Post: #2
Title: Re: المغتربين ديل شكلهم كلهم ماشين يسكنوا الخ
Author: Hassan Makkawi
Date: 03-22-2018, 08:27 AM
Parent: #1
Quote:
نا عارف السبب شنو لكن
خشمي عندي
|
طيب وقت فتحت خشمك جيب لى معاك موية...
|
Post: #3
Title: Re: المغتربين ديل شكلهم كلهم ماشين يسكنوا الخ
Author: عبدالحفيظ ابوسن
Date: 03-22-2018, 08:30 AM
Parent: #2
المغتربون (آي صاح كدة لأنها مبتدأ مرفوع بالواو لأنو جمع مذكر سالم ) آي خليهم
حتي ناس الاقاليم دايرين يرحلو الخرطوم
انا برضو عارف وما بقول
|
Post: #4
Title: Re: المغتربين ديل شكلهم كلهم ماشين يسكنوا الخ
Author: عبدالله عثمان
Date: 03-22-2018, 08:58 AM
Parent: #3
الحقيقة أنا برضو "عارف"
في الحتة دي بالذات
ولا الدنيا بأجمعها
غنى سيد خليفة
يا ود اب سن أهلي كلهم رحلوا الخرتوم الا كبيرنا
زحزحزو ياخ
حزنت والله لما عرفت انو هاشم بلول "نزح" لخرتوم خورشيد
يعني تاني غيرك نجي لمنو يا ود اب سن في كوستي
ود نواي مات
وصديق محمد احمد مات
والأطرش في دبي
والزين مات
|
Post: #5
Title: Re: المغتربين ديل شكلهم كلهم ماشين يسكنوا الخ
Author: حمد عبد الغفار عمر
Date: 03-22-2018, 09:19 AM
Parent: #2
ابو علي الموية عايزها كريستال ولا ماسورة
عاكر لونها تسر الناظرين؟
|
Post: #6
Title: Re: المغتربين ديل شكلهم كلهم ماشين يسكنوا الخ
Author: حمد عبد الغفار عمر
Date: 03-22-2018, 09:38 AM
Parent: #5
يا اب سن المغتربون مبتدأ ولا اسم فاعل
لو كانت اسم فاعل فمن الافضل المغتربين لانهم مفعول به مكسور الجناح
ما سمعت بي كان مبتدأ وكان الخبر وفي الفروة كان مسك الختام
هل تصدق في ناس دافعين ايجار شقق هسه مقفولة ما فيها زول وهم قاعدين لسه في السعودية بانتظار قفلة المدارس؟
|
Post: #7
Title: Re: المغتربين ديل شكلهم كلهم ماشين يسكنوا الخ
Author: عبد اللطيف بكري أحمد
Date: 03-22-2018, 09:42 AM
Parent: #6
إلا أنا
عامل نضازتك المكسورة دي
الأبيض جنة العالم الرابع
|
Post: #8
Title: Re: المغتربين ديل شكلهم كلهم ماشين يسكنوا الخ
Author: عثمان الأمام
Date: 03-22-2018, 09:42 AM
Parent: #6
في جزو قالوا ما راجعين السودان زاتو :)
|
Post: #9
Title: Re: المغتربين ديل شكلهم كلهم ماشين يسكنوا الخ
Author: حسن ادم محمد العالم
Date: 03-22-2018, 09:54 AM
Parent: #6
سلااام صاحب البوست
نعم السودان كلو داير يسكن الخرطوم وتعدد الاسباب والموت واحد
الشباب الخرطوم بالنسبه لهم صالة مغادرة للهروب
اهل دارفور ايضا هروب من الموت
المناطق الاخري هروب وبحث عن ملاذ امن متمثل في الوظيفه السفر العلاج بسبب الاقاليم طادرة
اما المغترب يعشعش في مخليته الوهم ان اولي سمات المغترب الناجح بيت في الخرطوم
لذا الكل يريد ان يكون ناجح في نظر نفسه والمجتمع
ده السودان ياصديق
|
Post: #10
Title: Re: المغتربين ديل شكلهم كلهم ماشين يسكنوا الخ
Author: دفع الله ود الأصيل
Date: 03-22-2018, 11:25 AM
Parent: #9
تحيتي لك حمد و لضيوفك الكرام البررة:
لك أن (تمسك خشمك) . فلو كان في الصمت
مندوحة عن جيب تباريح الهوى الغلاب. فإن في
الكلام حيلٌة لطرد رائحة (الخلوف)عن فم الصائم؛
تماماً، مثلما نظل عبثاً نحك جرح دنينا الذي يابى
أن يندمل، أو نرش عليه الملح كي يقاوم العفن.
