Post: #1 Title: أنا الصَابِر عليك يا هَمْ .. أنا الوافي و هواى فريد .. ثم ما ادراك و عوض جبريل .. Author: يحي قباني Date: 03-29-2018, 12:09 PM
01:09 PM March, 29 2018 سودانيز اون لاين يحي قباني-فى الدنيا العجيبة مكتبتى داهية تخمك انت و عوض جبريل ...
قالتها الفلاتية للسر قدور في حالة غيرة فنية حينما سمعت العاقب محمد حسن يشدو
بيا حبيبي نحن اتلاقينا مرة ... و التي رفضتها الفلاتية حينما سألها قدور بان تغنيها ...
فضحك السر وقال ليها ( عوض جبريل مالو) ؟ قالت ليه: ( ما شين زيك ) ...
اما ذلك الشين عوض جبريل عليه شآبيب الرحمة ...
فقال عنه السر قدور :
كان عوض جبريل واحد من الناس ... فحينما كان الشعراء ظهراً و في الامسيات يقصدون قهوة يوسف الفكي و المغنيين يقصدون جورج مشرقي ... يذهب عوض جبريل منذ الفجر الى قهوة شديد ... قهوة العمال و الحرفيين ... يتقاسم معهم شاي اللبن و اللقيمات ... و يسمع همهم و يصيغه شعراً بسيطاً يعكس حال الناس و حال الغلابة ...
اغالب دمعى واتصبر واقول يا الله صبرنى على فراقك يا اغلى الناس سواد حظى الملازمنى
أماني هوانا يا حليلا وحليل فرحي وهناي معاه حليلو الاغلى من عيني حليلو الكنت بتمناه حليلو العمري ضاع بعده حليلو المافي زول بيسواه اعذب قليبي بي دمعه وفاقد سلوى في ذكراه
Post: #2 Title: Re: أنا الصَابِر عليك يا هَمْ .. أنا الوافي و ه� Author: يحي قباني Date: 03-29-2018, 12:25 PM Parent: #1
لي حبيب شاغل بالي ...
اول ما كتب و لحن عوض جبريل ...
سمعتها فاطنة الحاج و هو يغنيها فطلبتها و سجلتها بصوتها في الإذاعة ...
احب سماعها بالصوت الذي يضفي جمال على كل ما غناه للغير ...
Post: #3 Title: Re: أنا الصَابِر عليك يا هَمْ .. أنا الوافي و ه� Author: احمد الامين احمد Date: 03-29-2018, 01:36 PM Parent: #2
تحية وتقدير قبانى فى مرور سريع جدا توقفت فى صدح هاشم ميرغنى بهذا الاداء الراقى لهذه الاغنية وما عارف ليش ( الغنا طالع نازل كأنو مغزول فى مغازل ) على حنجرة هاشم ميرغنى ؟ برضو ماعارف ( ليه الدنيا كده لماحة ) فى صدح وترنم وشدو وتغريد هاشم ميرغنى ؟ * تنبيه : الكلام داخل الاقواس من شعر الخال عبدالرحمن الأبنودى فى رثاء عم فؤاد حداد عليهما السلام وعلى قبانى (ذاتو ) .
Post: #4 Title: Re: أنا الصَابِر عليك يا هَمْ .. أنا الوافي و ه� Author: معاوية الزبير Date: 03-29-2018, 03:06 PM Parent: #3
تعرف يا قباني لأسباب عديدة.. اكتر فنان أسعدني الحظ بالجلوس معه هو الراحل هاشم ميرغني منها مصاهرته لجيراننا سابقا في كوستي فضلا عن سنوات الدوحة الزاهية بجلساته الخاصة لكن لم أسمعه يشدو بهذه الأغنية أبدًا
والكلام جاب الكلام، هل تعلم إنو هاشم في آخر أيامو (سنوات كده) سجل عشرات من أغاني الحقيبة عود، حضرت بعضا من جلسات التسجيل دي مش عشرات الأغاني و بس، كمان بعض الأغاني سجلها بألحان مختلفة الهدف من ذلك كما قال هو التوثيق لهذا التراث في أقرب صورِهِ أقصد طريقة أداء الأغنيات من أصحابها الأصليين هذه التسجيلات التحفة لا أدري مصيرها الآن لكن لا شيء يفنى، لا بد أنها في مكان ما !
