البطل و تفسير عبارة صرفت ليها بركاوي !!

11:00 AM April, 08 2018

سودانيز اون لاين
محمد البشرى الخضر-العين-الإمارات
مكتبتى
رابط مختصر

نقلت الجزء المتعلّق بموضوع البوست فقط من المقال فا باقي المقال كلام فارغ كالعادة, لكن لمن يرغب رابط المقال كامل بالأسفل

Quote: أما في خطب الرئيس أمام الحشود فقد استوقفتني عبارة “صرفت ليها بركاوي” عند حديثه بإستاد ربك عن السلوك المتعدي المخالف للأعراف الدبلوماسية للسفيرة البريطانية السابقة روزاليند مارسدن. وهو تعبير شائع في أجواء القوات المسلحة، وكان واضحاً من ردود الفعل التي وقفت عليها أن كثيراً من السوادنة المدنيين لم يسمعوا بها. وقد سارع الأحباب من معارضي النظام الى اهتبال الفرصة ، واتخذوا من ذلك سلماً ومطية لممارسة النضال الإسفيري! ولم يقصر قريبي الأستاذ عبد الوهاب همت، المسؤول الإعلامي للحركة الشعبية في بريطانيا، فارتدى من بزاته أفخرها وقصد منزل السفيرة روزاليند مارسدن، حيث أجرى معها حواراً قصيراً تحفظت فيه السيدة تأدباً بأعراف الدبلوماسية، ورفضت أن تقع تحت إغراء الدخول في معمعة الجدل البيزنطي كما أراد لها إعلام الحركة، ونفت أن يكون الرئيس قد صرف لها بركاوي. وبالطبع فإن تقويم إجابة السفيرة يتوقف إلى حد كبير على درجة فهمها هي للترجمة، ومستوى إجادة اللغة ومدى قدرات قريبي عبد الوهاب همت على ترجمة عبارة “صرفت ليها بركاوي”. ولعله يفعل خيراً لو أنه وافانا بالنص الإنجليزي للعبارة فنتعلم ونستفيد! ولا أظن أن هناك من يجهل المعنى الحقيقي، غير المجازي، للبركاوي، وهو نوع من التمور تنتجه الولاية الشمالية. قال الشاعر ود بادي في خطابه الشهير لوالدته: (بت الخير يجيكي الخير/ وصل جوابك الكاتباهو للولد الحتالي/ وكان الظن ترسلي لي هين هينين من البركاوي داك الطعمو حالي). وقد اجتهد بعض الأحباب من بين صفوف المعارضة في مسعاهم لإقناع الناس بأن التمر البركاوي يستخدم أساساً في صناعة الخمور البلدية، في محاولة باسلة للربط بين العبارة وبين طرفة قديمة سائدة منذ زمان ممعن في القدم عن الرجل الذي ينتمي إلى إثنية معينة ارتبطت في المخيال الجمعي السوداني بسب الدين، وذهابه إلى الحج بصحبة ابنه وهما يحملان بقجة تحتوي على وريقات صغيرة تشتمل على العبارات إياها، فكان كلما استعصت عليه محاولاته لكبح جماح رغبته في شتم من ضايقوه وعكروا مزاجه أثناء أدائه للمناسك أمر ابنه بأن يصرف، أو يقذف، ببعض تلك الوريقات في وجه المتعدي! (٤) وقد أدهشني بوجه خاص كيف سدرت صحيفة (التغيير) الإلكترونية التي ترأس تحريرها الأستاذة رشا عوض، وهي معارضة غراء نعرف عنها بعض حلمٍ وعلم، ونحسن الظن بنشاطها المعارض، فكتبت: (البركاوي نوع من التمور يستخدم لصناعة الخمور البلدية.. والعبارة تستخدم أحيانا لسب الدين)، هكذا قولاً واحداً! والكراهية المفرطة عندما تستبد بالإنسان تعمي بصيرته وتذهب ببصره، فلا يكاد يعي ما يقول! وبالطبع فإن المعلومة محض باطل حنبريت، ولا أساس لها من الصحة البتة. إذ إن البركاوي من التمور الجيدة، حسنة السمعة، ذات القيمة العالية سعرياً، وليس هناك من يستخدمها في صناعة العرقي وإلا لارتفعت أثمانها ارتفاعاً جنونياً. وإنما تستخدم في تقطيرها تمور الدرجة الثالثة متدنية القيمة مثل بلح الجاوا. واسألوا أهل الذكر. ومصطلح (صرف البركاوي) مستخدم بكثافة في أوساط القوات النظامية، فتسمع في معسكرات القوات المسلحة ضابط الصف التعلمجي مهدداً: (الليلة حأفضي فيكم خزنتين بركاوي لامن تعرفوا حاجة). ومثل هذا الاستخدام عريق في سيرة جيش السودان، ولا صلة له بسب الأديان، وما ينبغي له. وقد اشتهر به بعض كبار الضباط لعل أبرزهم المغفور له اللواء حسن بشير نصر نائب الراحل الكبير الفريق إبراهيم عبود. تغمدهما الله بواسع الرحمات. وعبارة “صرفت ليهو بركاوي” تعادل في الفصحى عبارات مثل “كلت له الصاع صاعين”. أما في عامية السوادنة فربما وجدت ما يقابلها في عبارات شعبية من شاكلة (وريتو المكشن بلا بصل) او (أديتو السم القدر عشاهو). ومن عجب أن هذه لم تكن المرة الأولى التي استخدم فيها الرئيس هذه العبارة بالذات، إذ سبق له ذلك غير مرة، منها تلك المناسبة قبل سنوات عندما زار الجنرال كولن باول وزير خارجية الولايات المتحدة في عهد الرئيس جورج بوش الابن. واتفق ان تحدث مدير برنامج المعونة الأمريكية خلال حفل عشاء فشطح ونطح، تماماً كما فعلت السفيرة روزالند مارسدن، وتخطى حدوده، في حديث له وجهه إلى الجمع، وتجاوز الأعراف الدبلوماسية المستقرة في مثل هذه المحافل والمناسبات. وتصدى له وقتها أحد الوزراء فأحسن وأجاد وألقم الرجل حجراً. فقال الرئيس البشير بعد ذلك في مناسبة عامة مشيداً بالوزير إنه، أي الوزير، صرف للخواجة بركاوي!

