في وكالة ناسا للفضاء.
غالبا تلقاهو في USA.
يعني الخبر من زماااااان طلع الاسافير.
وسبق أن قلت ليك الكلام دا في التلفون
و ما اخفي عليك الخبر دا.
وصل للمهندس خالد حسن إبراهيم.
مدير هيئة مياه الخرطوم سابقا.
والمستشار القانوني عبد الإله عثمان . أبوظبي.
اكيد قرأ الخبر الجميل دا في سودانيزاون.
ي منير اشبعتنا فرحا و غبطة.





عزالدين عباس الفحل
أبوظبي

Quote: بس المثير بالنسبة لى هو أنى كاتب حروف اسمى فى الـ chip ، وطبعاً تقوم تتخيل انو اسمك ده حيطير كـ hardware ويخترق الفضاء .. يعنى اسم زول ساى سودانى يلبس العراقى والسروال ويقعد تحت العمود وياكل كسرة وويكة وفول يكون مسافر سبعة سنة عشان يرك قريب للشمس !! .. دى النقطة البتخلينى اتبسم وانا اقرأ الخبر وأعاين للفيديو ..

أيوة تتبسم و تضحك لا ضرسك الورا كمان
خلّيك انت سيد الشي زاتا, إحنا الفي سودانيز دي نضحك ونقشر ونحشّش كمان! أفا .. إحنا عاد مو زملان منير الكتب اسمه في الشمش*

___________________________

*طبعا الح نحشّش عليهم مافيهم حيل ولا مزاج يفهموا التفاصيل الكتيرة دي, فا بدّيهم ليها مختصرة كدا: الباص الماشي قريب للشمش قفّل مكنته زولنا و مضى اسمه كمان

ياود البشرى ، الانطلاق قالوا فى اكتوبر ..
بعداك ممكن الواحد يمد رجليه .. الاطلاق ده ظلوا يأجلوا فيه لعدة سنوات لغاية ما نسيت الموضوع زاتو !!

Quote: وَعْدًا عَلَيْنَا ۚ إِنَّا كُنَّا فَاعِلِينَ

شكرا" دكتور منير أب كرتونه ... قول يا باسط ...
ياخي معقوله (سوداني قح) من حي الشعبيه أكمل
(المراحل التعلمية) داخل بحري ويطرب للنعام
ادم وبعد دا كلو يطلع منك هيك (إنجازات) ...
أنت فخر لنا (كسودانيين).

Quote: انتهيت من الجزء بتاعى سنة ٢٠١١

وما خفي أعظم بالتأكيد ... شيشك علينا ...
تحياتي محمود ...

عزيزنا صلاح الزبير .. لك التحايا العطرة ..

ياخوى من ناحية كرتونة فهى كرتونة لا تسمن ولا تغنى من جوع .. علوم دنيا غير يقينية حتى ولو وصلت درجة اليقين 99.99% فأنا أقدر ناس الـ 0.01% التى فيها الاسرار التى تقلب الحقيقة خيال .. 😁😁
لكن درب الـ99.99% ماشين فيهو ولسان الحال يقول : ماشين فى السكة نمد ..

عزالدين يا صاح ، كل سنة وانت طيب ..
صديقنا د.عادل شكوكو طبعاً خمّن ساى انى فى امريكا هههه .. وانا يعلم الله امريكا ما دخلتها إلاّ ترانزيت ساى 😊😊.. التحية له وللأخ خالد حسن ..

عبدالإله على تواصل طواالى 🍒🍒☺

ودالامين كيف حالك وكل سنة وانتم طيبين..
عليك أمان الله الخواجات ديل بصرفوا على العلوم بدون حساب.. لو القائمين على المشاريع حنكهم سنين فإنهم يستطيعون حلب التمويل مرحلة وراء مرحلة .. وطبعاً فى الآخر مافى زولاً دافعها من جيبه بل المطلوب مبررات سنينة لتوفير المال من جيب اوروبا واتحاد اوروبا ..
طبعاً زيما قلت فالشغل من حيث شغل فإنها الصدفة التى تضعك فى موضع أداء واجب عادى لربما يكون واجب حساس ومهم .. لكن كونه تتخيل حروف اسمك تطير لعالم مجهول فذلك شئ يدعو للتوجس 🙌😌

الدقم وشركاه
بس كدة المسألة بقت واضحة واتحلت على اﻻقل بالنسبة لي
انا اصلا من زمان شاكي في منير دا
وفعلا ..طلع زول ماساهل

التحية للمهندس البديع منير

فعلاً شئ يدعو للمفخرة

ومزيد من التقدم


تحياتي

الف مبروك ياهندسة وواضح تفكيرك المنظم من خلال بوستاتك العميقه...


.

انا غايتو واحد من الناس البتمني اقدم خدمة للبشرية بخلاف استهلاك الفول والعيش (هه)

بالتوفيق للاخ الدكتور منير ......و مزيد من الانجاز ......

بالتوفيق إن شا ء الله أخ منير

يا سلام ياخ أحلى عيدية طلعت طلعت من المستنير منير
نشكرك يامحمود على نشر الفرح فينا

كل عام وانتم بخير منير و محمود و البقية

ما شاء الله، العبقرية + تواضع العلماء، و كمان بروف!

حتى اسمك +س +ت = مستنير ( صحي صحي) . ☺

شكراً للمنبر و للزمن الأدانا فرصة نفخر بيك.

Quote: بس لو كان كمّلت جميلك وختيت الـ1.6 مليار دولار وديعة في بنك السودان، كان ريّحت جارك عمر في الأراضي المنخفضة من التصاوير والمطاردة والشعبطة الحاصلة بين الدولار والجنيه!

تعليق رائع يا استاذ محمد الأمين . 👍

الأخ عمر دفع الله كل سنة و انت طيب

طبعاً إعجابي بكاركتيراتك الذكية المعبرة ما له حدود، لكن عجبتني حكاية الوديعة دي.

التحية ليك يانعمات وكل عام وانتم بخير ..🌺

غايتو اتجرجرنا 9 سنة الى الماضى بعدما ظننته صفحة انطوت 😊..
لكن سبحان من يحى العظام وهى رميم ☺

كل يوم بنكتشف فيك حاجة جديدة يامنير .. ياخ تعيش إنت وتعيش الشعبية ذاتا .
الف الف مبروك وعقبال نشوفك متشعبط ليك في صاروخ وماشي علي زحل 😍

ألف مبروك بروف منير علي الإنجاز العلمي الكبير
دعواتنا وامنياتنا بمزيد من النجاحات وعقبالنا
وكالة الفضاء السودانية.

خبر مفرح
بالتوفيق منير

Quote: شكرا" دكتور منير أب كرتونه ...

مبروك يا دكتور منير..
أين صاحب ال "ساكسفون" ؟ ما تستحى تعال...

كل يوم بنكتشف فيك حاجة جديدة يامنير .. ياخ تعيش إنت وتعيش الشعبية ذاتا .
الف الف مبروك وعقبال نشوفك متشعبط ليك في صاروخ وماشي علي زحل 😍

السيد المسلمي
------------------------------

حي الشعبية بالخرطوم بحري.
حي العباقرة و الموهوبين و المثقفين.
ابناء الفقراء الان تربعوا علي القمم الشاهقة.
و تقلدوا اعلي المناصب بالعلم الغزير.
تسلم الشعبية .
ويسلم العالم الفضائي منير عبد الرحيم.





عزالدين عباس الفحل
ابوظبي

ماقلت إلا الحق ياعزالدين يافحل .. الشعبية دي كانت عبارة عن عالم جميل جدا تجد فيهو النفس والروح السودانية متأصلة فيهم .. زاملت وصادقت إخوان هناك فكانو نعم الرجال هم .. ونعم الصحاب .

....
ياعز الدين سؤال كدا .. درست الثانوية في أي مدرسة ..
كأني عاصرتك في بحري الحكومية .
تحياتي

آسف قصدى السيد المسلمى فى الرد ادناه 🍒🍒🍓🍓🌺🌺

التحايا للجميع.....

