بهدوء الوالي لا يستقبل النساء

02:15 PM April, 22 2018

سودانيز اون لاين
عبدالحفيظ ابوسن-no where
مكتبتى
رابط مختصر

*والي الخرطوم يرفض مقابلة نائب رئيس البرلمان*

الخرطوم: الإنتباهة
رفض والي الخرطوم الفريق أول عبد الرحيم محمد حسين مقابلة نائب رئيس البرلمان عائشة محمد صالح القيادية بحزب الاتحادي الديمقراطي الأصل (حزب الميرغني) متحججاً بأنه لا يقابل ولا يستقبل نساء في منزله.

وأبلغت عائشة (الإنتباهة) أنها ذهبت الى منزل والي الخرطوم أمس الجمعة (أمس الأول) مضطرة برفقة نسوة متضررات قامت ولاية الخرطوم بإزالة قريتهن بالكامل وشردتهن في منطقة شرق النيل، وقالت إنها كانت تريد أن تشرح له الأوضاع المأساوية التي يعيشها سكان القرية بعد أن قامت بزيارتهم وتعرفت على أوضاعهم، وذكرت أنهم يفترشون الأرض، واستغربت رفض الوالي لمقابلتها، وأكدت بأنها لم تأتِ لغرض شخصي أو للاستجداء، وإنما طلباً لإنصاف سكان القرية المزالة. وأوضحت أن الواجب يحتم عليها هذا الأمر، وقالت باستغراب، لماذا لا يستقبل النساء في منزله وهن القوة الكبيرة التي يعتمد حزبه عليهن؟ في إشارة منها للحزب الحاكم. وجددت التأكيد أنها لم تأتِ مستجدية، وقالت (نعم الله تكفيني وأنا حامدة وأنوم قريرة العين لم يدخل بيتي حرام ولم أظلم أحد ).
كما قال معاوية ما اصلو حيكون منقول

قراءة موازية
قالوا سيدنا عمر بن الخطاب أعطي واحد فقير كيس نقود من بيت المال . طبعا الكيس من القماش زي كيس المخدة كدة . وبكون خشمو مربوط بي خيط ولا حبل عشان القروش ما تنبهل .. اهلنا بسموهو بلغة سودانية وكاي .. وفصيح الكلمة وكاء . دايما بطلق علي القربة او الخورج
المهم
قال ليهو شيل كيس النقود داك
فسأله السائل
اشيلو بي وكايو
فرد سيدنا عمر الذكي الحصيف بعيد النظر
بل دع المال !!
اها القصة ما منقولة لكن محكية بلغة سودانية
في علاقة وطيدة

Quote: متحججاً بأنه لا يقابل ولا يستقبل نساء في منزله.

وحتي مطران الكنيسة القبطية لايقابل اي نساء في منزله مهم كان السبب ...وسمعت ان السيد الحسيب النسيب ابوهاشم زاته سيد الحزب والرصة لا يصافح النساء ولايستقبلهم في منزله'



-----
ود ابوسن سلامات

حبابك مسلمي
لعلك تماثلت للشفاء
ربنا يسبغ نعمته عليك
دة الفلم زاتو مسلمي جاييك تب
ولو تصدق وتآمن متخيل ذات منطق ردك لذا كان الهدوء والتريث في البوست

في العمل في حاجة اسمها التوصيف الوظيفي job description
وفق لنوع الوظيفة
والوظايف فيها ادراية وخدمية وكدة
وفي واحدات عندهن حساسية عالية واهمية قصوي
في خدمات عندها زمن بتبدا وتنتهي فيهو
وواحدات ماعندهن زمن شغالات 24 ساعة اقصد الوظيفة

سؤال
ولماذا لم تذهب نائب ر رئيس البرلمان إلى الوالي في مكتبه ..لعله يستقبل النساء في المكتب وليس في المنزل...فالمنزل لأسرته وليس للأعمال الرسمية ...يعني كمان نكون حقانيين شوية
مع وافر التقدير والاحترام

مرحبا امتثال
برضو والله في بالي منطقك دة
جاييك تب

في وظايف مدنية وعسكرية مافيها انقطاع . 24 ساعة
الاطباء والممرضين بشتغلوا ورديات
العساكر السادين خدمة حراسة
معظم القطاعات الخدمية زي الكهرباء مثلا بشتغلو 24 ساعة
خدمات الاتصالات
وفي وظايف فيها طلب استدعاء call allowance
يعني يضربو ليك وانت ملزم تجي من بيتكم

يعني الوظيفة توصيفها مربوط بحوجة الناس ليها . حوجة الناس بتحدد زمن الوظيفة
عندك رخصة ما طلعتها لغاية 2ظ تجي بكرة مافي استعجال
لكن حصل ليك عطل كهربا تضرب يجو يصلحو
ولا مرضت في اي زمن تمشي المستشفي
وهكذا
وديل للخدمات الملحة المفروض تتعمل في وقتها
طيب دي وظيفة مدنية عندها هيلكل وظيفي وترقيات وكدة
في وظايف ماعندها هيكل وظيفي ولا ترقيات
زي الوالي والمعتمد والوزير والرئيس

