Post: #1
Title: هل نحن شعب أكول ؟
Author: عبدالحفيظ ابوسن
Date: 04-08-2018, 06:09 AM
06:09 AM April, 08 2018 سودانيز اون لاين
عبدالحفيظ ابوسن-no where
مكتبتى
رابط مختصر معظم المصانع اغلقت ابوابها
بفعل الجبايات المتعددة من ضرائب ورسوم انتاج ونفايات ودفاع مدني ورسوم محليات ورسوم صحية ألخ
ومن تعرفة المياه العالية وتعرفة الكهرباء الاعلي
ولا سبيل لتسهيل امورك كمالك مصنع الا من خلال الارتباط بدائرة الفساد السياسي .
يوجد بابين
باب الشعب وتطبق عليك كل الاوامر والقوانين والرسوم المعلنة والخفية وبي اثر رجعي كمان
باب اهل السلطة مافيهو حارس زاتو
|
Post: #2
Title: Re: هل نحن شعب أكول ؟
Author: عبدالحفيظ ابوسن
Date: 04-08-2018, 06:14 AM
Parent: #1
الانتاج بقا مطاعم بس
مطاعم فخمة .. اكل بس
رأسمالية تجارية وصناعية هربت نحو المطاعم
البلد دى اتملت مطاعم التقول الناس دي بقت ما بتولع نار في بيوتها
حتي الاجانب ما لقو استثمار غير المطاعم
يقول ليك
داير تشتغل اعمل ليك مطعم . الناس دي ما بتخلي الاكل
مطاعم فخمة
مطاعم شعبية
طعمية قدام البيت
قدرة فول قدام البيت
كوارع
|
Post: #3
Title: Re: هل نحن شعب أكول ؟
Author: Abdullah Idrees
Date: 04-08-2018, 06:23 AM
Parent: #2
اعتقد الناس بقت بتعدي ساعات طويلة برة البيوت جريا وراء المعايش
لاكين المطاعم الفخمة دي ممكن تكون حكرا على الطبقة الطفيلية المتنامية ، الناس الماعندها مانع تدفع الف ج في اتفه وجبة
صباحك خير يا ابسن
|
Post: #4
Title: Re: هل نحن شعب أكول ؟
Author: أيمن نواى على
Date: 04-08-2018, 07:34 AM
Parent: #3
حباب ود أب سن الراكز
صدقت يا ود اب سن ... التجارة الرابحة الاكل .... الدولة الرسالية انتجت شعب أكول ... شعب يعلف ويبعر ولا يفكر ... المهم العليقة تكون متوفرة تمنها كم ما مهم .... يوم ما تنقطع العليقة الحكومة تروح شمار فى مرقة..... واصل ما نكون قطعنا ليك حبل افكارك .... اها اتوهطنا مصنقرين فى المنبر .
|
Post: #5
Title: Re: هل نحن شعب أكول ؟
Author: عبدالحفيظ ابوسن
Date: 04-08-2018, 07:53 AM
Parent: #4
تعرف يا عبدالله ادريس اخوالي ضيوف في ام درمان مع خالي . ومرقو واتأخرو وبالليل غشو مطعم من المطاعم الاياها . اتعشو وشربو عصير فرش . واتحالفو في الدفع
ولامن شافو الفاتورة . لمو كلو قروشهم وما كفت . تخيل ختو واحد خالنا امنية في المطعم وركبو تكسي من الخرطوم للثورة جابو قروش وجو
ههه
بقت حكوة اسرية وفيها تفاصيل
يعني هم عندهم تقدير للاكل وماليتهم ما جهلاء . لكن الحساب مختلف
العصير الفريش في المطاعم الما فاخرة خالص ب 35 ج وهو عبارة عن برتكان ضارب ولا منقة ضاربة . والعصير برة بي 5 ج
دي اسعار قبل كم شهر
اخوك زول عنقالي ساكت . بخش المطعم لو دعت الظروف وما باكل حاجة الا اسأل من سعرها ما بعتمد علي القايمة . مرات في رسوم خدمات ما بكتبوها
|
Post: #6
Title: Re: هل نحن شعب أكول ؟
Author: عبدالحفيظ ابوسن
Date: 04-08-2018, 08:41 AM
Parent: #5
اي والله يا ايمن بقينا شعب كسلان .. الكسل جابتو الحكومة . اي عمل داير تعملو تقابلك العراقيل المالية المفروضة من قبل الحكومة ومن جهات متعددة تكسلك زاتو . تصاديق تصاديق تصاديق قبل تدخل كراعك وبعد تخش يلمو فيك جبايات من كل نوع
والكسل انتشر ... الراجل والمرة هاجين وما محصلين . يبحتو كلهم
وست البيت شغالة اقتصاد . بدل تشتري حطب وتعوس . الحطب غالي وناس الغابات غازين عودهم . والعيش ناس القبانة والزكاة والمحليات والولاية ووو غازين عيدانهم
تكلفة العواسة اغلي من الجاهز
حتي وريق الخدرة تشتريها وتديها لي مرة قاعدة في سوق الخدار تورقا ليك
يعني تكون ورقت الخدرة 😆😆😆😆
والحكومة تشم ريحة المال . اي شغلة شغالها المواطن دايرة تقسم معاهو . وبعد شوية تقلع منو خسرت ما عندها شغلة بيك حاسباك ربحان طوالي
|
Post: #7
Title: Re: هل نحن شعب أكول ؟
Author: احمد الشيخ
Date: 04-08-2018, 09:02 AM
Parent: #6
الحل في فطور البيت البدري
موظف ، طالب، عامل
افطر في البيت قبل ما تطلع
ان شاء الله عيشة بي شاي
الحل التاني لو ما بتعرف تاكل من الصباح شيل معاك سندوتشات من البيت
لو حسبت تكلفة العيش والحاجة البتحشيه فيها مقارنة باقل وجبة تاكلها برا حتلقاها النص
تخيل اسرة فيها ستة لسبعة اشخاص ، مهما تشتري عيش من بدري وتعمل ليهم سندوتشات قبل ما يطلعوا حتلقا الوفر في فطور كل واحد منهم برا البيت قريب النص
|
Post: #8
Title: Re: هل نحن شعب أكول ؟
Author: Nasser Amin
Date: 04-08-2018, 09:28 AM
Parent: #7
سلامات اب سن
دا بقي الترفيه الوحيد الموجود, الناس عايزه تفرَق تمشي محل العضًة
لا في دور سينما , لا مسارح و لا ملاهي
الدولة رسالية وكدا!!
