Post: #2 Title: Re: أغاني والحان تذكرك بشخص ما ، مكان ما ، زما Author: أحمد محمد عمر Date: 04-09-2018, 08:04 AM Parent: #1
وصتني وصيتها و يا نديدي
بعملوا فيني عمايل ما كويسة كلو كلو
Post: #3 Title: Re: أغاني والحان تذكرك بشخص ما ، مكان ما ، زما Author: Haytham Ghaly Date: 04-09-2018, 08:07 AM Parent: #2
هههههههههه
اسمع ديل كانن في بداية دخولك للجامعة؟؟؟؟
Post: #4 Title: Re: أغاني والحان تذكرك بشخص ما ، مكان ما ، زما Author: أحمد محمد عمر Date: 04-09-2018, 08:08 AM Parent: #3
نهايات الثانوي أيام طلوع الشريط كنت بختبر في عواطف ولخبطات وجدانية غريبة كدة وإحنا صغيرين ما نعرفش حاجة يا بيه
Post: #5 Title: Re: أغاني والحان تذكرك بشخص ما ، مكان ما ، زما Author: Haytham Ghaly Date: 04-09-2018, 08:13 AM Parent: #4
بيني وبينك يا نديدي خطرة والله
ياخي انا رحلة عصافير الخريف تسجيل الازاعة
قاعد توديني الاخرة ويجيبني ..
حاولت ارفق الفيديو لقيتو اكبر من حجم الشاشة زاتو
فعينوني يا خلاي .. حيران وحار بي دليل
وينكم تقودو خطاي عينوني
Post: #6 Title: Re: أغاني والحان تذكرك بشخص ما ، مكان ما ، زما Author: عبدالحفيظ ابوسن Date: 04-09-2018, 08:42 AM Parent: #5
لو ما خايف من المفتشين داخل القطارات وحياة الخوة اتجدع ليك جديع هنا لامن ما تعرفني ولا كما قال لامن شنو شنو شنو الحبيت فيهو
Post: #10 Title: Re: أغاني والحان تذكرك بشخص ما ، مكان ما ، زما Author: Haytham Ghaly Date: 04-09-2018, 09:19 AM Parent: #6
Quote: لو ما خايف من المفتشين داخل القطارات
هي زكريات يا ابسن
اتجدع ساي وانسى المفتشين الوهم ديل
يعني حا نعدي عمرنا كلو خوف .. وهو كل كمهو
اتدفق وما تبقى رقراق ياخ
Post: #7 Title: Re: أغاني والحان تذكرك بشخص ما ، مكان ما ، زما Author: أحمد محمد عمر Date: 04-09-2018, 08:43 AM Parent: #5
كان كورس صيفي أيام الثانوي من البعملوهو طلاب روابط الجامعات وكانت أول مرة أدخل لي فصل مختلط واشوف بنات جد جد :) الشفاتة كانو بخلطوا تحت الشجر وانا زول تجم كان واحدة عاينت لي ساي بكون مدنقر 3 يوم الجماعة يشيلوا ويتبادلوا في الجوابات ويحكوا في القصص والبطولات وانا المسيكين كل البقدر عليه أعاين بالكروب كدة أثناء الحصص .. استراق النظر دة كان شجاعة كبيرة خلاص بالنسبة لي :) بجي بعد الكورس افتح المسجل الناشيونال واقعد اسمع في شريط سيف الجامعة الجديد واسسسرااااااااااح سرحان شديد اتمها خيال
كويس إنه عرسوها في كورسينا داك ذاتو وهاجروا بيها اوربا وتاني مافي زول شافها ولا سمع بيها .. وإلا كانت بهدلتنا عمرنا كلو
Post: #11 Title: Re: أغاني والحان تذكرك بشخص ما ، مكان ما ، زما Author: Haytham Ghaly Date: 04-09-2018, 09:23 AM Parent: #7
Quote: كويس إنه عرسوها في كورسينا داك ذاتو وهاجروا بيها اوربا وتاني مافي زول شافها ولا سمع بيها .. وإلا كانت بهدلتنا عمرنا كلو
لعنة الله على الكورسات دي ياخي
والله يا ابوحميد العملتو الكورسات دي في نفسياتنا في تلك الزمانات الغابرة شي لا ينسى ولا يوصف