® قال أستاذ لأحد تلامذته:
انهض يا بني و اعرب ما تحته خط:
(عشق المغترب تراب الوطن)
وقف الطفل المعجزة و قال:-
عشق : فعل ماضٍ صادقٌ ، مبنيٌّ على حسن نيةٍ،
يحـــدوه إيمانٌ واثقٌ راسخٌ بأن لا بدَّ من عودةٍ حتميةٍ،
كما تعودالعرجاء إلى مراحها؛ و ما يرجع الكلب في قيئة؛
و كما يعود مرتاد سجونٍ الكرة إلى أول مسرحٍ
لافترف أولى جرائمه.
- المغترب : فاعل ، قفز قفزة غير محسوبة في ظلام غربات ثلاث ،
بعضها فوق بعض ؛ حتى إذا أخرج يده لم يكد يراها؛ و عاجز أن يخطو قيد أنملة.
© حيث العدمُ خلفَه و اليبابُ أمامه؛ و صمتههو أعنف ردة فعل ممكنه لديه.
- تراب : مفعول ٌبه مغصوبٌ ،و علامة غصبِهِ حَيْرَةٌ مرتسمةٌ على جبينه
المندهش؛ لم يمنع من ظهورها ثقل (قروشٌ) تُهْدَرُ من حيث إن (كروشاً)
تنبتُ من سُحْتٍثٍ ، ثم تظل تكبر و تكبر ، إلى أن تنفقع من الشحم!!
- و اما الوطنُ: فجسد له خوارٌ) و قد مُزِعَلحمُ عاليه مزعاً ،
عن سافِله ليصيرَ مضافاً ثم مضافاً إليه ، مجروراً على بطنه.
حتى صار حال من فيه كالمنبت: لا أرضاً قطعَ و لا ظهراً أراحَ.
|
Post: #11
Title: Re: المغتربين ديل شكلهم كلهم ماشين يسكنوا الخ
Author: حمد عبد الغفار عمر
Date: 03-23-2018, 09:12 AM
Parent: #10
الحقيقة أنا برضو "عارف"
هلا عبد الله عثمان
ياريت كنت عارف شخصك عني صارف
وسليت الناس عشانك وامل فيك توالف
وماكنت متصور في يوم خداع في هواك اصادف
ماكنت عارف ياريت ياريتني كنت عارف
جاري وراء السراب الخ
بدأت أحلام الغربة تتسرب بين شقوق ألم البقاء فيها والحنين الجبان إلى الوطن
|
Post: #12
Title: Re: المغتربين ديل شكلهم كلهم ماشين يسكنوا الخ
Author: حمد عبد الغفار عمر
Date: 03-23-2018, 09:27 AM
Parent: #11
هلا عبد اللطيف
الأبيض جنة العالم الرابع
والله عاقل
رغم اني ما شفتها لكن متأكد انها واحدة من الجنان حسب ما توصف به وطيبة من قابلت من ناس الأبيض
انا هسه انفتح عندي خيار مدني رغم انو ناسنا كلهم في الكرش دي
ولو ما حرقنا كل مراكبنا كان رجعتا حلتنا في الجزيرة
القفلة دي ادبتنا عديل الواحد ما ممكن يمشي يكررها في السودان
|
Post: #13
Title: Re: المغتربين ديل شكلهم كلهم ماشين يسكنوا الخ
Author: جمال ود القوز
Date: 03-23-2018, 11:16 AM
Parent: #12
حمد كيفك ..أنا عارف السبب ..
