Post: #1
Title: أيها الناس
Author: طلحة عبدالله
Date: 05-11-2018, 03:20 PM
أما قبل
فقد أصبح منبركم فاقد سوائل ومحتاج دربات حتى يستعيد حيويته التي كانت ..
قف ..
أصبح منبر الاتنين والتلاتة زي منابر الحناكيش المليانة باسماء من الفضاء
الخارجي من لدن نازف الجرح، والمدهش، وانسان حزين، والمتيم الخ الخ ..
قف ..
منبر فيهو شلشمية زول ومسيطرين عليهو اتنين تلاتة
يتبادلون ونسة أفرغ من الفراغ وأمسخ من المساخة وأسمج
من السماجة السمجة .
عدد المشاهدات في الموضوع الواحد فوق ال 1000 على أقل تقدير
والردود 3 وأحيانا 1 ومرات 0 كبير
قف..
هكذا أصبح منبركم بعدما كان محج بى كعبتو ومزار بى شيخو وقبتو .
قف..
لازم تشوفوا حل ..
غايتو من جانبي الحل في تحجيم المونساتية والمنظرين
والعارفين أية حاجة في أية حاجة و الشفاتة والمكفكفين في
الهينة والقاسية، والرباطة الشايلين عكاكيزم استرجالا
وحمرة عين فهولاء جميعا ومن على شاكلتم وصفاتم قوموا
العجاجة بعرضيهم ونطيطم وشقلبتم وكرهوا ناس العرس
حفلتم ..خخخخخخ
وبالمقابل لابد من افساح المجال للمفكرين والمبدعين*
والخسرانين على رأسم شاي وقهوة وسجارة وتمباك ومشروبات
روحانية .. ديل هم القاعدين يحركوا سكون مياه المنبر بحجارة
من ياقوت ومرجان وأحيانا من سجيل .. خخخخخخ
..................
* بالنسبة لشخصي القوي فاعتبر نفسي زي قلم الرصاص
المبرى بالجانبين، من جهة مفكر ومبدع وأية حاجة، ومن
جهة شايل عكازي ومارق للربا والتلاف .. بخ بخ .
|
Post: #2
Title: Re: أيها الناس
Author: طلحة عبدالله
Date: 05-11-2018, 03:33 PM
Parent: #1
الناس اللى عندهم عدد ردود ومداخلات فوق التلتين والأربعين
والخمسين ديل بوستاتم قديمة في الغالب .. وفي واحدين قاعدين
يرفعوها براهم أو مستعينين بسديق سديقين .. خخخخخخخ..
.............
سيد الحوش وبتوفيرو لخاصية الخاص والماسنجر أثبت أنو ذو نظرة
مستقبلية شديدة الثقوب والبعد .. خخخخخخخخخ
|
Post: #3
Title: Re: أيها الناس
Author: طلحة عبدالله
Date: 05-11-2018, 03:38 PM
Parent: #2
قال شاعر :
الاتعوقوا بالبوست دا كوتار شديد رحمهم الله ..
..............
نأسف لعدم توفر الوشوش المدورة وخدرا ..خخخخخخ
|
Post: #4
Title: Re: أيها الناس
Author: Asim Ali
Date: 05-11-2018, 03:43 PM
Parent: #2
مساء الخير
ملاحظه انو البعض بيتعامل على اساس عندو متعهد حصرى لموضوع او مواضيع معينه . حتى لو كان الموضوع نفلا .