آلام وسعادة ونشوات واهات وحاجات كدا ما تقدر تقولا زاتو ياخي الخلان افتح البوست دا شنو
Post: #8 Title: Re: أغاني والحان تذكرك بشخص ما ، مكان ما ، زما Author: علي دفع الله Date: 04-09-2018, 08:48 AM Parent: #5
الحب في زمن الكوليرا 😂😂😂
شوف انت وهو العاملين فيها حبيتو زمان وقالت لي اترجل وام فتفت وعصافير الكتاحة ندين الرومانسية والمترومسين ونشجب بشدة هذا الترف والتداعي في عام الرمادة
الرمادة التكيل بشة ورهطه الفاسدين
اقول ليكم حاجة انا زاتي عاوز استرجع ذكرياتي مع اول حب😂😂
يلا تداعوا ولكم الجنة وهجرة عصافير الخريف
هجرة عصافير الخريف الأستــــــــــــاذ محمد وردي كلمات أسحق الحلنقي *هـجرة عـصافير الـخريف* فـى مـوسم الـشوق الحلو هـيج رحـيلا مـع الـغروب احـساس غـلبنى اتـحملو وكتمت اشواق الحنـيـن داير الدموع يتـقـلـو ورجعـت خليت الـدموع يـنسابو ..مـنى ويـنزلو ليـه يا عصافيـر الخريف خضرة مـشاعـرى اشيلا صيف ... تـحت الـغمام شـايف مـواكب الـهجرة اتـلاشت سراع ليه يـا عـصافير ليه الاسف مين علمك أسف الوداع وعارف دا ما اول سفر لبلاد بـعيدة بـدون مـتاع زى ما بتخافي مـن الرياح بنخاف كمان انحن الضياع ليه يا عصافير ليه الضنى صفقة جناحك احزنها .... غـايـب الـسنين الـليله مالو غنا العصافير غـلبو طراهو زولا كان ولوف كم رضا خاطرو وطيبو سمع قليبو كـلام حـنين هـدهد مـشاعرو ودوبـو الـناس سعيدم فى الـحياة لا ضاق فراق لا جربو وانا حالى فى بعد الوطن دفـعنى ضي العين تمن
Post: #9 Title: Re: أغاني والحان تذكرك بشخص ما ، مكان ما ، زما Author: أحمد محمد عمر Date: 04-09-2018, 09:06 AM Parent: #8
وأنا مقدمها على البص نهاية السمستر وقفت قدام الباب وصافتحها مصافحة طويلة كدة وقلت ليها : علي أي حال .... هي تمتها لي : إن شاء الله ما آخر وداع
بعد فتحت الجامعة بزمن ونحن راكبين في المواصلات مع باقي الزملاء وهي قاعدة بعيد مني سواق الحافلة دور شريط سبب الريد بتاع محمود ولما جات أغنية مع السلامة عاينت ليها لقيتها بتعاين لي .. ابتسمت بخجل ودنقرت نفس الابتسامة نفس الخجل نفس الحافلة نفس البص السفري نفس المصافحة الحنينة بتجيني كل ما اسمع الأغنية دي بصوت محمود
هيثم الغالي تباً لك
Post: #13 Title: Re: أغاني والحان تذكرك بشخص ما ، مكان ما ، زما Author: Ali Alkanzi Date: 04-09-2018, 09:32 AM Parent: #9
طرح ذكي وسيكون له رواد كثر واجعلني منهم في قريتنا في الستينات كانت (روادي جمع رادي) الترانسستر بالعدد لم اكن اعرف محمد الامين في صغرى ولكن نبهي اليه حب من احب فقد كان خالي على جلال يكبرني سناً له مودة مع صديقي وابن اخي د احمد عبدالحميد وكل في قريته ولكن كان احمد يأتينا في بيتنا ويقيم اليوم واليومين والثلاث ولكنه كان يقضي وقت العصر إلى المغيب مع الخال علي جلال ولاحظت ان عندما يغني ود الامين يصيبهم الوجوم والصمت ولا يستأنفان الحديث إلا بعد ان يفرغ من اغنيته ومن يومها احببتُ اغاني ود الامين وإلا يومنا هذا ما غنى ود الامين اغنية إلا وخرجت من ذاكرتي صورة القرية وبيت جدي جلال الدين وعناقريب العصر وصورة على واحمد وهما صامتان يتحرك الحجر وليس هما.