البيابن الرجوع لعوالم وفيفافي ..
(الجنقل لاند) زي مابسميها النساوين ديل ..
كان جبت سيرة البلد ساي بالونسة ..
يحمرن ليك ويحردن الونسة .. خخخخخ ..
الأغرب بقى انت تكون بندراوي ..
وهن يكونن جايات من الجنقل لاند ..
لكن العودة للجذور بيابنها تب ..
فأخير يسوقوهين البندر ساي ..
ده اصلا كان رضن بيهو ...
دايرات البيتزا مع انها ياها الكابيدا ..
بالدمعة أو بي حاجة تانية ..
لكن الفلقصة كاتلاهم ..
غايتو كان لي أنا بحب البلد جدا ..
ويبسطني جدا صحن كابيدا بي كُداد ..
( مابحبو بالكندي خالص ) .. خخخ
وياحبذا لو كندي بي كُرارة ..
كتنويع في اللحن الأساسي ...
أول يوم جابوا لي بيتزا بالطماطم واللحم ..
قلت ليهو وحاة الله ياها القراصة بالدمعة ..
بطلوا حركاتكم دي قال بيتزا قال ..
ربنا يفتح على المغتربين وعيالهم ..
فتحا من عنده ويزرقهم ..
كما يرزق الطير تغدو خماصا ..
وتعود بطانا ..
والله ما شقالو حنكاً ضيعو ..
ويصلح عيالهم يارب ويغطي عليهم ..
ويقدروا يتاقلموا مع واقعهم الجديد ..
مابنصح زول يودي عياله ..
مكان غير السودان ...
وعسى ان تكرهوا شيئا ..
ويجعل الله فيه خيرا كثيرا ..
|
Post: #14
Title: Re: المغتربين ديل شكلهم كلهم ماشين يسكنوا الخ
Author: حمد عبد الغفار عمر
Date: 03-23-2018, 12:28 PM
Parent: #13
في جزو قالوا ما راجعين السودان زاتو :)
هلا عثمان
انا ذاتي كنت ولا زلت من الجزء دا لكن للشايفو دا حنمشي وكراعنا في رقبتنا
الأمور ماشة في تصعيد ما في صالح البقاء
|
Post: #15
Title: Re: المغتربين ديل شكلهم كلهم ماشين يسكنوا الخ
Author: حمد عبد الغفار عمر
Date: 03-23-2018, 12:55 PM
Parent: #14
نعم السودان كلو داير يسكن الخرطوم وتعدد الاسباب والموت واحد الشباب الخرطوم بالنسبه لهم صالة مغادرة للهروب اهل دارفور ايضا هروب من الموت المناطق الاخري هروب وبحث عن ملاذ امن متمثل في الوظيفه السفر العلاج بسبب الاقاليم طادرة اما المغترب يعشعش في مخليته الوهم ان اولي سمات المغترب الناجح بيت في الخرطوم لذا الكل يريد ان يكون ناجح في نظر نفسه والمجتمع ده السودان ياصديق
هلا حسن العالم
دا ما السودان دا وهم ركب الناس أو خيل لهم ، الخرطوم فيها شنو
انا بنصح نفسي وأي مغترب:
1- ما عندو بيت في الخرطوم
2- ما عندو التزام جامعات أو ما حيكون عندو الإلتزام دا لمدة على الأقل خمسة سنوات
3- أهلو ما في الخرطوم
4- ما عندو مصدر دخل في الخرطوم