https://www.bajnews.net/news/19262

البطل يبدو انه لم يفهم وجه استنكار الناس لصدور مثل هذه العبارة من رئيس الجمهورية, القصّة ليست سب الدين
القصّة في ضياع هيبة المنصب وفي سوقية الخطاب التي لا تليق بمنصب رئيس كل السودانيين
حتى لو كان هذا مصطلح متداول في اوساط الجيش فهو ليس أمرا إيجابيا بل ويستخدم فيما يعرف بالفارغة
يعني ذنبنا شنو احنا ما كفاية هالكنا بالشتارة في الرقيص و في الكذب كمان ناقص يشدّنا إدارة و يطرشنا فارغة ! رئيس دا ولاّ تعلمجي, وشعب إحنا ولّا مستجدّين خدمة!!

تحياتي ودو
الرك علي صرفت !!
يقول ليك صرفت ليهو صرف بدون اضافة كلمة تانية وتكون مفهومة صرف ليهو شنو
التانية
هو قايل الجيش دة منظمة سرية كالمافيا ولا الماسونية ؟ ياتو بيت مافيهو زول عندو علاقة بالجيش و رندوك الجيش والناس خشت الدفاع الشعبي وعارفين الرندوك المتداول فيهو

ود البشري سلام

ياخ عندي سؤال برة الموضوع لو ممكن


وين صاحبك الكوز المدعو فيصل نوبي اكيد بي تتزكرو جدا


و شكرا

هلا اب سن
فعلا البطل عايز يبيع بضاعة اي كلام المهم يبعد سب الدين من المشهد

هلا دكتور مصطفى
كيف ما بتذكرو موجود ومتواصلين لكنه ككثيرين تركوا البورد و استعاضوا عنه بالوسائط الأخرى
بس حبيت اصحح معلومة انه ما كوز, اللهم إلّا لو بنفس الفهم بتاع انّك مناضل وكدا