يا ود البشرى...إذا انت تبسمت لأن منير معنا هنا في البورد....
طيب انا أعمل شنو ...وانا ( Technically ) قمت بتدريسه (كنت مساعدا للتدريس بالجامعة) بعض مقررات الالكترونيات في آخر سنة له بالجامعة؟!!!

منير قدَم الكثير في تطبيقات الالكترونيات (داخل السودان...و خارجه)....رغم انه يحمل (كرتونة) ...فقط!!!!

تحياتي اخونا منير .....حاليا الجن في الفضاء مشغولون بالتنصت على القرآن ...شيل شيلتك عندما ينتهون من ذلك

Quote: والبداية كانت سنة ٢٠٠٧ وانتهيت من الجزء بتاعى سنة ٢٠١١

اربعة سنين؟!
جنس محركة

الف مبروك يا منير مزيد من التقدم

لكن زي ما قال حاظ روحهم سلبة الناس ديل

انا لو في محلك بمجرد ما اخت مفاتيحي بقول ليهم يلا حاسبونا

الأعزاء محمد المسلمى.. عبدالله الحبيب .. عبدالحفيظ ابوسن.. حسن مكاوى .. زكريا فضل .. حافظ بشير .. وحمدعبدالغفار .. أشكر حضوركم المشرف ..
وزيما كررت وقلت : أهو ربنا أراد إنو شغل انا ماكنت شايفه غير انو تحدى لى كسودانى جايط وسط زحمة الخواجات الجادين جدية صارمة فى هذا المشروع والذى يخليك تتأمل امكانات هؤلاء القوم فى ادارة المشاريع الجهامة بأتيام مختلفة ومن جنسيات وتخصصات مختلفة وبدقة متناهية حيث الـ project management والتخطيط ليهو قيمة وليهو شنة ورنة .. وأنا كتبت عدة مرات عن عجزنا عن ادارة المشروعات الجهامة وقلت اننا عاجزين عن ادارة وتخطيط المنشئات العملاقة نتيجة لضعف التخطيط والنفس القصير وعدم استيعاب الصورة الكبرى وعدم استيعاب التعامل مع الميزانيات الضخمة .. والمنشئات الضخمة هى امثال المطارات، الموانئ، السكك الحديدية، المشاريع الزراعية الكبرى .. المصانع الضخمة .. الجامعات.. إلخ .. وتلاحظوا أن متشئاتنا الضخمة بتاعة الرجال الجد هى ما انشأها الانقليز .. عاينو كل الحاجات الذكرتها دى تلقوها انشاءات انقليز .. وظلت هذه المنشئات تسير وشايلة البلد بقوة الدفع الذاتى ،،لغاية ما فقدت طاقتها مع الزمن ومسكوها السودانيين الذين اهملوا الصيانة والتطوير لغاية مادقت الدلجة .. والعجب إنو الادارات السودانية جعلوها سنام يسترزقوا منها الأبهة والبهرجة الزائفة ..

وأضرب ليكم العجز بمثال حديث، وهو مشكلة المصفاة التى ادخلت البلاد فى نفق مظلم .. فأكاد أجزم أن الادارة التقنية التى ظلت تسير المصفاة هى الايدى الاجنبية الملتزمة بالمواعيد والصيانة والتوقيت الجيد للعمل والجدية الشديدة .. وارجح انه حالما يستلم السودانيون دفة الادارة يبدأ التسيب والاهمال والاتكالية واللامبالاة .. ده طبعاً بدون تعميم ..

نحتاج لنبنى الانسان السودانى المسئول القادر على ادارة منشئات جهامة .. مش مسئول ينتظر المنحة الخارجية والخبراء الأجانب عشان يجوا ينشئوا المنشئة ويركبها ويديرها ويقعد هو يعمل فيها افتتح وانجز وسوى وفعل ويبدأ يستمتع باللامتيازات ولبس البدل والكرفتتات 😬😬

الاخوة الاكارم عاصم فقيرى ، محمدابراهيم، مدثر صديق، ترهاقا ودرديرى كباشى لكم التحايا المعطرة وشكراً على الاطلالة والكلمات الطيبة🍒🍒🍓🌺..
غايتو ياشباب عملتونا زى ولدنا احمد الاخترع الساعة، ودخلتونا فى ضفورنا .. عبارات الثناء دى ما بنقدر عليها .. (ياخوانا نون الجمع دى ليست للتعظيم ، بل لتخفيف الـ "أنا" القاعدة على حافة الغرور) ..

لكم الشكر والود ..

الاخ احمد يسين مرحبتين سلام وكل سنة وانت طيب..
اتمنى تلقانا عند ظنك الحسن .. 🌺

يادكتور منير سلامات وعيد ينعاد عليك بالخير والبركة
نلت العلم وواصلت فيه ولم يزيدك الا تواضع وانت بلغت
نقش حروف اسمك في المركبة وكله بجهدك وتعبك
وتوفيق الله لك مزيد من التقدم والرقي ياصاحب
الحمدلله الذي جعل بيننا عالم نفاخر به



------
غايتوا البتقع فيه بتنجمه عشان كدي كثيرون عملوا منك رايحين

ماقلت إلا الحق ياعزالدين يافحل .. الشعبية دي كانت عبارة عن عالم جميل جدا تجد فيهو النفس والروح السودانية متأصلة فيهم .. زاملت وصادقت إخوان هناك فكانو نعم الرجال هم .. ونعم الصحاب .

....
ياعز الدين سؤال كدا .. درست الثانوية في أي مدرسة ..
كأني عاصرتك في بحري الحكومية .
الشعبية عاااااالم جميل
تحياتي

السيد المسلمي

--------------------------

الحمد لله درست الثانوي.
في مدرسة بحري الحكومية.
تحياتي



عزالدين عباس الفحل
ابوظبي

شكراً بكم جميعاً أيها الأحبة .. والله تفاجأت بمقدار التفاعل بهذه المعلوماية التى لم أكن اتوقع ان تفرح الاخوة والأحباب .. وبكل أمانة ما أجمل الضرا وما اصعب الكشافات !!! ..

الأربعة سنة كانت مليئة بالتحدى لأن تنفيذ الـ flight model او ايا كان اسمه تسبقه مراحل عدة .. تبدأ بالنموذج التجريبى prototype وهذا يتطلب اختبار لأنه يعمل وفق المواصفات من حيث السرغة وكقاءة استهلاك الطاقة واحتمال درجات الحرارة العالية والمنخفضة والمناعة ضد الضوضاء والمناعة ضد الاشعاع النووى والجسيمات المؤينة .. وهذه الاختبارات تتطلب السفر والبقاء لأيام ومن ثم اجتماعات وتقارير وتقييم .. وإذا تطلب الأمر يعاد تصميم الـ prototype وتعاد الاختبارات .. ثم تبدأ مرحلة الـqualification model وهذه كمان الاختبارات فيها تكون اكثر دقة وصرامة وتشمل التدقيق الدقيق فى كل الاختبارات بما فيها اختبار الاشعاع وخاصة اشعة قاما.. كما يتم قياس تأثير الجسيمات الذرية وتخصيصاً البروتونات وهذه اختبارات مكلفة جداً وبتتعمل فى معاهد معدودة .. ومن ثم هناك اختبارات الـaging .. وهى تعريض الموديل لظروف محددة كالحرارة والرطوبة وضوء الشمس والاهتزاوات بصورة يتم تسريعها ليستخلص مناعى الموديل للـaccelerated aging 😊😊😊
اها بعد التأكد ان الـqualifiaation model اجتاز كل هذه الاختبارات المكثفة تبدأ مرحلة الـflight model وهنا يتم تصميم النموذج النهائى .. ومن أهم المراحل واكثرها تعقيداً ودقة هى مراحل هذه الاختبارات المتنوعة والتى تتم فى عدة مناطق منها فى ايطاليا فلورنسا ومنها فى سردينيا ومنها فى بلجيكا ومنها فى معامل ESA فى مدينة نوردويك وهى مدينة صغيرة فى هولندا .. اها فى خلال هذه المدة تتكثف الاجتماعات والسفريات والتقارير الفنية والقرارات الحرجة وضغوط العمل النفسية .. والمشروع بيكون عبارة عن ورشة قارية تساهم فيها مؤسسات بحثية كبيرة وكثيرة من مختلف دول اوروبا.. ولو انت شغال فى احد هذه المشاريع ستكون مثل ترس صغير او صامولة فى ماكينة كبيرة .. ذلك أن شغل الـ space ليس مثل المنتجات العادية .. خيث مثلاً سامسونغ تلقى انو جهازها فيهو عطل فنى تقوم بالراحة تسحبوا من السوق وتعتذر وتعوض ويادار مادخلك شر .. أمل الـflight model فحالما ينطلق تانى خلاس الجوة جوة والبرة برة .. 😊😊😊😊😊

