الطيب سيخة يزعم تمكنه من تحديد موعد ليلة القدر

11:54 PM June, 04 2018

سودانيز اون لاين
Abdullah Idrees-Sudan
مكتبتى
رابط مختصر

نقلا عن الراكوبة

Quote: تمكن مركز إعلامي في الخرطوم، يديره صهر الرئيس البشير، من إعادة اللواء طبيب "م" الطيب محمد خير "الطيب سيخة" إلى الأضواء مجدداً، عبر مؤتمر صحفي للكشف عن نظرية جديدة لحساب ليلة القدر. وأعلن مركز طيبة برس المملوك للإعلامي وصهر الرئيس، محمد لطيف، عن مؤتمر صحفي لسيخة يوم الثلاثاء، لتحديد موعد ليلة القدر، بالتزامن مع دخول العشر الأواخر من رمضان الفضيل. وبعد سنوات من السلطة انحسرت الأضواء عن سيخة الذي تحول إلى علوم الدين والتصوف وانجز دكتوراة في القرآن الكريم. ويعتبر سيخة أحدى مجلس قيادة الثورة المنفذ لانقلاب 1989 ومن اشهر كوادر العنف في الجامعات، وتشير إليه اصابع الاتهام في مقتل الطبيب علي فضل في المعتقل.

لييلة قدر اكتر من انو يكون هذا الطيب موضوعا للاخبار

شوف عليك الله مصايب الدنيا فينا
الناس حاجزين وقاطعين تذاكرهم الماشي القمر والماشي المريخ
والغاشي بلوتو عندو خالتو كاسرة كراعا ، وصاحبنا الدجال ده
قال عايز يحسب ليلة القدر
قول ليهو عليك الله اعزم البشير ده معاك sleep-over
يوم نزولا كان تفك ليهو تعريجتو دي

وجاء في الاثر ان احدهم وقد حلت العشر الاواخر قد قرر ، مستعينا بكل ما حصل عليه من علوم و فنون العكلتة ، انو لازم السنة دي ليلة القدر تغشا بيتو ، ما ممكن ياخ يسمع بيها سمع كل سنة !
عمك صلى العشا والتراويح وجاب ابريقو ومصلايتو ومصحفو وقال لي الحاجة "الليلة لا بيني ولا بينكم " ، لا نجوت ان نجت ، والتوب الفرمالة ده بريحك منو .. وطبل عليهو الاوضة من جوة
وصنقر فرد صنقيرة لامن بقا يشوف المصحف ده قدامو جبل ..
أهااااااااااا
وبينما هو منهمك في تلاوته ، فإذا ببرق يشع ويملأ غرفته وصوت قوي واضح يسأله "يا حاج ابراهيم دعوتك مستجابة ، قول " ..
تلعثم الحاج وارتبك وبدلا من يسأل :
يا ليلة القدر تملي لي حوشي ده بقرا بلا حبال ..
فإذا به يتلعثم ويقول :
يا ليلة القدر تملي لي حوشي ده حبالا بلا بقر ,,
فأصبح الصبح وكان ما كان واصبح حاج ابراهيم تاجر حبال لا يشق له غبار ..
ثم انها صارت مثلا .. حبالا بلا بقر
انشا الله تغشاكم واحد واحد

بافتراض ان ليل القدر حدث حقيقي
الزول ده بكون حسبا كيف يعني ، استند علي شنو ؟
وممكن تجي لي ناس كتار ولا كل سنة عن زول واحد زي اللوتري ؟
غايتو عجايب الكيزان ما بتنتهي

Quote: بافتراض ان ليل القدر حدث حقيقي

الكلام الفوق دا بشير لتغيير كبير في علاقة عبد الله إدريس بالقرآن!!
عبد الله إدريس بقول:
آيات القرآن تحتمل أن تكون حقيقة أو كذب