هههههههههههههههههههههههههههههه

طبعا سؤالي يا محمد ما كان بي البساطة دي لانك كررت قبل مدة الكلام نفس الكان بيقولو فيصل نوبي في بوستاتي

لكن حكاية مناضل دي و كوز وخلايا نائمة و ناس اللون الرمادي

الاسماء دي كلها بي تتقال للزول حسب تصرفاتو و افعالو

واالله اعلم

سلم علي فيصل نوبي الكوز و قول ليهو زمان انا وصلني كلام مكتوب انو بي يتعامل مع جهاز الامن قبل 8 سنة تقريبا وكان بيدهو حاجات كده ..................


مع تحيات الاستاذ نزار قباني ليك

معليش لانو مداخلاتي محددة ما ح اقدر اتونس معاك تاني

مع السلامة

شكرا البطل على اجتهادك المفضوح لسكب الماء المثلج على "بركاوي" الرئيس ....

ومن باب الشيء بالشيء يذكر ....

وبعد هذه المهارة الفائقة التي أبديتموها في استخراج الشربات من فسيخ الرئيس ...

لعلك تنفحنا بتفسير مدنكل آخر لعبارته "طال عمره" ... الميكانيكية بقولوا الحديد لو ما سبيت ليهو الدين ما بشتغل ...

أكيد بكون حديد أمخاخنا سخن بعد ثلاثين عاما من الاستعلاء الإنقاذي علينا ...

فهلا أتحفتنا بتفسير قوله رعاه الله .... ورعاك ...

دي محاولة لتجميل القبيح ليس إلاّ ...

التعبير ما سمعتو متداول بين منسوبي الجيش
والموجّه ليهم الخطاب ما عساكر.


البطل ده أتاريهو حكاية.

وكان واضحاً من ردود الفعل التي وقفت عليها أن كثيراً من السوادنة المدنيين لم يسمعوا بها.

_______________
غايتو نكتة الحلفاوي سمعتها قبل عشرين سنة


_____
بعدين شنو حكاية "السوادنة" دي؟

ود البشرى

الإنتهازي المتملق للكيزان مصطفى البطل يعتقد بأنه قد يستطيع أن يحجب ضوء الشمس بيديه.

وأنا أقول له: يا أرزقي أت############ ت############تك وأقبض ماهيتك، لكن ما تجي تدافع على نظام ساقط.

و عبدالوهاب همت حا يمشي يقول للسفيرة كلام البشير بي ضبانتو "البشير قال صرف ليك بركاوي " ، بالتاكيد حيوصل ليها المعني ، او حيسألها بي طريقة تانية ، شنو الكلام الدار بينك وبين البشير في اخر مقابلة ليك معاهو .. مثلا ..
طبال وغبي

عمر البشير داخل القوات المسلحة كان معروف بين الضباط بلقب عمر الكضاب

خخخخخ

غايتو همت بكون تعب يوصل المعني .. واجتهد في توضيح انو دة نبذ ... الا يكون استعان بخطب القذافي زمان
السفيرة تكون مهجومة لي هسة بهتوها وشيلوها القوالة
ولا حكاية كرهت اليوم الامها ولدتو فيها !
غايتو همت دة بإعتبارو من كوستي وصديق قديم من زمن الثانوي بطلب منو يكتب لي فهم السفيرة كيف بالانجليزي
هسة دة ما امتحان ماجستير عديل 😆😆😆😆

الاخ محمد وبقية الزملاء والزميلات
- هذ المدعو البطل في كل مرة يمارس السقوط وسيظل كذلك ويجب ان يعرف ان التاريخ لايرحم ولاينسي والانقاذ زائلة وان طال السفر
- عجيب امر الرئيس اليس فيهم رجل رشيد ينصحه فسقوطه يتتزايد بمعدل متزايد اكثر من ا لبطل نفسه
- رغم عبارة صرفت ليها بركاوي تعبير لايشبه رئيس دولة الا ان في تقديري العبارة التي تلتها اسؤا " كرهت اليوم الولدتا فيها امها زاتو " والسفير قل ادبو
- كمان موضوع محاربة الفساد دا اخير منو البركاوي
تحياتي

