أنيق المنبر ..

Post: #1
Title: أنيق المنبر ..
Author: يحي قباني
Date: 05-05-2018, 05:15 PM

05:15 PM May, 05 2018
سودانيز اون لاين
يحي قباني-فى الدنيا العجيبة
مكتبتى
رابط مختصر
لناس الخبارات ...

ما في اي زول بعينه مقصود بهذا البوست ...

فقط خاطرة في البال منذ زمن ... ولدت ثم تبلورت على فترة ليست بالقصيرة ...

الفكرة:

اولاً حسب العنوان انا كتبت ( أنيق المنبر ) و لم اقل ( أنيق / أنيقة ) المنبر
و ذلك لان من يشبههم ذلك الوصف و حسب ملاحظتي كلهم من الجنس الخشن ...

من هو أنيق المنبر و ما هي صفاته و مواصفاته ...

هو ذلك الشخص الذي يريد ان يظهر على الدوام بمظهر الأنيق ( ما ياها ذاتها مش كده ) ...

الأناقة في نظره ان يكون دائماً في بر الأمان ...

لا يصادم ...
لا يناقش الى حد الخصام ... بل ينسحب بسرعة البرق ليحافظ على اناقته ...
بل قد يمتد الامر ان تاتيك رسايل منه و من غيره و مكالمات لعدم الاسترسال بحجة ان الاناقة لا تحتمل ...

لا يقول رأيه بصراحة ... بل يتعمد الغياب ...

يحب ان يشار اليه بالانيق ...
و الاناقة هنا ... لها معاني شتى في نظره ...
- الرزين ...
- الحكيم ...
- المتألق ...
- الوديع ...
- الظريف ...

ايضاً يحب ان يكون من ضمن اي مجموعة توصف بالمواصفات اعلاه ...

مشكلة الانيق ...

في انه لو لم يكن أنيقاً بالفعل ... سينكشف حاله عند اول منعطف ...

منبر سودانيز به ما يحير :

- به أنيقين و هم ليسوا بأنيقين في الحياة اليومية خارج المنبر ... وهم المقصودين بهذا البوست ... ( نوع نعمل شنو ياخ ما نقلونا ) ...

- و به من يلبسون وجوه قبيحة جدا غير وجوههم الأنيقة في الحياة العامة ... و هو لعمري شئ لا افهمه ...هم ايضا مقصودين ... و نتمنى ان يأتوا باناقتهم الحقيقية هنا ...

- و به ايضا من يرقص على سلم الاناقة ... ( يوم كده و يوم كده ) ... ديل الله يعينهم بس ... ههه

- اما الانيق ( بره و جوه ) ... فلا غبار عليه و لا يخصه هذا الكلام ...

زمان كنا بنحتار ليه السودانيين لما يسكروا و يحتد النقاس بيقلبوا الكلام بالانجليزي ...
الان ما في انجليزي طبعا لانو العربي في تلتلة ...
فاصبح الانيق ( الغير انيق في الحياه العامة ) حينما ( ينزنق ) في اي ملف ...
يقلب لغة عربية فصحى ... ( مجرد ملاحظة ) ...

كما اسلفت ...

هي وجهة نظر عامة ...
رغم قناعتي التامة بان هناك من سيعتقدون غير ذلك ...
و هنا اقول لهؤلاء .. انا هنا لا اقصد انسان بعينه ...

Post: #2
Title: Re: أنيق المنبر ..
Author: sadig mirghani
Date: 05-05-2018, 05:38 PM
Parent: #1

دا كلو ولا اقصد انسان بعينه
دي عينه وسنونه ورقبته

Post: #3
Title: Re: أنيق المنبر ..
Author: محمد البشرى الخضر
Date: 05-05-2018, 06:07 PM
Parent: #2

أنا غايتو اتحسست
لكن ح اكلها اسي و ح اعمل ما شايف 😁

Post: #4
Title: Re: أنيق المنبر ..
Author: Hafiz Bashir
Date: 05-05-2018, 06:42 PM
Parent: #3

سلام يا قباني
طاقيتك دي فري سايز و كوكتيل الوان
السبب الوحيد البخليني ما ألبسها هو أنها بتخرب علي أناقتي

Post: #5
Title: Re: أنيق المنبر ..
Author: يحي قباني
Date: 05-05-2018, 07:28 PM
Parent: #4

Quote: دا كلو ولا اقصد انسان بعينه
دي عينه وسنونه ورقبته

و الله ده الخائف منو يا الصادق ..

حسي بي كلامك ده كم زول حيشوف سيناريوهات بديلة عشان يقول كلامي مقصود ..

عموما لو في زول أتحسس من كلامي ...
يمش يراجع رقبتو ...