خليني اتسحر واجيك

بعد قراة الخبر

تبادر الى الذهن شهداء 28 رمضان
وداؤاد يحى بولاد

اتنين من حلتنا بضربو البنقو سوا كل يوم
واحد بمشي للتاني بعد المغرب ، بغشا الخانة ويجيب المعلوم ويتكامل صاحبو
ما فارزين رمضان ولا شعبان مدورين يوماتي
اها يوم 27 رمضان البمشي لي صاحبو حكمت معاهو ينتظر ليلة القدر
بعد المغرب عندهم اوضة ضيافة مطرفة قفلها عليهو وقعد يقرأ في المصحف
زولو رجاهو ساعة تلاتة ما جا
مشي ليهو في البيت سأل منو ، امو قالت ليهو
ياهون داك من فطر قفل الاوضة عليهو وقال زول يجيهو مافي
مشي علي صاحبو الاوضة مقفولة
عاين ليهو بالشباك لقاهو متفن في المصلاية وفاتح المصحف ويقرأ بصوت عالي
كورك ليهو بالشبال بي اسمو
يا ... اقرأ
رد ليهو
ما انا بقارئ
اقرأ يا ....
ما انا بقاري
قام ليهو
والبتسوي فيهو دة شنو ؟!
قوم ياخ ما يكون الخانة قفلت

Quote: ويعتبر سيخة أحدى مجلس قيادة الثورة المنفذ لانقلاب 1989

؟؟؟؟؟؟؟؟؟؟؟؟؟؟؟

Quote: الكلام الفوق دا بشير لتغيير كبير في علاقة عبد الله إدريس بالقرآن!! عبد الله إدريس بقول:آيات القرآن تحتمل أن تكون حقيقة أو كذب

مرحب بكري والجميع واسف للتاخير
ما عارف كيف توصلت للنتيجة دي لاني متأكد انو مافي اي زول في المنبر ده عارف علاقتي بالدين عامة شنو ، ما قاعد اشارك في النقاشات الدينية ابدا ..
لكن خليني اقول ليك اني مسلم عادي عندو اسئلة .. مسلم مستنير يعني
بخصوص ليلة القدر في اختلاف كبير في ماهيتها او هي ذاتا شنو ، الموضوع بيخص التأويل وليس النص ، بالتاكيد ما بقتنع بالقصة الشعبية القديمة دي
ولا قصص كتيرة تانية وده السبب الخلاني افتح البوست ، التأويل مصدر هام من مصادر الدجل والديماغوجية والمشاكل العجيبة دي كلها ..

Quote: تبادر الى الذهن شهداء 28 رمضان وداؤاد يحى بولاد

اهلين هشام
وعلي فضل والخدمة المدنية الخ الخ الخ
وفي النهاية عايز يعمل لينا فيها درويش وورقو زايد وبتاع !

Quote: قوم ياخ ما يكون الخانة قفلت

ابسن الكبير
واحد من الجماعة ديل ذاتهم قال حلم بالرسول ، اهاا قالو ليهو وصفو لينا ، صاحبك قام يوصف لابس عراقي وتوب ومركوب كيف ما عارف ، صاحبو قال ليهو رسول شنو البجيك انت ، ده عمك التريكي

Quote: ؟؟؟؟؟؟؟؟؟؟؟؟؟؟؟

شيخنا ابو الريش
تساؤلاتك في محلها
ما عارف لو كان في المجلس كان عمل شنو .. ما قصر تب

سلام الأخ عبدالله

للأسف فتحت الإنقاذ الباب لأكبر عمليات الشعوذة باسم الدين في تاريخ السودان
فهنالك مراكز إتأسست باسم إسلامية المعرفة في أكبر محاولات تديين العلوم وقد قال الرسول
في معنى الحديث انتم أدرى بشئون دنياكم وهكذا طلع علينا كثير من مدعي العلم يحدثونا بنظريات
علمية مصدرها القرآن ما أنزل الله بها من سلطان. قبل فترة جابوا دكتور قال عمل عملية هو كان
العنصر النوموه وعملوا رصد لنشاط قلبه في ماليزيا ليؤكد ما جاء في القرءان بأن القلب هو مصدر الفكر
تصديقاً للآية (ولهم قلوب لا يفقهون بها) وهنالك من حاول إثبات أن الأرض هي مركز الكون وغيره

Quote: العنصر النوموه وعملوا رصد لنشاط قلبه في ماليزيا ليؤكد ما جاء في القرءان بأن القلب هو مصدر الفكر

مرحبتين عبدالصمد
نعم الاوهام بتاعتهم دي ما بتخلص ، زي قصص اسحاق بتاعت ساحات الفدا ، غزالة جات قالت ليهو تعال اضبحني وريحة المسك الخ الخ
اغرب واحدة كانت بتاعة الاستفادة من الجن المسلم في حلحلة مشاكل البلد ! غايتو جنس غيبوبة عليهم ما حصلت كلو كلو ..
الان سوق الطب النبوي و التقليدي مذدهر بصورة غريبة ، مراكز حديثة و"متخصصين " وكلو دجل في دجل ..