تحية للجميع

المشكلة الأساسية قبل موضوع البركاوي
أنه الموضوع باين عليه دراما منسوجة من نافوخ الرئيس
عشان يحمس الحضور بي جنس الكلام الفارغ دا
مافي دبلوماسية في الدنيا بتغادر بلد وقبل المغادرة
تجوط الشغلة وتسئ الأدب للدولة وحكومتها
فهذا يخالف الأعراف الدبلوماسية تماماً
وأهي جات السفيرة وقالت دا ما حصل وأكيد ما حصل
لكن تقول شنو .. جنس الكضب دا هو الاتعودوا عليه ناسنا ديل

و عبدالوهاب همت حا يمشي يقول للسفيرة كلام البشير بي ضبانتو "البشير قال صرف ليك بركاوي

______________
President Bashir said he took you out for many 'Dates'

سلام يا هندسة

Quote: ومثل هذا الاستخدام عريق في سيرة جيش السودان، ولا صلة له بسب الأديان، وما ينبغي له. وقد اشتهر به بعض كبار الضباط لعل أبرزهم المغفور له اللواء حسن بشير نصر نائب الراحل الكبير الفريق إبراهيم عبود. تغمدهما الله بواسع الرحمات.

يا ريت أحد الإخوة الأعضاء في هذا المنبر ممن له علاقة بالجيش ينورنا بخصوص هذا ( الاستخدام العريق للبركاوي في سيرة جيش السودان ) .....

تحياتى ليك يا ود البشرى ..

حضور و متابعة ..

معروف اي سفير/ سفيرة لما مدة العمل تنتهي بقابل رئيس البلد او رئيس الوزراء واثناء الحديث بكون هناك حديث ودي فيه إبداء رأي حول قضايا لمسوها اثناء فترة عملهم
بحاولوا يحثوهم على معالجتها مثل قضايا حقوق الانسان وغيرها من البلادوي الحاصلة في بلدنا
البشير عاوز يقول السفيرة حبت تملي عليه شروط وخلافه
انا خايف مترجمه زاتو يكون مافاهم التكتح من كلامها

Quote: حضور و متابعة ..

ههههههههههههههه

والله حقو الواحد يصرفلك بركاوي انت زاتك

عايز تتابع شنو عليك الله

كلام واااضح واحد متملق زي حلاتك كدا

قاعد يحاول يجمل في كلامك رئيسكم الاهبل الاشتر دا


تطمموا البطن الله يعلم

Quote: سلم علي فيصل نوبي الكوز و قول ليهو زمان انا وصلني كلام مكتوب انو بي يتعامل مع جهاز الامن قبل 8 سنة تقريبا وكان بيدهو حاجات كده .

يازول إنت رايح ليك الدرب في الموية بس .. فيصل نوبي لا كوز ولا أمنجي ولاينتمي للنظام الحاكم دا اصلا .. فيصل زول حقاني وأخو أخوان ومابحب الدهنسة ولا البلبصة .. الكلام الجاك مكتوب دا تموصو وتديهو حبة ملح عشان يطعو ليك وتشربو .. انت من زمن فلان أمنجي وفلان كوز الدنيا إتطورت والفهم إرتقي والعصبيات بكل مسمياتها في طريقها للتلاشي .. إنت لو عايز تعيش في قوقعتك دي عيش ياخ لكن كمان ما تأذي غيرك بأوهامك دي .. ونصيحتي أبعد من قلنا وقالو الحاجة دي ماحلوة في حق الرجال .


.......
ياعمك أولا .. البطل شرح المعني ( صرفت ليها بركاوي ) بإسهاب .. وجاب أمثلة من داخل المنظومة العسكرية
ثم تانيا هو ماقال ياسلام ياريس خطابك كان في الصميم ... ابدا .. البطل ركز علي فرح المناضلين بالعبارة وتهليلهم بها .. فشرح معناها الحقيقي وأورد أمثلة للتدليل علي رعانتهم ولقافتهم .. وهذا كان هدف مقاله .
تحياتي يامساعد 😁

مكرر