يبعد من الخرطوم لأنو التهافت على الخرطوم دا حيرفع الإيجار لأرقام فلكية سيعجز عندها الناس من الوفاء بالتزاماتهم والكل سيجد نفسه بعد سنة أو سنتين في مفترق طرق خطير بالإضافة لارتفاع التكاليف في الخرطوم من مواصلا وحركة وخلافه
أنا بعتقد إنو المدن الوسيطة مثلا مدني عطبرة القضارف الفاشر كسلا الخ هي ملاذ آمن توجد فيها كل ضروريات (حتى مدارس الجن العالمية دي فيها) وممكن تكون فيها لو الناس استوطنت فيها
خلاف ذلك المدن دي حتنتعش بالمداخيل الجديدة الداخلة فيها وتلقائيا حتتوفر فيها كل ما يحتاجه الناس وذلك بتعدد الأنشطة الحتكون فيها من زراعة وتجارة وتصنيع صغير الحجم ودا بؤدي لانتعاش عام ورخاء
تخيل مثلا عطبرة يدخلها 300 مغترب بس (من أولادها) ، لو كل مغترب وصل بمتوسط 50 ألف ريال بس، دي 15 مليون ريال (150 مليار جنيه) دخلت عطبرة هوب كدا تخيل مستوى الانتعاش الممكن يحصل في الحياة فيها وعلى ذلك قس باقي المدن
انا بفتكر الناس تتوزع لتأمين نفسها الخرطوم ملحوقة
|
Post: #16
Title: Re: المغتربين ديل شكلهم كلهم ماشين يسكنوا الخ
Author: Khalid Basheer
Date: 03-23-2018, 01:06 PM
Parent: #15
| Quote: المغتربين ديل شكلهم كلهم ماشين يسكنوا الخرطوم |
جنس الكلام دة بزعل توفيق ...يعني حسة يلقاها من الجوة ولا البرة
|
Post: #17
Title: Re: المغتربين ديل شكلهم كلهم ماشين يسكنوا الخ
Author: حمد عبد الغفار عمر
Date: 03-23-2018, 08:38 PM
Parent: #16
حبابك ود الأصيل
و اما الوطنُ: فجسد له خوارٌ) و قد مُزِعَ لحمُ عاليه مزعاً ، عن سافِله ليصيرَ مضافاً ثم مضافاً إليه ، مجروراً على بطنه. حتى صار حال من فيه كالمنبت: لا أرضاً قطعَ و لا ظهراً أراحَ.
دا ياهو المجنن بوبي المغتربين وغالبهم ليس لديه التصور الكامل حول ما آل إليه حال الوطن ، فقط تتحكم الذاكرة القديمة وأدغاث أحلامها في أمانيهم ورغباتهم بحياة سهلة آمنة
ربك يسهل علينا فبيده الملك يؤتيه لمن يشاء
|
Post: #18
Title: Re: المغتربين ديل شكلهم كلهم ماشين يسكنوا الخ
Author: حمد عبد الغفار عمر
Date: 03-23-2018, 08:56 PM
Parent: #17
هلا ود القوز
ربنا يفتح على المغتربين وعيالهم .. فتحا من عنده ويزرقهم .. كما يرزق الطير تغدو خماصا .. وتعود بطانا .. والله ما شقالو حنكاً ضيعو .. ويصلح عيالهم يارب ويغطي عليهم .. ويقدروا يتاقلموا مع واقعهم الجديد .. مابنصح زول يودي عياله .. مكان غير السودان ... وعسى ان تكرهوا شيئا ..