كل عام وأنتم بخير ..
تصدق يا محمود لما جبت الخبر دا أنا قلت يا ود اتقل يمكن محمود ناوي يهظر ..
لكن بعد جا سيد الشيء وأكد المعلومة ..
فرحت شديد لأن للصديق منير محبة في النفس فرضها عليّ كدا بس بدون أن ألتقيه لايف .
بعد كدا الواحد يشوف طريقة يصلو يتصور معا قبال ناس ود البشرى يقشروا بيهو..
مبروك يا دكتور .

مولانا محمد علي طه الملك، سلامات واحترامات، انا بصراحة لمن قريت المنشور بتاعوا في صفحة الفيس قلت ممكن منير بتظارف لكن لمن جابت ليها مصطلحات ورموز قلت كدا الموضوع نجيض، نعم شيء مفرح وبتمني نري مزيدا من السودانيات و السودانيين الناجحين.

*شكرا لكل من تداخل وعلق او قرا ولم يتمكن من التداخل..

خبر مفرح
الف مبرووك
مذيد من النجاح و التفوق باذن الله

بالجد ياجماعة بعد هذا التفاعل هنا وهناك شكيت فى نفسى، وخاصة أنى بنيت كلامى على خبر عابر وفيديو قصير فى قناة الجزيرة جانى عابر فى الفيسبوك وذكرنى المشروع وقلت اه ده مو مشروعى القبال سبعة سنة .. ومنها تذكرت الـchip وحروف الاسم .. !! وكان مفروض اتريث وأشوف الحاصل شنو ؟ يمكن الـchip ليست مسافرة فى المهمة دى !! لكن التفاعلات ما ادتنى فرصة وحصل الشير والبوستات ووو .. الحقيقة خفت وقلبى فرّ وقلت لو الـchip مامضمنة فى السفرية انا اسوى شنو؟
لذلك هسه قبل شوية رسلت ايميل للمسئول عن الجهاز وبعد التحية والتهنئة سألته إن كانت PICAM ضمن الأجهزة المسافرة .. وقد اجاب بالإيجاب وأكد لى ذلك ..
التسرع ما كويس !!😬

اتذكرت الفيديو داك البقول ليك ما تفرح too early وفيهو حارس مرمى شاتو ليهو بلنت ودق فى العراضة .. فقام جارى بالفرحة على زملائه وترك القون.. فقامت الكورة بت الذين جات براها بقدرة قادر ودخلت قون بعدما ارتدت من العراضة وخلت خشم الحارس ملح ملح ..

المهم القيامة دى اخجلتنى والله لكين الاتبلبل يعوم ..

إنجاز علمى مميز يا منير الف مبروك
الاحتفاء بهذا النجاح يشمل شخصك فى المقام الاول والجامعه التى درست بها وكذلك مدارس الغبش التى خرجت منها مثل معظم الاعضاء هنا قبل ثوره التعليم الكاذبه هشه الاساس
حتى وقت ليس ببعيد فى اخر حكومه ديمقراطيه حيث مجانيه التعليم بل ودعم عينى للتلاميذ فى بدايه كل موسم دراسى من زيوت واجبان وعلب التونه هذا عدا الكتب والكراسات
الدرس الخاص كان يسمى درس عصر ويشمل كل الدفعه تقريبا:) وكانت بخت الرضا ومفتشى التعليم للمتابعه الدوريه وناظر مدرسه كجنرال مصغر يلتقى الصغار فى طابور الصباح ونظافه السبت والثلاثاء وكان وكان..... الان يخرج الاطفال من المدارس للمساهمه فى دعم اسرهم اقتصاديا وهناك من يدخل مدرسه بتاتا وهم على بعد كليومترات من العاصمه
حاول يا منير توسع فكره البوست ووضح لنا معايير اختيار استاف العمل وفكره المشروع كيف تنجح فى الحصول على دعم
فى ما يتعلق بكائنات الفضاء الخارجي ننصحك ب ياسين والجكه:)

الاخ دكتور منير
- ما اجمل ان اري البحث العلمي يمشي علي قدمين صحيحين .
- وما اجمل من ذلك ان اري ايقونة باسم سودانيز اون لاين تجمع كل المهتمين بالبحث العلمي ولدي بوست متجدد هنا للفائدة العامة
- ارجو متابعة تسجيل جهدك فهل هنالك صيغة تعاقدية؟ copy right - patent- others ؟

Quote: المهم القيامة دى اخجلتنى والله لكين الاتبلبل يعوم ..

ياخي والله دي قمة التواضع وبدون تكلف مصطنع كمان
اتبلبل يا عم انت قايل نهر الحياة ده بنعبروا كم مره

مبرووك منير وموفق
برقياتك القصيره الفي التنك في المنبر
انا من زمان بقول بتاعة عالم ولا محشش
الحمد لله انها طلعت الاولى
شكراَ الدقم
وبالله شوفو عندنا زي منير وقنواتنا مشغوله بي استضافة رماز وفرفور والبندول
الله في

والله يا نعومي انت تستاهلي اوسكار من الزمرد والياقوت واللؤلؤ وليس فقط من الذهب على تعليقك الرائع::
"" حتى اسمك +س+ت مستنير..صحي صحي""
وكل سنة وكل يوم انت طيبة ..
وكل سنة وانت طيب يا منير ...ومزيد من النجاحات ان شاء الله

بسمات يا حبيبة دي انتي اللي ذوقك حلو و كلك نظر 😊،تسلمي يا قلب.

يا دوبك داخلة عشان أعلق في بوست ( أروع مقال عن القبلية و العنصرية و

التكبر و التعالي) ، فلقيت مفاجأة حلوة، هي تعليقك. تشكري.

يا نسمة أتضح ان المنبر يتميز بالآتي :
فيه مستنيرين حقيقين.
و ناس في طريقها للإستنارة كاملة الدسم.
و أخيراً ناس في بداية الطريق للإستنارة ، يعني إمكانية الإستنارة
متوفرة للجميع، الأ من أبى.

حاجة جميلة جدا" ومحفزة كونو تكون جزو من مشروع كبير زي ده يا هندسة
يحق لك الفخر ويحق لنا الاحتفاء بك .

منير عبد الرحيم

ما شاء الله...رجل موفق...




المهندس خالد حسن إبراهيم ( جردل)
مدير هيئة مياه الخرطوم . سابقا

يا سلاااام ياخ الاخ منير عبد الرحيم.
الرجل الطيب
تحياتنا ليه
اخلاق وعلم وادب




الدكتور عادل شكوكو.
مستشفي في دبي . الامارات

تهانينا للاخ منير ...
ومزيدا من التقدم والنجاح ...
.
.
منير شهادتنا فيه مجروحة ...
راجل كتّاب ومتواضع لأبعد الحدود * ...
وفوق لذلك فهو عالم في مجاله ...
نتمنى له دوام التقدم والنجاح ...
.
.
يا منير ياخ تعالوا زيارات للسودان ...
خلي أهلنا ناس (قريعتي راحت) ديل يستفيدوا من علمكم وخبراتكم ...
فالسودان فيه خامات بشرية ممتازة بس محتاجة لمن يأخذ بيدها ...
.
.
.
.
* الداير يتأكد يمشي مكتبة منير ...
.
نكرر التهاني ...
وبالتوفيق ان شاء الله ...
.

