حسين خوجلى

01:26 AM May, 03 2018

سودانيز اون لاين
سيف النصر محي الدين-
مكتبتى
رابط مختصر

ما عارف فضاوة وقلة شغلة وللا شنو الليلة قعدت سمعت بعضا من ثرثرة حسين خوجلى
التي يمارسها بكل أريحية على قناته الخاصة.
الرجل يستمر طوال الحلقة في الهذيان يشرق ويغرب متحدثا عن الاقتصاد والسياسة
وقضايا المجتمع بغير علم ولا هدى ولا كتاب منير. عندما تتابع ما يقوله هذا الرجل تجد
انه لا يستند على اي خلفية معرفية وتلحظ بسهولة ضعف تكوينه الفكري والثقافي. وبالرغم
من ذلك تجده لا يتورع عن إصدار الأحكام وإطلاق النظريات الهوائية غير المدعومة باي معلومات
صحيحة ولا إحصاءات سليمة. اعتقد انو لو أخذ بعضهم على عاتقه الرد على كلامه جملة جملة
لطلع كله مجرد كلام فارغ واراء شخصية لا قيمة لها على الإطلاق.
يا اخونا حسين خوجلى لو كنت تريد تقمص دور المعلق السياسي فلا اقل من أن تجتهد حبة في
الإعداد لموضوعك والتأكد من الحقائق والمعلومات وتقرا شوية عن ما يجري في العالم من حولك لأنو
من الواضح انك مكتفي باجترار حاجات قديمة تعشش في دماغك منذ عهود سحيقة او otherwise
خليك في سرور وكرومة وود نوباوي وبقية كلام الوناسات الذي تجيده.

وديني يا سيف مابقدر اسمعو اكتر من دقيقة
قدر ما حاولت ازيدها غلبني
التمهل والصمت ومصمصة الشلاليف وتقطيع الكلمة ويلد فأرا ميتا ضبانو ينوني
ياخ ما قايل عندك صبر لي قدر دة

لكن يا دكتور سيف لقيتك بالك طويل خلاص . المرحوم نقد قال كلام حسين خوجلي حيال بلا بقر .

تحياتي لك وللأسرة .

أبو قصي

والله يا حفيظ فعلا صعب تسمعه زيادة من دقيقتين 😁
ياخي الزول ده من علامات الانهيار الشامل في السودان ودليل على توقف الزمن في محطات
السبيعنيات من القرن الماضي. سمعت تعليقه على اقالة غندور، تصور جاب سيرة غندور وإقالته
في بضع كليمات وبعدها قعد يهضرب ويقول في عبارات يظن هو انها رنانة زي الدولة القطرية
والهيمنة الغربية ثم حكى انه اشترى كتب من القاهرة ولما عدد اسماء المؤلفين طلعوا كلهم من
كتاب ومفكري ما قبل الحرب العالمية الثانية، تخيل قال انه اشترى كتب قاسم أمين وسلامة
موسى رغم انه ما قدر يتذكر اسمه. ثم ختم الحلقة بقوله ان السودانيين كللللهم بقوا كضابين!

سلامات يا كتي علك طيب والاسرة
يمكن زمان كان حبال بلا بقر، هسي الحبال ذاتها مافي. الف رحمة ونور على المعلم الكبير نقد.

يا سيف،
حسين خوجلي أيقونة للفشل والإنهيار وداخل كل فرد منّا "حسين خوجلي"

ما زلت مُصر انو سبب الانهيار هو فقر الموارد قصاد تطلعات الناس بمستوى حياة عالي

محتاجين نغير نمط الحياة ودا صعب

إذا كان حسين خوجلي فاشل جداً، فسيف النصر فاشل من غير جداً

Quote: خليك في سرور وكرومة وود نوباوي وبقية كلام الوناسات الذي تجيده.

يا سيف ياخ تاني داير ترجعو لودنوباوي والقرشاب وناس كرومة وسرور والهادي الضلالي!!

خليهو هناك احسن ليهو

شفتا الكوز لامن يروح ليهو الدرب ببقا في جنس الهضربة دي

سلامات يا سيف
الزول الممل دا لاحظت في احد حلقاته المملة يخوف الناس من سقوط الإنقاذ ويقول : إذا سقططت الإنقاذ حيجوكم ناس الحركات الدارفورية وبعدين حتشوفوا العجب. صاحبك شغال ينشر الرعب (كما يتوهم) بين الناس عشان يقنع الناس من التغيير والثورة والانتفاضة

سلام د. سيف و ضيوفك

أكبر دليل على فشل حسين خوجلي هو ترسيخه للصورة أو ال image

المكروه عن نفسه. أي فشل في تسويق نفسه رغم امتلاكه لقناة تلفزيونية

و صحيفة يومية . ناهيك عن تكريس قناة أم درمان للترويج لسياسات

النظام الفاشلة و الحركة الإسلامية.