الوالي والمعتمد وظايف ذات طبيعة مختلفة
ديل حكام
حكام في السودان يعني ممكن يصدر امر واجب التنفيذ .. او يلغي امر
بيدهم مصاير الناس
والناس شغالة 24 ساعة
وبرضو الوظايف دي في السودان
بتسكن في بيت الحكومة
وعندهم ميزانية ضيافة .. ضيافة دي من ضيف
وعندهم طباخ تدفع ماهيتو الحكومة
وطاقم عمل منزلي تدفعه الحكومة
عشان شنو؟
عشان يتفرغ للمواطنين
وبيتو اسمو بيت الوالي ما بيت فلان
لأنو لو شالو بجي والي غيرو بسكن فيهو

الوالي حاكم للولاية
الولاية دي مسؤول من كل ناسها ضكور واناتي
لامن يقول ما بستقبل نساء داير يوصل رسالة دينية محددة . مع انو بستقبل رجال
طيب لو قال ما بستقبل مواطن في بيتو عندنا معاهو كلام مع انها افضل من حكاية ما بستقبل نساء
بعدينك هن ما جاياتنك عشان انت فلان جايات للمسمي الوظيفي
وما جايات للضيافة مع انك عندك بند ضيافة
وما جاياك مرة واحدة جاياكم كورجة

والله يا ود ابو سن اذا كان الوالي ده بيستقبل رجال في بيته ويستمع لشكاويهم ويحل مشاكلهم ويرفض يستقبل نساء فعندك حق في كلامك ...وما مفروض يكون والي ...ممكن يكون وزير الأوقاف والشؤون الدينية ويقول انا ما يستقبل نساء ولا يسلم عليهن واذا عاوزات فتوى دينية فمن وراء حجاب ...اما الوالي فلا يجب عليه أن يفرز بين الرجال والنساء وخاصة وان معظم مشاكل ولاية الخرطوم تختص بالنساء المظلومات ظلم الحسن والحسين...جيبو لينا والي يحل مشاكل النساء أولا ومن ثم الرجال ...

سلوك غريب وخاطئ
لماذا ذهبت اليه فى بيته وخارج ساعات العمل فى موضوع رسمى وليس زيارة شخصية؟
غايتو السودانيين يحيروا الما بيتحير.

وظيفة الوالي لا ساعات عمل لها
فهو الحاكم .. رئيس الولاية
عليه بمعالجة مشاكل الولاية وحل مشاكل المواطنين

لا يا شيخ العرب.
فى حالات محددة جدا. مثل الحالات الطارئة التى لا تحتمل التاخير.
يعنى لو سكان القرية عرفوا للتو بتحرك جرافات الولاية ولكنها لم تصلهم بعد.. او حالات انفلات امنى جارية.. او شئ من هذا القبيل. ولكن لا تشمل تكوين وفد ليشتكى من موضوع ظلم وقع على قرية مما يمكن ان يتم بصورة افضل فى مكتبه.. وهى كمسؤولة حكومية اكيد لن تجد مشكلة فى مقابلته فى مكتبه.
بأمانة حين قرات العنوان قلت الوالى بقى وهابى

وأبلغت عائشة (الإنتباهة) أنها ذهبت الى منزل والي الخرطوم أمس الجمعة (أمس الأول) مضطرة
برفقة نسوة متضررات قامت ولاية الخرطوم بإزالة قريتهن بالكامل وشردتهن في منطقة شرق النيل

ـــــــــــــــــــــــــــــــــــــــــــــــــــــــــــــــــــــ

الناس البتستنكر ذهابها لمنزل الوالي .. مشت
يوم جمعة وبعديهو السبت إجازة .. يعني ناس فارشين
فى السهلة ينتظروا يومين عشان الواحد يقابل مسئول
مسئول فى مكتبه!!!.
كان يقابلهم عند الباب ومن ثم يوجه بما يجب عمله بالتلفون.
ناس ما عندها غرفة تأويهم .. ومسئولين ما بيقابلوا المواطنيين
فى بيوتهم لـ دقائق!!!.
الرحمة تنزل كيف .. الله المستعان.

كويس يا ابوالريش اهو وقت اقتنعت بالاضطرار
وشكرا تيتاوي للاشارة للاضطرار
واضيف ليك بأشارة لما ذكرته عاليه
للوالي ميزانية ضيافة يومية وطباخ وغيرو لأنو عارفين الناس بتصل الحاكم في بيتو
في السودان في صعوبة احيانا في مقابلة الولاة . ما هاجسين في مكاتبهم ..شي اجتماعات ولقاءات سياسة ولف في الولاية . يعني مامتوفر في مكتبو طوالي زي اي موظف . وشغلو ما بقوم بيهو غيرو
وكل السلطات متركزة في يدو !
مالو ما يمشو ليهو في بيتو!!؟؟