يديك العافية على هذه الدعوة الصادقة وربنا يرزقك ويمتعك بالصحة
النقلة حارة بيني وبينك وتاني في مشكلة اسمها المدارس العالمية الناس دي نصهم مورطين في المسألة دي تصدق
انا الوضع عندي معكوس المره متحزمة للمشي بإصرار وأنا الرافض مزعلها الاستفزاز البنتعرض ليهو دا ، بس انا خائف يبقى ليها بمبي هناك في أرض الميعاد دي (الحماقة ما كويسة ) 
الوالد عليه الرحمة بعد ما رحلنا من الجزيرة وكان معترض جدا جوهو أصحابو أهلنا في البيت قالوا ليهو أها الوضع الجديد كيف قال ليهم سمكة طلعوها من الموية بس
أما البيتزا أنا ما حصل أكلتها أصبحت شديد
|
Post: #19
Title: Re: المغتربين ديل شكلهم كلهم ماشين يسكنوا الخ
Author: حمد عبد الغفار عمر
Date: 03-23-2018, 09:08 PM
Parent: #18
هلا خالد بشير
جنس الكلام دة بزعل توفيق ...يعني حسة يلقاها من الجوة ولا البرة
يا زول المغتربين ديل لو كلهم كبسوا العاصمة زي عمك دا بروح وسط الكرعين
لا تستهينوا بالمغتربين فهم خبرات جبارة وليس تقليلا لأهل الداخل لكن أي مغترب مؤهل لو مشى قعد في أي مصلحة حيخلي الناس تتلفت من وزيرهم لأصغر موظف الناس ديل معظمهم مارسوا العمل على أنظمة متقدمة جدا في الإدارة والطب والهندسة وتقنية المعلومات والمحاسبة بس يطلعوا من التدقيسة الأولى دي هههه
|
Post: #20
Title: Re: المغتربين ديل شكلهم كلهم ماشين يسكنوا الخ
Author: Nasr
Date: 03-24-2018, 05:36 PM
Parent: #19
موضوعك حيوي يا راعي البوست
"لا تستهينوا بالمغتربين فهم خبرات جبارة
وليس تقليلا لأهل الداخل لكن أي مغترب مؤهل
لو مشى قعد في أي مصلحة حيخلي الناس تتلفت
من وزيرهم لأصغر موظف الناس ديل معظمهم
مارسوا العمل على أنظمة متقدمة جدا في الإدارة
والطب والهندسة وتقنية المعلومات
والمحاسبة بس يطلعوا من التدقيسة الأولى دي هههه"
وكلامك دا صاح جدا
تتخيل إنه وزارة الخارجية يا دوب دخلت الإيميل؟؟؟؟؟؟
بس كتر المعرفة دا يا هو ذاتو البخلي المغتربين يحتلوا في الخرطوم
ما دايرين خبراتهم دي تضيع هزر مزر في مدن صغيرة
ناس كتار فيها لسه ما شافوا كومبيوتر
علي المغتربين أن يعلموا أن الحكومة ما حتشغلهم
لا هم ولا أولادهم
المغترب كان بقرة حلوب
وهسع وقت الضرع جف
كان لقوا طريقة بيضبحوكم ويبيعوا لحمكم بالكيلو
بتكونوا سمعتوا ما قاله الرئيس عن المغتربين يبلوا قروشهم ويشربوا مويتها
ناس كتار حيفضلوا الخرطوم لضرورات إقتصادية وتعليمية و"ترفيهية"
وفي ناس كتار الضرورات دب "وهمية "
المهم
أرجو أن ترحب بيهم البلد حكومة وشعبا
عندهم خبرات وشوية ريالات
وحب وطن
وناس السعودية ديل بالذات أكثر مغتربين هميمين وخدومين ومتعاونين
وهم الكانو ممشين إقتصاد السودان طوال الاربعين سنة الماضية
|
Post: #21
Title: Re: المغتربين ديل شكلهم كلهم ماشين يسكنوا الخ
Author: نادر الفضلى
Date: 03-24-2018, 06:06 PM
Parent: #20
زحمة الكونر المرفوع بدون تكتيكات تنهى الزحمة سواء بئغحراز هدف أو إنهاء خطورة الهجمة .. بل تكرار الكورنرات وزحمتها
لا بتريح لا بتزيل هم .. ويظل الوضع على ما عليه زحمة مدافرة فى الفارغة
وبلغة اخرى إستمرارية المعاناة وغلاء المعيشة وإنعدام التنمية وفقر الخدمات الصحية والأمنية .. والعيش فى كوشة كبىرى تسمى الخرتوم