Post: #15 Title: Re: أغاني والحان تذكرك بشخص ما ، مكان ما ، زما Author: Haytham Ghaly Date: 04-09-2018, 09:42 AM
Quote: إلا وخرجت من ذاكرتي صورة القرية وبيت جدي جلال الدين وعناقريب العصر وصورة على واحمد وهما صامتان يتحرك الحجر وليس هما.
يا سلااااام يا كنزي ياخي
والله اجمل الذكريات واعذبها تلك التي تكون في القرى والارياف في سوداننا الحبيب
وعناقريب العصر وشاي المغارب خرمتن للان ما فكت مننا يعلم الله
واحدة من الاغنيات البتجرسني بالجد يا كنزي هي اغنية اسمها الرحيل بغنيها حمد الريح
تحس فيها حنين الناس للقرى ولحياة الريف البسيطة الهادئة .. ياخي نحنا ضيعنا روحنا ساي والله
هاك ليها ومشكور على المرور وان شاءالله بلغت الصحة
كلمات اغنية الرحيل
حليل ارض الجزاير والمراكب والطنابير الترن حليل ناس ليلى ساعة الليل يجن يا غالية يا تمرة فؤادي الليلة ما عاد المراكب شرقن والقمري فوق نخل الفريق فاقد الاهل يبكي ويحن نحمل رسايلنا واشواقنا لحبايبنا وللاهل للقاطعين الرسائل الاحلى من عسل النحل لذات الضفاير الطايشة بين مجلس عشيرة وبين اهل وبخجل بتسال الساير بلدنا حبايبنا اهلنا راحو للحلة لا بكاتبونا لا بيفيدونا الحصل حليل الراحو خلو الريح تنوح فوق النخل حليل الفاتو لدار الاهل بدون اهل والجروف الكابة من شاطئ النهر طاب المحل والنخل متاكي وين سوق طير وجوج في امل
Post: #14 Title: Re: أغاني والحان تذكرك بشخص ما ، مكان ما ، زما Author: Haytham Ghaly Date: 04-09-2018, 09:33 AM Parent: #9
Quote: هيثم الغالي تباً لك
ياخي تباً وزيادة زاتو
عليك الله شوف الوجع التحت دا
والله صحي السعيد لا ضاق فراق لا جربو
ياااا حليلنا منها يا احمد
Quote: غـايـب الـسنين الـليله مالو غنا العصافير غـلبو طراهو زولا كان ولوف كم رضا خاطرو وطيبو سمع قليبو كـلام حـنين هـدهد مـشاعرو ودوبـو الـناس سعيدم فى الـحياة لا ضاق فراق لا جربو
Post: #12 Title: Re: أغاني والحان تذكرك بشخص ما ، مكان ما ، زما Author: Haytham Ghaly Date: 04-09-2018, 09:28 AM Parent: #8
Quote: اقول ليكم حاجة انا زاتي عاوز استرجع ذكرياتي مع اول حب😂😂
ابو علوة يا صديقي
استرجع يا ابو علوة خلينا ننسى الحاضر المر دا ياخي
بالله مقولة اذكروني ان غاب جسدي في الرما او غاب اسمي في الخيال فهذا خطي لا يزال
وايضاً ان الذكرى ناقوس يدق في عالم النسيان
المقولات دي تمثل ليك شنو يا ابوعلوة
