(تجربتي مع نجم)حادث في السودان وحادث في السعودية

01:06 PM May, 01 2018

سودانيز اون لاين
Adam Youssif-Jeddah, Saudi Arabia
مكتبتى
رابط مختصر

والله يااخوان الانسان يتحسر علي السودأن خصوصا لما تجيهو سفرة للخارج ويشوف التطور الحصل في العالم برة
وانا بتكلم عن المرور وانسيابه والتقيد بالقوانين وحقيقة القانون هو البمشي الناس مازي عندنا العكس اي الناس هي البتمشي القانون
قبل ساعات حصل حادث بيني وبين واحد سعودي وكان هو الغلطان ونزلنا من العربات بكل احترام وسلامة سلامة وكفارة وطوالي دق علي نجم
وهي شركة تعمل في التأمين وفض النزاعات وكل مايتصل بالحادث والله ي جماعة ماتمت عشرة دقايق وجاء بتاع نجم
ويشهد الله قابلنا بي ابتسامة قل ماتلقاها في الزمن ده وكان سعودي وبدون اي تحيز لي طرف رسم الحادث وعمل الاجراءات
وقال للسعودي انت نسبة الغلط عندك 100%
يعني قمة الاحترام وعدم التحيز وكل الشغل ده تم إلكترونيا بدون مشاكل ولاجوطة وناس باركوها باركوها ديل نهايي مافي
يعني الموضوع تم بكل سهولة ويسر
تعال انت واتخيل الحادث لو حصل في بلدنا مشاكل ونبز واساءات ماليها لزوم ووجع قلب وانتظار رجل المرور وحراسات وواسطات وهلمجرا ااااااه
والله الزول مسكتو مغصة وانا بتذكر وبقارن في حادث مع بتاع حافلة في بحري قبل فترة وهو كان غلطان معاي تعال شوف السواق والكمساري
والحاجة المزعلاني الركاب واقفين في صف السواق
وكلو عشان مايفقدو الحافلة لانو كان مافي مواصلات واحد يمسكك من كتفك وواحد يجرك بي جاي وواحد يقول ليك صلي علي النبي وواحد يقول ليك بسيطة ياخ
وانت في النهاية تلقي نفسك مافاهم الحاصل زاتو شنو والله الانسان يتألم لما يشوف الناس برة اتقدمت مننا اميال ضوئية ونحن لسة محلك سر
كسرة غايتو تجربة نجم لو اتعملت عندنا هنا بتحل كتير من المشاكل بس علي مااظن ناس شركات التأمين عندنا هنا افضل ليهم الوضع ده
لان الناس بالطريقة دي وبي اجاويد الناس الفي الشارع لحظة الحادث بتخلي الناس ماتلجأ لشركات التامين وبالتالي تكون خففت علي ناس التامين
وقللت ليهم الخسائر الكان حاتدفعها للمتتضررين في الحادث كسرة اخيرة والله ياجماعة زول كدة وقف عربيتو مافي لامليخ يدين ولا باركوها ولا يحزنون ربنا يسلمنا جميعا من الحوادث

منقووول للامانة،،،

تحياتي يا حبيب

تجربة نجم دي تحتاج بنية تحتية متكاملة ودا مفقود في السودان

الخطوة الاولى المطلوبة يكون في نظام ربط الكتروني للمرور في السودان

السودان ما فيهو قانون وعسكري المرور هو الحاكم والقاضي والجلاد والسجان

وهي شركة تعمل في التأمين وفض النزاعات وكل مايتصل بالحادث
والله ي جماعة ماتمت عشرة دقايق وجاء بتاع نجم

=================

حبيبنا آدم .. مودتي ..
يمكن الحادث خارج مدينة جدة .. في شوارع وأزقة في الحارات والاحياء الشعبية
تباع نجم ما يصلك ولا في 3 ساعات ( الهنداوية ، حي السبيل ..إلخ )
أنا من سكان جدة وحصل لي حادث بسيط .. إنتظرنا أكثر من ساعة ما في رد
ووصلنا لحل ( كل واحد يصلح سيارته .. وخلاص )
الكلام الفوق ممكن في الطائف أو بريدة أو الجوف .. إلخ ربما في الرياض كمان

تحياتي ..