الريف واالبندر ينميه أهله بمختلف مكوناتهم ومهنهم وأجيالهم وخبراتهم وإمكانياتهم ومنها المادية والفكرية .. بغير ذلك ستستمر الدوامة
فإما المشاركة فى زحمة الكورنر العشوائى الوهمى أو الإغتراب أو الهجرة وفوق هذا البكاء والعويل وإلقاء اللوم على أكلشيهات
المركز والنخبة والحكومات والتريخ والحاضر .. ربما بعضها صحيح ولكنها قولة حق اريد بها باطل التنصل من المسؤلية الشخصية
ودور كل فرد فى المشاركة فى تنمية مجتمعه الصغير بموطنه الصغير بموقع مسقط رأسه ونشأته وأهله ومواطنيه .. باطل الهروب
من الأصل والمسؤولية والركون لما يتوهمه وضعاً جاهزا مريحاً .. إنها أزمة السودان الحقيقية المتمثلة علا الأخص فى متعلميه وتعليماً
عالياً .. أولاد الحكومة تعليما مجانياً فظنوا أنهم أمراء عنما حصلوا على درجاتهم الأكاديمية .. تنكروا لمسؤوليات تنميه مناطقهم والتى
كان التعليم المجانى لهم من أجلها . بينما ظنوا أن تنمية مناطقهم أيضا هبة مجانية مثلما كان تعليهم .. وأن دورهم التنعم بالدنيا الجديدة
خرتومها وإعترابها الخليجى والأوربى والأمريكى .. والمتاجرة بشعارات حقوق و وتنمية مناطقهم، ربما دوافعها وخز بقايا ضمير
أو لمزيد من التكسب والمنافع الشخصية! وسيظل الكورنر مرفوعاً مالم يدلوا بما أنفسهم!
|
Post: #22
Title: Re: المغتربين ديل شكلهم كلهم ماشين يسكنوا الخ
Author: حمد عبد الغفار عمر
Date: 03-25-2018, 06:52 PM
Parent: #20
مرحب نصر
كتر المعرفة لو اتوظف صاح في اي منطقة بدي مردود
شوف تجربة الراجحي في الشمالية نفس الفكرة مع فرق الامكانات المالية طبعا
ممكن تكون صغيرة الحجم تدار بعقلية متمكنة بتدي مردود ومع تعدد الافكار ستنهض بالمناطق في الخرطوم التنافس حاد والمنغصات كتيرة والزمن ممحوق في التنقل وزحام الحركة.
|
Post: #23
Title: Re: المغتربين ديل شكلهم كلهم ماشين يسكنوا الخ
Author: مهيرة
Date: 03-25-2018, 07:10 PM
Parent: #22
سلام حمد اخوى وضيوفه الكرام
قبل فترة كان فى بوست طرحت فيه أن يتشارك مجموعات من المغتربين فى عمل تجمعات سكنية منتجة خارج العاصمة
ويقومون بتخطيطها وبناء مساكنها ومشاريعها المنتجة ومدارسها الأساسية ومراكزها الصحية وادارتها
أعتقد دة هو الحل المناسب للعائدين بدل الضياع وسط زحام الخرطوم وغلاء ايجاراتها وأسعار أراضيها رغم وسخها وزحمتها وتلوث جوها
والله المغتربين لو كونوا شراكات لقيام هه التجمعات السكنية المنتجة ناس الخرطوم زاتهم حيجوا يشتروا ولا يأجروا عندهم
الخرطوم فى الوقت الحالى كوشة كبيرة كما كر أحد الأخصائيين فى برنامج تلفزيونى
تحياتى
|
Post: #24
Title: Re: المغتربين ديل شكلهم كلهم ماشين يسكنوا الخ
Author: حمد عبد الغفار عمر
Date: 03-25-2018, 07:11 PM
Parent: #22
مرحب نادر
على قولك الكورنر مرفوع وما اكتر الممكن يدخلوها في مرماهم
نهضة الريف بتأدي لنهضة عامة سوف تتعبد الشوارع وتدخل الخدمات لمواكبة النهضة دي
وسينعكس ذلك رخاءا عاما ، معقول السودان فيهو اربعة ملايين جائع زي ما ذكر التقرير
حاجة تفقع البطن كلها ما المرارة بس .
|
Post: #25
Title: Re: المغتربين ديل شكلهم كلهم ماشين يسكنوا الخ
Author: Munir
Date: 03-25-2018, 09:07 PM
Parent: #24
سلامات للجميع ..