Quote: ياسيف اليزل انا طبعاً المخوفنى انه فى الـchip كتبت الانيشيالز M A A وعشان كده خايف فى الفضاءات البعيدة ديك يلم فيهو جن واللا شيطان واللا مصيبة زمان يختنى فى راسه 😁😁😁😁

جن الاسافير ده كمان بكون عارف كل الأكواد والباصويرد..ده لو لما فيك غايتو الله يستر...

تمت الافراح وكل شي هادي جميل السرور عمانا ولينا باقي زميل ,,,,,, يا زول اتهنا
الشوادي تغني والحواري تميل فاح عبير نسامن زي زهور في خميل ،،،،، يا زول اتهنا
تمت الافراح واملا كاس الراح ويا زول اتهنا ...
هكذا غناها عمنا الجاغريو في زواج محمد ود طه احد فنانين العيلفون في عهد الغناء العذب رحمهما الله ...

من اجمل واسعد اللحظات التي تمر علينا ان نرى احد زملائنا او معارفنا يعتلي مراتب الانجاز وقمم الحياة ,,, فلقد اسعدني الخبر جدا كون المقصود به احد زملائنا في هذا الحوش الوسيع الذي يعتبر دارنا وملاذنا .... ومن دواعي سروري ايضا ان ينتمى هذا الرجل لمحافظة بحري عامة وللشعبية خاصة فاللشعبية معزة خاصة في قلبي ونفسي لذا فرحت كما لم افرح من قبل ..
فالتحية لك اخي الباش مهندس منير والتحية عبرك للشعبية ولكل الاصدقاء والاحباب والاخوان هناك وانا سعيد بوجودي معك في مكان واحد ولك سلامي واحترامي ...

تحياتي : ياسر العيلفون .....

Quote: وانت بلغت نقش حروف اسمك في المركبة

إنت قايل يا ود المسلمي موضوع نقش الحروف دا جا من وين؟ ما من حركات "تذكار من فلان الفلاني" الكانت بتتكتب على سيقان الأشجار أو الأسمنت قبل ما يجف أو مقاعد البصات!

ملايين التبريكات الأخ العزيز د. منير

ومزيدا من الابداع والتفوق

حبيبنا منير ( العالم المجهول )
نعجز عن التعبير بفرحتنا بك كسودانى وكإنسان
جاء من بلاد تأكل الجوع وتقتات الدوارا .....

إنتو شنو شابكنو الشعبية أو يي العبقرية جبدتوا جينات الشوايقة ،يا منير شوف لي ناس ناسا دي رحلتهم متين داير أرسل معاهم شوية أمانات

الف مبروك
مزيدا من التوفيق والأنجازات

منقول

منير عبدالرحيم إلى كوكب عطارد .

تجرى الاستعدادات لإطلاق مركبة تستكشف كوكب عطارد .فى أحد أجهزة هذه المركبة تقبع الأحرف M.A.A منقوشة فى الشريحة الالكترونية " اختصار لاسم Munir Abdelrahim Abdalla منير عبد الرحيم مصمم الشريحة الإلكترونية " التى تمثل قلب الكاميرا الأيونية المسماة PICAM ، وذلك اختصار لـ Planetary Ion CAMera المخصصة لتصوير أيونات العناصر المكونة لكوكب عطارد
المهمة الفضائية اسمها بيبى كولومبو ـــ Bepi Colombo ــ على اسم العالم الايطالى الذى تمكن من حساب المسار المؤدى لمدار الكوكب .. المشروع هو عمل مشترك بين وكالة الفضاء الاوربية ESA واليابانية JAXA .. وتحت مظلة ESA شاركت عدة مراكز بحوث من فرنسا وبلجيكا والنمسا وايطاليا وهولندا .. المركبة الآن تم نقلها لقاعدة الإطلاق بعد تأجيل لعدة سنوات .. رحلة المركبة من كوكب الأرض حتى تستقر فى مداراتها حول عطارد ستستغرق سبع سنوات .. موقع المشروع فى ESA هو: http://sci.esa.int/bepicolombo/http://sci.esa.int/bepicolombo/
تصميم وتصنيع الشرائح الرقميه
منبر عبد الرحيم لمن لا يعرفون
** ابن الشعبية بحري **. 😂
هو الدفعه الرابعة تكنولوجيا فيزياء والكترونات واجهزه
الان مقيم ببلجيكا بمدينة لوڤن ويعتبر من أبرز علماء النانوفيزكس وهو الان يعمل بابحاث في غاية الاهميه بالنسبه للبشريه.
ربنا يوفقه وينفع به الناس
ونفسه يقدم خدمه لجامعة الجزيره في انشاء مختبرات تصميم وتصنيع الشرائح الرقميه المتكامله .
انه مفخرة لجامعة الجزيرة و بحري و السودان و لنا جميعا.


***
ملحوظة :-
منقول من الوتساب.



عزالدين عباس الفحل
ابوظبي

ألف مبروك لأخونا منير عبد الرحيم النجاح والتفوق
وعجبنا وسر بالنا شديد
وأمنياتي لك بالتوفيق في كل مناحي الحياة

التحية والود والتقدير لكم جميعاً ..
سأحاول اجى اقزقز واتونس قليلاً مع مداخلاتكم .. 🍒🍒🍒🍓🍓🍓🍒🍒🍒🌺🌺

لكين يا معاوية الزبير زيما شايفنى اتبليت جنس بل ..😀😀

مافى حل غير البل .. 😬😬

حبينا منير ود عبد الرحيم عبد الله
عز الدين عباس الفحل بيقول انك من علماء النانوفيزيكز nanophysics ...
والله نشعر بالفخر ان سوداني يكون من علماء النانو فيزيكيز ....واذا قدمت لينا شرح مبسط لهذه المادة تكون ما قصرت ....
والحمد لله ان منبرنا العام يضم في عضويته أدباء وشعراء وفنانين وعلماء وأساتذة
ودمتم بالف خير وصحة وعافية

العالم الفضائي الجليل.
منير عبد الرحيم.
ابن الشعبية. الخرطوم لجري
الآن يحق للسودان ان يكرم شخصك ويبجلك
عالم من علماء الفلك و الفضاء.
في وكالة ناسا الفضائية.
الان من حق للشعب السوداني و المديا.
ان تتعرف علي شخصك الكريم اكثر.
استميحك عذرا ان انزل صورة الشخصيه هنا ؟
هلا اذنت لي ؟؟؟




عزالدين عباس الفحل
ابوظبي

الف مبروك..تستحق الفخر والتقدير

الحمد لله الذي وفق الأخ العزيز منير في هذا العمل ، و قد بذل منير جهد كبير خلال فترة المشروع و كان العم المرحوم عبد الرحيم والد الأخ منير عندما يتصل به منير يسأله : اها المشروع ماشي كيف ؟ (طبعا دون معرفة بالتفاصيل و لكن كانوا يعرفون ان هناك مشروع كبير يشغل الأخ منير) ثم يدعو له بالتوفيق و النجاح..الف مبروك للأخ منير هذا النجاح و لجامعة الجزيرة و للسودان.من صفحة الأخ منير بالفيسبوك:

Quote: ...الاستعداد لإطلاق مركبة تستكشف كوكب عطارد ..فى أحد أجهزة هذه المركبة تقبع الأحرف الأولى لـصاحب البوست Munir Munir M.A.A 😊 منقوشة فى الشريحة الالكترونية التى تمثل قلب الكاميرا الأيونية المسماة PICAM ، وذلك اختصار لـ Planetary Ion CAMera المخصصة لتصوير أيونات العناصر المكونة لكوكب عطارد وأجوائه (تحليل طيفى بقياس الكتلة Mass spectrometry) .. دورى فى هذا المشروع كان تصميم الجزء الأمامى من الدائرة الالكترونية الدقيقة فى PICAM.. وأنهيت العمل فيه سنة ٢٠١١ .. 😊المهمة الفضائية اسمها بيبى كولومبو ـــ Bepi Colombo ــ على اسم العالم الايطالى الذى تمكن من حساب المسار المؤدى لمدار الكوكب .. المشروع هو عمل مشترك بين وكالة الفضاء الاوربية ESA واليابانية JAXA .. وتحت مظلة ESA شاركت عدة مراكز بحوث من فرنسا وبلجيكا والنمسا وايطاليا وهولندا وغيرها ..المركبة الآن تم نقلها لقاعدة الإطلاق بعد تأجيل لعدة سنوات .. رحلة المركبة من كوكب الأرض حتى تستقر فى مداراتها حول عطارد ستستغرق سبع سنوات ..موقع المشروع فى ESA هو:http://sci.esa.int/bepicolombo/http://sci.esa.int/bepicolombo/[/QUOTEhttp://sci.esa.int/bepicolombo/http://sci.esa.int/bepicolombo/[/QUOTE]

---

Post: #75 Title: Re: عضو سودانيزاونلاين يساهم في اطلاق مركبة ل Author: الحاج حمد الحاج Date: 06-24-2018, 12:11 PM Parent: #74 الأخ د.منير عيد الرحيم عبد الله درس الابتدائية بمدرسة الشعبية جنوب ثم الأميرية (2) ثم مدرسة بحري الحكومية ثم جامعة الجزيرة ( قسم الفيزياء التطبيقية والالكترونيات والأجهزة) - ماجستير السويد - جامعة الخرطوم - دكتوراة السويد.

---

Post: #76 Title: Re: عضو سودانيزاونلاين يساهم في اطلاق مركبة ل Author: محمد حمزة الحسين Date: 06-24-2018, 02:12 PM Parent: #75 Quote: حاجة جميلة جدا" ومحفزة كونو تكون جزو من مشروع كبير زي ده يا هندسة يحق لك الفخر ويحق لنا الاحتفاء بك . كل عام وانت بالف خير يا دكتور منير : : : : : : : مع التحيات لله الزاكيات

---

Post: #77 Title: Re: عضو سودانيزاونلاين يساهم في اطلاق مركبة ل Author: عمر أبوعاقلة Date: 06-24-2018, 05:44 PM Parent: #76 غايتو للضمان كدا استحقيت لقب مستنير تحياتي يا بروف .. وموفق دائماً ان شاء الله

---

Post: #78 Title: Re: عضو سودانيزاونلاين يساهم في اطلاق مركبة ل Author: الفاتح ميرغني Date: 06-24-2018, 05:53 PM Parent: #77 بالله الانجازات دي كلها يا منير وقاعد معانا هنا؟ اطيب الأمنيات بالمزيد من النجاحات. محبتي

---

Post: #79 Title: Re: عضو سودانيزاونلاين يساهم في اطلاق مركبة ل Author: Biraima M Adam Date: 06-24-2018, 05:57 PM Parent: #76 يا سلام والله خبر يسر النفس .. ألف مبروك يا دكتور منير .. مزيد من الأنجاز يا رب .. ونسأل الله أن يرفع قدرك ومكانتك ويزيددك من علمه وفضله .. كما رفعت أسمنا .. بريمة

---

Post: #80 Title: Re: عضو سودانيزاونلاين يساهم في اطلاق مركبة ل Author: سيف ود الخواجة Date: 06-24-2018, 06:21 PM Parent: #79 الأخ د. منير ربنا يوفقك ويعلى مراتبك وحق لنا بك الفخار

---

Post: #81 Title: Re: عضو سودانيزاونلاين يساهم في اطلاق مركبة ل Author: الصادق اسماعيل Date: 06-24-2018, 11:28 PM Parent: #80 اوووووه زميلنا دكتور منير طبعاً منير زول متواضع بطبعه وفوق لي كدا بالجد بيكون خجلان وما عارف يقول ليكم شنو ودا طبعه لكن بالجد منير عالم بالدرب العديل (وانا مستغرب المقعدوا مع الوهم الزينا ديل شنو ههههه)، رجل تعتز بالنقاش معاه وتستفيد اكتر ان اختلفت معه. والله خبر مفرح، والمفرح اكتر ان يعرف الناس هنا وفي السودان وفي العالم قيمة عالم مثل منير يساهم بعلمه فيما ينفع البشرية ولا يكتفي بذلك بل يساهم مع الناس في رفع الوعي بقالضايا اليومية وهذا ديدن العلماء ظل منير منذ اشتراكه هنا يناقش ويحاور وينفعل ويكاجر ولكنه وللحقيقة ظل يحترم الجميع ويرد على اي مداخلة بصبر ويقدم مواضيع جميلة وملاحظات دقيقة، استمتعت طوال الوقت بمداخلاتي معه وحتى اختلافي معه، فمنير من الذين لا تأخذهم العزة بالاثم بل يتراجع ويغير موقفه وفقاً للمعطيات التي امامه وتحليله لها. والله نفرح له من كل قلبنا وامنياتنتا له دوماًبالنجاح واعتقد ان منير ظل وحتى الآن يحتفظ فقط بجنسيته السودانية وهذا أمر يجعل هذا الانجاز مسجل باسم شخص سوداني كامل الدسم وليس هولندي او بلجيكي من اصل سوداني عشت طفولتي في شمبات وكان يفصلنا عن الشعبية خور فقط وقد درس بعض ابناء الشعبية معنا في شمبات الغربية المزدوجة وغلبناهم في الكورة كثيراً وغلبونا ربما تقابلنا في مباراة ما او مناسبة ما حينها، لكن للحقيقة احد الاشخاص الذين اتمنى مقابلتهم والونسة معاهم.