في السعودية: تخطط شركة AMC، أكبر سلسلة لدور السينما في الولايات المتحدة، لافتتاح 30 دارا للعرض في السعودية.!
|
Post: #9
Title: Re: هل نحن شعب أكول ؟
Author: عبدالحفيظ ابوسن
Date: 04-08-2018, 10:34 AM
Parent: #7
بل اكتر يا احمد
التكلفة اكتر بي كتير
اسألني انا عندي طلاب في المدارس . بنديهم حشوات من البيت و موية باردة في حافظة موية صغيرة (زمزمية) . السندويتش غير انو اقتصادي بكون نضيف . السندوتش الجامبو بي 50 ج حق السجوك ولا الهمبرغر ولا الكفتة . وصندوق السجوك بي 40 ج بعمل ستة سندوتشات جامبو . نص كيلو فول بي 15 بعمل عشرة سندوتشات ويفطر ناس البيت . البيضة بي2 ج بيضتين وعيشة سندوتش بي 5 ج
وهكذا
نمط الحياة الاستهلاكي دة حق الحكومة دخلتنا فيهو هي . وخشو لينا من الحتة الهشة .. الشفع . فلذات اكبادنا البتفرجو في دعايات التلفزيون الرسالة وبشوفو حياة ارباب السلطة في مناسباتهم . وفي المدارس
ويزنقونا وقلبنا يتقطع
اي شئ ولا هزيمة وليداتنا
|
Post: #10
Title: Re: هل نحن شعب أكول ؟
Author: عبدالحفيظ ابوسن
Date: 04-08-2018, 10:54 AM
Parent: #9
مش قلت ليك يا ناصر
عاصرننا مع الحيطة الهورب وضاغطين ضلعتنا القصيرة
يلمو فيك الشفع مرقنا !! نرفه !!
وبي لغة عصرية نتغدا ولا نتعشا برة في ذات المطاعم الاستفزازية
الانوار كيف
والترابيز كيف
الصحون والشوك
و ال ال ال
وتدفع ما يساوي قروش اخير لو اشتريت ليك بيها خروف بيج ولا بالعدم عنبلوك لبن . تاكلو شية وتختو الباقي في التلاجة يقعد معاك شهر
|
Post: #11
Title: Re: هل نحن شعب أكول ؟
Author: Abureesh
Date: 04-08-2018, 11:51 AM
Parent: #10
"البيضة بي2 ج"
براها واللا معاها أمها؟
|
Post: #12
Title: Re: هل نحن شعب أكول ؟
Author: احمد الشيخ
Date: 04-08-2018, 11:56 AM
Parent: #10
وانا كمان يا اخ عبدالحفيظ عندي اربعة في المدارس
بشتري ليهم عيش من بدري وانواع الحشوات بالأسبوع عشان انوع ليهم
ومهما تحسب وتديهم احسن اكل حتلقاه اقل بكتير من تكلفة انك تديهم قروش عشان يشتروا فطور من كافتريا المدرسة
وانا زاتي بشيل فطوري معاي او افطر في البيت
وخلي اكل المطاعم اليبور
الشي التاني مهما كان واتاخرت برا، تعال اتغدى في البيت
وما تشرب شاي ولا جبنة برا البيت الا للضرورة
الحاجات البسيطة دي لو اتحسبت حتلقاها في الشهر بتعمل حاجة
وكل زول وحسب ظرفه
|
Post: #13
Title: Re: هل نحن شعب أكول ؟
Author: محمد جبره
Date: 04-08-2018, 01:16 PM
Parent: #12
سلام ابوسن و ضيفوفه في آخر زيارة لي للسودان لاحظت ازدياد عدد المطاعم و الكافتريات وبالمقابل زيادة في عدد الصيدليات
بين كل مطعمين في صيدلية ..توازي غير منطقي
اها الشعب المرييض دا اكول و لا جعان ولا مزلوع ساي
تحياتي
|
Post: #14
Title: Re: هل نحن شعب أكول ؟
Author: هاشم احمد ادم
Date: 04-08-2018, 01:34 PM
Parent: #13
سلام عبد الحفيظ
الإجابة عن السؤال تتلخص
فى كلمتين :
money laundering
نعم ( غسيل الأموال )
وهذا معروف على مستوى العالم
اما بالنسبة للسودان بعد التشديد
فى الاجراءت المالية ارفع الحظر وتوفيق
الاواضاع المالية حسب طلب البنك الدولى
اصبح المال المشبوة( فساد ، مخدرات ...)