حبيبنا اللزم الاستاذ علي عبد الوهاب عثمان
تحياتي
ربما هي الصدفة لعبت دور فعلا احيانا نجم ما يصلك تقعد تنتظر ساعات
واحيانا ما يقيف معاك يقيف مع السعودي لكن برضو احسن حالا من السودان
مودتي

مسا الخير عليك وزوارك
شيخنا ماعايز اخررب عليك حلمك لكن قبل ستة شهور حصلت عندنا جريمة اغتصاب وقتل لي طفل في بلدنا هناك في اقصى الشمال وكانت حاجة صعبة جدا على الناس وخبر محزن جدا
المهم مااطول عليك مشوا فتحوا البلاغ باختفاء الطفل وقالوا ليهم الكلب اعزكم الله البوليسي من دنقلا ولازم تدفعوا حق فطورو وبنزين العربية
اها اتا قول معاي الحمد لله زاتو عندنا كلب

الاخ حامد بدري
مساء الورد عليك
البركة فيكم وربنا يرحم الطفل ويلهم آله وذويه الصبر
على قولك كونه عندنا كلب دة في حد زاتو حاجة كويسة
يعني يطلبو حق فطور الكلب والبنزين دي زي لمن تمشي المستشفى يقولو ليك جيب شاش وقطن على حسابك
لك الله يا وطن
قلبي موجوع

الأخ آدم,, سبحان الله, المشكلة أنحن كسودانيين حتى أسلوبنا مع بعضنا البعض ما فيهو إحترام, خاصة في حالات الحوداث
تصديقا لكلامك قبل يومين كلمني صديق سوداني, قال وقف عربيته قدام شقتهم وعندهم صاحب الشقة ساكن معاهم في نفس الدور وشققهم متقابلة, المهم دخل البيت عشان يشيل حاجة وماشي مشوار, لمن نزل لقى زجاج العربية مكسر بحجارة كبيرة إسقطت من أعلى وولد صاحب الشق واقف جمب السيارة, على طول إتصل على والده والشرطة. الشرطة لمن جات لقى السعودي وولده والسوداني واقفين, ولد السعودي نكر, الشرطي السعودي سأل السوداني: هل عندك شهود؟ قال ليهو: لا. العسكري: طيب هل شاكي في أي شخص؟ قال ليهو: الولد ده, لانه الوحيد الكان واقف جمب السيارة وجاء نازل من فوق ولمن أنا وقفت السيارة قبل دقائق معدودة كان ما موجود. الشرطي قال للسعودي: في الحالة دي انا حأتصل على الشرطة الجنائية وحيجوا ويشيلوا البصمات الموجودة في الحجارة وإذا حصل تطابق مع بصمة من بصماتكم, القضية حتتطول وتتعقد وحتكون فيها سجن وتحريات وتكون أكثر من قضية وحتتعبوا تعب شديد, أحسن شوف الولد إذا هو الرمى الحجارة حاولوا تعملوا تسوية مع السوداني. السعودي ساق ولده طرف إتكلم معاهو وجاء راجع وقال للعسكري خلاص أنا بتحمل الخسارة, وقال للسوداني: أمشي صلح الزجاج وجيب لي الفاتورة وحأسدد ليك القروش. السوداني طلب من العسكري أن يكبته إقرار بالكلام ده وفعلا كتبه وأخذ السيارة للتصليح.

الاخ عثمان Osman
لك التحية
الشرطة في السعودية في احيان كتيرة ما بتظلمك لأنك أجنبي بل وفيهم احترام شديد
أنا قبل كدة صدمني واحد من الخلف نزل وسلم واعتذر شديد واتصل بالدورية وجات الدورية على غير العادية
جات فيها ظابط برتبة ملازم أول بدل عسكري ونزل الظابط وادى التحية العسكري للزول الذي صدمني
هنا قلت لنفسي يا ادم حقك ضاع الظاهر دة رتبة كبيرة المهم قال الزول دة انا صدمته من الخلف خذوه معكم للقسم وعطوه ورقة اصلاح وخلي يجيب فواتير بقيمة التلفيات
ويجيني في المكتب قلت له بس انا ما اعرفك قام الظابط الصغير قال لي دة بالله ما بتعرفو دة فلان بن علان مدير شرطة منطقة مكة المكرمة للشئون الادارية
فسلمت عليه وابتسم واعتذر مرة اخرة واعطاني رقمه وقال تعالي في المكتب وجيب الفواتير
وفعلا جبت الفواتير وسلمني المبلغ كاملا وقال لي اذا احتجت اي خدمة اتصل شكرته واحترمه اكثر لأنه ما استغل مركزه وسلطاته في تضييع حقي وتحميلي الغلط
دمت

Quote: تجربة نجم دي تحتاج بنية تحتية متكاملة ودا مفقود في السودان

الأخ حاتم, السودان ده شنو الما فيهو مفقود؟ حتى المفقود زاتو في السودان مفقود.