والله عندي كراس للان محتفظ بيهو كتبو فيهو كثير من الاخوة والاخوات بعض مقولات للذكرى
وكان في واحد من الكورسات الكارثيات دي زاتا .. الواحد لمن يقرا العبارات ويتذكر الوجوه تقرب تجيهو سكتة قلبية
تباً لكل شي ياخي
Post: #16 Title: Re: أغاني والحان تذكرك بشخص ما ، مكان ما ، زما Author: Ali Alkanzi Date: 04-09-2018, 09:58 AM Parent: #12
فعلا يا هيثم اغعنية الرحيل عاشت في وجدان الشعب السوداني كله لانها اغنية تخاطب العاطفة والفراق ونحن شعب يحب ان يبكي من يعزه عندما يفارقه رايت ذلك عندما ترحل العروسة من بيت امها وابيها إلى بيت الزوجية تاتي نساء القرية كلها ليعملوا مناحة لا تنقطع وتشاركهم العروس حتى الاب يجهش باكياً والطريف الامر السمحة قالو مرحلة داخل القرية وربما هي جارة لوالديها في البيت الجديد اما إذا كان رحول السمحة خارج القرية فيتبعها رهط من النساء يبقى معها لايام عدداً ومنهن من يبقين لشهور عددا والرحول شنو اغراض لا تملأ طرف اللوري سريرين وعنقريب وبنبر وومرتبتين ومخدتين ولحاف لحافين بعدين برش العريس المزركش وبرش حفرة الدخان والشملة
Post: #17 Title: Re: أغاني والحان تذكرك بشخص ما ، مكان ما ، زما Author: عبدالحفيظ ابوسن Date: 04-09-2018, 10:00 AM Parent: #12
وجاي تفتش الماضي والماضي ولى زمان وجفت مقلتي الباكية ونامت من سنين احزان
Post: #18 Title: Re: أغاني والحان تذكرك بشخص ما ، مكان ما ، زما Author: أحمد محمد عمر Date: 04-09-2018, 10:05 AM Parent: #17
طرونى ليك وانا كنت قايل اصلى مابطراك تانى كنت فاكر طول فراقك يمحو ريدك من زمانى الا تارى البينا لسع مانسيتو ولا نسانى فجاء اتذكرتو ريدنا والزمان الكان معاكا والمشاوير والامانى والفرح ساعات لقاكا حتى قلبى القال نساكا مالو زى المانساكا صحى جرح الماضى تانى من جديد هسع بكاكا وابتديت من تانى اندم زى كانى كنت ظالمك لمت نفسى وقلت ياريت لو ظروفنا تلم وأكالمك وأحكي ليك أنا كيف ظلمتك لما جيت غلطان ولايمك
Post: #19 Title: Re: أغاني والحان تذكرك بشخص ما ، مكان ما ، زما Author: Haytham Ghaly Date: 04-09-2018, 10:16 AM Parent: #17
يا عبدالحفيظ ياخي دي اغنية فيها جرسة مبالغة
مرتبطة لي بواحد صاحبنا كان بغنيها ويبكي
حمد الريح برغم انه ليس مفضل عندي ولكن عندو اغاني جميلة بحق وتستحق السمع
ربما هو ليس مفضل بسبب اتجاهاته السياسية ولكن لا استطيع ان اغمط حقه في اختيار الكلمات
اغنية الى مسافرة ...