لو كان يعرف شئ او اثنين عن الإعلام. لتوارى في الخلفية مثلما يفعل

تيد تيرنر (cnn) أو زوكربيرغ (facebook) و غيرهم .

سلام
والله يا سيف وصفتو وصف دقيق
حسين خوجلي كوز كلاسيكي مع شوية فهلوة وافتراض جهل الاخرين
انا غايتو بزعلني جد لما يقول الاسلاميين الجد جد لسه ما حكموا السودان
ديل مكانهم وين؟ اسلاميين جد جد اكتر من الترابي والناس الشايفنهم ديل

ده زول وناس ساي صحفي شنو !
حافظ ليهو قصص قديمة كده نصها اساطير واكاذيب ساي ومعاها شوية شعر عربي
اذا كان الصادق الرزيقي نقيب الصحفيين واسحق نجم النجوم وكليات الاعلام ماسكنها ناس ربيع عبدالعاطي وتيتاوي
اما ناس يوسف عبدالمنان وخالد حسن وضياء الدين والهندي وعبدالقادر سبيل ، اسكت ساي
ده سودان البشير يا سيف ، سودان "مكانا وين" و "الحتات كلها باعوها" و "ياخوانا انا حصل كضبت عليكم " ..
زبط تلفزيونك يا ابوي انا ماعندي قناة سودانية كلو كلو ..

هل تعتقد يا مستنير انو فقر الموارد ده أدى الى فقر في الخيال والقدرة على الإبداع؟
على العموم أمثال حسين خوجلي مفروضين على الواجهة وهم بالتأكيد ما بعبروا عن
القدرات الحقيقية للسودانيين، في ناس كتار منزويين او زاهدين في الاضواء او كسلانين
وفِي ناس لا يمكن ان تفتح لهم المنصات الجماهيرية باي حال من الأحوال.
واحتمال برضو كلامك صاح وعلى قولة الفيلم المصري نقول "يا عزيزي كلنا فاشلون" 😊

السنوسي ود بدر حسين خوجلي كوز رايح ليهو الدرب في الموية وفِي الرملة وفِي كل مكان عشان كده
هضربتو كتر ههههه. مواضيع ناس أمدرمان وأساطيرهم ديك غايتو هو بعرف فيها كويس عشان كده
لو حصر نفسه فيها بكون اخير ليهو ولينا.

وجود الدولة في المائة سنة الفاتت سببو صدفة رجوع الانجليز واستمرت بفضل فتات فضلات بترول الخليج.
لاستمرار الدولة خمسين سنة قادمة محتاجين رئيس عسكري بفهم شويّة يقود البلد لتكامل مع اثيوبيا للاستفادة
من موارد البلد المحدودة وهي سهول البطانة وكنانة مع النيل الأزرق،
سهول كردفان ودارفور يصلحن فقط للرعي.
اسلاميون وشيوعيون وشنو كدا أمة وختمية ومثقفين ومفكرين وفساد كلها ونسة ساكت

هاك - دا إسلاموي تاني - إكتشف الذرة مؤخرا ! غايتو - برضو أحسن شوية من حسين خوجلي!
((( دماؤنا.. ليست للبيع!!
دماؤنا.. ليست للبيع!!


05-06-2018 01:18 AM
عثمان ميرغني
قبل سنوات، وعاصفة الحزم في بواكيرها، دعانا السفير السعودي السابق للقاء صحفي بمقر السفارة بالخرطوم.. ومن خلف منصة والجميع وقوف ألقى كلمة بروتوكولية رسمية.. ثم دعانا لجلسة حوار في صالون فسيح..

أحد شباب الصحفيين سأله بما معناه (السودان شارك في الحرب باليمن لكن لم يستلم حتى الآن أي “قروش”) نطقها هكذا “قروش”.. السفير لم يفهم فالتفت إلى نقيب الصحفيين الأستاذ الصادق الرزيقي فشرح له أن المقصود بـ”قروش” هو الدعم المالي السعودي.. في الحال رد السفير ببعض السخرية ( من ناحية “قروش” نحن لن ندفع “قروش”.. كل الذي يمكننا تقديمه هو مشروعات استثمارية) ثم صمت برهة وأكمل الجملة (إن كنتم مستعدون للاستثمار!).. ثم ببعض العتاب قال السفير للصحفيين السودانيين، ما معناه (أربأ بكم أن توصموا جيشكم بالقتال من أجل المال)!