Post: #6
Title: Re: أنيق المنبر ..
Author: يحي قباني
Date: 05-05-2018, 09:31 PM
Parent: #5

Quote: أنا غايتو اتحسست
لكن ح اكلها اسي و ح اعمل ما شايف 😁

ياخ انت الاناقة ما جيت ماش بي جنبها ...

ما تتقايف ساكت ... 😉

Post: #7
Title: Re: أنيق المنبر ..
Author: Salah Zubeir
Date: 05-05-2018, 09:55 PM
Parent: #6

Quote: عموما لو في زول أتحسس من كلامي ...
يمش يراجع رقبتو

ههههههاي ... قبه يا هندسه ... قال ليك بتاعين
المعمار ديل دقيقين ... هاك الدقه دي ...
انا غايتو ما اتحسستا لاني معترف بالاناقه ...
لكن اشك في انني الهمتك في افتراع البوست ...
مداخلتك البيهناك تحوي بعض مواصفات الاناقه
المنطبقه ومتطابقه مع حالتي وكان ذلك قبل 55
دقيقه من مواعيد متن هذا البوست ... اليس
من حقي الا اراجع رقبتي ...

Post: #8
Title: Re: أنيق المنبر ..
Author: زهير عثمان حمد
Date: 05-05-2018, 10:03 PM
Parent: #7

يا هندسة سلام يغشك

أنت دوما عميق بلا أخلال لمعاني ما ترمي له وقريب من نفوس الكل بباطة الطرح وموضوعيته وتعرف قصة الاناقة الانسانية تحدي حقيقي لكل الناس وكل منا لا يعرف مستوي ما هو عليه من قويم السلوك وجدارة الانسانية
حلل بمار تري عسانا نسقط أوخامنا ونكون الاكثر أناقة أنسانية
لك ودي وللعجوز صديقي كل التحيا

Post: #9
Title: Re: أنيق المنبر ..
Author: محمد البشرى الخضر
Date: 05-05-2018, 11:06 PM
Parent: #6

Quote: ياخ انت الاناقة ما جيت ماش بي جنبها ...
لا ياخ..
أنا أنيق المنبر جت :)

Post: #10
Title: Re: أنيق المنبر ..
Author: سفيان بشير نابرى
Date: 05-06-2018, 01:51 AM
Parent: #9

Quote: أنيق المنبر جت

لا حول ولا قوة الا بالله

Post: #11
Title: Re: أنيق المنبر ..
Author: سيف النصر محي الدين
Date: 05-06-2018, 02:04 AM
Parent: #10

وفِي ناس يؤثرون السلامة كده ساكت يا قباني ما اناقة ولا حرصا عليها بس طبعهم كده.

Post: #12
Title: Re: أنيق المنبر ..
Author: عبدالحفيظ ابوسن
Date: 05-06-2018, 03:33 AM
Parent: #11

وبى شوق سيشعل صمت هذا الزورق الهادى
فيدفعه إلى الوادى ..
إلى أفق أنيق النجم صداح البساتين

Post: #13
Title: Re: أنيق المنبر ..
Author: يحي قباني
Date: 05-06-2018, 05:54 AM
Parent: #12

Quote: سلام يا قباني
طاقيتك دي فري سايز و كوكتيل الوان
السبب الوحيد البخليني ما ألبسها هو أنها بتخرب علي أناقتي

حافظ بشير ...

و الله لو زول اعتبرها طاقية و نزلت ظبط ... مالو ... حلال عليو ...

المهم ... (ما حقة تبارك ) ...

Post: #14
Title: Re: أنيق المنبر ..
Author: يحي قباني
Date: 05-06-2018, 05:49 PM
Parent: #13

ههههههاي ... قبه يا هندسه ... قال ليك بتاعين المعمار ديل دقيقين ... هاك الدقه دي ...
انا غايتو ما اتحسستا لاني معترف بالاناقه ... لكن اشك في انني الهمتك في افتراع البوست ...
مداخلتك البيهناك تحوي بعض مواصفات الاناقه المنطبقه ومتطابقه مع حالتي وكان ذلك قبل 55 دقيقه من مواعيد متن هذا البوست ...
اليس من حقي الا اراجع رقبتي ...

ود الزبير ليك وحشة و انت تتدثر بثوب الأناقة الإجباري ...هههه

سيد عبد العزيز قال ليك
و أدق من فهم اللبيب ...

خليك منضبط ...