---

Post: #93 Title: Re: عضو سودانيزاونلاين يساهم في اطلاق مركبة ل Author: Munir Date: 07-16-2018, 11:20 PM Parent: #80 تحياتى للغالين يوسف الطيب احمد ادريس .. عزالدين .. بسمات .. تماضر الطاهر .. الحاج حمد .. محمد حمزة الحسين .. عمر ابوعاقلة .. الفاتح ميرغنى .. بريمة محمد آدم .. سيف ودالخواجة .. شكراً لمشاعركم الغامرة .. زيما قلت فى مكان ما ، حسستونى بيوم العرس عندما كنت داخل فى ضفورى ومحاول اتضارى فى ضل الكشافات 😁 لكين اهو مرات من حيث لا تحتسب تلقى نفسك فى الصقيعة.. 😁😁 وبمناسبة الصقيعة دى اتذكر مرة الفنان حمدالريح فى لقاء تلفزيونى قال انو ما بيرتاح انو يقيف قدام الجمهور بدون اوركسترا ، لأنو يحس كأنه واقف فى الصقيعة .. 😁😁 بالنسبة لى الصقيعة زى الحالة دى .. أن، تكون محط اهتمام وانت مش أد المقام ☺☺ 🌺🌺🌺 عزالدين ياصديقى ليتنا نتجنب الصور .. فما لم يتبرع صاحب الصورة بنشر صورته بنفسه انا شخصياً لا انشر صورة تخص شخص آخر ابداً ولا حتى اعادة نشرها .. عفواً صديقى .. بنتنا بسمات سلامات .. بالنسبة لسؤالك عن النانوفيزيكس : فأنا لست متخصصاً نانوفيزيكس .. وعبارة نانو ارتبطت بالنانوتكنولوجى وهى العلوم المتعلقة بدراسة وتطبيقات التقنيات فى مقاييس النانومتر وذلك ليس محصوراً على الفيزياء ، بل يشمل علوم فيزياء وكيمياء وبيولوجى وو .. وانا تخرجت من قسم الفيزياء التطبيقية والالكترونيات والاجهزة من كلية العلوم والتكنولوجيا بجامعة الجزيرة .. وهى كانت كلية جديدة ومستحدثة خليط مابين العلوم والهندسة حيث كانت هيئة التدريس خليط من دكاترة الفيزياء والهندسة .. فكنا ندرس كورسات الفيزياء وكورسات الهندسة .. وخلط الفيزياء والهندسة ينتج كلمة تكنولوجيا ــ أظن ــ او هكذا ارادوها شئ جديد هجين بين العلوم والهندسة .. وذلك خلق مشكلة للخريج فى سوق العمل فلم يكن معروف هل يعتبر خريج علوم ام خريج هندسة ؟ فهو يستوفى الصفتين .. المهم فى الآخر تم حسم الأمر وتمت اعتماد الكلية فى المجلس الهندسى وسميت كلية الهندسة والتكنولوجيا .. فأنا بحكم الخلفية الفيزيائية مع هندسة الالكترونيات اشتغلت مساعد باحث فى قسم الالكترونيات فى هيئة الطاقة الذرية .. وفى هذا القسم فإن هندسة الالكترونيات هى هندسة الالكترونيات النووية او nuclear electronics .. وهى ما يختص بالتعامل مع الاجهزة النووية او قولى أجهزة قياس الاشعاعات النووية .. والمهندسين المتخصصين فى هذه الانواع من الاجهزة هم مهندسى هيئة الطاقة الذرية واذكر منهم فى زمنى الاخ سينيرنا لادو وانى كينى ، ومكرم هارون ، ماجدولين الفونس ، ومحمداحمد ابشر ، وهيثم حسن عبدالجليل ، وأمين مدثر وجستن ... ومحمدالمليح وآخرون من بعدنا.. ومن مهندسى الاجهزة الذرية/النووية ايضاً أصدقائنا وزملائنا فى مستشفى الذرة المسئولين عن صيانة ومعايرة أجهزة الاشعاع للتشخيص والعلاج فى المستشفى .. وفى زمنا داك كان هناك صديقنا وسنيرنا المليح البشير وصديقنا وسينيرنا جون افروت أكيج ومن بعدهم صديقى وزميلى عبدالله يعقوب والأخوة من الدفعات اللاحقة الباقر احمد وعبدالعظيم وغيرهم .. ذلك كان مجال عملى فى السودان .. ثم فى مرحلة دراسة الدكتوراه انتقلت لمجال تصميم الدوائر الالكترونية المتكاملة integrated circuits .. وبرضو كان الشغل فى مجال الالكترونيات النووية nuclear electronics والـnuclear physics و الـdevice physics .. بالنسبة للالكترونيات فالتقدم مرتبط بمدى تصغير حجم الترانسستور ويقاس ذلك بطول بوابة تحكم الترانسستور المسمى gate length .. والـgate length كان فى التسعينات اصغر gate طولها فى حدود المايكروميتر .. ثم ظلت تصغر عبر السنين حتى وصلت لـ 40نانوميتر وحتى 7 نانوميتر .. وصغر حجم الترانسستور هو ما يجعل عدد الترانسسترات فى السنتميتر المربع الواحد ييعد بالملايين لذلك زادت السعة التخزينية للكمبيوترات ــ memory ــ .. وكذلك مثلاً عدد البكسلات فى الكاميرات.. فمثلاً الآن أكبر شريحة الكترونية مساحتها ممكن تكون 2x2 سنتمتر وحجم البكسل الآن حوالى 1.1x1.1 مايكروميتر .. يبقى احسب الـ2x2 سنتمتر ممكن تحوى كم بكسل بحجم 1.1x1.1مايكروميتر !! .. عشان كده تلقى كاميرة الموبايل حصلت الـ20 ميقابكسل.. وهكذا .. إذن، دخول الـgate length لمقاييس صغيرة تقاس بالنانومتر فكأنما ممكن نقول nano-electronics .. فهذا عصر النانو.. نانو الكترونيكس.. نانوفيزيكس .. نانوكيمسترى .. إلخ .. وذلك طبعاً فيما يتعلق بقياس المسافة (نانوميتر).. والعلم ماشى وزيما تعدينا مرحلة المايكروميتر والمايكروالكترونكس فسيأتى عصر البيكوميتر (1/1000 من النانوميتر.. والنانوميتر زاتو يساوى 1/1000 من المايكروميتر .. والمايكرويتر زاته يساوى 1/1000000 من المتر ☺) .. وهكذا .. أما طبعاً قياسات الزمن فالناس بالراحة بتقيس البيكوسكند pico-second والفيمتوسكند .. الكلام طال واتجرجر وراء كلمة نانوفيزيكس .. وآسف للإطالة ..

---

Post: #92 Title: Re: عضو سودانيزاونلاين يساهم في اطلاق مركبة ل Author: Munir Date: 07-13-2018, 07:57 PM Parent: #67 الافاضل قسم الفضيل مضوى .. سيف اليزل سعد .. ياسر السر.. عبدالعزيز عيسى .. عمر دفع الله .. muntasir .. عباس محمود .. لكم التحايا والود .. كلماتكم الواحد يلبسها قلائد ويحوم ☺☺ .. داير أعيش زول ليهو قيمة .. ومشاعركم ادتنى قيمة اكبر منى ياخ .. 🍒🍓🌺❤

---

Post: #85 Title: Re: عضو سودانيزاونلاين يساهم في اطلاق مركبة ل Author: Munir Date: 06-27-2018, 05:05 PM Parent: #43 الأخوة مولانا محمدعلى طه الملك، وناصر أمين شكراً لكم .. بالطريقة بتاعتكم دى خايف أقوم تشيلنى هاشمية وارفع القزاز 😁😁 وياالملك الله عالم الشعور متبادل وبرضو عندى ليك محبة وود لله فى الله .. 🍒🍒🌺🌺🍒🍒

---

Post: #84 Title: Re: عضو سودانيزاونلاين يساهم في اطلاق مركبة ل Author: walid taha Date: 06-25-2018, 03:46 PM Parent: #1 وهل من بيننا من كان يعتقد إنو منير (زول ساكت) ؟!! بالغنا لو ده حاصل !!!