شكرا ليك أصلا. ثم لأنك جلبت لينا الإنسان الرائع أحمد الأمين
Post: #5 Title: Re: أنا الصَابِر عليك يا هَمْ .. أنا الوافي و ه� Author: يحي قباني Date: 03-30-2018, 00:12 AM Parent: #4
Quote: تحية وتقدير قبانى فى مرور سريع جدا توقفت فى صدح هاشم ميرغنى بهذا الاداء الراقى لهذه الاغنية وما عارف ليش ( الغنا طالع نازل كأنو مغزول فى مغازل ) على حنجرة هاشم ميرغنى ؟ برضو ماعارف ( ليه الدنيا كده لماحة ) فى صدح وترنم وشدو وتغريد هاشم ميرغنى ؟ * تنبيه : الكلام داخل الاقواس من شعر الخال عبدالرحمن الأبنودى فى رثاء عم فؤاد حداد عليهما السلام وعلى قبانى (ذاتو ) .
يا سلاااااام ياخ ...
احمد الامين و ود الزبير حتة واحدة ...!
حقو الزول يطبل البوست ده على كده ...😌
هاشم ميرغني يا احمد ...
هاشم ميرغني و كفى ...
Post: #6 Title: Re: أنا الصَابِر عليك يا هَمْ .. أنا الوافي و ه� Author: يحي قباني Date: 03-30-2018, 00:46 AM Parent: #5
Quote: فضلا عن سنوات الدوحة الزاهية بجلساته الخاصة لكن لم أسمعه يشدو بهذه الأغنية أبدًا
والكلام جاب الكلام، هل تعلم إنو هاشم في آخر أيامو (سنوات كده) سجل عشرات من أغاني الحقيبة عود، حضرت بعضا من جلسات التسجيل دي مش عشرات الأغاني و بس، كمان بعض الأغاني سجلها بألحان مختلفة الهدف من ذلك كما قال هو التوثيق لهذا التراث في أقرب صورِهِ أقصد طريقة أداء الأغنيات من أصحابها الأصليين هذه التسجيلات التحفة لا أدري مصيرها الآن لكن لا شيء يفنى، لا بد أنها في مكان ما !
شكرا ليك أصلا. ثم لأنك جلبت لينا الإنسان الرائع أحمد الأمين
ود الزبير يا صاحب ...
كما قال احمد الامين عن الخال الأبنودي ..كأن الغنا مغزول في مغازل
ياخي الأداء و الصوت هنا من حلاوته و طلاوته ... بخليك تستحضر كلمات الحسين الحسن في حبيبة عمري فصوتك كان يهدهد روحي ويحملني في جناحٍ أغر يحلق بي حيث لا أمنياتٍ تخيب ولا كائناتٍ تمُرْ
رحم الله هاشم ميرغني ...
Post: #7 Title: Re: أنا الصَابِر عليك يا هَمْ .. أنا الوافي و ه� Author: يحي قباني Date: 03-30-2018, 04:57 AM Parent: #6
تصحيح ...
قهوة الشعراء حسب افادة عمنا السر قدور هي قهوة احمد خير ...
Post: #8 Title: Re: أنا الصَابِر عليك يا هَمْ .. أنا الوافي و ه� Author: يحي قباني Date: 03-30-2018, 05:22 AM Parent: #7
كل ما سألت عليك صدوني حراسك ردو الجواب قاسي مع اني من ناسك ردو الجواب قالو كم غيرك احتالو غير صدهم لا شي مننا نالو يا قاسي يا قاسي هل يرضي ما قالو أم انت ما سائل و ما حرك احساسك ...
عبدالمنعم حسيب و عوض جبريل ...
Post: #9 Title: Re: أنا الصَابِر عليك يا هَمْ .. أنا الوافي و ه� Author: يحي قباني Date: 03-30-2018, 05:38 AM Parent: #8
سألوا أسامة عوض جبريل:
و ( سيبني في عز الجمر ) مناسبتها شنو؟
فقال : ـ كانت الدنيا عيد وظروفنا صعبة.. الوالد كتب قصيدة لترباس قال ليه «ما تسيبني في عز الجمر وانت من حولي بتمر.. وانت عارف انو جيبي فات حد الصبر» بعدها اتعدلت....
هذه الاغنية الخالدة باتت صالحة لكل زمان و كل مكان في ذلك البلد الأمين ...
Post: #10 Title: Re: أنا الصَابِر عليك يا هَمْ .. أنا الوافي و ه� Author: يحي قباني Date: 03-30-2018, 01:14 PM Parent: #9
ما بنقدر نغير ..... الايام سجية محسوبات علينا المرة وهنية
الايام سجية ... عوض جبريل و عبد الله محمد ...
و أيضا تعجبني بصوت رمضان زايد
Post: #11 Title: Re: أنا الصَابِر عليك يا هَمْ .. أنا الوافي و ه� Author: يحي قباني Date: 03-30-2018, 01:16 PM Parent: #10
الاعتذار واجب ... التسجيل غير مكتمل لاغنية الايام سجية بصوت الراحل رمضان زايد