Post: #15
Title: Re: أنيق المنبر ..
Author: يحي قباني
Date: 05-06-2018, 05:54 PM
Parent: #14

يا هندسة سلام يغشك أنت دوما عميق بلا أخلال لمعاني ما ترمي له وقريب من نفوس الكل ببساطة الطرح وموضوعيته
وتعرف قصة الاناقة الانسانية تحدي حقيقي لكل الناس وكل منا لا يعرف مستوي ما هو عليه من قويم السلوك وجدارة الانسانية
حلل بما تري عسانا نسقط أوخامنا ونكون الاكثر أناقة أنسانية لك ودي وللعجوز صديقي كل التحيا

ابو الزهراء الرجل الأنيق برة و جوة ...

وينك يا جميل ...

تعرف يابو الزهراء ... يا رجل يا دكشنري انت مافي اعقل منك في المنبر ده ...

تحملت رزالات لا حد لها ... لكن خبرتك في الحياه ( التي اعرفها ) ههه

تجعلني مطمئنا عليك و على ردود افعالك ...

العجوز بالمناسبة عجز جد جد ... حالته بقت صعبه ... لكن الروح ما زالت شابة ...هههه

Post: #16
Title: Re: أنيق المنبر ..
Author: يحي قباني
Date: 05-06-2018, 05:55 PM
Parent: #15

لا ياخ.. أنا أنيق المنبر جت :)

نبقى لي جنس ده يا ودو ؟

انت عووضة و البوش وين ؟

Post: #17
Title: Re: أنيق المنبر ..
Author: يحي قباني
Date: 05-07-2018, 06:29 AM
Parent: #16

Quote: لا حول ولا قوة الا بالله

اتحوقلت عديل ...

بالغ ما كده ؟ :)

Post: #18
Title: Re: أنيق المنبر ..
Author: يحي قباني
Date: 05-11-2018, 06:16 AM
Parent: #17

Quote: وفِي ناس يؤثرون السلامة كده ساكت يا قباني ما اناقة ولا حرصا عليها بس طبعهم كده.

ما اصلوا طبعك يا زمن ...

درب السلامة قلت لي يا دكتور ...

و الله الطبعو انيق برا و جوة حبابو الف ...

الكلام المتغلفين ...

Post: #19
Title: Re: أنيق المنبر ..
Author: Osman Awoda
Date: 05-11-2018, 07:34 AM
Parent: #1

عووضة والبوش قاعدين يا قبة
بس الادب الشديد بلجم كيبورداتهم
انت الله ما ليك

Post: #20
Title: Re: أنيق المنبر ..
Author: معاوية الزبير
Date: 05-11-2018, 08:20 AM
Parent: #19

Quote: بس الادب الشديد بلجم كيبورداتهم
حكمة الجمعة، أرسلها لشنو كده ما عارف، ينولك ثواب

Post: #21
Title: Re: أنيق المنبر ..
Author: يحي قباني
Date: 05-12-2018, 01:10 AM
Parent: #20

Quote: وبى شوق سيشعل صمت هذا الزورق الهادى
فيدفعه إلى الوادى ..
إلى أفق أنيق النجم صداح البساتين

إذا عادت بنا الأيام إلى الماضي ...
كتبت على ثواني العمر شعرا لا يدانيه ..
غناء الطير و همس الماء ..
ووشوشة الضياء فيه ..

الله عليك يا صاحب .. و انت تستصحب كلمة ( أتيق ) مع اجمل اشعارنا ..

التحية لك و الى صديقي الجميل ناصر الليندي ..

Post: #22
Title: Re: أنيق المنبر ..
Author: Mahjob Abdalla
Date: 05-12-2018, 11:33 AM
Parent: #21

فاصبح الانيق ( الغير انيق في الحياه العامة ) حينما ( ينزنق ) في اي ملف ...
يقلب لغة عربية فصحى ...

_____________________
سلام قباني
افتكرتك تقول بصرف بركاوي

Post: #23
Title: Re: أنيق المنبر ..
Author: يحي قباني
Date: 05-18-2018, 01:09 PM
Parent: #22

عووضة والبوش قاعدين يا قبة بس الادب الشديد بلجم كيبورداتهم انت الله ما ليك
رمضام كريم يا عووضة ...

كيف الصيام مع صفوف البنزين بالله ...

اقسمبلاي امس واحد قال لي اشتريت مكان في الصف بي 700 الف ... و لا 700 مليار ما بعرف بي قروشكم الما مفهومة دي :)

قلت ليو مكان كيف ؟

قال سواقين مركبات الاجرة عشان ندرة البنزين المشاوير بقت ما بتخارج معاهم ...

فتحولوا الى بزنس جديد و هو حجز اماكن في الصفوف و يبيعوها لذوي الحاجة ...

زي ايام طفرة العمران في الامارات ... تقيف في صف حجز الشقة و تبيع ورقتك للمحتاج ...