---

Post: #86 Title: Re: عضو سودانيزاونلاين يساهم في اطلاق مركبة ل Author: Munir Date: 07-08-2018, 05:26 PM Parent: #84 الأكارم Nasser Amin .. Abdelrahim Mohamed Salih .. ابراهيم حسين .. معاوية الزبير .. على محمد الفكى .. عثمان الإمام .. التحية والتقدير ليكم .. طبعاً أهو زيما شايفين الحصل حصل والمهم أنى من خلال التفاعل مع هذه الجزئية الخبرية قاعد أتأمل فى الروح الإيجابية والسرور الذى ينتاب السودانى لمواطنه السودانى بدون حتى معرفته شخصياً ... زول مابتعرفه تقوم تفرح ليهو وتتكلف تكتب تهنئة ليهو ، فتلك روح مفعمة بالخير وحب الخير للآخر ، بعكس الأرواح السالبة التى تنقبض بفرح الآخر .. فى الآخر طبعاً الزول ما بطبع البوست يوديهو البنك يصرفوا ليهو الفلة هههه.. يكفى انو الزول يصرف من الود من بنك القلوب 🌺🌺🌺 الشغل فى اتيام متفرقة والسفر ومقابلة اجناس مختلفة يخلى الزول يتعلم كتير .. ليس فقط الجانب المهنى، بل ايضاً الانضباط والاحكام والمسئولية وعواقب مايترتب على الأخطاء من تعطيل وتكاليف مالية وزمنية .. فالمرء بيكون فى وجه المدفع مباشرة .. وياعبدالرحيم أنا شغلى كان اصلاً تصميم دوائر الكترونية وتصميم الالكترونيات على مستوى الشرائح او قل الـ (integrated circuits (ICs للأسف لسه لم يتضمن فى مقررات الهندسة الالكترونية فى جامعاتنا السودلنية وربما ليس فى أغلب افريقيا .. وهو مايجعلها متخلفة عن الحد الأدنى من دول العالم المستخدمة لها بـأكثر من كم وعشرين سنة !!.. وليس هناك اهتمام حتى بالـboard level design أو قل الـprinted circuit boards أو PCBs.. وفى هذا المستوى يتم التصميم بإستخدام ICs جاهزة .. وأذكر أن جامعة الجزيرة هى أول جامعة ادخلت تقنية الـPCBs على مستوى مشاريع تخريج الطلبة ولكن اذكر كان هناك خواجة هولندى يعمل فى معامل كلية العلوم بجامعة الخرطوم يستخدم هذه التقنية على مااعتقد .. ومن جامعة الجزيرة نقلنا استخدامها لهيئة الطاقة الذرية السودانية التى كان عمل بها قبلى الصديق من الدفعات السابقة لى فى الجامعة اسمه من الجنوب وهو لادو وانى كينى .. المهم أننى بالجد حسير على عدم تطوير تعليم هندسة الالكترونيات لإقتحام مجال تصميم الـICs .. فذهن الطالب السودانى جائع ومتلهف لإلتهام الجديد من العلوم بدلاً عن مضغ تاريخها المسيخ ..

---

Post: #87 Title: Re: عضو سودانيزاونلاين يساهم في اطلاق مركبة ل Author: علي عبدالوهاب عثمان Date: 07-08-2018, 06:00 PM Parent: #86 فذهن الطالب السودانى جائع ومتلهف لإلتهام الجديد من العلوم بدلاً عن مضغ تاريخها المسيخ .. =================== شكراً منير الحبيب على هذه العبارة التي تلخص كل شيء هي رسالة بليغة للمسئولين .. ولكن سوف يتم إجهاضها بعمل اللجان ، وورش العمل ، وأوراق البحث ، والرفع بالنتائج ... إلخ وإذا دخلت عبارة ( وقد وجه الوزير بتضافر الجهود حيال تنفيذ ...إلخ ) كان علينا السلام .. الحبيب منير من أجل أبنائنا خليك قريب من الوطن فلابد من زيارة للجامعات في إجازاتك والتواصل مع الدوائر التي لديها إستعداد علمي التحية لصاحب البوست ..

---

Post: #88 Title: Re: عضو سودانيزاونلاين يساهم في اطلاق مركبة ل Author: محمد فضل الله المكى Date: 07-09-2018, 06:22 AM Parent: #87 لمن الواحد يسمع بسوداني أصبح رقم في طابور التميز... أكيد راسو بيكبر والمركوب بيضيق على كرعيهو . . نفخر بك باشمهندس منير

---

Post: #89 Title: Re: عضو سودانيزاونلاين يساهم في اطلاق مركبة ل Author: Mannan Date: 07-09-2018, 09:39 AM Parent: #88 عالم الفضاء الجميل والمتواضع بروف منير عبدالرحيم عبدالله .... شكرا للأخ محمود الدقم على تعريف هذا العالم المتواضع والمفخرة لنا نحن جماهير سودانيزاونلاين الكادحة... نحتاج لمثل هذه البوستات لنطمئن بأننا شعب عظيم به عباقرة وعقول يمكن أن تخرجنا من الظلمات الى النور. والله يا منير (كدة حافى) انك لمفخرة عظيمة للسودان الحزين الذي يحكمه الأقزام قبل أن تكون مفخرة علمية جبارة يقدمها السودان المفترى عليه هدية للعالم الذي يجرى بقوة نحو المستقبل وقادتنا الأقزام يرقصون ويتغنون (أمريكا .. روسيا قد دنا عذابها ... وامريكا لمي جدادك ... وأمريكا تحت جزمتى الخ) .. علماؤنا واحات نستريح فى ظلها عندما يحكمنا ويقتلنا حكامنا الصغار ...على الأقل نشعر بالتماسك فى لحظات الإحباط واليأس والهزيمة... بصراحة شعرت بنشوة بالغة عندما علمت من هذا البوست الجميل أن اسمك المنير سيكون من ضمن أسماء كوكبة العلماء الذين سيدورون بعقولهم الجبارة حول هذا الكوكب العجيب وانك باسمك المنير ستطارد كوكب عطارد وتدور حوله لسبر أغوار وعجائب هذا الكوكب البعيد والعجيب وأصغر الكواكب الشمسية... ضحكت ايضا من خفة الدم وروحك المرحة وتواضع العلماء عندما ذكرت قفشة حارس المرمي الأهبل... Quote: اتذكرت الفيديو داك البقول ليك ما تفرح too early وفيهو حارس مرمى شاتو ليهو بلنت ودق فى العراضة .. فقام جارى بالفرحة على زملائه وترك القون.. فقامت الكورة بت الذين جات براها بقدرة قادر ودخلت قون بعدما ارتدت من العراضة وخلت خشم الحارس ملح ملح الى الأمام ايها العالم العبقري الجليل ولا تنسى أن تحدثنا عن بعض ذكرياتك الجميلة وطفولتك ومراحل حياتك فانت ملك لهذا الوطن المعطاء بغير حساب.. الوطن الجميل الذي يمتطيه حكام قبيحون... نورالدين منان / نوري جليلة

---

Post: #90 Title: Re: عضو سودانيزاونلاين يساهم في اطلاق مركبة ل Author: محمود الدقم Date: 07-09-2018, 10:38 AM Parent: #89 لا يفهم قدر الرجال الا الرجال، شكرا للجميع اخوات واخوة وشكرا سفيرنا منان..

---

Post: #91 Title: Re: عضو سودانيزاونلاين يساهم في اطلاق مركبة ل Author: Osama Mirghani Date: 07-10-2018, 07:05 AM Parent: #88 والله يا بروف ...بدون ما ألاقيك شعرت بأني أتمني أكون صاحبك .....أسلوبك رشيق ...وتواضعك غير مصطنع ...وفوق ذلك عالم شارك في صُنع التاريخ .......ومن الشعبية كمان !!!!!.. يعني ناس الأميرية 2 وبحري الثانوية) سوداني .. وبك أفتخر