غايتو ياحمد بالنسبة للسبب انا طوالى وببراءتى المعهودة قلت السبب سياسى وقلت ده بوست سياسة والشغلة حتنقلب كلام عن الخدمات ومحل الرئيس بنوم والطيارة بتقوم ووو الخ .. الى أن جاء جمال القوز وجاب التائهة وذكر السبب الحكومة ياعملات النعام آدم .. والمعنية هى حكومة الظل التى لا تريد ان تسكن إلاّ فى الخرطوم حتى وإن كانت اصلاً من الريف 😊😉..
اها هل ده السبب الخلاك تقول خشمى عندى؟😉
|
Post: #26
Title: Re: المغتربين ديل شكلهم كلهم ماشين يسكنوا الخ
Author: كمال عباس
Date: 03-25-2018, 10:30 PM
Parent: #25
الخرطوم !!
من حق اَي مواطن ان يسكن اَي بقعة في وطنه !!حق التنقل والإقامة حق أساسي للمواطن !!
والخرطوم ليست ملك لقبيلة او عرق او حتي ملك من استوطنوا فيها قبل مائة عام فالكل هاجر ونزح وأقام بها - ابتدا من التعايشي وجنوده بامدرمان !!
الخرطوم قبل الفتح التركي كانت غابة ونطاق شبه مهجور / عدا الجموعية في أطراف أمدرمان والبطاحيين في شرق النيل والعبدلاب في الحلفايا وشمال بحري والمحس في تؤتي اما الخرطوم المدينة فسكنها شتات ولحم
راس معظمها من الأجانب والاغاريق والاتراك والمصريين الخ وقليل من. السودانيين !
* بعد اندحار المهدية وبناء السكك الحديدية انكسر الحاجز والجدار لهجرة المجموعات السكانية المناهضة للمهدية واستقروا بالعاصمة
* الناس هاجرت ونزحت للخرطوم من وضع معيشي وفرص أفضل ومن العلاج والتعليم ! فالحكومات اهملت تنمية الريف وافتقد الخدمات الاساسية / وضاقت الرقعة الزراعية وسبل الحياة لذا هاجر الناس للعاصمة
ليس للتسول والهبات وانما من اجل حياة ووضع حياتي حققوه ويحقوقه بعرق جبينهم !!
**
حكاية الناس ضايقونا في الخرطوم وباخي ما يرجعوا بلدهم وقراهم. وانو نحن مابقينا نستمتع بالخرطوم الافي الأعياد - دي نظرة سقيمة ومتعالية فبمثل يهاجر مواطن او يستقر مغترب بها فقد هاجر والدك او جده للخرطوم
بجرابه ا وشنطة حديده للعاصمة من اجل وضع أفضل !!
* حكاية البرة برة والجوة جوة دي انانية وتعالي أجوف لايضاهيه سوي من استبدل العصبية القبلية بعصبية جهوية عاصموية - متعالية ومحتقرة للاخر !!
