Post: #1
Title: سيدي التعيس ..
Author: عمر التاج
Date: 04-30-2018, 05:43 PM
05:43 PM April, 30 2018 سودانيز اون لاين
عمر التاج-KHT
مكتبتى
رابط مختصر من البداية قلت جاي بالانقلاب من أجل الوحدة .. والرخاء .... والديمقراطية .. والكرامة..
لميت في البلد الموحدة من قبل الاستقلال فرتكتها حتة حتة وقبيلة قبيلة
الجنوب بأكلمه راح في خبر كان هنا سودان موحد..
الغرب والشرق والشمال كلها نزاعات ونزوح ومناطق محتلة
من ناحية الجنوب حتى الان البلد ما محسومة حدودها
مسكت الجيش الجيت عن طريقه انتهيت منو ..
جبت الجنجويد بقوا ليك وللبلد شوكة حوت ..
استعنت بالامن بقى كلو تكتلات وجهويات وشركات..
مسكت امر الاقتصاد نشفت حنانو .. وماخليت مشروع واحد منتج
قبلت على البنوك قلت تعيد فيها الثقة طفشت اي انسان عاقل
التعليم .. انتهيت منه وسمعة البلد بقت في الحضيض
الصحة بقت تجارة مميتة وحاشيتك والوزراء ماعندهم صحة الا برة البلد
الاخلاق بقت في الحضيض .. والدين طلع بي الباب الجيت منو..
الوفرة .. وما ادراك ما الصفوف .. مافي شى في البلد من غير صفوف حتى الخراءة
امن المواطن بقى خط اسود .. النهب والسرقة والقتل جوة البيوت .. وكلها ضد مجهول..
خليه البلد ياريس ..
اي بلد تاني مشيت ناحيتها نشفتها ..
بديت مع العراق واليمن الان هم في خبر دمار ..
قبلت على ايران اتحاصرت ..و مصانعها انضربت جوه بلدك..
توجهت تلقاء مرسي غتست حجره في يومين
صادقت قطر انضربت حصار لامن امنت بابليسك
حالفت الخليج جبت ليهم نحس مالي وامني من الله خلقهم ما شافوه..
سيدي التعيس ... ما اتعسك..
ابايعك على انك اتعس رئيس
والفرصة مفتوحة لبيعتك.
|
Post: #2
Title: Re: سيدي التعيس ..
Author: عمر التاج
Date: 04-30-2018, 09:47 PM
Parent: #1
الصفوف دي يا سيد ود الباوقة التعيس ما ممكن تمر مرور الكرام .. وكذا الأسعار
صف البنزين حدو من اقصى الشمالية حتى حدودك مع الجنوب ، والسوق الأسود سيد الموقف
صف الرغيف من الفرن للبيت ، والرغيفة بجنيه في ناس مالاقينها
صفوف القروش و الصرافات الالية، الناس قروشها الختتها أمانة مالاقياها ..
صفوف الغاز ، والانبوبة بقت أغلى من وزنها ذمة ..
صفوف التوظيف، صفوف السفر للخارج، صفوف المعاملات الحكومية، صفوف القضايا، صفوف البلاغات المقيدة ضد مجهول، صفوف القطط السمان ، صفوف الحمامات ، صف الصفوف .. وعييك
|
Post: #3
Title: Re: سيدي التعيس ..
Author: سيف النصر محي الدين
Date: 04-30-2018, 10:31 PM
Parent: #2
والله يا ود التاج تعاسة الزول ده فاضت ودفقت وغرقتنا فيها عديل.
ياخ بالله شوف عمرنا ده ضاع سدى كيفن؟
ثورة الارماد دي لمن جات كنّا يفعا يانعين مليانين احلام بوطن ملء
الشوف والسمع وها نحن الان قد هرمنا وضاعت احلامنا وتسربت
حيواتنا كالسراب... تعاسة من امها ياخ.
|
Post: #4
Title: Re: سيدي التعيس ..
Author: عمر التاج
Date: 05-01-2018, 07:20 AM
Parent: #3
سلامات اخي سيف النصر ..
Quote: والله يا ود التاج تعاسة الزول ده فاضت ودفقت وغرقتنا فيها عديل.
ياخ بالله شوف عمرنا ده ضاع سدى كيفن؟
ثورة الارماد دي لمن جات كنّا يفعا يانعين مليانين احلام بوطن ملء
الشوف والسمع وها نحن الان قد هرمنا وضاعت احلامنا وتسربت
حيواتنا كالسراب... تعاسة من امها ياخ. |
العمر ده كوم براهو يا دكتور ، وما في شيء بعوضو
28 سنة ضائعة من حياتنا ، ودي بتمثل لي جيلنا أكثر بكثير من نصف العمر
لا اتعلمنا مجان ، ولا اتعالجنا من حق بلدنا
ولا شفنا داخليات في الثانوي ولا أكلنا من خيرات جامعة الخرطوم
ولا دخلنا سينمات زي الناس ، ولا اترفهنا واتنعمنا في بلدنا زي البشر ولا متنا شهداء ..
غايتو زي مابقول جنابو عمر عثمان زمان ،
حقو يخصموا من عمرنا فترة الإنقاذ دي ويرجعونا صبيان زي ماكنا
|
Post: #5
Title: Re: سيدي التعيس ..
Author: Hatim Alhwary
Date: 05-01-2018, 07:58 AM
Parent: #4
Quote: ابايعك على انك اتعس رئيس
والفرصة مفتوحة لبيعتك |
أبايعك سيدهم التعيس
|
Post: #6
Title: Re: سيدي التعيس ..
Author: عمر أبوعاقلة
Date: 05-01-2018, 08:15 AM
Parent: #5
ود التاج ازيك ياخ
المشكلة هم للآن ما مقتنعين
وكايسين الحلول الجذرية عشان ينقذونا
واخذ بال حضرتك !!!
|
Post: #7
Title: Re: سيدي التعيس ..
Author: عمر التاج
Date: 05-03-2018, 09:40 PM
Parent: #6
اهلين ود أبو عاقلة
ينطبق عليه قول الما شاعر :
كيف بالله من أتعسه الله يسعد مواطنيه؟
|
|