---

Post: #94 Title: Re: عضو سودانيزاونلاين يساهم في اطلاق مركبة ل Author: Munir Date: 07-21-2018, 08:29 PM Parent: #88 الأعزاء د.نعمات ، تانى، والصادق اسماعيل ، ووليد طه، واستاذنا على عبدالوهاب عثمان.. ممنون لكم وماخليتوا لى جنبة أتكئ عليها ☺.. وياوليد طبعاً السكوت من ذهب واحسن الزول يكون زوول ساكت هههه .. ياالصادق والله انا زاتى معجب برحابة صدرك فى النقاش وعدم التطرف والهتافية .. والزول لمن تلقاهو معتدل ومتزن فى نقاشه تحس انك زاتك مفروض تتزن وتعتدل وتتنازل وتعيد النظر فى رأيك لأن نصف الحقيقة عند من يناقشك وتختلف زوايا النظر.. فتلاحظ مثلاً ان الناس اجمعت على أن البشير كان كج وفأل سئ على كرواتيا وفى نفس الوقت جاكم ودالباوقة وقال الفرنسيين مبسوطين من البشير لأنه كان فأل حسن لفرنسا .. واخد بالك؟ هههههه .. يانعمات دحين كلمة مستنيرين دى مش اسم الماسونيين واللا انا ملحبط هههه ؟ فملاحظ انه ااصبحت تطلق على كل رافض للدين والعادات والتقاليد ووو او بإختصار وصف مستتر للالحاد .. وبهذا المفهوم فيمكن تقولى على ظلامى وافتخر 😁.. والدليل على ظلاميتى البوست بتاع مابين الكفر والايمان والعلم والخرافة .. حيث ذكرت مامعناه إنو الخرافة ممكن تكون اقصى من العلم اذ انها منتوج ذهنى لم يتوصل الناس لتحقيقه بعد وكم من الخرافات اصبحت واقع معلوم ومجرب ومعترف به .. استاذنا على عبدالوهاب عثمان .. والله ياخى للأسف زيما شايف اهو نحن شغالين برة بلدنا وماقادرين نقدم شئ ملموس .. عن نفسى ظللت أتمنى أن تنتقل دراسة الالكترونيات من مستوى بورد التجارب البدائى لتقنية الـprinted circuit board ومنها لمستوى الـchip design .. وانا شبه متأكد انه ستكون هناك شراهة من الطلاب لإلتهام هذه التقنيات .. بس ما أظن المسئولين مستعدين للإنفاق على متطلبات هذا التعليم رغم أنها بسيطة .. فرخصة استعمال بعض برامج التصميم تصل لمئات الآلاف من الدولارات وممكن القسم الواحد يحتاج لعدة licenses .. واضف لذلك تكاليف تصنيع الدوائر الاختبارية لمشاريع الطلاب الخ .. تأمل هل ستنفق الحكومة على ذلك بينما لا تنفق مئة مليون لصيانة المصفاة الرئيسية التى اوقفت الحياة فى البلد بينما حرامى واحد ذو سطوة يملك أضعاف المبلغ ، ومع النهب الممنهج ؟؟ .. نحن راس خيطنا ضائع ياخ ..😬😬

---

Post: #95 Title: Re: عضو سودانيزاونلاين يساهم في اطلاق مركبة ل Author: عبدالعظيم عثمان Date: 07-21-2018, 08:51 PM Parent: #94 شكرا يا محمود الدقم علي هذا البوست ومبروك يا منير ومزيدا من النجاح والتوفيق طول الزمن دا منير لا جا قشر أو طالبنا بأتوآت إجتماعية , يمشي في الأسواق ويأكل القديد ويناقرنا ويشعبط في رقبتنا مناقشا .. زي منير دا لم يكلف المجتمع الصغير (المنبر) ما لايطيق ومؤكد لن يفعل خارجه وما رفع نخرته ولا نفخ نفسه ( دا السلوك المطلوب من قبل المتعلمين) منير دا أنا ما بعرفه أكثر من حدود هذا الإسفير ولكن أتوقع نفس هذا السلوك علي أرض الواقع مجتمعنا محتاج لي نزول المتعلمين من الأبراج العاجية التي صنعوها لأنفسهم , محتاجين بشدة لنماذج من العلماء والمثقفين المتواضعين المستعدين لخدمة الناس بالسلوك أولا تحياتي للجميع

---

Post: #96 Title: Re: عضو سودانيزاونلاين يساهم في اطلاق مركبة ل Author: Munir Date: 07-25-2018, 11:45 AM Parent: #95 اخوتى العمالقة منان .. اسامة ميرغنى .. محمد فضل الله المكى .. وعبدالعظيم عثمان .. والله أثقلتم كاهلى بالعجز عن التعبير عن امتنانى لكلماتكم التى ترد الروح وترفع المعنويات المدمرة بسبب الحال الشاذ الذى تمر به بلادنا .. وللأمانة فإنها الظروف والصدف التى وضعتنى كأحد المصممين لتلك الـدائرة الالكترونية التى لا تتعدى مساحتها مساحة ظفر اصبع اليد الأصغر، والتى هى مثلها مثل ملايين الدوائر ، سوى أنها اكتسبت خصوصيتها لأنها قطرة فى محيط أجهزة كثيرة ومعقدة مرتبطة بمهمة فضائية.. وياعزيزى محمدفضل الله الذى يسعدنى فى هذا البوست ليس الإعلام بالمشروع ذاته والذى زيما ذكرت كان قد مرّ على كخبر عابر من قناة الجزيرة وأنا اتصفح الفيسبوك .. فقفزت فى ذهنى ذكرى المشروع وقمت ارتجلت عنه بعض السطور فى صفحتى المهجورة .. فإذا ببعض الاصدقاء سرعان ما عملوا share واصبحت امام الأمر الواقع .. واضطربت لأنى ماكنت متأكد إن كانت تلك الدائرة ستكون ضمن اجهزة المركبة .. فقمت بقلق تواصلت مع الدكتور المسئول عن تجميع كل اجزاء الجهاز فى النمسا ، وما دخلت الضل إلاّ بعدما أكد لى تضمين الكاميرا فى المهمة .. اذن، زيما قلت فإن انعكاس هذا البوست بالنسبة لى هو انكشاف النفوس الشفيفة التى تفرح بخبر سمح عن سودانى .. وكمان لا تقرأ وتقلب الصفحة ، بل تكلف نفسها بالكتابة والتعبير رغم عناء الكتابة ☺☺ وياالعزيز نورالدين منان الشكر لك أطنان على كلماتك التى سأتوارى فى ظلها هههه .. وأنا جيل بداية السلم التعليمى ودرست فى الشعبية جنوب الابتدائية ومنها الأميرية ٢ ثم بحرى الحكومية ومنها لجامعة الجزيرة .. وأجمل مرحلة كانت الابتدائية والطفولة البسيطة ثم لتتعقد الحياة شيئاً فشيئاً كلما تقدمت المراحل والسنون ، لغاية ما هسه وصلنا مرحلة التعقيد الما عنده حل .. ويحلنا الحلّ بلة 😌😌 .. اسامة ميرغنى لك التحية والود ويانا ناس الاميرية٢ حيث وحين هيبة التعليم والمعلمين لدرجة تتهيب المرور قرب مكاتب المعلمين والعجب مكتب الناظر والوكيل .. عليك أمان الله لا أنسى يوماً جاء داخل علي فصلنا ــ أولى جنوب ــ الناظر سيداحمد الرشيد (المشهور بالسحار) وكانت الحصة فاضية وجاء داخل زى أبوالهول وملأها لينا reading هههه .. أقول ليك لمن قال طلعوا كتب الـreaders فكأنما صبت فوقنا المطرة .. والفصل صننننننننننن .. وأوعك تغلط تطقش الدرج ويعمل صوت او كركبة لأنو طوالى ستلفت نظر السحار ويقومك تقرأ ليك صفحة أو معنى كلمة انجليزية .. تلك كانت اصعب حصة تمر علينا .. وبالمناسبة نفس الشعور متبادل مع شخصك الرائق الراقى التى تكشفها الصورة ومداخلاتك الرصينة فى هذا المنبر على قلتها .. وإن شاءالله لو حيين بنتقابل والدنيا ضيقة .. ياعبدالعظيم ياصاحب شكراً لحسن الظن .. وياخى الزول يقشر على شنو عليك الله؟ .. علومنا البنقرأ فيها دى كوم وتهذيب النفوس كوم .. وبالنسبة لى بس الله يقدرنا على تهذيب النفوس .. القراية دى بيقرأها الصالح والطالح .. والذين يبتكرون اسلحة الدمار الشامل ديلاك عباقرة عديل .. ههههه .. والقشرة والتفاخر ليس إلاّ أحد أعراض النفوس المريضة، واللا شنو؟ 😉😉

---

Post: #97 Title: Re: عضو سودانيزاونلاين يساهم في اطلاق مركبة ل Author: الصادق عبدالله الحسن Date: 07-26-2018, 09:55 PM Parent: #96 = ... .. .

---

Post: #98 Title: Re: عضو سودانيزاونلاين يساهم في اطلاق مركبة ل Author: Munir Date: 08-02-2018, 10:12 AM Parent: #97 سلامات أخى الصادق عبدالله .. الزهور بسمت لينا .. 🌺🌺 🍒🍒🍒🍒🍒🍒