|
Post: #5
Title: Re: أيها الناس
Author: حمد عبد الغفار عمر
Date: 05-11-2018, 04:37 PM
Parent: #4
ازيك يا طلحة
تعرف المنبر دا زي السعودية
انا جيت السعودية 1997 الهنا قالوا لي جيت بعد السعودية انتهت
معاهم واحد قال لي انا جيت 1988 الكلام دا برضو اتقال لي الكلام دا ليهو عشرين سنة واهو السعودية لسه قاعدة في جواي فرح هههه
برضو جينا المنبر 2008 ولقينا نغمة المنبر انتهى مدورة قبل ما نجي
اهو ليها عشرة سنين
ممكن قل العنصر النسائي بشكل لافت ففقدنا شيء من الجمال واللطف
|
Post: #6
Title: Re: أيها الناس
Author: Abdullah Idrees
Date: 05-11-2018, 05:39 PM
Parent: #5
يا حمد
المنبر ده قبل ست ، سبع سنة لو نزلت موضوع ومافي زول اتداخل فيهو لكم ساعة كده
طوالي تنقلب قصاص اسفيري وتفتش ليهو في الصفحة التانية ، اسي البوست3 يقعد يوم في الصفحة الاولى بدون مداخلة واحدة
في انهيار شديد
حتى الاكشن ذاتو كلو بقاا سنترليق
|
Post: #7
Title: Re: أيها الناس
Author: حمد عبد الغفار عمر
Date: 05-11-2018, 06:27 PM
Parent: #6
كيفك يا عبد الله
الصفحة الاولى اصلا بقت كبيرة وعدد المواضيع فيها كتير
زمان الاكشن بحررنو البنات لما تتعرض واحدة لمخاشنة
تلقى المنبر كلو بقة خلاف ذلك كانت في احداث جسام
مثل غزوة امدرمان واحداث دارفور يعني كانت في حركة نوعا ما
في غياب المحركات انا لعتبر المنبر صمد لحد ما
|
Post: #8
Title: Re: أيها الناس
Author: علاء سيداحمد
Date: 05-11-2018, 10:18 PM
Parent: #7
أيها الناس
دى الخطبة الاولى ول الثانية ؟؟
------------
كيفنك يا طلحة
|
Post: #9
Title: Re: أيها الناس
Author: زهير عثمان حمد
Date: 05-11-2018, 10:44 PM
Parent: #8
الاخ طلحة والبورداب الاماجد
مسا الخير
الامر فيه الكثير من الخلط ومحاولات العلاج تواجه الطرق اللي أعتد عليه الناس صعبه تغييرها وهنالك موضوعات تستحق نشرها وكما ترون كم التفاعل خلال هذه السنة ضئيل بالمقارنة لسنوات خلت
وعليه الان أنا من ناحيتي بحاول يكون هنا في حراك وان كان البعض لا يروقهم ولكن أضعف الايمان أن نشارك لكي لايموت الحوش من عدم الحركة وما نقدم من أخبار ومشاركات
ولكن يبقي الحل في يد العضوية بالاجتهاد في أعاد المنبر لرونقه بالكتابة في موضوعات مختلفه والحرص علي التجديد والمفيد والله دا أستدرك وكويس قبل رمضان ممكن يعمل تغيير
ولك كل الود
|
Post: #10
Title: Re: أيها الناس
Author: امتثال عبدالله
Date: 05-12-2018, 00:03 AM
Parent: #9
طلحة
انا اسمي مكتوب!!!!
مع وافر التقدير والاحترام
|
Post: #11
Title: Re: أيها الناس
Author: Biraima M Adam
Date: 05-12-2018, 12:02 PM
Parent: #10
القصة وما فيها الشيوعيين والجمهوريين .. في حروب داحس والغبراء بتاعتهم مع الكيزان .. خربوا المنبر.
أنا لا اقصد شخص بعينه .. لكن هذا ما بدا لي ..
---------------------------------------
شوفوا المضايقات التي تعرض لها أولاد البقارة، كبر، الطيب رحمة قريمان، عبد الرازق الطالب وغيرهم من أبناء البقارة تركوا المكان ..
في نظري كان بأمكان الأحزاب المعارضة تعمل علي بناء الثقة مع الذين تراهم وسطيين وتترك المغاليين دون مساس ..
ممكن دا يؤدي إلي فتح قنوات حوار .. وهذه هى خطة الكيزان ..
وكما يقول الأمريكان هذه هى "ماي تو سنت"
بريمة
|
|