والجملة الأخيرة هي عين الحقيقة، الجيش السوداني خاض غمار حروب كثيرة خارج حدوده بمنتهى الشرف والعزة والفخر من أجل المبادئ لا طلباً للمال، حارب في مصر أكثر من مرة، وحارب في فلسطين، وحارب في لبنان مع القوات العربية، وحارب في ليبيا في الحرب العالمية وفي إريتريا وإثيوبيا، وفي الكويت، بل وحارب في أقاصي الدنيا في المكسيك.. وغيرها من الدول.. في كل تلك الحروب لم يسجل التاريخ أن الجيش السوداني ذهب من أجل “القروش”.

ليس من الحصافة ربط مصير القوات السودانية في اليمن بالعون المالي أو العيني أو الدبلوماسي من أية دولة.. في هذا إهانة كبيرة للسودان عامة وللجيش خاصة.. ولدهشتي أمس كنت أقلب في وثائق من صحف سودانية قديمة في العام 1966، كان “المانشيت” (السودان يتوسط بين السعودية واليمن) وفي تفاصيل الخبر أن السفير السعودي بالخرطوم أبلغ الرئيس إسماعيل الأزهري بقبول السعودية للوساطة السودانية لحل نزاعها مع اليمن.. وفي اليوم التالي نشرت الصحيفة في المانشيت.. (تفاصيل المشروع السوداني للوساطة بين السعودية واليمن).. كان خاطرنا الدبلوماسي كبيراً عند الدول العربية.. لأننا لم نكن ننظر أو ننتظر إحساناً.. كنا كباراً على قدر كبريائنا.

حيثيات انسحاب الجيش السوداني من حرب اليمن لا يجب أن تقترب ولو بالتلميح من أية فواتير تجاه أي طرف.. مخجل للغاية إثارة القضية صحفياً بأية زاوية مادية فدماء أبناء السودان ليست للبيع.

أما أم (المخاجل) فهي الافتراض العجيب أن السودان دولة على قارعة الطريق تنتظر الصدقات.. نحن دولة ثرية ولدينا موارد أكثر من كل الدول العربية.. نحن دولة مانحة، اليد العليا المعطاءة.. لا اليد السفلى..

نستطيع تحمل الأزمة الاقتصادية وأوزارها.. لكن ليس في استطاعتنا تحمل الإهانة المذلة.

التيار
- -

يا دكتور المشكلة في حسين خوجلي وونسته العامل ليها قناة ليست انه كوز بقدر ما هي انه امدرماني - أو مركّب ماكينة امدرماني - ود قلبها بعد اولاد قلبها الجد طلّعوه مجرّد نازح اهل عوض ساي وليس امدرماني اصلي
نوع ونسته الكلها مبالغات وهترشات وزمن جميل وشلنا كاس افريقيا وصديق منزول و شواطين و المحجوب و الازهري الكانوا بتشاكلوا في البرلمان ويطلعوا يركبوا التاكسي سوا ... إلخ إلخ
وغيرها من اساطير ونسة ناس امدرمان ياها الونسة السائدة و المحببة و البتدخل مزاجنا أكثر من لغة الارقام و الحقائق وغيرها
بنحب نحن الأمور الساهلة, لا أحد لديه الوقت و الحيل و المزاج للدقة أو تحريها
لا اسّة حايم فيديو كيف يصنع الكاتشاب من مكونات فيها - الله يكرمك - بول و كوكايين! و فيديو تاني فيه رئيس كوريا الشمالية يلقي برئيس كوريا الجنوبية في حفرة باعتباره وزير فاسد ويقول ليك ياريت نلقى منه اتنين تلاتة هنا!
نحن شعب يحب الونسة الظريفة الساهلة خالي ارقام و محاققة, من سنين تحتل الدار صدارة طباعة و توزيع الصحف اليومية وذلك بعناوين على شاكلة غنماية تلد تيس برأسين واحد بشنب و التاني أحول و الدار تقتحم و تفجر أخطر الأسرار!
فا شنو... حسين خوجلي في النهاية صاحب بزنس, منّها يتونّس ومنّها ياكل عيش
و الجمهور عايز كدا .


يا مستنير ياخي كرّرت أكثر من مرّة قصة فقر مواردنا دي و اقتراح التكامل مع الجيران للإستفادة المثلى منها
يا ريت تفتح لينا بوست لتناول الكلام دا بجدية و علمية و ارقام بعيد عن الونسة! لأن حساب ششنة ساي كدا نمتلك نظريا موارد ضخمة وبكر وغير مستغلة من اراض زراعية و مياه و شمس و معادن و غيرها
وبصراحة الششنة دي هي ما تبقي جذوة الأمل مشتعلة انه بعد ان تغور الانقاذ لا يزال هناك امل في مستقبل مشرق أكان ما لينا فا لي اولادنا من بعدنا