الجيش يرشح عمر البشير

06:59 AM May, 09 2018

سودانيز اون لاين
عبدالحفيظ ابوسن-no where
مكتبتى
رابط مختصر

قومية الجيش

انتهي كما قال
وبدون تعليق كمان

وين الجيش قال الكلام ده يا ابو سن؟

اتمني ان يكون هذا الخبر عار من الصحة
تتناقله الاسافير
والاسافير صحافة يمكن ان تنقل الصحيح والكاذب
ولا سبيل لمعرفة صحته من عدمها إلا بتصريح رسمي من الجيش

تحياتي ايمن
الخبر يتناقل عبر الوسائط .
والناس بقت تلقط الاخبار من الفيس والواتس
الخبر لايصدق
ولكنه يتناقل وسط الناس
كتبت عنه فقد اتاني اكثر من مرة
اندهشت جدا له . فلم نعتاد من الجيش تصريحات سياسية بهذا المستوي ابدا
شخصيا اعتقد ان الخبر غير صحيح
فأساس تكوين الجيوش هو القومية والحفاظ علي الدستور

انا يتخيل لي أكتر جهة فيها فساد هي الجيش
وأكتر ناس خايفين على روحهم هم هؤلاء الضباط الفاسدين
شوف يا أب سن .. البشير كان رفضو الجيش ولا رفضو الجن اللحمر .. ما حيخلي السلطة نهائي بإرادتو
إلا بعد شلال من الدماء ودا المصير البقود ليه البلاد .. ويقولو ليك خايفين من مصير سوريا والعراق وليبيا
هو الدول دي وصلت لي الحالة دي بي شنو؟؟ لأنو على رأسها رئيس فاسد وحوله جيش من الفاسدين
خايفين من التغيير عشان ما يتحاسبو ويفقدوا النعمة والمزايا العايشين فيها دي..
بالتالي حيظلوا يساندوه ويدعموه حتى آخر رمق لأنهم عارفين نهايتهم في نهايته
لو البشير كان نزيه زي عبود لاستقال قبل عشرة سنوات
وبكرة عادي تقابلو في الشارع .. ولا في سوق الخدار

هو وينو الجيش ! ! !

حليل الجيش

مودتي

Quote: ويقولو ليك خايفين من مصير سوريا والعراق وليبيا هو الدول دي وصلت لي الحالة دي بي شنو؟؟ لأنو على رأسها رئيس فاسد وحوله جيش من الفاسدين خايفين من التغيير عشان ما يتحاسبو ويفقدوا النعمة والمزايا العايشين فيها دي..

بالظبط كده
المشكلة انو البلاد دي كلها وصلت للحرب الاهلية بعافيتها ، نحن حا نصلها جعانين وحالنا بالبلا
والجوع معروف يجرد الانسان من اي شيء ، من اي عاطفة ، الحرب لا تجردك من اي شيء
لكن الجوع يذهب العقل ، ممكن تكتل عمك عشان ملوة فتريتة والكلام ده اسوأ منو حصل سنة 6

اما الجيش ، فدي اغرب حكاية
لكن حسب وجهة نظري ، ده تحذير موجه من البشير شخصيا للمدنيين وناس الحركة الاسلامية بشكل عام

Quote: فأساس تكوين الجيوش هو القومية والحفاظ علي الدستور

أجي؟

تشكروا
يا ابوالريش مالك ؟

أبداً ... لكن أساس تكوين الجيوش ده بينطبق على الجيوش الإنقلابية؟

صحي عبدالله الجوع ابو الكفار
يا ابوالريش عضم الجيوش في كل العالم واحد
لبسا وسمتا وانضباطا
هكذا يجب ان تكون 😆😆
في الجيش مثلا ممنوع تربي دقن او شعر راس لسبب صحي مش عشان اي حاجة 😆😆😆

في هذه الظروف، والشعب يبيت في طرمبات البنزين، والبلد في شلل تام، قام الرئيس بلقاء قادة القوات المسلحة .. وقبل أن يلقي كلمته، وقف أحد الضباط، وألقى كلمة مليئة بالآيات القرآنية، خلصت لمبايعة القوات المسلحة للرئيس البشير، ليكون الفائز في انتخابات عام 2020م !! فهل يجوز لمؤسسات الدولة الرسمية، ترشيح زيد أو مبايعة عبيد ليصبح رئيساً ؟! وهل هذا الضابط والمجموعة التي أيدته، يمثلون كل القوات المسلحة ؟! وهل قوانين القوات المسلحة، ولوائحها، تسمح لها كمؤسسة، بتأييد مرشح دون الآخر، في أي إنتخابات ؟! وإذا قام بعض الإخوان المسلمين في الشرطة، بنفس البيعة، ثم تلتها قوات الدعم السريع، وحرس الحدود، وغيرها من القوات النظامية، فهل يمكن أن تعتبر الإنتخابات التي ستجرى في 2020م إنتخابات حرة ؟! وما الداعي للإنتخابات إذا كنا نقبل للرئيس بالبيعة ؟! وهل يمكن ان تعتبر الإنتخابات إنتخابات، إذا كان الرئيس يدخلها، وهو في منصبه، والمؤسسات تتقرب إليه بالبيعة، طمعاً في عطائه، أو خوفاً من بطشه بقياداتها ؟! وإن تعجب فعجيبة هي دعوة بعض المثقفين، لإختيار مرشح لينازل الرئيس في الإنتخابات، التي سبق للمؤتمر الوطني أن زورها مراراً، كما زور إنتخابات نقابة المحامين، وسائر النقابات الأخرى، وهاهو الآن يسعى الى تحويلها الى بيعة، يتم بها الإعتراف للرئيس، بدورة جديدة من الحكم .. مع أنه كان قد ذكر عدة مرات، من باب الخداع، أنه لن يترشح لدورة جديدة، لأن الدستور لا يعطيه هذا الحق.. ثم إذا هم الآن يعدلون له الدستور، ليعطيه ما لا يستحقه، ويوجهون له الإعلام، وويهيئون له البيعة، فهل يصح إعتبار عملهم هذا من الديمقراطية، حتى يشاركهم فيه أي رجل شريف، يحترم نفسه، ويحترم الديمقراطية ؟!
د. عمر القراي