يا امتثال قال لا اقابل النساء يعني فرزن ممكن يقابل الرجال
يا مسلمي
مافي زول قال ليهو صافحهن . ممكن ما يصافح لكن يقابلهن . وفعلا هو بقابل النساء في المكتب وغير المكتب
اشارة لا اقابل النساء في منزلي غير مريحة في نظري وتصريح غير موقف
ويامسلمي دي ماوظيفة دينية .. دي وظيفة دنيوية . اذا تعارضت مع اعتقاده فليدعها لغيره

الوالي فارغ وماعنده موضوع ولا شغله ..
كان يتحجج بانه لايقبل نقل العمل للبيت ..
لانه مكان سكنه وراحته ..
حكاية مابيقابل ومابيصافح والحركات دي ..
خلاص اوانها بالنسبة ليهو وليها راح وانتهى ..
عبد الرحيم ذاااتو بقى من القواعد .. خخخخخ ..
الجوز طاعنين في السن ..
البيسمع كلامه ده يقول خلاص لسه فيهم شرايه ..

يا ود القوز دة تهرب من المسؤولية
شوف حول الموضوع من عجز عن حل مشاكل الناس لي حكاية لا استقبل النساء في منزلي
مالن النسوان مابتستقبلن في بيتك ؟ الاشارة لي شنو ؟
ماياهون دة بنستقبل النساء في دارنا معززات مكرمات دون اي اشارة ريبة
وظيفتو دي ماها وظيفة راتبها بسيط ولا مخصصاتا بسيطة . ولا سلطاتا بسيطة لأنها يفترض ان تكون كدة
ان تكون تحت الخدمة في اي وقت واي مكان
مامكن تعتبر وظيفتك دي زي اي وظيفة مدنية تانية . وتقول وقت راحتي وزمن بيتي
من ينبري لها يجب ان يكون مستعدا لها
ولا يفرق في تعامله بين النساء والرجال

سلام يا أهلنا،
حسب الخبر الوارد، الوالي قال (ما بيستقبل نسوان في بيته) .... يعني حدد (نسوان) ... ما قال ما بيدير مهامه الوظيفية من البيت.

أي كلام تاني يبقى محاولة مخارجة للوالي.

لا انا الظاهر ما قريت الخبر كويس.. ما دام خصص النسوان بالذات
فيجوز دا ما قراره براه. كان يعمل زى غندور ويرحب بيهم بالأحضان...
اصلو مرفوت مرفوت.

مش كدة يا ابوالعزائم
مع انو المشهور عنهم اغلب الشغل لا يدار من المكتب !!

ابوسن سلام
اصلا ما مفروض المواطن يضطر يمشي لي مسؤل في بيته
دة لو المسؤل شايف شغله
الوالي و الرئيس والوزير دي وظايف عادية زيها وزي الباقيات، مفروض يكون عندها ساعات عمل رسمية
لو حسبت انجاز اي مسؤول في اليوم ما حيكون اكتر من شغل التمانية ساعات
شغالين شنو يعني؟
الدكاترة وناس الكهرباء الشغالين بالليل ديل بكونو مرتاحين الصباح

لأنهن جن بالليل وطافيات انوار

ود ابوسن سلامات
خليك من والي ووظيفة ياخي اول مرة اسمع رجل سوداني
يرفض دخول نسوان لي بيتو. دا بشر شنو دا. مافي رجولة وشهامة

صحي يا الفاضل
لو كان
بعدينك قول جوك في البيت شنو يعني المشكلة ؟
وحتي لو كان في سيستم الوالي زاتو مافي زول بجيهو في مكتب ولا بيت
الولاة مكدسين السلطات في يدهم
لو داير تتوظف الوالي لو مضي ليك بوظفوك
لو داير تصديق
لو داير قطعة
لو داير ترفع مظلمة عنك
لو ولو
بس يمضي ليك

هههه ياجبرة
اسمع عاطف خيري
البنات طفن الرتاين
وولعن

صحي يا حسن
عيب والله
كدى اسمع جبار الكسور البنقزو فيها ويرقصو
ده في الظلام كباس
ده البفزع قبل يبكوا و يضيقوا الناس
يا جبار الكسور
ميزان الذهب يا اب كفةً راحجة
ابواب مسكنك ليل و النهار فاتحة
جبار الكسور
يا اسد الظلام يا اب ولدةً ناحجة
صقر الخلا عينيك سلاح جارحة
البموت في ايديك ما بيقروا لي الفاتحة
جبار الكسور
الدود النتر صحي المرافعين خوف
ده محشم قبيلتو البستر المكشوف
ان شافك عدوك يرجف يغلبوا الشوف
النار في الجسم و الطعنة جوة الجوف
عشاي الجماعة يا مشبع الملهوف
يا جبار الكسور
ميزان الدهب يا الغالي وزنو تقيل
يا اب صدراً ركيزة تب ما بغلبوا الشيل
ده الدابي البسم العاتي زي السيل
ستار العيوب حاشاهو ما قويل
وقت الناس تضيق يلفاها هجعة ليل