Post: #1
Title: الكيزان للشعب السودانى:طلعنا دينكم وما انتفضتوا ...نعمل ليكم شنو علشان تعملوا انتفاضة
Author: عمر جبرونا
Date: 04-28-2018, 06:35 PM
عملنا ليكم العيشة بجنيه
سكتوا
الدولار الجمركي ب ١٨ جنيه برضه سكتوا
ضحكنا عليكم
قلنا الفيران هدوا الكوبري
الضب قطع الكهرباء
بعنا كل المشاريع والأراضي
ضاعفنا أسعار الادويه
كل ده و ما سمعنا ليكم صوت
وصلنا سعر شوال السكر ل ١٢٥٠ جنيه ما حركتوا ساكن
وقلنا النمل اكل ٢٢ طن منه عملتوا نايمين .
طبعنا ترليونات فئة ال50 جنيه واشرينا بيها كل دولارات البلد مافي فايده .
هربنا اطنان من الدهب
عبر مطار الخرطوم
برضه لا حياة لمن تنادي .
مسكنا قروشكم في البنوك
وابينا نديكم ليها
ما شفنا زول قال بغم .
البنزين والجاز والغاز
دسيناهم وبقوا بالصف
وانتوا نايمين
نومة أهل الكهف .
مواصلات ما في
وانتو ساكتين
الامتحانات كشفناها
ما قلتوا حاجة...
يا اخوانا
الحكم ده غلبنا عديييل
ودايرين نتفك منه
بس ورونا
تاني نعمل شنو
عشان تمرقوا الشارع ؟!!
التوقيع :
الحكومة
منقول
|
Post: #2
Title: Re: الكيزان للشعب السودانى:طلعنا دينكم وما ان
Author: عمر جبرونا
Date: 04-28-2018, 06:40 PM
Parent: #1
وبعنا حاجاتكم دى كلها و ما انتفضتوا بس ورونا نعمل ليكم شنو عشان تتحركوا
حصر اصول وممتلكات السودان التي باعها حكومة التمكين والمشروع الحضارى الفاشل منذ 1989✋
- الجنسية و الجواز السوداني
- جنوب السودان
- سواكن
- ميناء بورتسودان
- مطار الخرطوم
- خط هثرو
- النقل المكانيكي
- الهيئة القومية للكهرباء
- الهيئة العامة للمواصلات السلكية واللاسلكية.
- المؤسسة العامة لأعمال الري والحفريات
- إناث الضأن و الإبل
- شتول شجرة الهشاب
- مقر سفارة السودانية جدة (حي الهنداوية)
- بيت السودان لندن
- بيت السودان جنيف
- حديقة الحيوانات
- الهيئة القومية العامة للبريد و البرق
- النقل النهري
- الخطوط البحرية السودانية (سودان لاين) 15 باخرة
- شركة الصمع العربي
- خصخصة شركة السكر السودانية
- منشآت ومخازن لأشغال والمهمات
- مبانى وزارة التربية والتعليم السكنية
- اشلاقات البوليس
- أراضي السكة حديد
- أراضي جامعة الخرطوم
- اراضي منطقة ابو حمد
اراضي منطقة مروي وما جاورها
- اراضي الحوض النوبي
- تصفية مؤسسة الدولة للسينما ،وقسم السينما في مصلحة الثقافة ،ووحدة السينما في التلفزيون 1991
- معسكر الحرس الجمهوري سوبا
- حوش المدرعات بالشجرة (بيع ليصبح مخطط غزة السكني )
- مصنع سكر الجنيد
- مصنع اسمنت عطبرة
- مصفاة الخرطوم
- اراضى الجامعة الاسلامية
- حي الوابورات وشاطئ النيل الأزرق
- الميادين في الأحياء السكنية
- ميدان وسوق الثورة ح 23
- مشتل محلية الخرطوم
- ميدان البوستة سوق امدرمان
- المواقف العامة
- مشروع الجزيرة
- مصانع الغزل والنسيج مارنجان
- منازل الموظفين فى مشروع الجزيرة والمناقل
- مشروع كناف ابو نعامة
- مشاريع النيل الأبيض للإعاشة
- مشاريع النيل الازرق للاعاشة (مشروع الليونة الزراعي، مشروع علي بدري، مشروع. التهامي)
- مشروع ساق النعام شمال دارفور 156 الف فدان
- السكة حديد سنار
- مبني الثروة الحيوانيه (البيطري) محليه الحصاحيصا
- مصنع التعليب كوستي
- مصنع الغزل والنسيج شندي
- قنصلية سفارة السودان بالهند بيعت للكويت
- الفندق الكبير الخرطوم
- فندق قصر الصداقة
- مستشفى الخرطوم
- مستشفى جعفر ابن عوف
-خصخصة مستشفى السلاح الطبي.
- شركة السودان للحبوب الزيتيه
- مشروع الغزالة جاوزت (أكبر مراكز البحوث وتطوير الثروة الحيوانية في السودان وثاني أكبر مركز في إفريقيا.
- هيئة تنمية غرب السافنا
- (23%) من الأراضى الزراعية فى السودان تم بيعها لمستثمرين أجانب، من بينها (1.4) مليون فدان بيعت لشركة أمريكية بـ(25) ألف دولار.
أن الأراضى السودانية المنتزعة أو مستولى عليها تشكل (9.99%) من جملة الأراضى المستولى عليها حول العالم . السودان رابع أكثر الدول فى العالم التى تم الاستيلاء على أراضيها الزراعية بعد جمهورية الكونقو الديمقراطية.
#ماضاعمن_السودان
منقول
|
Post: #3
Title: Re: الكيزان للشعب السودانى:طلعنا دينكم وما ان
Author: مني عمسيب
Date: 04-28-2018, 06:59 PM
Parent: #1
ود جبرونا لك التحية .
والله فعلآ هم طلعوا دينا لكن حا تشوف
الشعب حا يطلع ليهم شنو . وهي قربت
مسألة وقت وما بطول .
وغدآ لناظره قريب .
ولك الشكر ,,,
|
Post: #4
Title: Re: الكيزان للشعب السودانى:طلعنا دينكم وما ان
Author: عمر جبرونا
Date: 04-28-2018, 07:03 PM
Parent: #3
بت عمسيب
شكرا للمداخلة
لكن بالمعارضة المهببة دى ما اظن تحصل انتفاضة
يا ستى النظام دا قاعد امفكوا ساكت
|
Post: #5
Title: Re: الكيزان للشعب السودانى:طلعنا دينكم وما ان
Author: مني عمسيب
Date: 04-28-2018, 07:08 PM
Parent: #1
مشكور ود جبرونا علي الاستقبال ..
بالمناسبة :
لكن بالمعارضة المهببة دى ما اظن تحصل انتفاضة
الشعب هو المعارضة وحا يطلع لانه الموضوع
ما حا يحتمل اكتر من كدا . والايام بيناتنا .
الشوارع لا تخون .
|
Post: #6
Title: Re: الكيزان للشعب السودانى:طلعنا دينكم وما ان
Author: عمر جبرونا
Date: 04-28-2018, 07:24 PM
Parent: #5
نعم الشوارع لا تخون
لكن الشوارع و الشعب بدون قيادة الحصيلة صفر كبير
|
|