القصة حصلت لي صاحبي وكنا كما التوأم اذا حب هو احببت معه واذا احببت انا يروح حابي معاي برضو ههههههه
المهم البت جات من نواحي الخرطوم زيارة لاهلها وهم جيراننا وهي كبيرة جداً بالنسبة لينا الاتنين حيث كنا بلا خجلة في سنة خامسة ابتدائي
وكمان نحب هههههههههههههههههههههههههههههه
المهم كنا نراقبها ونترصد كل تحركاتها بغرض الشوف سااااي لله وما كنا نستطيع او نجرؤ على الكلام
واذكر يوم باكر سفرها كنا قاعدين انا وصديقي في نهار يقلي الحبة في الشارع قبالة باب بيتهم
وكانت الدنيا صاااانة ومن رادي احد الجيران يجينا صوت حمد الريح
حليلو قال ناوي السفر يا حليلو كيفن نسيبو يروح بعيد في رحلة مجهولة الامد ياااااااااااا حليلو يا حليلو
يا زول انا اتمالكت نفسي
لكن صاحبي النصيحة لله اتبشتن بشتنة العدو
انهمرت الدموع انهاراً في عز ذلك النهار الحار
للان لمن اذكرو بالكلام دا يضحك
ويقول لي ياخي نحنا كنا في خامسة ابتدائي .. خاااامسة ههههههههههههههه
Post: #20 Title: Re: أغاني والحان تذكرك بشخص ما ، مكان ما ، زما Author: أحمد محمد عمر Date: 04-09-2018, 10:26 AM Parent: #19
خامسة يا مفتري ! علي القسم أنا لحدي قريب نهاية تانية جامعة حتى لساني انطلق مع البنات :)
يا عمك افصل الفن من السياسة ياخ حمد الريح وصلاح مصطفى ديل أنا ما بمل سماعهم نهائياً إلى مسافرة دي كترت السماع ليها زمان .. هسة مكتول في أغنية رجيتك وفي انتظار عينيك كملت الصبر كلو
Post: #23 Title: Re: أغاني والحان تذكرك بشخص ما ، مكان ما ، زما Author: Haytham Ghaly Date: 04-09-2018, 10:35 AM Parent: #20
Quote: خامسة يا مفتري ! علي القسم أنا لحدي قريب نهاية تانية جامعة حتى لساني انطلق مع البنات :)
هو الاتكلم منو؟؟؟؟
والله ولا واحد فينا ما كان يقدر يسلم سلام الله زاتو
الى ان يصل قصو دربي ولقوهو باين وانا ما سرقتا .. بس جيت اعاين ههههههه
صلاح مصطفى عندو : ضربت اقول صباح الخير واشوفك كيفن اصبحتا.. مباااالغة
Post: #21 Title: Re: أغاني والحان تذكرك بشخص ما ، مكان ما ، زما Author: عماد كرار Date: 04-09-2018, 10:30 AM Parent: #19
لو بايدى كنت طوعت الليالى و كنت ذللت المحال والامانى الدايرة فى دنياى ما كانت خيال دى الارادة ونحنا ما بنقدر نجابه المستحيل والمقدر مابنقدر نجيب ليه بديل
Post: #22 Title: Re: أغاني والحان تذكرك بشخص ما ، مكان ما ، زما Author: عماد كرار Date: 04-09-2018, 10:34 AM Parent: #19
لو بايدى كنت طوعت الليالى و كنت ذللت المحال والامانى الدايرة فى دنياى ما كانت خيال دى الارادة ونحنا ما بنقدر نجابه المستحيل والمقدر مابنقدر نجيب ليه بديل
Post: #24 Title: Re: أغاني والحان تذكرك بشخص ما ، مكان ما ، زما Author: Haytham Ghaly Date: 04-09-2018, 10:41 AM Parent: #22
Quote: لو بايدى كنت طوعت الليالى و كنت ذللت المحال والامانى الدايرة فى دنياى ما كانت خيال دى الارادة ونحنا ما بنقدر نجابه المستحيل والمقدر مابنقدر نجيب ليه بديل
الله عليك يا كرار
لكن ورينا بتذكرك شنو يا اخوي
ما شايفنا انا وود عمر اندلقنا كيفن .. فتو بالله وامتعنا