**هذا وان كانت الخرطوم أصبحت نفسها طاردة وأصبحت مجردة محطة للهجرة للخارج !
** ا
|
Post: #27
Title: Re: المغتربين ديل شكلهم كلهم ماشين يسكنوا الخ
Author: حمد عبد الغفار عمر
Date: 03-26-2018, 07:13 PM
Parent: #26
مرحب د. مهيرة
والله المغتربين لو كونوا شراكات لقيام هذه التجمعات السكنية المنتجة ناس الخرطوم زاتهم حيجوا يشتروا ولا يأجروا عندهم
ودي واحدة من مرتكزات البوست دا إنو تطوير المدن الولائية أو حتى المناطق الواقعة في حافة الخرطوم حيعمل رحلة عكسية للمدن دي
وبشكل توازن عام في مستوى الحياة
|
Post: #28
Title: Re: المغتربين ديل شكلهم كلهم ماشين يسكنوا الخ
Author: حمد عبد الغفار عمر
Date: 03-26-2018, 07:25 PM
Parent: #27
هلا منير
غايتو ياحمد بالنسبة للسبب انا طوالى وببراءتى المعهودة قلت السبب سياسى وقلت ده بوست سياسة والشغلة حتنقلب كلام عن الخدمات ومحل الرئيس بنوم والطيارة بتقوم ووو الخ .. الى أن جاء جمال القوز وجاب التائهة وذكر السبب الحكومة ياعملات النعام آدم .. والمعنية هى حكومة الظل التى لا تريد ان تسكن إلاّ فى الخرطوم حتى وإن كانت اصلاً من الريف 😊😉.. اها هل ده السبب الخلاك تقول خشمى عندى؟
الحكومة دي عفيناها تب وصلت مرحلة معارضتها ذاتها بقت حرام تلقاها مننا ولا من النمل
خشمي مسكتو من حاجات كتيرة لكن واحدة من الحاجات دي إنو المغتربين (حسب السعودية) مورطين في حاجة اسمها مدارس أجنبية ودي (لو في فيها جودة تعليم ) بتكون مركزة في الخرطوم ولو في في المدن التانية قد ما تستوعب العدد
فدي واحدة من المزعجات المقابلة المغتربين في رحلة العودة.
|
Post: #29
Title: Re: المغتربين ديل شكلهم كلهم ماشين يسكنوا الخ
Author: حمد عبد الغفار عمر
Date: 03-26-2018, 07:51 PM
Parent: #28
هلا كمال عباس
* حكاية البرة برة والجوة جوة دي انانية وتعالي أجوف لايضاهيه سوي من استبدل العصبية القبلية بعصبية جهوية عاصموية - متعالية ومحتقرة للاخر !! **هذا وان كانت الخرطوم أصبحت نفسها طاردة وأصبحت مجردة محطة للهجرة للخارج !
في البوست دا مافي زول قال الكلام دا ومافي زول بفرض على زول يعيش وين متى ما كان قادرا ولكن مجرد تخوف أن ينجرف الناس بسوء تقدير للتكوم في الخرطوم بعد غيبة طويلة وبعد شوية يلقوا نفسهم مواجهين بتكاليف خارج توقعاتهم (بل سوف تتعاظم مما هي عليه الآن بسبب الجشع والاستغلال لظروفهم) واغلبهم ماشين يتلمسوا طريقهم في الاستقرار
دي دعوة للتحفظ وأخذ الحذر حتى مرحلة الوقوف على الرجلين.
انا ما من الخرطوم يا كمال جابنا اللوري برضو
واقول ليك حاجة في الجزيرة زمان كان عندنا بيت 1000 متر أو اكتر مبني بشكل جيد + حواشات + تراكتر + دكان + مزرعة خضروات + بقر + غنم + جداد وحمام+ حمار + كلب + كديسة وفيران كل شيء طازح - حليب - خضروات - لحمة
الآن بيت بس يخلو تماما من أي تنوع بييئي
هسع في حسرة أكتر من كدا
|
Post: #30
Title: Re: المغتربين ديل شكلهم كلهم ماشين يسكنوا الخ
Author: كمال عباس
Date: 03-26-2018, 09:09 PM
Parent: #29
كلامك في محلو ياحمد !!اكلامي دا مقصود بيهو مثل العقلية اللي بحملها الزول بتاع ا " الضهاري " داك ؛!!
|
Post: #31
Title: Re: المغتربين ديل شكلهم كلهم ماشين يسكنوا الخ
Author: حمد عبد الغفار عمر
Date: 03-26-2018, 09:29 PM
Parent: #30
بتاع الضهاري انا خايفو يجي يقرأ كلامي دا يقول لي بنرجع ليكم خسارتكم
يلا ارجعو هههههه
|
|