لا لا لا يا قرويه ألقرويه :- يا ربي متين أشوف ألخرطوم قالو لي في الخرطوم جنينة البلديه وحدثوني وقالولى الفسحه بالعصريه وقالو لي كان شفتي البت تسوق عربيه أحييييييييييييييا وتصرف الماهيه ** ** ** ** ** ** ** ألمدنيه:- لا لا الليله يا قرويه وانتي يا قرويه ما تغرك المدنيه وانتي ماك منسيه والله انتي غنيه بزراعتك المطريه وبهايمك المسعيه ** ** ** ** ** ** ** ألقرويه:- ياربي متين أشوف الخرطوم قالو لي في الخرطوم البت بيمشوا حديثها ودخلوها الجامعه ووظفوها رئيسه وقالو لي كان دارت تقوم تنقي عريسها الدبله الدبله تمشي تقيسها ** ** ** ** ** ** ** ألمدنيه:- لا لا الليله يا قرويه منو بلاك يتحمل يمسك الطوريه منو بلاك يعمل يبني ميزانيه منو بلاك يمووووول وزارة الماليه ** ** ** ** ** ** ** ألقرويه :- ياربي متين أشوف الخرطوم قالو لي في الخرطوم البدره والمنكير ويا حلاة البت يوم تمشي للكوفير أحييييييييييييا متين اشوف ألكوفير ** ** ** ** ** ** ** ألمدنيه:- لا لا الليله يا قرويه انتي يا قرويه بالكرم معروفه وفي هبابيب الليل تقوم تعشي ضيوفها وانتي يا قرويه بالقيم موصوفه
Post: #2 Title: Re: ياربي متين اشوف الخرطوم لا لا لا يا قرويه Author: Emad Ahmed Date: 03-03-2018, 06:47 AM Parent: #1
قدم نشيد القروية في النصف الثاني من السبعينات وتلك هي الفترة الذهبية للبرنامج الهادف والمفيد (جنة الأطفال) حينها والذي كان يحظى بمتابعة الكل صغار وكبار وذلك بما كان يحمله من فقرات متنوعة لاتزال حاضرة في أذهاننا مثل الفقرة الدينية التي كان يقدمها الاستاذ والمربي الجليل عوض حاج حامد ونلعب ونتعلم وهي فقرة تتمثل في تقديم الأشياء الجميلة الممتعة والفقرة العلمية والفقرة المصورة التي كانت تقدمها نضال عبد الكافي قبل ايناس محمد أحمد المذيعة الحالية بالتلفزيون القومي والرحلة المصورة وفقرة الفنون التي كانت تقدمها ماما عشا و ومن أشهرها القروية والتلفزيون ودنيتنا الجميلة وبدري صحيت من نومي ولا ياعزوز والتي كان يكتبها عبد العزيز عبد اللطيف من بحري (الحاج يوسف) والفقرة في الأساس واقعية وهي من وحي طفولته الشقية وكان يقوم بتجسيد شخصية عزوز دكتور عبد الباسط عبد اللطيف ومعه عمر عبد الرحمن وشقيقته امال وفقرة اصحاب اصحاب والتي كان يقدمها الدرامي المعتق محمد السني دفع الله ومعه محمد ... والمهندس / عاطف جمال الدين شقيق المسرحي دكتور عثمان جمال الدين عمي جوائز وفقرة الحاوي وتعلوب المكار وكان يقوم بأدائها يحي شريف ومعه طارق الاسيد في دور ثعلوب الصغير وفقرة الاناشيد الخاصة برياض الأطفال مع بابا فزاري وفيلم الكرتون وفقرة جحا التي كانت يقدمها المرحوم سليمان حسين مع صديقنا (بريقع) سيف الدولة ختم وكان يختتم بها البرنامج.
تحاياي أستاذ عمر دفع الله
Post: #3 Title: Re: ياربي متين اشوف الخرطوم لا لا لا يا قرويه Author: عمر دفع الله Date: 03-03-2018, 11:05 AM Parent: #2
يا سلام يا استاذ عماد على المعلومات القيّمة .
في النصف التانى من الثمانينيات وربما قبل انقلاب الاخوان بفترة قصيرة وهى الفترة التى لاحظنا فيها عملية الهجرة من الريف للمدينة وخاصة للعاصمة القومية . في تلك الفترة كتب ناقد حصيف لم اعد اذكر اسمه مقالا رائعا في الصحافة اليومية ، يتناول فيه تلكم القصيدة ( الليلة يا قروية ) وللاسف لم يعد في رأسى بقية من ذاك المقال سوى فتات من العلاقة بين المدينة والريف في ظل الاقتصاد السودانى المتعثر بفعل السياسات المايوية ولكن مع ذلك ظل اقتصاد الريف يدفع بالدم في شرايين الاقتصاد السودانى الى ان وقعت الواقعة بإستيلاء رأسمال الطفيلي على عصب الاقتصاد السودانى وانهيار اقتصاد الريف وتوالت الهجرات من اللارياف الى العاصمة من كل حدب وصوب . بالتأكيد هناك من هو افضل مني في الكتابة عن محتوى القصيدة ودلالاتها وعن علاقة الريف بالمدينة في ظل الوضع الراهن ........ تحياتى
Post: #4 Title: Re: ياربي متين اشوف الخرطوم لا لا لا يا قرويه Author: Ashraf El Bagir Date: 03-04-2018, 08:11 AM Parent: #3
لا حوله !!!! ده نكتو من وين يا عمر؟
ديناصورات
Post: #5 Title: Re: ياربي متين اشوف الخرطوم لا لا لا يا قرويه Author: Emad Ahmed Date: 03-04-2018, 10:39 AM Parent: #4
اوبريت القروية من كلمات والحان المرحوم عمر الضو
من أبناء جزيرة توتي
والأداء لفرقة زهرات توتي
Post: #6 Title: Re: ياربي متين اشوف الخرطوم لا لا لا يا قرويه Author: Asim Fageary Date: 03-04-2018, 10:45 AM Parent: #5