طبعاً من اغاني وردي المرتبطة لي بموسم الشتاء واقتراب الاجازة الكبيرة ولمن اسمعها حتى شعور الشتاء بجيني
نشيد اليوم نرفع راية استقلالنا وكان عندنا شجر نيم كتير جداً قدام البيت في الشارع في الوقت داك الشجر دا بحت
كمية كبيرة جداً من الصفق الاصفر لدرجة ان الشارع معظمو بكون لونو اصفر . فالنشيد مرتبط لي بالمناظر دي واحساس الشتا العجيب داك
مشكور على المشاركة
Post: #25 Title: Re: أغاني والحان تذكرك بشخص ما ، مكان ما ، زما Author: عبدالحفيظ ابوسن Date: 04-09-2018, 10:41 AM Parent: #22
النصيحة ليك يا الله كنت جرئ جرأة شديدة ما بلاوز كلو كلو اناضم الجن الاحمر زاتو كنت بحب لي واحدة حب بي نضميهو كمان صوتا حلو او اظنه ذلك في ذلك الزمن بتغني لي عشقتو شادن عيونو ناعسة وقوامو لادن كأنو زهرة ياخ كل ما نتلاقا اقول ليها غنيها اصلو ما مليتها وديني لي اليوم ما احتفظت بالغنية دي . مسختها لي عند الناس كلهم ولامن اسمعها تجيني شحتافة ووحواحة وخمة نفس التقول اغمر عديل
Post: #26 Title: Re: أغاني والحان تذكرك بشخص ما ، مكان ما ، زما Author: عبدالحفيظ ابوسن Date: 04-09-2018, 10:41 AM Parent: #22
النصيحة ليك يا الله كنت جرئ جرأة شديدة ما بلاوز كلو كلو اناضم الجن الاحمر زاتو كنت بحب لي واحدة حب بي نضميهو كمان صوتا حلو او اظنه ذلك في ذلك الزمن بتغني لي عشقتو شادن عيونو ناعسة وقوامو لادن كأنو زهرة ياخ كل ما نتلاقا اقول ليها غنيها اصلو ما مليتها وديني لي اليوم ما احتفظت بالغنية دي . مسختها لي عند الناس كلهم ولامن اسمعها تجيني شحتافة ووحواحة وخمة نفس التقول اغمر عديل
Post: #27 Title: Re: أغاني والحان تذكرك بشخص ما ، مكان ما ، زما Author: عماد كرار Date: 04-09-2018, 10:51 AM Parent: #26
ههههههههههه دي ياهيثم من ايام ظروف الجوابات الملونة والمزركشة والمعطرة تاني مابقدر ابوح ههههه
Post: #30 Title: Re: أغاني والحان تذكرك بشخص ما ، مكان ما ، زما Author: محمد المرتضى حامد Date: 04-09-2018, 10:56 AM Parent: #27
الغالي هيثم.. سلام وتحايا وثناء على هذه الواحة
Post: #28 Title: Re: أغاني والحان تذكرك بشخص ما ، مكان ما ، زما Author: عماد كرار Date: 04-09-2018, 10:52 AM Parent: #26
ههههههههههه دي ياهيثم من ايام ظروف الجوابات الملونة والمزركشة والمعطرة تاني مابقدر ابوح ههههه
Post: #32 Title: Re: أغاني والحان تذكرك بشخص ما ، مكان ما ، زما Author: Haytham Ghaly Date: 04-10-2018, 04:50 AM Parent: #28
Quote: ههههههههههه دي ياهيثم من ايام ظروف الجوابات الملونة والمزركشة والمعطرة تاني مابقدر ابوح ههههه
كرار دي زوغة منك ساي
الظروف دي كانت حاجة جميلة خلاس
بعدين لمن يجيك جواب في ظرف رااقي غير الظروف الملونة بالاحمر وازرق ديك
طوالي بتحتفظ بالظرف وكل فترة تمشي تقرأ الجواب وتتنشق عبير الحبر والورق والخيال يسرح ويتوه
ما بنعفيك .. احكي
Post: #29 Title: Re: أغاني والحان تذكرك بشخص ما ، مكان ما ، زما Author: عماد كرار Date: 04-09-2018, 10:54 AM Parent: #26
للتكرار