Quote: الشرطي قال للسعودي: في الحالة دي انا حأتصل على الشرطة الجنائية وحيجوا ويشيلوا البصمات الموجودة في الحجارة وإذا حصل تطابق مع بصمة من بصماتكم, القضية حتتطول

تحياتي أ.عثمان
ماتفضلت به يوضح اهمية القانون و "تطبيقه"
وانا دائما بقول انو هيبة القانون وفرضهها بتبدأ بفرد الشرطة اولا وهو بالمناسبة اهم ركن يعني لازم تكون معاييرك عالية وصارمة في اختيار وتدريب رجل الشرطة ، معايير اعلا بكثير من اختيار جندي الجيش

لان الشرطة معنية بتطبيق القانون وفرض هيبة القانون
يعني لمن يكون فرد الشرطة نفسه فاسد ماليا او اخلاقيا لا تنتظر ان يطبق لك القانون فما بالك بمنظومة كاملة فاسدة وكلها ثقوب تمكن للفساد

مثال بسيط لمن يكون عندك نظام ربط مالي الكتروني ومافي حاجة اسمها تسليم نقد لشرطي لسداد مخالفات او رسوم كل شئ عن طريق البنك والربط الالكتروني
عندها الشرطي الفاسد نفسه لن يجد طريق لنهاب اموال المواطنين بالباطل واللف والدوران..ماعندو خيار يا يبقى شرطي صالح يا يشوف ليهو شغلة تانية

تحية وسلام للمتواجدين
لو سمح لي صاحب البوست: الحمدلله انا ما حصل حصل لي حادث كبير سوى مرة واحدة ... الحادث كان بيني وبين دورية نجم ... آي والله ... ودفعت ليهم قريب لتلاتة ألاف ريال .. ان شاء الله تنفعهم ما اقدر اقول اكتر من كدة
دفعت ضمن ما دفعت بما فيها كلفة تضرر استيكرات شعار نجم والحادث كان بعد انتهاء تاميني بيومين تلاتة بس

سلام مربع


يا عبد الوهاب .. هكر في

في جدة يا عبد الوهاب بتاع نجم بيصلك بسرعة قد تكون حالتك إستثنائية

تعرضت لحادث بسيط في حراج الصواريخ .. والطرف الآخر كان هو الغلطان لكن للأسف كان يصر على أني الغلطان رغم إنه الموضوع واضح أنا كنت أصف سيارتي في موقف ومشغل المكيف وقاعد في السيارة

صدم سيارتي من الخلف في الصدام سيارتي جيب موهافي وصدامها متين لم تتأثر وتأثرت سيارته ماركة متسوبيشي جالانت وكانت الصدمة بسيطة

عندما نزلت ورأيت الأمر وسيارتي سليمة قلت له مافي مشكلة

ولكن إذا به يصر على أن أدفع له

قلت له إذا الحكاية هكذا فلتأتي الشرطة لأن سيارتي مؤمنة تأمين شامل وضد الغير .. إذا كنت صدمت بيها حيطة بنفسي سأطلب الشرطة حتى تتم صيانة سيارتي على حساب التأمين

وإتصل هو على نجم وأتى موظف نجم في أقل من ربع ساعة

وفعلاً طلع صاحبنا غلطان وسلمني بطاقة حمدلله على السلامة وسألني إذا كنت أرى أن الصدام تأثر ويحتاج لأي تشييك فقلت له لاء كله سليم


وبالنسبة له حمد لله على السلامة مع إثبات خطئه مائة بالمئة

الباكستاني كان عاوز يدقني بس ربنا ستر

تحياتي

الاخ عاصم
مساء الخير
الباكستاني كان عاوز يدقني بس ربنا ستر
سلامات
يازول ديل ناس ما بيفهمو
لو كنت اانت الغلطان والله ما يسامحك مهما فعلت

الاخ مهدي صلاح
تحية طيبة
بالغت بيليغ عديل تصدم بتاع نجم البقييم الحوادث زااااااطو
هههههههههه
سلامات يازول الجاتك في مالك سامحتك

سلام مربع


يا عبد الوهاب .. هكر في

في جدة يا عبد الوهاب بتاع نجم بيصلك بسرعة قد تكون حالتك إستثنائية

تعرضت لحادث بسيط في حراج الصواريخ

===================
فقيري أننقا .. مسكاقمي ..
الحراج ساهل على الخط السريع
أنا أقصد الحارات القديمة ..
إن شاء الله بصحة وعافية .. الجو زي نار في جدة ..
مودتي ووو أننقا ..

مع التحية للاخ آدم صاحب البوست