يبحث عن امكان اخرى كالمطاعم وتجارة
السيارات ، والمغاسل .. باختصار اى مهنة
تجلب كاش ويسهل التلاعب فى دفاترها
وتم الباقي بالخيال والأسئلة .
|
Post: #15
Title: Re: هل نحن شعب أكول ؟
Author: عبدالحفيظ ابوسن
Date: 04-08-2018, 02:36 PM
Parent: #14
بيض النية يا ابوالريش 😆
ملحوظة ضرورية ضراوة ملحة
بيض من ابيض اللون
وليس من البيض بين قوسين جنا الجداد او المح
|
Post: #16
Title: Re: هل نحن شعب أكول ؟
Author: عبدالحفيظ ابوسن
Date: 04-08-2018, 02:47 PM
Parent: #15
الحاصل شنو يا جبرة ؟
معظم المحلات الجنبنا وتزيد علي العشرة في شارعنا محلات اكل .. لاحظ شارعنا وليس حلتنا
محلات اكل من جميعو .. فول اقاشي فتة كوارع طعمية سمك بيض باسطة لبن عصير
وتحديدا 8 صيدليات
|
Post: #18
Title: Re: هل نحن شعب أكول ؟
Author: عبدالحفيظ ابوسن
Date: 04-08-2018, 02:55 PM
Parent: #16
مابعيد يا هشام
جايز جدا
امس ماشي علي ربك في مخرج المدينة مبني فخم جدا ما شفتو قريب .. فخم غلا يكون كلف مية جنية !! في منطقة الصناعات !! القطع المخصصة للاستثمار الصناعي .. يافطة كبيرة مطعم سمك
يعني الفخامة دي كلها ما باكلها لكن بدفع تمنها وباكل نفس السمك الباكلو في محلات تانية غير بعيد منها
|
Post: #17
Title: Re: هل نحن شعب أكول ؟
Author: Elhadi
Date: 04-08-2018, 02:48 PM
Parent: #15
المطاعم + الصيدليات + صوالين الحلاقة دي الأبرز
يليها بدرجة أقل محلات الكوافير وتجهيز العرائس
والمغالق وديل بضاعتهم كلها ضاربة
|
Post: #19
Title: Re: هل نحن شعب أكول ؟
Author: امتثال عبدالله
Date: 04-08-2018, 03:13 PM
Parent: #17
الناس الاكالين جد هم سكان نيويورك ، في كل ركن في مطعم ، مطاعم فاخرة ومطاعم ما فاخرة ومطاعم في عربات متحركة اصحابها
عرب وتلقى الناس واقفين صفوف.
لكن يا ود ابوسن هسع انت وريتنا ان الاكل رخيص في السودان... طمنتنا ....البيضة الواحدة ب ٢ جنيه يعني الدستة ب ٢٤ جنيه بس!!! اقل من دولار (هههههه) هنا بنشتري الدستة ب ٣ و ٤ دولارات ،،،ومرات بيغشونا ويقولوا لينا ده بيض خاص والجدادة المسؤولة
عن وضع البيض كانت بتاكل اكل طبيعي بدون كيماويات ، ودستة البيض الخاص ب ٦ دولارات،،،
واكيد جداد السودان بياكل اكل طبيعي لان الكيماويات معدومة في السودان، واذا كانت في كيماويات كانوا خصبوا ملايين الافدنة من
الاراضي الزراعية وانتجوا الذرة والقمح وكانت الرغيفة حتكون مجان.
مع وافر التقدير والاحترام والتقدير
|
Post: #20
Title: Re: هل نحن شعب أكول ؟
Author: Ali Abdalla
Date: 04-08-2018, 03:41 PM
Parent: #19
لكن يا ود ابوسن هسع انت وريتنا ان الاكل رخيص في السودان... طمنتنا ....البيضة الواحدة ب ٢ جنيه
يعني الدستة ب ٢٤ جنيه بس!!! اقل من دولار (هههههه) هنا بنشتري الدستة ب ٣ و ٤ دولارات ،،،
:::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
التحية ليك يا أبوسن ولضيوفك
إمتثال: مستوي دخل الفرد في السودان وعندكم ما واحد
لذلك المقارنة ما في محلها
إلاّ إذا كانت المقارنة حسب مستوي دخل الفرد
القالو ربيع عبدالعاطي
|
|