Post: #31 Title: Re: أغاني والحان تذكرك بشخص ما ، مكان ما ، زما Author: Haytham Ghaly Date: 04-10-2018, 04:46 AM Parent: #29
Quote: الغالي هيثم.. سلام وتحايا وثناء على هذه الواحة
مولانا الجميل ود المرتضى
بزيارتك البوست نور يعلم الله ومشكور جداً على ارفاق الفيديو
طلبتو من الولهانين الفوق ديل لكن تقول شنو من حالة التوهان الحاصلة
الاحترام والود لك يا عزيزي
Post: #33 Title: Re: أغاني والحان تذكرك بشخص ما ، مكان ما ، زما Author: Haytham Ghaly Date: 04-10-2018, 06:41 AM Parent: #26
Post: #34 Title: Re: أغاني والحان تذكرك بشخص ما ، مكان ما ، زما Author: عبدالحفيظ ابوسن Date: 04-10-2018, 06:52 AM Parent: #33
يا هيثم قلت ليك انا كنت جرئ شديد حكاية احبها من بعيد ما عندي بقول بقول وفي كم طريقة الحفلات . وزمان الحفلات عندنا ما بتخلص . عرس .. طهور .. راس سنة قعر سنة شم نسيم رحلو جداد ساي كدة بيوت البكيات وتحتل مع كفتيرة الشاي ولا مراسيل الاكل ما كان في طباخين زاتو . ياهين النسوان البطبخن . وانت طالع خاش مارق بتلاقي البنوت وفي مقولة يقول ليك بكا في الحلة الجديدة ولا عرس في المرابيع نحن عارفين البكا بلم النحل وهن عارفات كلنا بنجي متظبطين ومستحمين ومتريحين ومن الاغاني كانت بتغني لي يا قايد الاسطول وحياة الله لي الليلة متذكر غرويد عيونها لامن تجر مين .. مييييين لي علاك يطول تاخد ليها غميدة وجرة نفس وانا اسوي في الحي ووووب
Post: #35 Title: Re: أغاني والحان تذكرك بشخص ما ، مكان ما ، زما Author: Haytham Ghaly Date: 04-10-2018, 09:13 AM Parent: #34
Quote: وحياة الله لي الليلة متذكر غرويد عيونها لامن تجر مين .. مييييين لي علاك يطول تاخد ليها غميدة وجرة نفس وانا اسوي في الحي ووووب
هههههههههههههههههه
غايتو جنس غايتو ..
ارجا الراجاك يا صاحبي
Post: #36 Title: Re: أغاني والحان تذكرك بشخص ما ، مكان ما ، زما Author: أحمد محمد عمر Date: 04-10-2018, 09:32 AM Parent: #35
خلط المناسبات دة ذكرني عرس في حلتنا .. خالتي شياااااالة حال من الدرجة الأولى غايتو لي هسة بتذكرها لمن وقفت تحكي بطول حسها في الشارع قدام حوش المناسبة بحيث يسمعوها الجوة والفي الصيوان : يا اخواني الغداء جاهز أي واحد من الاولاد نقول ليه تعال شيل صينية يقول أنا شغال شاي .. دة طالع بي ثيرموس ودة داخل بكباية شاي .. والما بلقى يشيل ليه ملعقة ويدخل بيها مكان الشاي .. قدر ما اقول ليهم يا اولادي الناس بتغدوا في الأول حتى يشربوا الشاي تعالو شيلوا الغداء .. زول شغال بي مافي بس يتجاروا ويتزاوغوا على كفتيرة الشاي .. لمن قلبي اكلني دخلت حوش الشاي أكان القى ليك البت الضيفة السميحة ديك تسوي في الشاي وهم يعاينوا ويتكشموا .. هسة يا اخواني يعني نمسّكها الغداء عشان الناس تتغدى وبعدين نسوقها الدفار عشان يرفعوا الكراسي والصيوانات ولا كيف ؟
طبعاً دقيقتين مافي الاولاد كلهم قاموا جارين من حوش الشاي لكن المشكلة بقت في اعمامك الكبار القاعدين في الصيوان بعد كملوا ضحكهم بقوا كايسين طريقة يكشّفوا جوة حوش الشاي
